राष्ट्र आज अठहत्तरवां स्वतंत्रता दिवस मनावत हे। प्रधानमंत्री नरेन्द्र मोदी ह ए मउका म नई दिल्ली म लालकिला म राष्ट्रीय झंडा फहरा के राष्ट्र ल संबोधित करीन। प्रधानमंत्री ह किहीन कि सेमीकंडक्टर उत्पादन म वैश्विक अगुवई हासिल करे म, आयात उपर निर्भरता कम करे म अउ टेक्नोलॉजी के क्षेत्र म आत्मनिर्भरता बाढ़य के भारत के प्रतिबद्धता के उल्लेख करीन। ओमन विनिर्माण, गेमिंग अउ डिजाइनिंग समेत कई ठिन क्षेत्र मन म देस ल वैश्विक नेता के रूप म राखे बर नवाचार के जरूरत उपर बल दीन।
प्रधानमंत्री ह किहीन कि देस के एक सौ चालीस करोड़ नागररिक एक ठिन संकल्प लेके चलही तव हर चुनौती ल नहाक के देस ल बछर दू हजार सैंतालीस तक विकसित राष्ट्र बना सकत हे।
प्रधानमंत्री ह हाले म बाढ़त प्राकृतिक आपदा उपर संसो जतईन हे। ओमन ए आपदा ले परभावित मनखे मन ल आश्वासन दीन हे कि कठिन बेरा म पूरा देस उंखर संग हे। श्री मोदी ह किहीन कि बांग्लादेश के घटना उपर परोसी देस होय के सेती भारत के संसो करना स्वाभाविक हे। भारत उहां हिन्दू मनके सुरक्षा तय करना चाहत हे।
स्वतंत्रता दिवस-प्रधानमंत्री-02
प्रधानमंत्री ह किहीन कि पाछु दस बछर म दस करोड़ माईलोगिन मन स्वयं सहायता समूह ले जुड़के पइसा-कौड़ी के मामला म अपन खुद उपर निर्भर बने हे। संगे ओमन यहू किहीन कि नारी-परानी मन उपर अत्याचार के सेती देस ह रोसियाय हे। फेर माईलोगिन मन संग होय अपराध मनके तुरते जांच अउ दोसी मन ल सजा होना चाही। ओमन किहीन कि मीडिया म दुष्कर्म के घटना तो उजागर होथे, फेर दोसी मन ल मिलइया सजा के जादा प्रचार नइ होवय।
उहें, प्रधानमंत्री ह एक सौ चालीस करोड़ भारतीय मन डहार ले पेरिस ओलंपिक म भाग लेइवया खिलाड़ी मन ल बधाई दीन। संगे पेरिस पैरा ओलंपिक म भाग ले बर जावत खिलाड़ी मन ल घलो सुभकामना दीन।
स्वतंत्रता दिवस-मुख्यमंत्री-01
छत्तीसगढ़ म घलो स्वतंत्रता दिवस देशभक्ति अउ उल्लास के संग मनाय जात हे। मुख्य समारोह राजधानी रायपुर के पुलिस परेड ग्राउंड म राखे गे रिहीस, जिहां मुख्यमंत्री विष्णुदेव साय ह तिरंगा फहरा के परेड के सलामी लीन। ए मउका म ओमन किहीन कि प्रदेस म सुरक्षा बल के जवान मन ह पूरा साहस अउ जज्बा के संग लोकतंत्र विरोधी माओवादी ले मुकाबला करत हे। श्री साय ह बतईन कि बीते आठ महीना म जवान मन अदम्य साहस के परिचय देवत एक सौ छियालीस झिन माओवादी मन ल मार गिराय हे। ए दउरान माओवाद परभावित इलाका मन म बत्तीस ठिन नवा सुरक्षा कैम्प खोले गेहे अउ अवइया बेरा म उनतीस ठिन नवा कैम्प सुरू करे जाही। ओमन किहीन कि बियाबान जघा म नवा कैम्प के विस्तार करके लोगन मन ल आतंक ले मुक्ति देवाय के संगे ए जघा मन म बुनियादी सहुलियत तय करे के काम घलो युद्ध स्तर म होवत हे। मुख्यमंत्री ह किहीन कि माओवादी घटना ले निपटे बर राज्य अन्वेषण एजेंसी-एस.आई.ए. के गठन करे गेहे।
मुख्यमंत्री ह किहीन कि राज्य के अट्ठारह ठिन जिला मन म सत्तर ठिन मल्टी विलेज योजना मनके काम सुरू होगे हे। राज्य सरकार ह प्रदेस म पचास लाख ग्रामीण परिवार मन ल नल कनेक्शन देके लक्ष्य राखे रिहीस, जेमा ले उनचालीस लाख इकतीस हजार परिवार मन ल नल कनेक्शन दे जा चुके हे।
श्री साय ह बतईन कि वन अधिकार पत्र धारक मनके मउत होय के बाद उंखर वारिस मन ल वन अधिकार पत्र ट्रांसफर करे के प्रक्रिया के उल्लेख वन अधिकार नियम म नइ रिहीस, जेला सुधारत राज्य सरकार ह उंखर वारिस मन ल वन अधिकार पत्र हस्तांतरित करे के प्रावधान करे हे।
स्वतंत्रता दिवस-मुख्यमंत्री-02
मुख्यमंत्री ह किहीन कि स्कूल मनके अधोसंरचना ल सुघ्घर बनाय अउ शैक्षणिक सुविधा मनके विस्तार बर पहिली चरण म प्रदेस के दू सौ ग्यारह ठिन स्कूल मन म पीएमश्री योजना सुरू करे गेहे। ए स्कूल मन ल मॉडल स्कूल के रूप म बढ़ाय जाही। ओमन बतईन कि योजना के तीसर चरण म प्रदेस के बावन ठिन स्कूल मन बर स्वीकृति मिले हे। उहें, उच्च सिक्षा म गुणवत्ता तय राखे अउ नवाचार ल बढ़ावा दे बर राज्य सरकार ह छत्तीसगढ़ उच्च सिक्षा मिशन के गठन करे हे। मुख्यमंत्री ह बतईन कि सरकार ह आईआईटी के तर्ज म प्रदेस के हरेक लोकसभा क्षेत्र म टेक्निकल संस्थान सुरू करे बर जावत हे। पहिली चरण म रायपुर, रायगढ़, बस्तर, कबीरधाम अउ जशपुर जिला म एखर स्थापना करे जाही। ओमन यहू बतईन कि संभाग स्तर म एम्स असन छत्तीसगढ़ इंस्टीट्यूट ऑफ मेडिकल सांईंस-सिम्स सुरू करे के निर्णय ले गेहे। रायपुर म मेकाहार अउ बिलासपुर म सिम्स के भवन विस्तार के संगे आने सहुलियत बर काम सुरू कर दे गेहे। ओमन किहीन कि राजधानी के नालंदा परिसर असन तेरा ठिन अउ नगरीय निकाय मन म सर्वसुविधा वाले लाइब्रेरी घलो तैयार करे जाही।
मुख्यमंत्री किहीन कि अर्थव्यवस्था ल अउ जादा गति दे बर प्रदेस के नवा उद्योग नीति तैयार करे जात हे। ओमन बतईन कि रोजगार के मउका बढ़ाय अउ राज्य के वातावरण अनुरूप लागू करे बर छत्तीसगढ़ आर्थिक सलाहकार परिसर के गठन बर घलो सरकार ह निर्णय लेहे।
मुख्यमंत्री-पुलिस पदक
स्वतंत्रता दिवस के मउका म रईपुर के पुलिस परेड ग्राउंड म होय समारोह म मुख्यमंत्री विष्णुदेव साय ह छियालीस झिन पुलिस अधिकारी अउ जवान मन ल उत्कृष्ट सेवा बर पुलिस पदक ले सम्मानित करीन। एमा पुलिस वीरता पदक ले छब्बीस झिन, राष्ट्रपति पुलिस पदक ले दू झिन, सराहनीय सेवा सुधार पदक ले घलो दू झिन, राज्य स्तरीय अउ पुलिस महानिदेशक पदक मन ले पांच झिन अधिकारी-कर्मचारी मन ल सम्मानित करे गीस।
एखर पहिली, मुख्यमंत्री के उपस्थिति म परेड कमांडर रविन्द्र मीणा के अगुवई म सोलह ठिन प्लाटून मन सुघ्घर मार्चपास्ट करीन अउ सलामी दीन। ए मउका म मुख्यमंत्री ह केन्द्रीय बल म केन्द्रीय औद्योगिक सुरक्षा बल अउ राज्य बल म छत्तीसगढ़ सशस्त्र बल-महिला ल पहलइया पुरस्कार से सम्मानित करीन। उहें, छत्तीसगढ़ पुलिस के अश्वारोही दल के घलो प्रदर्सन होइस।
कार्यक्रम म आठ सौ ले जादा स्कूल पढ़ईया नोनी-बाबू मन सांस्कृतिक नाच-गान के प्रस्तुति दीन। एमा सुघ्घर प्रस्तुति देवइया नोनी-बाबू मनके दल ल मुख्यमंत्री ह पुरस्कृत करीन अउ उंखर हौसला बढ़ईन। एमा पहला पुरस्कार शासकीय उच्च माध्यमिक विद्यालय मठपुरैना के पढ़ईया लइका मन ल मिलीस। रायपुर म होय ए मुख्य समारोह म छत्तीसगढ़ बैगपाइपर बैंड के प्रदर्शन घलो होइस।
स्वतंत्रता दिवस-राज्यपाल/मंत्री
स्वतंत्रता दिवस के मउका म आज राजभवन म राज्यपाल रमेन डेका ह राष्ट्रीय झंडा फहरा के परेड के निरीक्षण करीन।
उहें, विधानसभा अध्यक्ष डॉक्टर रमन सिंह ह राजनांदगांव म, उप मुख्यमंत्री अरूण साव ह बिलासपुर म अउ विजय शर्मा ह बस्तर जिला मुख्यालय म तिरंगा फहरईन। स्वास्थ्य मंत्री श्याम बिहारी जायसवाल ह बलौदाबाजार, कृषि मंत्री रामविचार नेताम ह अंबिकापुर, वन मंत्री केदार कश्यप ह दुरूग, उद्योग मंत्री लखनलाल देवांगन ह कोरबा, खाद्य मंत्री दयालदास बघेल ह महासमुंद अउ महिला अउ बाल विकास मंत्री लक्ष्मी राजवाड़े ह बलरामपुर म ध्वजारोहण करीन।
इही तरह, प्रदेस के आने जिला मन म घलो राज्य मंत्रिमंडल के सदस्य, सांसद, विधायक अउ जनप्रतिनिधि मन ध्वजारोहण करीन अउ मुख्यमंत्री डहार ले प्रदेस के जनता के नाव संदेस ल घलो पढ़ीन।
प्रसार भारती-पी.बी. शब्द
प्रसार भारती ह मीडिया संगठन मन ल सामग्री देके उद्देश्य ले ‘पीबी शब्द‘ सेवा सुरू करे हे। मीडिया संगठन ह मार्च दू हजार पच्चीस तक एला बिन पइसा के बउर सकही। एखर बर इच्छुक संगठन ‘शब्द डॉट प्रसार भारती डॉट ओआरजी, रजिस्टर‘ म पंजीकरण करा सकत हे। पीबी शब्द के उद्देश्य मीडिया संगठन मन ल देस के परमुख भासा मन म देसभर के तुरतहे खबर ल उपलब्ध कराना हे। एमा वीडियो, ऑडियो, टेक्सट अउ फोटो सामिल हे।
अउ अब थोरकुन समाचार सार म –
– स्वतंत्रता दिवस म मुख्यमंत्री विष्णुदेव साय ह आज रायपुर के कचहरी चौक स्थित टाउन हॉल म जनसंपर्क विभाग डहार ले लगाय गे सात दिन वाले छात्राचित्र प्रदर्शनी के सुभारंभ करीन। ए प्रदर्सनी ह इक्कीस अगस्त तक लगे रइही।
– सुकमा जिला म माओवादी मन अपने एक झिन संगी कुरसम मनीष के हत्या कर देहे। उहें, इही जिला के पूवर्ती गांव तीर माओवादी मन बीते रतिहा सोलह बछर के एक झन पढ़ईया लइका के घलो हत्या कर देहे।