मंकी पॉक्स-निर्देश
केंद्र सरकार ह राज्य मन ल मंकी पॉक्स बीमारी के तुरते पता लगाय बर प्रभावी उपाय करे अउ निगरानी बढ़ाय के निरदेस देहे। प्रधानमंत्री के प्रधान सचिव प्रमोद कुमार मिश्रा ह देस म मंकी पॉक्स के स्थिति अउ स्वास्थ्य उपाय के स्थिति के बारे म जानकारी लीन। प्रधानमंत्री नरेंद्र मोदी मंकीपॉक्स के स्थिति के सरलग निगरानी बर जांच प्रयोगसाला मनके नेटवर्क बढ़ाय बर किहीन। अभी जांच बर बत्तीस ठन प्रयोगसाला तियार हे। बीमारी के इलाज अउ रोकथाम के प्रोटोकॉल के प्रचार व्यापक स्तर म करे जाना चाही। अभी देस म मंकीपॉक्स के कोनो रोगी नइ मिले हे।
अंतरिक्ष दिवस-कार्यक्रम
केंद्र सरकार ह चंद्रयान – तीन मिसन के बड़े सफलता के उत्सव मनाय बर तेइस अगस्त ल ‘‘राष्ट्रीय अंतरिक्ष दिवस‘‘ घोसित करे हे। राज्य शैक्षिक अनुसंधान अउ प्रसिक्षण परिसद डहार ले चंद्रयान-तीन मिसन के सफलता के मउका म युवा मन म विज्ञान अउ अंतरिक्ष बर रूचि पैदा करे के उद्देस्य ले प्रदेस के सबो स्कूल मन म कारीकरम कराय जाही। राष्ट्रीय अंतरिक्ष दिवस के ए बछर के थीम हे ‘‘चंद्रमा के छूते हुए जीवन को छूना : भारत की अंतरिक्ष गाथा‘‘। बाईस अउ तेइस अगस्त के प्रदेस के स्कूल मन म एनसीईआरटी डहार ले विकसित बिसेस ‘‘चंद्रयान पर आधारित मॉड्यूल‘‘ प्रदर्सित करे जाही। ए मउका म व्याख्यान, पोस्टर, निबंध, मॉडल बिल्डिंग, क्वीज अउ पेंटिंग प्रतियोगिता कराय जाही। संगेसंग अंतरिक्ष विज्ञान ले जुड़े तीस मिनट के एक ठन वीडियो ल स्कूल मन म प्रदर्सित करे जाही।
मोबाइल बेस्ड एप्लीकेशन ‘‘सुगम‘‘
वाणिज्यिक कर मंत्री ओ.पी.चौधरी ह काली मोबाइल बेस्ड एप्लीकेसन ‘सगुम‘ के लोकार्पण करीन। ए एप्लीकेसन म कोनो भी व्यक्ति संपत्ति स्थल के फोटो अउ अक्षांस अउ देशांतर के भौगोलिक स्थिति ल रजिस्ट्री सॉफ्टवेयर म डाल सकही। एखर ले संपत्ति ले जुड़े धोखाधड़ी अउ टैक्सचोरी ल रोके म मदद मिलही।
संगेसंग श्री चौधरी ह मंत्रालय म पंजीयन विभाग के कामकाज के घलो समीक्षा करीन। ए दौरान ओमन ह अधिकारी मनले किहीन कि पंजीयन विभाग ह जनता ले जुड़े विभाग हे। लोगन ल परेसानी के सामना करे बर झन पड़य एखर बिसेस धियान राखे जाय। विभाग म बिचौलिया मनके अवई-जवई म रोक लगाय जाय।
बइठका म अधिकारी मन ह बतइन कि पुराना दस्तावेज के स्कैनिंग के काम करीबन पूरा होगे हवय अउ कुछेक दिन म पंजीयन विभाग के सर्च अउ नकल मॉड्यूल ल ऑनलाइन कर दे जाही। एखर ले कोनो भी मनखे कार्यालय ले आय बिना तय करे गे सुल्क ल ऑनलाइन जमा करके पुराना दस्तावेज ल खोज सकही अउ ओखर नकल ल डाउनलोड कर सकही। अधिकारी मन ह यहू घलो बतइन कि पंजीयन विभाग ल कैस, पेपर अउ कैसलेस बनाय के काम चलत हे।
भाजपा सदस्यता-अभियान
सदस्यता अभियान के जानकारी देबर काली बीस अगस्त के भारतीय जनता पार्टी डहार ले एक ठन कार्यसाला कराय जाही। कुशाभाऊ ठाकरे परिसर के प्रदेस कार्यालय म होवइया ए कार्यसाला म राष्ट्रीस महासचिव अरूण सिंह, भाजपा प्रदेस प्रभारी नितिन नबीन, मुख्यमंत्री विष्णुदेव साय, भाजपा प्रदेस अध्यक्ष किरण सिंह देव, क्षेत्रीय संगठन महामंत्री अजय जामवाल अउ प्रदेस संगठन महामंत्री पवन साय सामिल होही।
भाजपा सदस्यता अभियान प्रभारी अनुराग सिंह देव ह बतइन कि काली होवइया बइठका म सदस्यता के लक्ष्य तय करे जाही। केंद्रीय नेतृत्व ह देसभर म ए बखत दस करोड़ सदस्य बनाय के लक्ष्य राखे हे। श्री सिंह देव ह बतइन कि ए बइठका म प्रदेसभर के पार्टी कार्यकर्ता पदाधिकारी अउ जनप्रतिनिधि मन हिस्सा लिही।
सावन सोमवार
आज सावन के आखिरी सोमवार हे। ए बखत सावन के महिना म पांच ठन सम्मार रिहीस हे, तेखर सेति पांच सम्मार तक भगवान शिव के विसेस पूजा-पाठ करे गीस। ए मउका म प्रदेस भर के शिव मंदिर मन म भगवान भोलेनाथ के बिसेस श्रृंगार करे जावत हे। भक्त मन डहार ले लाय गे नंदिया मनके पानी ले भगवान शिव के अभिषेक करे जावत हे। राजधानी रईपुर के शिव मंदिर मन म घलो बिहनियच ले शिव भक्त मनके कतार लगे रिहीस। बुढ़ेश्वर महादेव, हटकेश्वरनाथ मंदिर, महादेवघाट संघरा सबो मंदिर म कांवड़िया मन डहार ले जल अभिषेक करे गीस। उहें, जांजगीर-चांपा के नवागढ़ म िंलंगेश्वर महादेव मंदिर म सावन के आखिरी सोमवार भक्त मनके बहुत भीड़ देखे गीस।
इही बीच, मुख्यमंत्री विष्ण्ुदेव साय ह आज सावन महिना के आखिरी दिन बाबा महाकाल के नगरी उज्जैन म श्री महाकालेश्वर के दर्सन करीन। ओमन ह ज्योर्तिंलिंग के पूजा-पाठ करके प्रदेसवासी मन बर सुख-समृध्दि अउ खुसहाली के कामना करीन।
रक्षाबंधन
भाई-बहिनी के पवित्र तिहार रक्षाबंधन आज छत्तीसगढ़ संघरा देसभर म उछाह अउ उमंग के साथ मनाय जावत हे। आज के दिन बहिनी मन अपन भाई के हाथ म रक्षासूत्र बांधते अउ ओला मिठाई खवाथे। भाई मन घलो अपन बहिनी के रक्षा के संकलप लेथे अउ बहिनी ल भेंट देथे। राष्ट्रपति द्रौपदी मुर्मू, प्रधानमंत्री नरेंद्र मोदी, राज्यपाल रमेन डेका अउ मुख्यमंत्री विष्णुदेव साय ह रक्षाबंधन के मउका म लोगन ल बधई दीन हे। उहें, भाजपा के प्रदेस अध्यक्ष किरण सिंह देव अउ नेता प्रतिपक्ष डॉक्टर चरणदास महंत ह घलो प्रदेसवासी मन ल बधई दीन हे।
रक्षाबंधन के पावन मउका म मुख्यमंत्री के निवास कार्यालय म प्रजापिता ब्रम्हकुमारी ईश्वरीय विश्वविद्यालय रईपुर के संचालिका ब्रम्हकुमारी सविता बहिनी अउ रश्मि बहिनी ह भेंट करीन। ए मउका म दूनों झन मुख्यमंत्री ल राखी बांधिन अउ उंखर स्वस्थ अउ खुशहाल जीवन के कामना करीन।
उहें, रईपुर के मुख्यमंत्री निवास म ही मुख्यमंत्री ल ट्रांसजेंडर, स्वच्छता दीदी, स्व-सहायता समूह के माईलोगिन मन दिव्यांग अउ आदिवासी नोनी मन ह राखी बांधिन। ए मउका म माईलोगिन मन ह किहीन कि बछर म एक घांव राखी के तिहार आथे, फेर हमर मुख्यमंत्री जी ह हमन ल हर महिना महतारी वंदन योजना म भेंट देथे। ए मउका म मुख्यमंत्री ह माईलोगिन मन के सम्मान, समृध्दि अउ सुरक्षा बर अपन प्रतिबध्दता ल दोहराइन।
जवान रक्षाबंधन
देस संघरा राज्य म आज सुरक्षा बर तैनात जवान मन ह रक्षाबंधन के तिहार मनाइन। ए दौरान स्व-सहायता समूह के दीदी मन ह अउ स्कूली छात्रा मन ह अंदरूनी कैंप म तैनात सुरक्षाबल के जवान मन ल राखी बांधिन।
सुकमा जिला के माओवाद प्रभावित क्षेत्र म क्षेत्र के सीएएफ कैंप के पर्या म रक्षाबंधन के तिहार मनाय गीस। ए दौरान महतारी वंदन योजना के हितग्राही माईलोगिन मन ह जवान मन ल राखी बांधिन। अइसने मिसमा, पोलमपल्ली, कांकेरलंका, बुरकापाल, चिंतलनार, जगरगुंडा, कोर्रा, चिंगावरम अउ तोंगपाल संघरा दूसर कैंप म जवान मन ल समूह के दीदी मन ह राखी बांधिन। ए मउका म जवान मन कोति ले बहिनी मन ल उपहार घलो दे गीस।
रेडियो श्रोता दिवस
काली रेडियो श्रोता दिवस हरय। ए मउका म ओल्ड लिसनर्स गु्रप ऑफ छत्तीसगढ़ जोन डहार ले रईपुर के वृंदावन हाल म एक ठिन कारीकरम के आयोजन करे जाही। एमा मुख्य अतिथि के रूप म जिला पंचायत के पूर्व अध्यक्ष अशोक बजाज सामिल होही। उहें, बिसेस अतिथि के रूप म आकाशवाणी के पूर्व कारीकरम निदेसक लखनलाल भौर्य अउ वरिष्ठ उद्घोषक प्रकाश उदय हिस्सा लिही।
अउ अब थोरकुन समाचार सार म –
– राजनांदगांव के एक झन व्यापारी के संग ऑनलाइन ठगी के मामला आगू आय हे। व्यापारी ले स्टाक मार्केट ट्रेडिंग कंपनी ह निवेस के नांव म तीन करेड़ चालिस लाख रूपिया ले जादा के ठगी करे हे। सिकायत के बाद बसंतपुर पुलिस ह जांच म जुट गे हवय।
– कोरिया जिला के कलेक्टर चंदन त्रिपाठी ह लोगन ले आग्रह करीन कि ओमन ह नंदिया अउ तालाब मन ल प्रदूषित करइया पॉलिथीन अउ प्लास्टिक समान के उपयोग झन करय।
– राजनांदगांव जिला रोजगार अउ स्व-रोजगार मार्गदर्सन केंद्र म इक्कीस अगस्त के बिहनिया साढ़े दस बजे ले प्लेसमेंट कैंप के आयोजन करे जाही।
अउ
– राजनांदगांव जिला के रेवाडीह तिराहा के पास आज एक ठन सड़क दुर्घटना म बेलगांव कटनी निवासी एक झन माईलोगिन के मउत होगे।