केंद्रीय मंत्री डॉ. वीरेन्द्र कुमार ह समारोह ल संबोधित करत किहीन कि दिव्य कला मेला दिव्यांगजन मनके अद्वितीय कौसल अउ उद्यमसीलता के अच्छा प्रदर्सन हे। दिव्यांगजन म प्रतिभा के कमी नइ हे। जरूरत ओमन ल आगू बढ़ाय के हे। इही उद्देस्य ले केंद्र सरकार डहार ले दिव्यांगजन मनके सामाजिक अउ आर्थिक ससक्तिकरण बर कतकोन योजना चलाय जात हे। ओमन ह किहीन कि राजनांदगांव म संचालित राज्य संसाधन केंद्र-सीआरसी के नवा भवन बने के बाद उंहा दिव्यांगजन मन बर डिप्लोमा, स्नातक अउ स्नात्कोत्तर पाठ्यक्रम संचालित करे जाही। डॉ. कुमार ह किहीन कि छत्तीसगढ़ के आने सहर म घलो दिव्य कला मेला के आयोजन करे जाही।
ए मउका म मुख्यमंत्री विष्णुदेव साय ह किहीन कि दिव्यकला मेला ह दिव्यांगजन मनके रचनात्मकता, कौसल अउ श्रृजन सीलता ल एक मंच देहे, जेखर ले ओमन अपन उत्पाद ल देस-विदेस म प्रदर्सित कर सकय। ओमन ह किहीन कि दिव्य कला मेला के आयोजन ह न सिर्फ दिव्यांगजन मनके भागीदारी ल बढ़ावा देहे, बल्कि ओखर आर्थिक अउ सामाजिक ससक्तिकरण ल घलो सुनिश्चित करे हे।
समारोह ल उप मुख्यमंत्री अरूण साव, समाज कल्याण अउ महिला अउ बाल विकास मंत्री लक्ष्मी राजवाड़े अउ सासंद बृजमोहन अग्रवाल ह घलो संबोधित करीन।
केंद्रीय मंत्री-दिव्य कला मेला-02
कारीकरम म केंद्रीय मंत्री डॉ. वीरेन्द्र कुमार अउ मुख्यमंत्री विष्णुदेव साय ह बलौदाबाजार जिला के चार दिव्यांगजन मन ल मोटराईज्ड ट्रायसाइकिल अउ एक दिव्यांग ल ट्रायसाइकिल दीन। उहें, ग्यारह दिव्यांग हितग्राही मन ल ट्रैक्टर, ई-रिक्सा क्रय, ट्रैक्टर ट्राली, मेडिकल स्टोर, रेडीमेड गारमेंट, किराना दुकान, सेंटरिंग प्लेट अउ टेंट हाउस व्यवसाय बर ऋण रासि के चेक दीन। कारीकरम म मुख्यमंत्री श्री साय ह आकांक्षा इंस्टीट्यूट के विद्यार्थी मन ल ओखर मनमोहक प्रस्तुती बर पुरस्कार स्वरूप इंक्यावन हजार रूपिया के रासि के चेक दीन। मेला म मुख्यमंत्री ल हीरा धृतलहरे ल अपन हाथ ले बने पैरासिल्प पोट्रेट भेंट करीन।
कारीकरम के दौरान केंद्रीय मंत्री अउ मुख्यमंत्री ह मेला म लगाय गे आने-आने स्टाल मनके अवलोकन करीन।
जानबा के मुताबिक रईपुर म होवइया दिव्य कला मेला तेइस अगस्त तक आयोजित करे जाही, जेन बिहनिया दस बजे ले रात नौ बजे तक आम जनता बर खुले रइही।
रेल परियोजना-स्वीकृति
रेल मंत्रालय ह दक्षिण पूर्व मध्य रेलवे के तहत छत्तीसगढ़ म करीब सत्रह करोड़ रूपिया के लागत के छै सौ सत्तर किलोमीटर के दू नवा रेल लाइन परियोजना के आखिरी सर्वे अउ डीपीआर निर्माण ल स्वीकृति देहे। ए रेल लाइन परियोजना म गढ़चिरौली ले बीजापुर होवत बचेली तक चार सौ नब्बे किलोमीटर के नवा रेल लाइन ल स्वीकृति दे गेहे। ए सर्वे बर रेल मंत्रालय ह बारह करोड़ रूपिया ले जादा के रासि स्वीकृत करे हे। उहें, कोरबा ले अंबिकापुर तक एक सौ अस्सी किलोमीटर के नवा रेल लाइन के सर्वे ल घलो स्वीकृति दे गेहे। एखर बर रेल मंत्रालय ह साढ़े चार करोड़ रूपिया के मंजूरी देहे।
मुख्यमंत्री विष्णुदेव साय ह ए परियोजना मन बर प्रधानमंत्री नरेंद्र मोदी अउ रेल मंत्री अश्विनी वैष्णव के आभार जताइन। ओमन ह किहीन कि ए परियोजना के स्वीकृति ले बस्तर अउ सरगुजा संभाग म रेलवे के क्षेत्र म विकास के रास्ता आगू बढ़ही। संगेसंग रोजगार के नवा अवसर घलो मिलही।
डॉक्टर-हड़ताल
कोलकाता के आरजीके मेडिकल कॉलेज म महिला डॉक्टर के संग दुष्कर्म अउ हत्या के विरोध म आज इंडियन मेडिकल एसोसिएशन-आई.ए.एम. के आह्वान म छत्तीसगढ़ के संग देस भर के डॉक्टर हड़ताल म हे। हड़ताल के सेति सरकारी अउ निजी अस्पताल मन म ओपीडी अउ ऑपरेसन के संग आने सेवा प्रभावित होय हे। अस्पताल मन म सिर्फ आपातकालीन सेवा चलत हे।
इंडियन मेडिकल एसोसिएसन के छत्तीसगढ़ प्रवक्ता सुरेंद्र शुक्ला ह बतइन कि प्रदेस के सब्बो डॉक्टर अउ नर्सिंग होम म आज बिहनिया छै बजे ले काली मंझनिया छै बजे तक केवल आपात कालीन सेवा चलही। आने सब्बो चिकित्साकीय काम बंद रइही।
इही बीच, केंद्रीय स्वास्थ्य मंत्रालय ह प्रदर्सनकारी डॉक्टर मन ल उंखर सुरक्षा सुनिश्चित करे बर हर संभव प्रयास करे के आश्वासन देवत हुए ओमन ल व्यापक जन हित म काम म लहुटे के आग्रह करीन। मंत्रालय ह केहे हे कि स्वास्थ्य पेसावर के सुरक्षा सुनिश्चित करे के उपाय के सुझाव देबर एक समिति बनाय जाही अउ राज्य सरकार के संग सब्बो हितधारक मनके प्रतिनिधि ल अपन सुझाव साझा करे बर आमंत्रित करे जाही।
‘किसानों की बात‘
केंद्र सरकार नवा वैज्ञानिक तकनीक तक किसान मनके पहुंच बनाय बर रेडियो म ए कारीकरम ‘किसानां की बात‘ सुरू करही। ए कारीकरम आकाशवाणी म प्रधानमंत्री नरेंद्र मोदी के मासिक कारीकरम ‘मन की बात‘ के तर्ज म होही। केंद्रीय कृषि अउ किसान कल्याण मंत्री शिवराज सिंह चौहान ह किहीन कि ए कारीकरम सितंबर म सुरू होही।
रक्षाबंधन-सार्वजनिक अवकाश
राज्य सरकार ह उन्नीस अगस्त रक्षाबंधन परब म सार्वजनिक अवकास घोसित करे हे। सामान्य प्रशासन विभाग ह ए संबंध म अधिसूचना जारी कर देहे। जानबा के मुताबिक राज्य सरकार ह रक्षाबंधन के बेरा म पहिली सामान्य अवकास घोसित करे रिहीस। अब नवा अधिसूचना के अनुसार उन्नीस अगस्त के रक्षाबंधन परब म छत्तीसगढ़ म निगोशिएबल इन्स्टूमेंट्स एक्स के तहत सार्वजनिक अवकास रइही।
उपमुख्यमंत्री-समीक्षा बैठक
उप मुख्यमंत्री अरूण साव ह आज रईपुर म लोरमी विधानसभा क्षेत्र के विकासखंड अउ तहसील स्तरीय अधिकारी मनके बइठका लेके विकास काम के प्रगति अउ शासकीय योजना के क्रियान्वयन के समीक्षा करीन। बइठका म श्री साव ह लोरमी क्षेत्र के कानून व्यवस्था के स्थिती के संग सबो विभाग के काम के बारी-बारी ले समीक्षा करीन अउ अधिकारी मन ल जरूरी निरदेस दीन। ओमन ह किहीन कि राज्य सरकार के विकास काम अउ योजना मन ल लोगन मन तक पहुंचाय म लोरमी प्रदेस म नजीर बने। उपमुख्यमंत्री ह लोरमी के मुख्य नगर पालिका के अधिकारी ल सहर म नगर पालिका के अनुरूप सुविधा विकसित करे बर किहीन। ओमन ह क्षेत्र म पीडीएस दुकान के संख्या बढ़ाय के घलो निरदेस दीन।
हल्बी/गोण्डी-समाचार बुलेटिन
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र एके संघरा रिले करही। ए दारी के अंक म ‘‘बीजापुर‘‘ जिला के बारे म जानकारी दे जाही।
भाजपा नेता-हमला
बीजापुर जिला के भोपालपट्टनम म भाजपा के जिला महामंत्री बिलाल खान ल आज ओखरे एक सुरक्षाकर्मी ह गोली मारे के कोसिस करिस। पुलिस अधीक्षक ह आरोपी जवान ल निलंबित करके ओखर खिलाफ विभागीय जांच के आदेस देहे।
जानबा के मुताबिक आज बिहनिया भाजपा नेता के सुरक्षा म तैनात आरक्षक नागेश टिंगे ह नशा के हालात म घर म घुसके अपन सर्विस रायफल ले भाजपा नेता उपर गोली चलाय के प्रयास करीस, तभे एक आने सुरक्षा कर्मी ह घर के दरवाजा बंद करके भाजपा नेता के जान बचाइस।
बैडमिंटन प्रतियोगिता
जांजगीर के शासकीय टीसीएल कॉलेज म तेइसवां राज्य स्तरीय बैडमिंटन प्रतियोगिता के आयोजन करे गीस। पांच दिवसीय ए प्रतियोगिता म पचीस जिला ले एक सौ इकहत्तर खिलाड़ी मन भाग लीन। एमा राष्ट्रीय खिलाड़ी रईपुर के रौनक चौहान घलो सामिल होइन। समापन कारीकरम म मुख्य अतिथि विधायक ब्यास कश्यप ह विजेता खिलाड़ी मन ल पुरस्कार दीन।
ए प्रतियोगिता म मिक्स डबल्स, मेंस डबल्स, मेंस सिंगल, वुमेंस डबल्स अउ वुमेंस सिंगल खिलाड़ी मनके बीच मैच होइस। ए दौरान अलग-अलग आयु वर्ग के खिलाड़ी मन ह अपन खेल के प्रदर्सन करीन।
देवेन्द्र यादव-गिरफ्तार
बलौदाबाजार म कलेक्ट्रेट अउ पुलिस अधीक्षक कार्यालय म आगजनी अउ तोड़फोड़ के मामला म आज पुलिस ह भिलाई के विधायक देवेन्द्र यादव ल करीन गिरफ्तार। ए मउका म विधायक के समर्थक अउ पुलिस के बीच झड़प होय के घलो खबर हे। पुलिस डहार ले विधायक देवेन्द्र यादव ल पूछताछ बर तीन बार नोटिस जारी करे गे रिहीस। फेर नोटिस के बावजूद पूछताछ बर उपस्थित नइ होय म ओला गिरफ्तार करे गीस।