राष्ट्रपति द्रौपदी मुर्मू ह आज राष्ट्रपति भवन म वैज्ञानिक मन ल बछर दू हजार चौबीस के राष्ट्रीय विज्ञान पुरस्कार ले सम्मानित करीन। एमा छत्तीसगढ़ के, बिलासपुर के केंद्रीय खनन अनुसंधान केंद्र के वैज्ञानिक डॉक्टर हर्ष वर्मा ल खनन प्रौद्योगिकीय के क्षेत्र म उंखर असाधारण योगदान बर भू-विज्ञान पुरस्कार दू हजार तेइस ले सम्मानित करे गीस। डॉक्टर वर्मा ह केंद्रीय खनन अउ ईंधन अनुसंधान संस्थान बिलासपुर म वरिष्ठ प्रधान वैज्ञानिक के रूप म काम करत कतकोन बड़े परियोजना म अपन योगदान दीन हे। एखर अलावा ओमन ह भूमिगत कोयला खदान बर एक ठन नवा स्थाई तकनीक घलो विकसित करीन हे।
एखर अलावा राष्ट्रपति ह प्रोफेसर गोविंद राजन पद्मनाभन ल बछर दू हजार चौबीस के विज्ञान रत्न पुरस्कार, कृषि विज्ञान के क्षेत्र म डॉक्टर आनंद राम कृष्णन परमाणु ऊर्जा के क्षेत्र म डॉक्टर अवेश कुमार त्यागी अउ जीव विज्ञान के क्षेत्र म प्रोफेसर जयंत भालचंद्र उडगांवकर ल विज्ञान श्री पुरस्कार ले सम्मानित करीन।
राष्ट्रपति-बच्चे मुलाकात
सरगुजा, जशपुर, सूरजपुर अउ बलरामपुर जिला के पांच झन छात्रा मन ह रक्षाबंधन के मउका म राजधानी दिल्ली म राष्ट्रपति द्रौपदी मुर्मू ले भेंट करीन। ए मउका म केंद्रीय शिक्षा मंत्री धर्मेंद्र प्रधान ह लइका मन के उत्साह बढ़ाइन। पढ़ई के संगेसंग खेलकूद, संगीत अउ दूसर गतिविधि म सुघ्घर प्रदर्सन के आधार म ए नोनी मन ल चुने गे रिहीस, जेमा सरगुजा के छात्रा ज्योति, जशपुर ले रिया अउ रजनी चौहान, सूरजपुर ले नंदनी किंडो अउ बलरामपुर ले प्रशंसा सामिल रिहीस। आज दिल्ली ले रईपुर लहुटे ए नोनी मन ह राष्ट्रपति संग अपन मुलाकात के बारे म बतइन।
अमित शाह-छत्तीसगढ़
केंद्रीय गृह अउ सहकारिता मंत्री अमित शाह काली तेइस ले पचीस अगस्त तक छत्तीसगढ़ के दउरा म रइही। श्री शाह काली रतिहा दस बजे रईपुर पहुंचही। अपन प्रवास के दौरान केंद्रीय गृहमंत्री चौबीस अगस्त के चंपारण के वल्लभाचार्य आश्रम के दउरा करही। एखर बाद ओमन ह रईपुर म छत्तीसगढ़ अउ पड़ोसी राज्य के मुख्य सचिव अउ पुलिस महानिदेसक के संग अंतर्राज्यीय समन्वय बइठका म सामिल होही। इही दिन श्री शाह छत्तीसगढ़ के वामपंथी उग्रवाद प्रभावित क्षेत्र म सुरक्षा अउ विकास के बारे म घलो बइठका लिही।
अपन प्रवास के आगू दिन पचीस अगस्त के केंद्रीय गृहमंत्री रईपुर के एन.सी.बी. ऑफिस के उद्घाटन करही अउ समीक्षा बइठका म भागी लिही। एखर बाद ओमन ह छत्तीसगढ़ म सहकारिता के बिस्तार ले जुड़े एक दूसर बइठका म घलो सामिल होही।
इही बीच, मुख्यमंत्री विष्णुदेव साय ह अपन निवास कार्यालय म केंद्रीय गृहमंत्री के आगू काली रखे जाने वाला सब्बो बिसय के बारे म उच्च अधिकारी मन संग चर्चा करीन।
राष्ट्रीय अंतरिक्ष दिवस
पहिली राष्ट्रीय अंतरिक्ष दिवस देसभर म काली तेइस अगस्त के मनाय जाही। ए बछर के उत्सव के बिसय हे – ‘‘चंद्रमा को छूते हुए जीवन को छूना : भारत की अंतरिक्ष गाथा। राष्ट्रपति द्रौपदी मुर्मू ह नई दिल्ली के भारत मंडपम म राखेगे मुख्य समारोह के उद्घाटन करही।
उहें, राज्य शैक्षिक अनुसंधान अउ प्रसिक्षण परिषद डहार ले चंद्रयान-तीन मिसन के सफलता के मउका म युवा मन म विज्ञान अउ अंतरिक्ष बर रूचि जगाय के उद्देस्य ले प्रदेस के सबो स्कूल मन म आज कतकोन कारीकरम कराय गीस। उहें, काली तेइस अगस्त के घलो बहुतअकन कारीकरम होही। ए मउका म व्याख्यान, पोस्टर, निबंध, मॉडल बिल्डिंग, क्विज अउ पेंटिंग प्रतियोगिता कराय जाही। संगेसंग अंतरिक्ष विज्ञान ले जुड़े तीस मिनट के एक ठन वीडियो स्कूल मन म दिखाय जाही।
महापौर-जाति प्रमाण पत्र निरस्त
कोरबा के महापौर राजकिशोर प्रसाद के जाति प्रमाण पत्र ल उच्च स्तरीय प्रमाणीकरण छानबीन समिंत ह निरस्त कर देहे। छै दिसंबर दू हजार उन्नीस के अनुविभागीय अधिकारी कोरबा ह राजकिशोर प्रसाद ल अन्य पिछड़ा वर्ग के स्थायी प्रमाण पत्र जारी करे रिहीन। प्रकरण म समिति ह कतकोन बिंदु के जांच के बाद उंखर जाति प्रमाण पत्र ल निरस्त कर दीस।
खबर के मुताबिक दू हजार उन्नीस म होय नगरीय निकाय चुनाव के बाद भाजपा पार्षद मनके संख्या, कांग्रेस पार्षद मनके मुकाबला जादा रिहीस। एखर बावजूद महापौर पद बर चुनाव के समय भीतरघात, गुटबाजी अउ क्रास वोटिंग के सेति कांग्रेस के पार्षद राजकिशोर प्रसाद महापौर चुने गे रिहीस। चुनाव म मिले हार के बाद प्रत्यासी ऋतु चौरसिया ह जिला न्यायाधीश के आगू वाद दायर करत महापौर राजकिशोर के जाति प्रमाण पत्र ल चुनौती दे रिहीन, जेखर बाद कोर्ट ह हाई पॉवर कमेटी ल जांच बर निरदेस दे रिहीन।
माओवादी-आत्मसमर्पण
धमतरी जिला म आज पांच लाख रूपिया के इनामी माओवादी ह आत्मसमर्पण करे हे। ए माओवादी ह एसीएम सीता नदी एरिया कमेटी के डिप्टी कमांडर के रूप म सक्रिय रिहीस। एखर उपर छै ठन अपराध दर्ज हे, जेमा सुरक्षाबल उपर हमला अउ हत्या जइसन अपराध सामिल हे।
पुलिस अधीक्षक आंजनेय वार्ष्णेय ह बतइन कि ए माओवादी ह राज्य सरकार के पुर्नवास के नीति ले प्रभावित होके आत्मसमर्पण करे हे। ओमन बतइन कि माओवादी ह खुद ले बनाय सुरका राइफल के संग सरेंडर करे हे। ए माओवादी ल सरकार के नीति के तहत पचीस हजार रूपिया नगद प्रोत्साहन रासि दे गे हवय।
अधिकारी-कर्मचारी-पदस्थापना
राज्य शासन के नगरी प्रशासन अउ विकास विभाग ह एक सौ छैसठ अधिकारी अउ करमचारी मनके नवा पदस्थापना के आदेस जारी करे हे। विभाग डहार ले मंत्रालय बर ए संबंध म चार ठन अलग-अलग आदेस जारी करे गेहे। ट्रांसफर होय अधिकारी मन म मुख्य नगर पालिका अधिकारी, मुख्य अभियंता, अधीक्षण अभियंता, कार्यपालन अउ सहायक अभियंता, मुख्य अउ स्वच्छता निरीक्षक, राजस्व विभाग के सहायक अउ उप निरीक्षक, लेखापाल, सहायक ग्रेड-दो, कैसियर, सफाई दरोगा, वाहन चालक, पंप अटेंडेंट अउ सफाई कर्मचारी सामिल हे।
आकाशवाणी रायपुर-शाम सिंदूरी
आकाशवाणी केंद्र रईपुर डहार ले काली चौबे कालोनी के महाराष्ट्र मंडल म आजादी के उत्सव शाम सिंदूरी आयोजित करे गीस। कारीकरम म पंडित प्रभाकर कश्यप अउ पंडित दिवाकर कश्यप ह खयाल गायन के प्रस्तुती दीन। उहें, डॉक्टर नमन दत्त डहार ले सुगम संगीत पेस करे गीस।
ए कारीकरम के संपादित अंश आप मन ह सत्ताईस अगस्त के रतिहा दस बजे ले आकाशवाणी के प्राइमरी अउ एफएम चैनल म सुन सकहू।
बैगानी भाषा सम्मेलन
रईपुर के पंडित रविशंकर शुक्ल विश्वविद्यालय म काली ले दू दिन के बैगानी भाषा सम्मेलन कराय जाही। तेइस अउ चौबीस अगस्त के होवइया ए सम्मेलन के आयोजन नई दिल्ली के साहित्य अकादमी अउ पंडित रविश्ांकर शुक्ल विश्वविद्यालय मिलजुर के करही। सम्मेलन म बैगानी भाषा, संस्कृत, साहित्य, कला, लोक साहित्य, जीवन शैली अउ कविता पाठ के बारे म चर्चा होही। एमा मध्यप्रदेस के डिंडौरी, छत्तीसगढ़ के कबीरधाम ले बैगा जनजाति समुदाय के लोगन सामिल होही।
किसान-खाद बीज
प्रदेस म किसान मन ल अभी तक राज्य सहकारी बैक डहार ले करीबन छै हजार दू सौ इक्यासी करोड़ रूपिया ल अल्पकालीन कृषि ऋण बांटे गेहे। ए बछर राज्य सरकार डहार ले किसान मन ल सात हजार तीन सौ करोड़ रूपिया कर्जा बांटे के लक्ष्य राखे गेहे।
उहें, प्रदेस के किसान मन ल चालू खरीफ सीजन म आने-आने फसल मनके बोआई बर सरकारी समिति अउ निजी क्षेत्र के माध्यम ले प्रमाणित बीज देवाय जावत हे। अभी तक किसान मन ल आने-आने खरीफ फसल मन के आठ लाख तिरासी हजार कुंटल प्रमाणित बीज बांटे गेहे।
अइसने, प्रदेस म चालू खरीफ सीजन बर किसान मन ल कतकोन प्रकार के रासायनिक उर्वरक के वितरण जारी हे। किसान मन ल अभी तक करीबन बारह लाख मीट्रिक टन उर्वरक ल बांटे जा चुके हे।