भारतीय चिकित्सा संघ आईएमए ह पश्चिम बंगाल के मेडिकल कालेज म महिला डॉक्टर ले होय दूष्कर्म के घटना के बाद प्रधानमंत्री नरेंद्र मोदी ले स्वास्थ्य कर्मी मनके सुरक्षा बर केंद्रीय कानून लाय के मांग करे हे। आईएमए ह केहे हवय कि अस्पताल मनके सुरक्षा बेवस्था हवाई अड्डा जइसन एकदम चॉक-चौबंद होना चाही। ए घटना के जांच बेरा म पूरा होना चाही अउ पीड़ित पक्ष ल जल्दी ले जल्दी न्याय मिलना चाही। उहें, स्वास्थ्य कर्मी मनके सुरक्षा बर केंद्र सरकार ह एक ठिन समिति बनाय हे। सरकार ह फेडरेसन ऑफ रेजिडेंट डॉक्टर्स एसोसिएसन, इंडियन मेडिकल एसोसिएसन अउ स्वास्थ्य ले जुड़े आने पक्ष मन के संसो करे बाद ए फइसला लेहे। केंद्र ह ए बिसय उपर राज्य मन ले घलो समिति ल सुझाव देके बिनती करे हे।
ऐति, ए घटना के विरोध म भारतीय जनता पार्टी के महिला मोर्चा ह प्रदेस भर म प्रदर्सन करीन। आज बिलासपुर म महिला मोर्चा के प्रदेस अध्यक्ष शालिनी राजपूत के अगुवई म सहर के मुख्य रद्दा म कैंडल मार्च निकाले गीस।
ओति, जगदलपुर म महारानी अस्पताल अउ मेडिकल कॉलेज के डॉक्टर अउ स्वास्थ्य कर्मी मन ह घटना के विरोध म कैंडल मार्च निकालिन, जेमा आम लोगन मन घलो सामिल होइन।
कांग्रेस प्रदर्शन
कांग्रेस विधायक देवेन्द्र यादव के गिरफ्तारी के विरोध म प्रदेस कांग्रेस कमेटी ह इक्कीस अगस्त के प्रदेस के जम्मो जिला मुख्यालय मन म प्रदर्सन करही। ए बारे म आज रईपुर स्थित प्रदेस कार्यालय राजीव भवन म पत्रकारवार्ता म कांग्रेस अध्यक्ष दीपक बैज ह किहीन कि कांग्रेस नेता मन ल निसाना बनाय जात हे। ओमन आरोप लगाइन कि प्रदेस सरकार बदला लेके काम करत हे। पत्रकार मन के तीर नेता प्रतिपक्ष डॉक्टर चरणदास महंत अउ पूर्व मुख्यमंत्री भूपेश बघेल ह घलो अपन बात राखिन। त उहें, काली छत्तीसगढ़ विधानसभा म नेता प्रतिपक्ष डॉक्टर चरणदास के अगुवई म कांग्रेस विधायक दल के बइठका होही। बइठका म पूर्व प्रधानमंत्री राजीव गांधी के जयंती अउ भिलाई विधायक देवेन्द्र यादव के गिरफ्तारी के बारे म गोठबात करे जाही।
मुख्य सचिव-समीक्षा
मुख्य सचिव अमिताभ जैन ह काली वीडियो कान्फ्रेंसिंग के माध्यम ले राज्य के संभागायुक्त अउ कलेक्टर मनके बइठका लीन। बइठका म राज्य शासन के जरूरी योजना मनके काम-काज के समीक्षा करे गीस। मुख्य सचिव ह ग्रामीण अउ सहरी क्षेत्र मन म राजस्व अभिलेख म गलती के सुधार, ‘एक पेड़ मां के नांव, नारी सक्ति ले जल सक्ति, जलजीवन मिसन, श्रम पोर्टल म दरज मजूर मनके रासन कार्ड बनाय अउ लइका मनके अधिकार के संरक्षण के संगेसंग अउ कतकोन जरूरी मुद्दा उपर जानबा लीन। अइसने स्वास्थ्य विभाग के अधिकारी मनले आने-आने स्वास्थ्य कारीकरम म होय कामकाज उपर गोठबात करीन।
आईईडी/माओवादी सामग्री-बरामद
सुकमा जिला म सुरक्षाबल मन ह माओवादी मन डहार ले लुकाके राखेगे गोलाबारूद बरामद करे हे। जिला के अतिरिक्त पुलिस अधीक्षक निखिल राखेचा ह बतइन कि डीआरजी अउ बस्तर फाइटर्स के जवान मन ह किस्टाराम थाना क्षेत्र के मेटागुड़ा अउ भेज्जी के बिराभट्टी जघा ले दू ठिन बीजीएल, राइफल, बीजीएल सेल के संगेसंग माओवादी जिनिस बरामद करे हे।
ऐति, नारायणपुर जिला के धनोरा थाना क्षेत्र म सुरक्षा बल मन ह दू-दू किलो वजन के दू ठिन आईईडी बरामद करे हे। हमर संवाददाता ले मिले जानबा के मुताबिक आज अमदईघाटी-धनोरा-ओरछा म आईटीबीपी अउ डीआरजी के जवान मन ह डिमाइनिंग ऑपरेसन चलाइन। इही दौरान धनोरा ले करीबन बारह सौ मीटर के दूरिहा म जवान मन ह ए आईईडी ल बरामद करीन। बाद म बम निरोधक टीम ह एला निष्क्रिय कर दीन।
उहें, इही जिला म सुरक्षाबल मन ह आने-आने जघा ले बड़अकन माओवादी जिनिस बरामद करे हे। पाछू सोलह अगस्त के डीआरजी अउ एड़का थाना पुलिस ह नारायणपुर -कांकेर के सरहदी क्षेत्र म सर्चिंग के दौरान उपरकामता-सापेनपारा गांव के जंगल म माओवादी जिनिस के संगेसंग अउ कतकोन समान बरामद करे गीस। त उहें, सत्रह अगस्त के घलो सर्चिंग के दौरान गांव मानकोट जंगलपारा के जंगल ले वॉकी-टॉकी, वर्दी-टोपी के संग कतकोन माओवादी जिनिस बरामद करे गीस।
रक्षाबंधन
भाई-बहिनी के सुघ्घर प्रेम के तिहार रक्षाबंधन काली मनाय जाही। काली के तिहार ल लेके रईपुर के संगेसंग पूरा प्रदेस म बाजार मन म भीड़ बाढ़ गेहे। एसो घलो स्व-सहायता समूह के माईलोगिन मन डहार ले बनाय गे रंग-रंग के राखी बाजार म बेचे जात हे।
राज्यपाल रमेन डेका अउ मुख्यमंत्री विष्णुदेव साय ह रक्षाबंधन के मउका म प्रदेस के लोगन मन ल बधई अउ सुभकामना दे हवय।
मुख्यमंत्री कांवड़ यात्रा
मुख्यमंत्री विष्णुदेव साय ह आज रईपुर के गुढ़ियारी म मारूती मंगलम भवन म होय कांवड़ यात्रा कारीकरम म सामिल होइन। ए मउका म विधानसभा अध्यक्ष डॉ. रमन सिंह, राजस्व मंत्री टंकराम वर्मा, सांसद बृजमोहन अग्रवाल अउ विधायक राजेश मूणत घलो आय रिहीन। मुख्यमंत्री ह किहीन कि सावन के महिना म भोरमदेव के दर्सन के संगेसंग पाछू दिन कांवड़ी मन उपर हेलीकाप्टर ले पुष्पवर्षा के मउका मिलिस। एखर पहिली मुख्यमंत्री निवास म श्री साय ह अपन गोसाइन के संग शिव रूद्रामहाभिषेक अउ हवन पूजन करे गीस। अउ संगेसंग प्रदेस के लोगन मनके सुख-समृध्दि के कामना करे गीस।
जंगल सफारी-प्लास्टिक मुक्त
नवा रईपुर के जंगल सफारी ल प्लास्टिक मुक्त बनाय बर आज ले प्रबंधन ह पर्यटक मन डहार ले प्लास्टिक के कोनो समान ले जाय उपर रोक लगा देहे। जंगल सफारी के निदेसक धम्मशील गणवीर ह बतइन कि अब ले जंगल सफारी म अवइया मनखे मन ह प्लास्टिक के समान नइ ले जाय सकय, अउ संगेसंग प्लास्टिक पैकेट वाले जिनिस उपर घलो रोक लगा दे गेहे। ओमन किहीन कि प्लास्टिक के सेति पर्यावरण उपर होवइया गलत परिणाम के बारे म अवइया पर्यटक मन ल जागरूक करे जाही।
आकाशीय बिजली मौत
जशपुर जिला म पाछू संझा गाज गिरे ले दू ठिन आने-आने घटना म तीन झिन लोगन के मउत होगे। पहिली घटना एकम्बा गांव के हरय, जिहां खेत म धान के रोपा लगावत पति-पत्नी के गाज गिरे ले मउत होगे। त उहें, दूसर घटना सन्ना थाना क्षेत्र के छिछली गांव के हरय, जिहां खेत म काम करत खानी एक झिन मनखे के उपर गाज गिरगे, जेखर ले ओखर मउकच म मउत होगे।
ट्रेन परिचालन
जबलपुर रेल मंडल के कटनी मुरवाड़ा-बीना रेलवे स्टेसन मनके बीच दमोह स्टेसन ल तीसर रेल लाइन ले जोड़े के काम करे जाही। उहें, बिलासपुर रेल मंडल के उमरिया स्टेसन म नॉन इंटरलॉकिंग के काम करे जाही, जेखर सेति चौबीस अगस्त ले नौ सितंबर तक छियालिस ठिन रेलगाड़ी नइ चलय। त उहें, आठ ठिन रेलगाड़ी मन ल दूसर रद्दा ले चलाय जाही। रद्द होय गाड़ी म चिरमिरी-चंदिया रोड पैसेंजर, कटनी-चिरमिरी मेमू स्पेसल, चिरमिरी-अनूपपुर पैसेंजर स्पेसल, बिलासपुर-इंदौर नर्मदा एक्सप्रेस, जबलपुर-अंबिकापुर एक्सप्रेस, बिलासपुर-रींवा एक्सप्रेस, रींवा-चिरमिरी पैसेंजर स्पेसल, लखनऊ-रायपुर गरीब रथ एक्सप्रेस, दुर्ग-कानपुर एक्सप्रेस अउ दुर्ग-नौतनवा एक्सप्रेस के संगेसंग अउ आने रेलगाड़ी घलो सामिल हे।
प्रसार भारती-पी.बी.शब्द
प्रसार भारती ह मीडिया संगठन मनले जिनिस मंगाय के उद्देस्य ले पी.बी.शब्द सेवा सुरू करे हे। मीडिया संगठन ह मार्च दू हजार पचीस तक एखर परयोग मुफत म कर सकही। एखर बर संगठन मन ह ‘शब्द डॉट प्रसार भारती डॉट ओआरजी/रजिस्टर‘ म पंजीकरण करा सकथे। पी.बी.शब्द के उद्देस्य मीडिया संगठन मन ल देस के प्रमुख भाषा मन म ताजा-ताजा समाचार देवाना हे। जेमा वीडियो, ऑडियो टैक्स अउ फोटू घलो सामिल हे।