उच्चतम न्यायालय ह स्वास्थ्यकर्मी मनके सुरक्षा सुनिश्चित करे बर राष्ट्रीय कार्यबल गठित करे हे। मुख्य न्यायाधीश न्यायमूर्ति डी.वाई. चंद्रचूड़ के अगुवई वाले खंडपीठ ह कोलकाता के अस्पताल म एक डॉक्टर ले दुष्कर्म अउ हत्या के मामला के सुनवाई के दउरान कार्यबल ले तीन हफ्ता के भीतर अपन अंतरिम अउ दू महीना के भीतर आखिरी रिपोर्ट प्रस्तुत करे के निरदेस देहे। मुख्य न्यायाधीश ह किहीन कि माईलोगिन मनके सुरक्षा सुनिश्चित करे बर अदालत ह देसभर ले डॉक्टर मनके एक राष्ट्रीय कार्यबल गठित करत हे। ए कार्यबल अइसे दिसा-निरदेस के सिफारिस करही, जउन ह पूरा देस म लागू होही।
उहें, केन्द्रीय स्वास्थ्य मंत्रालय ह अस्पताल म सुरक्षा बढ़ाय बर केन्द्र सरकार के अस्पताल अउ संस्था मनके जम्मों प्रमुख मन ल चिट्ठी लिखे हे। ए चिट्ठी म मंत्रालय ह प्रवेस, निकासी, गलियारा अउ संवेदनशील क्षेत्र समेत प्रमुख जघा म पर्याप्त संख्या म सीसीटीवी कैमरा लगाय के निरदेस दीन हे।
इही बीच, केन्द्र सरकार ह जम्मों केन्द्रीय चिकित्सालय म सुरक्षाकर्मी मनके तैनाती म पच्चीस प्रतिसत बढ़ोतरी ल मंजूरी दे देहे। मानक सुरक्षा प्रोटोकॉल के संगेसंग अस्पताल के अपन मांग के आधार म मार्शल के तैनाती ल घलो मंजूरी दे गेहे।
केन्द्र सरकार ह संघ लोक सेवा आयोग-यूपीएससी ल नौकरशाही म लैट्रल एंट्री ले जुड़े विज्ञापन ल रद्द करे के निरदेस देहे। हालेच म यूपीएससी ह केन्द्रीय मंत्रालय म पैंतालीस संयुक्त सचिव, निदेशक अउ उप-सचिव ल नियुक्त करे बर एक ठिन विज्ञापन जारी करे रिहीस। विपक्षी पार्टी मन ह ए विज्ञापन म प्रश्न उठाय रिहीन। केन्द्रीय मंत्री जितेन्द्र सिंह ह यूपीएससी के अध्यक्ष प्रीति सूदन ल लिखे चिट्ठी म किहीन कि प्रधानमंत्री नरेन्द्र मोदी के मानना हे कि लैट्रल एंट्री के प्रक्रिया संविधान म समानता अउ सामाजिक न्याय के सिद्धांत, बिसेसकर आरक्षण के प्रावधान के अनुरूप होना चाही। ओमन किहीन कि सार्वजनिक रोजगार म आरक्षण सरकार के सामाजिक न्याय ढांचा के एक बिसेस भाग हरय। डॉक्टर सिंह ह यहू किहीन कि सामाजिक न्याय के प्रति संवैधानिक अधिदेश के उद्देश्य सरकारी सेवा म वंचित समुदाय के योग्य उम्मीदवार मन ल उचित प्रतिनिधित्व देवाना हरय।
भाजपा-बैठक/कार्यशाला
रईपुर स्थित प्रदेस भाजपा कार्यालय कुशाभाऊ ठाकरे परिसर म आज भारतीय जनता पार्टी के सदस्यता अभियान अउ कार्यशाला के सुभारंभ करे गीस। ए मउका म प्रदेस अध्यक्ष किरण सिंह देव ह बतईन कि पाछु सत्रह अगस्त के राष्ट्रीय अध्यक्ष जगत प्रकाश नड्डा, केन्द्रीय गृह मंत्री अमित शाह अउ राष्ट्रीय महामंत्री संगठन वी.एल. संतोष ह अवइया छह महीना तक सदस्यता अभियान चलाय के फइसला लेहे। एला देखत बाईस ले चौबीस अगस्त तक जिला स्तर म कार्यशाला आयोजित करे जाही। उहें, छब्बीस ले अट्ठाईस अगस्त तक ब्लॉक स्तर म कार्यशाला होही।
भाजपा के कार्यशाला अउ बइठका म राष्ट्रीय महासचिव अरूण सिंह, क्षेत्रीय संगठन महामंत्री अजय जामवाल, प्रदेस संगठन महामंत्री पवन साय, केन्द्रीय राज्यमंत्री तोखन साहू अउ मुख्यमंत्री विष्णुदेव साय समेत भाजपा के बड़का नेता मौजूद रिहीन।
पीएम जनमन-अभियान
आदिम जाति अउ अनुसूचित जाति विकास विभाग डहार ले सितंबर महीना म प्रदेस के अट्ठारह जिला मन म जागरूकता अभियान चलाय जाही। ए अभियान के तहत विशेष पिछड़ी जनजाति बहुल बसाहट म रहवइया परिवार मन ल केन्द्र अउ राज्य सरकार डहार ले चलत प्रधानमंत्री जन-मन योजना के जानकारी दे जाही। ए अभियान के दउरान प्रधानमंत्री नरेन्द्र मोदी वर्चुअल रूप ले जुड़के बिसेस पिछड़ी जनजाति वाले परिवार मन ले गोठबात करही।
आदिम जाति अउ अनुसूचित जाति विकास विभाग के प्रमुख सचिव सोनमणि बोरा ह बतईन कि छत्तीसगढ़ म विशेष पिछड़ी जनजाति वाले कोनों एक जिला ल राज्य स्तरीय मेगा ईवेंट बर चुने जाही। उहें, बाचे सबो पीएम-जनमन वाले जिला मन म जिला स्तरीय कार्यक्रम राखे जाही। ए आयोजन म स्थानीय विधायक अउ आने-आने जनप्रतिनिधि सामिल होही। श्री बोरा ह बतईन कि तेईस अगस्त ले दस दिसंबर तक जम्मों पीवीटीजी बसाहट अउ जिला म लाभार्थी संतृप्ति शिविर के घलो आयोजन करे जाही।
कांग्रेस-विधायक दल बैठक
कांग्रेस विधायक दल के बइठका आज रायपुर के प्रदेस कांग्रेस मुख्यालय राजीव भवन म राखे गीस। बइठका म कांग्रेस विधायक दल के नेता डॉक्टर चरणदास महंत, पूर्व मुख्यमंत्री भूपेश बघेल अउ कांग्रेस विधायक मन मौजूद रिहीन। ए बइठका म भिलाई के विधायक देवेन्द्र यादव के गिरफ्तारी अउ आने-आने बिसय म चर्चा करे गीस। बइठका म तय करे गीस कि विधायक देवेन्द्र यादव के गिरफ्तारी ल लेके चौबीस अगस्त के प्रदेस के जम्मों जिला मुख्यालय म कांग्रेस प्रदर्शन करहीं।
बइठका के बाद पूर्व मुख्यमंत्री भूपेश बघेल, नेता प्रतिपक्ष चरणदास महंत समेत जम्मों विधायक मन ह रईपुर केन्द्रीय जेल पहुंच के देवेन्द्र यादव ले भेंट करीन।
देवेन्द्र यादव-रिमांड अवधि
बलौदाबाजार हिंसा मामला म आज जिला अउ सत्र न्यायालय बलौदाबाजार म वीडियो कॉन्फ्रेंसिंग के माध्यम ले सुनवाई होइस। एखर बाद कोर्ट ह विधायक देवेन्द्र यादव के जमानत याचिका खारिज करके न्यायिक रिमांड के बेरा ल सात दिन बर बढ़ा देहे। अब ओ ह सत्ताईस अगस्त तक न्यायिक रिमांड म रइही।
हाईकोर्ट-शराब घोटाला
कथित शराब घोटाला मामला म आरोपी पूर्व आईएएस अनिल टुटेजा, अनवर ढेबर, अरूणपति त्रिपाठी अउ विधु गुप्ता समेत आने-आने आरोपी मनके याचिका ल छत्तीसगढ़ उच्च न्यायालय ह खारिज कर देहे। हाईकोर्ट ह आज ए मामला म ईडी, ईओडब्ल्यू अउ एसीबी के खिलाफ दायर जम्मों तेरह याचिका म सुनवाई करीन। एखर पहिली, हाईकोर्ट ह एक ठिन याचिका के सुनवाई के दउरान अनिल टुटेजा ल अंतरिम राहत दे रिहीन, फेर अब कोर्ट ह टुटेजा ल मिले अंतरिम राहत ल घलो खारिज कर देहे।
सरकार-उचित मूल्य दुकान
केन्द्रीय उपभोक्ता कार्य, खाद्य अउ सार्वजनिक वितरण मंत्री प्रहलाद जोशी ह आज नई दिल्ली म साठ उचित मूल्य दुकान मन ल जन-पोषण केन्द्र म बदले के प्रायोगिक कारीकरम के सुरूवात करीन। कारीकरम म मौजूद लोगन मन ल संबोधित करत श्री जोशी ह किहीन कि जन-पोषण केन्द्र ह उचित मूल्य दुकानदार मनके आय बढ़ाय म मदद करही। श्री जोशी ह पांच ठिन आने-आने कारीकरम के घलो सुरूवात करीन, जेमा मेरा राशन ऐप, गुणवत्ता प्रबंधन प्रणाली, गुणवत्ता मैनुअल पुस्तिका, भारतीय खाद्य निगम के संविदा मैनुअल अउ प्रयोगशाला के एन.ए.बी.एल. प्रमाणन सामिल हे। ओमन किहीन कि ए प्रणाली ले पारदर्सिता बढ़ही।
राजीव गांधी-जयंती
आज पूर्व प्रधानमंत्री राजीव गांधी के जयंती हरय। ए मउका म प्रधानमंत्री नरेन्द्र मोदी ह ओमन श्रद्धांजलि दीन हे। उहें, लोकसभा म विपक्ष के नेता अउ कांग्रेस सांसद राहुल गांधी ह नई दिल्ली म वीर भूमि जाकर पूर्व प्रधानमंत्री राजीव गांधी ल फूल चढ़ाके श्रद्धांजलि दीन।
ऐति, छत्तीसगढ़ प्रदेस कांग्रेस कार्यालय राजीव भवन म राजीव गांधी के जयंती म उंखर छायाचित्र म पुष्पांजलि अर्पित करके ओमन श्रद्धांजलि दे गीस। ए मउका म नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल बघेल, वरिष्ठ कांग्रेस नेता रविन्द्र चौबे अउ पूर्व मंत्री उमेश पटेल समेत कांग्रेस के कतकोन पदाधिकारी मन मौजूद रिहीन।
उहें, छत्तीसगढ़ विधानसभा परिसर स्थित सेंट्रल हॉल म घलो पूर्व प्रधानमंत्री राजीव गांधी के फोटू म आज नेता प्रतिपक्ष डॉक्टर चरणदास महंत, सांसद ज्योत्सना महंत अउ कांग्रेस के आने-आने विधायक मन डहार ले फूल चढ़ाके श्रद्धांजलि दीन।
रेडियो श्रोता दिवस
रेडियो श्रोता दिवस के मउका म आज ओल्ड लिसनर्स ग्रुप ऑफ छत्तीसगढ़ जोन डहार ले रईपुर म एक ठिन कारीकरम के आयोजन करे गीस। ए मउका म दूरदर्शन केन्द्र, रईपुर के अभियांत्रिकी विभाग के निदेशक संतोष कुमार देवहरे, आकाशवाणी रायपुर के पूर्व कार्यक्रम उपनिदेशक लखनलाल भौर्य अउ लिसनर्स ग्रुप के संरक्षक लक्ष्मी नारायण लाहोटी मौजूद रिहीन।
रेलवे प्रसासन डहार ले यात्री मनके सुविधा अउ ओमन ल आरक्षित बर्थ देवाय बर दक्षिण पूर्व मध्य रेलवे ले होके जवइया हावड़ा-पुणे-हावड़ा दुरंतो एक्सप्रेस म एक उपरहा एसी-थ्री कोच के सुविधा देवाय गेहे। ए सुविधा हावड़ा ले बाईस अउ चौबीस अगस्त के अउ पुणे ले चौबीस अउ छब्बीस अगस्त के उपलब्ध रइही।
रायपुर रेलमंडल-अभियान
ट्रेन म होवत चैन पुलिंग के घटना ल रोके बर रईपुर रेलमंडल डहार ले ‘‘ऑपरेशन समयपालन‘‘ अभियान चलाय जावत हे। इही कड़ी म एक ले उन्नीस अगस्त तक अभियान चलाके अड़सठ चैन पुलिंग के दुरूपयोग करइया मनखे मनके खिलाफ रेल अधिनियम के तहत कार्रवाई करे गीस। उहें, रेल यात्री मनके सुविधा बर ‘‘मिशन यात्री सुरक्षा‘‘ के तहत घलो अभियान चलाय जावत हे।
– आकाशवाणी रायपुर डहार ले काली इक्कीस अगस्त के संझा सात बजे ले रायपुर के चौबे कॉलोनी स्थित महाराष्ट्र मंडल म स्वंतत्रता के उत्सव ‘शाम सिंदूरी‘ कार्यक्रम के आयोजन करे जाही।
अउ
– जांजगीर-चांपा जिला म ‘एक पेड़ मां के नाम‘ अभियान के तहत बाईस अगस्त के पौरारोपण कारीकरम के आयोजन करे जाही।