मुख्यमंत्री विष्णुदेव साय ह आज मंत्रालय म ई-ऑफिस प्रणाली अउ स्वागतम पोर्टल के सुभारंभ करीन। मुख्यमंत्री ह ई-आफिस प्रणाली के पेज म मुख्य सचिव ल शासन के जम्मों विभाग म ई-आफिस प्रणाली लागू करे के निरदेस जारी करीन। ई-आफिस प्रणाली सबले पहिली सामान्य प्रशासन विभाग म लागू करे जात हे। एखर बाद एला जम्मों विभाग म लागू करे जाही। एखर ले दस्तावेज म हेरफेर होय के संसो सिरा जही। संगेसंग अधिकारी मनके कामकाज के मॉनिटरिंग सरल हो जही।
उहें, मुख्यमंत्री ह मंत्रालय म प्रवेश बर स्वागतम पोर्टल के सुभारंभ करीन। एमा ऑनलाइन अरजी दे म बिन अगोरा करे, बिन लाइन लगे अउ बिन अबेर के एस.एम.एस. अउ ई-मेल ले मिले के बेरा के जानकारी मिल जही, जेखर ले लोगन के बरा बाचही।
अमित शाह-छत्तीसगढ़
केन्द्रीय गृह अउ सहकारिता मंत्री अमित शाह तेईस ले पच्चीस अगस्त तक रईपुर दउरा म रइही। श्री शाह तेईस तारीख के रतिहा दस बजे रईपुर पहुंचही। अपन दउरा के बेरा केन्द्रीय गृत्र मंत्री चौबीस अगस्त के चंपारण के वल्लभाचार्य आश्रम के दउरा करही। एखर बाद रईपुर म छत्तीसगढ़ अउ पड़ोसी राज्य के मुख्य सचिव, पुलिस महानिदेशक मन संग अंतर्राज्यीय समन्वय बइठका म सामिल होही। इही दिन श्री शाह छत्तीसगढ़ के वामपंथी उग्रवाद प्रभावित क्षेत्र म सुरक्षा अउ विकास संबंधी बइठका लींही।
अपन दउरा के आगू दिन पच्चीस तारीख के रईपुर के एन.सी.बी. आफिस के उद्घाटन करही अउ समीक्षा बइठका म भाग लीहीं। एखर बाद ओमन छत्तीसगढ़ म सहकारिता के बढ़वार ले जुड़े एक आने बइठका म संघरही।
यूपीएससी-लेटरल एंट्री
संघ लोक सेवा आयोग-यूपीएससी ह कार्मिक अउ प्रसिक्षण विभाग ले निरदेस मिले के बाद प्रसासनिक सेवा म लेटरल एंट्री संबंधी विज्ञापन रद्द कर दे गेहे। एखर पहिली, काली सरकार ह आयोग ले प्रशासनिक सेवा म लेटरल एंट्री ले जुड़े विज्ञापन रद्द करे बर केहे रिहीस। कुछेक दिन पहिली यूपीएससी ह केन्द्रीय मंत्रालय म पैंतालीस संयुक्त सचिव, निदेशक अउ उप सचिव के भर्ती बर विज्ञापन जारी करे रिहीस, जेखर विपक्षी दल ह विरोध करीन।
राष्ट्रीय अंतरिक्ष दिवस
पहिली राष्ट्रीय अंतरिक्ष दिवस देशभर म तेईस अगस्त के मनाय जाही। एसो के बिसय हरय – चन्द्रमा को छूते हुए जीवन को छूना-भारत की अंतरिक्ष गाथा‘‘। राष्ट्रपति द्रौपदी मुर्मू नई दिल्ली के भारत मंडपम म राखे गे मुख्य समारोह के उद्घाटन करही। अंतरिक्ष राज्यमंत्री डॉक्टर जितेन्द्र सिंह ह आज एक पत्रकारवार्ता म बोलत किहीन कि पाछु बछर इही दिन चन्द्रयान-तीन मिशन के दउरान चन्द्रमा के सतह म विक्रम लैंडर के सुरक्षित अउ सॉफ्ट लैंडिंग होय रिहीस। ओमन किहीन कि एखर संगेसंग भारत चन्द्रमा म उतरइया चौथा अउ चन्द्रमा के दक्षिणी धु्रव के तीर उतरइया पहिली देस बन गे रिहीस।
उहें, राज्य सैक्षिक अनुसंधान अउ प्रसिक्षण परिषद कोति ले चन्द्रयान-तीन मिशन के सफलता म युवा मन म विज्ञान अउ अंतरिक्ष कोति रूचि जगाय बर प्रदेस के सबो स्कूल मन म बाईस अउ तेईस अगस्त के कार्यक्रम राखे जाही। ए मउका म व्याख्यान, पोस्टर, निबंध, मॉडल, क्वीज अउ पेंटिंग प्रतियोगिता होही। संगेसंग अंतरिक्ष विज्ञान ले जुड़े तीन मिनट के एक वीडियो स्कूल मन म देखाय जाही।
विजय शर्मा-बैठक
उपमुख्यमंत्री विजय शर्मा ह भोरमदेव मंदिर के जीर्णोद्धार बर आज रईपुर म संस्कृति अउ पुरातत्व विभाग अउ कबीरधाम जिला ले आय लोगन अउ पुजारी मन संग बइठका करीन। बइठका म श्रद्धालु मन ल मिलइया सुभिता ल बढ़ाय अउ मंदिर परिसर के विकास के आने-आने प्रस्ताव म गोठबात करे गीस। ओमन ल संस्कृति विभाग के अधिकारी मन ल निरदेस दीन कि मंदिर के इतिहास ले जुड़े वीडियो डॉक्यूमेंट बनाय जाय, जेखर ले भक्तजन मंदिर के इतिहास ल जान सकय। संगेसंग भोरमदेव महोत्सव ले पहिली अभी होवत निर्माण काम ल पूरा करे के निरदेस दीन। बइठका म भोरमदेव मंदिर ले छेड़की महल, मड़वा महल, तक पक्का रद्दा बनाय, मंदिर परिसर म सोलर लाइट अउ सीसीटीवी कैमरा लगाय के संबंध म गोठबात करे गीस।
विजय शर्मा-सीबीआई
उपमुख्यमंत्री अउ गृहमंत्री विजय शर्मा ह किहीन हे कि राज्य सरकार महादेव बैटिंग ऐप के मामला सीबीआई ल सौंपही। ओमन बतईन कि ए मामला म करीबन सत्तर ठिन थाना म अलग-अलग एफ.आई.आर. दरज हे। एमा काम होवत हे अउ कुछेक बेरा म फइसला हो जही। श्री शर्मा ह किहीन कि बिरनपुर अउ सीजीपीएससी स्कैम के बाद ए तीसर मामला होही, जउन सीबीआई ल सौंपे जाही। ईडी के मुताबिक महादेव बैटिंग ऐप मामला प्रदेस के कतकोन बड़का नेता, अधिकारी अउ कारोबारी के नाव दरज हे।
अरूण साव-प्रेसवार्ता
उपमुख्यमंत्री अरूण साव ह आज रईपुर म एक पत्रकारवार्ता म बोलत किहीन कि प्रदेस म सत्ताईस जुलाई ले दस अगस्त तक जनसमस्या निवारण पखवाड़ा के दउरान एक लाख तीस हजार अरजी मिले हे, जेमा ले अड़तालीस हजार अरजी के निपटारा कर दे गेहे। बांचे अरजी के जल्दीच निराकरण करे के कार्रवाई होवत हे। ओमन किहीन कि लोगन के जरूरत अउ मांग ले जुड़े काम बरसा के सेती नइ हो पाय हे। बरसात के बादे ओ काम मन ल पूरा करे जाही। श्री साव ह बतईन कि समस्या ल तुरते सुलझाय बर नगरीय निकाय अउ प्रसासन विभाग ह नौ सौ करोड़ रूपिया के रकम जारी करे के फइसला लेहे। एमा ले चार सौ पचास करोड़ रूपिया अधोसंरचना मद ले अउ चार सौ पचास करोड़ रूपिया पन्द्रहवां वित्त आयोग मद ले जारी करे जाही।
एसटी-एससी-छत्तीसगढ़ बंद
अनुसूचित जाति अउ जनजाति संगठन कोति ले आज बलाय गे बंद के छत्तीसगढ़ म मिले-जुले असर देखे बर मिलीस। अनुसूचित जाति-जनजाति बहुल बस्तर जिला म बंद के जादा असर देखे गीस। बस्तर म चेम्बर ऑफ कॉमर्स के समर्थन के सेती अधिकतर दुकान बंद रिहीस। उहें, ए बंद ले जरूरी सेवा ल अलग रखे गे रिहीस। यात्री अवइया-जवइया मन बर यातायात के साधन ठप्प रिहीस। उहें, बंद के समर्थन म आदिवासी मन ह एक रैली निकाली।
कोंडागांव म घलो सबो दुकान बंद रिहीस। अनुसूचित जाति-जनजाति वरग के लोगन मन चौपाटी मैदान म धरना-दीन। ओति, रायगढ़ म छत्तीसगढ़ चेम्बर ऑफ कॉमर्स के समर्थन नइ मिले के सेती दुकान खुले रिहीस। ए बेरा म चउक-चउराहा म पुलिस बल मौजूद रिहीस।
राज्यपाल-दुर्ग
राज्यपाल रमेन डेका ह पर्यावरण संरक्षण बर सबो झन ले एक पेड़ लगाय के आहवान करीन हे। राज्यपाल ह आज दुरूग म प्रशासनिक अधिकारी के बइठका लेके केन्द्र अउ राज्य सरकार के आने-आने योजना के संगेसंग सामाजिक हित खातिर जिला म करे जात काम के जानकारी लीन। ओमन किहीन कि सरकार के योजना बने ढंग ले चलाय के काम अधिकारी अउ करमचारी मन कोति ले करे जाथे। बइठका म राज्यपाल ह अधिकारी मन ले एजेंडावार बीस ठिन बिसय म गोठबात करीन।
दुरूग दउरा के दउरान राज्यपाल ह तितुरडीह के कृष्ण कुंज म ‘‘एक पेड़ मां के नाम‘‘ अभियान म कचनार के पौधा रोपीन। उहें, विधायक गजेन्द्र यादव ह जामुन के पौधा लगईन।
रंगपर्व
रईपुर के महंत घासीदास संग्रहालय परिसर म काली ले चौबीस अगस्त तक रंगपर्व नाट्य श्रृंखला के आयोजन होही। संस्कृति विभाग कोति ले राखे गे ए कारीकरम म आने-आने नाटक ले छत्तीसगढ़ के जनजातीय अउ लोक संस्कृति के झलक देखाय जाही। ए नाट्स श्रृंखला के प्रस्तुति हरेक दिन संझा सात बजे ले होही। रंगपर्व के पहिली दिन काली ‘गोदना‘ नाव के नाटक म देवार जनजाति के जीवनशैली, कला अउ संस्कृति ल देखाय जाही।
बालोद-बच्चे घायल
बालोद जिला के कोरगुड़ा गांव के सरकारी प्राथमिक स्कूल म छत के प्लास्टर गिरे ले चार झिन लइका गंभीर रूप ले घायल होगे हे। घायल लइका मन ल जिला अस्पताल म भर्ती कराय गेहे। घटना के जानकारी मिलतेच पूर्व मंत्री अउ विधायक अनिला भेंडिया अस्पताल पहुंचीन अउ घायल लइका अउ उंखर परिवार वाले मन ले भेंट करके हरसंभव मदद के भरोसा देवईन।
आकाशवाणी रायपुर-शाम सिंदूरी
आकाशवाणी केन्द्र, रायपुर द्वारा कल इक्कीस अगस्त को शाम सात बजे से रायपुर के चौबे कॉलोनी स्थित महाराष्ट्र मंडल में स्वंतत्रता का उत्सव ‘शाम सिंदूरी’ कार्यक्रम का आयोजन किया जाएगा। इस कार्यक्रम में पंडित प्रभाकर कश्यप और पंडित दिवाकर कश्यप ख्याल गायन की प्रस्तुति देंगे। वहीं, डॉक्टर नमन दत्त द्वारा सुगम संगीत की प्रस्तुति दी जाएगी।
अउ अब थोरकुन समाचार सार म –
– मुख्यमंत्री विष्णुदेव साय के रईपुर स्थित निवास कार्यालय म हर बिरस्पत के होवइया ‘जनदर्शन‘ कार्यक्रम काली बाईस तारीख के कोनों कारण ले स्थगित कर दे गेहे।
अउ
– राजनांदगांव जिला के डोंगरगढ़ मां बम्लेश्वरी मंदिर म ट्रस्ट समिति कोति ले चलाय जात रोप-वे के मरम्मत काम कराय जात हे। एखर सेती आज अउ काली रोप-वे नइ चलाय जाय।