दिव्य कला मेला
केंद्रीय सामाजिक न्याय अउ अधिकारिता मंत्री डॉक्टर वीरेंद्र कुमार काली रईपुर म राखेगे सत्रहवां दिव्य कला मेला के उद्घाटन करही। एक हफ्ता तक चलइया ए मेला दिव्यांग कारीगर अउ उद्यमी मन ल ससक्त बनाय उपर केंद्रीत होही। एखर आयोजन भारत सरकार के सामाजिक न्याय अउ अधिकारिता मंत्रालय के तहत दिव्यांगजन ससक्तिकरण विभाग डहार ले करे जात हे। ए मेला म सौ ले जादा दिव्यांग कारीगर मन कोति ले घर के सजावट, जीवन सैली के उत्पाद, कपडा, पर्यावरण के अनुकूल जिनिस के संग्रह होही। अवइया मन ल ए हाथ ले बने जिनिस मन ल देखे अउ खरीदे के मउका मिलही। ए आयोजन म दिव्यांग जन मन ल दिव्य कला सक्ति रोजगार मेला अउ ऋण मेला के माध्यम ले ससक्त बनाय जाही।
किसान सम्मेलन
भारतीय कृषि अनुसंधान परिषद डहार ले काली लाभार्थी किसान सम्मेलन के आयोजन रईपुर के बरौंडा स्थित राष्ट्रीय जैविक स्ट्रैस प्रबंधन संस्थान म करे जाही। ए मउका म किसान मन ल कृषि उपकरण बांटे जाही। ए कारीकरम म विधानसभा अध्यक्ष डॉ. रमन सिंह मुख्य अतिथि के रूप म सामिल होही। उहें, कृषि मंत्री रामविचार नेताम विशिष्ट अतिथि अउ धरसींवा विधायक अनुज शर्मा बिसेस अतिथि के रूप म मौजूद होही।
स्वदेशी मेला ब्रोशर विमोचन
मुख्यमंत्री विष्णुदेव साय ह आज अपन निवास कार्यालय म छत्तीसगढ़ के आने-आने जिला मन म भारतीय विपणन विकास केन्द्र डहार ले आयोजित होवइया ’’स्वदेशी मेला’’ के ब्रोशर के विमोचन करीन। ए मउका म भारतीय विपणन विकास केन्द्र के मेला प्रबंधक सुब्रत चाकी ह बतइन कि पाछु दू दशक ले ए कारीकरम हरेक साल आने-आने जिला म आयोजित करे जात हे। ओमन बतइन कि स्वदेशी मेला भारतीय उद्यमी मन बर नवा व्यवसायिक अवसर उपलब्ध कराथे। ए मेला भारतीय उत्पादक, ग्रामीण, कुटीर, निजी, सहकारी अउ सार्वजनिक क्षेत्र के उपक्रम मन बर लाभकारी आयोजन के रूप म उभरे हे।
आईईसी-अभियान
स्वास्थ्य मंत्री श्याम बिहारी जायसवाल ह आज रइपुर के शासकीय कन्या महाविद्यालय म एच.आई.वी. एड्स के रोकथाम अउ जन-जागरूकता बर सघन प्रचार-प्रसार कारीकरम आईईसी अभियान के सुभारंभ करीन। ए दउरान स्वास्थ्य मंत्री ह बतइन कि राष्ट्रीय एड्स नियंत्रण संगठन-नाको के सुझाव के अनुसार राज्यभर म एचआईवी अउ यौन संचारित संक्रमण मन के बारे म आम लोगन अउ बिसेस कर युवा मन ल ज्ञान के स्तर ल बढ़ाय बर गहन आईईसी अभियान सुरू करे गेहे।
ए मउका म श्री जायसवाल ह एड्स के रोकथाम बर जन-जागरूकता रथ ल हरियर झंडा दिखाके रवाना करीन। ए रथ ह पांच जिला-रईपुर, दुरूग, राजनांदगांव, बिलासपुर अउ सरगुजा के ग्रामीण अउ सहरी क्षेत्र मन म लोगन ल जागरूक करहीं।
उपमुख्यमंत्री-दौरा
उपमुख्यमंत्री अउ गृहमंत्री विजय शर्मा ह आज माओवाद प्रभावित सुकमा जिला के पूवर्ती अउ बीजापुर जिला के पालनार गांव के दउरा करीन। ए दौरान ओमन ग्रामीण अउ जवान मन ले भेंट करे अउ ओमन के समस्या सुनिन। पालनार के ग्रामीण मन उपमुख्यमंत्री ले बिजली, पानी, सड़क अउ स्कूल के मांग करीन। एमा उप मुख्यमंत्री ह ग्रामीण मन ल आश्वस्त करीन कि जल्दी ही बुनियादी सुविधा मौजूद होही। उप मुख्यमंत्री ह पालनार म ग्रामीण मन ल जमीन के पट्टा, रासन कारड, आधार कारड अउ युवा मन बर खेल समान दीन। उप मुख्यमंत्री ह ग्रामीण मन ले किहीन कि एक हफ्ता के अंदर सात ठिन गांव म सौर ऊर्जा ले चलने वाला टीवी अउ डीटीएच लगा दे जाही। बतादन कि पूवर्ती माओवादी कमांडर हिड़मा के गांव हरय।
अटल बिहारी-वाजपेयी- पुण्यतिथि
पूर्व प्रधानमंत्री भारत रत्न अटल बिहारी वाजपेयी के आज पुण्यतिथि हरय। ए मउका म राज्यपाल रमेन डेका ह उन ल भावभीनी श्रद्धांजली अर्पित करीन। उंहे, मुख्यमंत्री विष्णुदेव साय ह अपन निवास म पूर्व प्रधानमंत्री स्वर्गीय अटल बिहारी वाजपेयी के छायाचित्र म माला पहिना के ओमन ल नमन करीन। ए मउका म डॉक्टर रामप्रताप सिंह घलो मौजूद रिहीन। मुख्यमंत्री श्री साय ह ए मउका म किहीन कि अटल जी ह ए भौगोलिक क्षेत्र ल नवा राज्य के रूप म आकार दिन हे। पत्रकार, कवि अउ राजनेता के रूप म ओमन अपन अलग पहिचान बनाए रिहीन। श्री साय ह किहीन कि ओ अइसे राजनेता रिहीन, जेला दलगत राजनीति ले ऊपर उठके सबो के सनेह मिलीस।
महिला मोर्चा केंडल मार्च
पश्चिम बंगाल म कोलकाता के आरजीके मेडिकल कॉलेज म महिला डॉक्टर के संग बलात्कार अउ हत्या के विरोध म भाजपा महिला मोर्चा ह आज प्रदेस के जम्मों जिला मुख्यालय मन म केंडल मार्च निकालीस। इही कड़ी म रईपुर सहर जिला के महिला मोर्चा इकाई ह शहीद भगत सिंह चौक ले घड़ी चौक तक केंडल मार्च निकालीस।
एसीबी-छापा
सेंट्रल जेल म बंद सौम्या चौरसिया, रानू साहू अउ समीर बिश्नोई के ठिकाना मन म आज बिहनिया एसीबी के टीम ह छापा मारीस। मिले जानकारी के अनुसार आय ले जादा संपिŸा के मामला म उन्नीस ठिन जघा म छापामारी करे गेहे। बताय जात हे, कि छत्तीसगढ़ के अलावा एसीबी के एक टीम ह राजस्थान के अनुपगढ़ म अउ झारखंड म घलो छापामारी करे हे।
उंहे, भिलाई के नेहरू नगर के रहइया होटल व्यवसायी अनिल कुमार पाठक के घर अउ होटल म इओडब्ल्यू अउ एसीबी के टीम ह आय ले जादा संपिŸा के मामला म छापा मारीस। अइसने कोरबा म एक झन ठेकेदार एम.एस. पटेल के घर म इओडब्ल्यू अउ एसीबी के टीम ह दबिश दिन।
जवान मौत
बीजापुर जिला म सर्विस राइफल के साफ-सफाई के दउरान होय दुर्घटना के सेती गोली चले ले एक झन आरक्षक के मउत होगे। भैरमगढ़ थाना म पदस्थ प्रधान आरक्षक सन्नू हपका आज बिहनिया अपन सर्विस राइफल के साफ-सफाई करत रिहीन। ए दउरान दुर्घटना वस ओखर छाती म गोली लग गे। घायल जवान ल इलाज बर भैरमगढ़ सामुदायिक स्वास्थ्य केन्द्र म भर्ती कराय गीस। जिंहा डॉक्टर मन ओला मृत घोसित कर दिन।
ट्रेन-रद्द
दक्षिण पूर्व रेलवे के चक्रधरपुर मंडल म तीन ठन सेक्शन मन म मेगा ब्लाक लेके जरूरी काम करे जाही। एखरे सेती कुछेक गाड़ी मनके अवई-जवई परभावित रिही। ए रूट ले होक गुजरने वाला टाटानगर-इतवारी-टाटानगर एक्सप्रेस चौबीस, इकत्तीस अगस्त अउ सात, चौदा, इक्कीस, अट्ठाइस सितंबर के रद्द रइही।
उंहे, सतरा चौबीस इकतीस अगस्त अउ सात चौदा, इक्कीस, अट्ठाइस सितंबर के टाटानगर-बिलासपुर-टाटानगर एक्सप्रेस रद्द रइही।
इसरो-प्रक्षेपण
भारतीय अंतरिक्ष अनुसंधान संगठन-इसरो ह आज पृथ्वी अवलोकन उपग्रह अउ एसआर-ओ उपग्रह के सफलतापूर्वक प्रक्षेपण करे हे। ए उपग्रह मन ल लघु उपग्रह प्रक्षेपण यान-एसएसएलवी-डी-थ्री के तीसरा उड़ान के जरिया अंतरिक्ष म भेजे गेहे। ए सफलता ले ए साबित होगे हे कि भारत छोटे अउ सूक्ष्म उपग्रह मन ल अंतरिक्ष म भेजे म सक्षम हरय।
छत्तीसगढ़ के मुख्यमंत्री विष्णुदेव साय ह ए सफलता बर सोसल मीडिया एक्स म इसरो के पूरा टीम ल बधई अउ सुभकामना दीन हे।
बातों-बातों में
मुख्यमंत्री-भारतीय सेना
मुख्यमंत्री विष्णुदेव साय ह आज सोसल मीडिया एक्स म जानकारी साझा करत बतइन कि राज्य सरकार के पहल म अक्टूबर महिना म भारतीय सेना राजधानी रईपुर म पहिली घांव अपन हथियार अउ सैनिक कौसल के प्रस्तुती दिही। एमा सेना के जवान हथियार अउ सैन्य समान प्रदर्सित करही। अइसन तरह कि सैन्य प्रस्तुति छत्तीसगढ़ म पहिली घांव आयोजित करे जाही।
अउ अब मौसम के हाल…
मौसम विभाग ह काली उत्तरी छत्तीसगढ़ म भारी बरसा होय के चेतावनी देहे। उहें, प्रदेस के कई जघा मन म हल्का ले मध्यम बरसा होय अउ एक-दू जघा मन म गरज-चमक के संग गाज गिरे के संभावना जताय हे।
मौसम विभाग के अनुसार एक ठिन निम्नदाब के क्षेत्र बंगाल के खाड़ी अउ बांग्ला देस के उपर स्थित हे। संघरा उपरी हवा के चक्रीय-चक्रवाती घेरा घलो बने हे। एखरे सेति अवइया चौबीस घंटा म प्रदेस के कई जघा म हल्का ले मध्यम बरसा होही।