ऐति, छत्तीसगढ़ म घलो स्वतंत्रता दिवस के मउका म मुख्यमंत्री विष्णुदेव साय रईपुर के पुलिस ग्राउण्ड म होवइया मुख्य समारोह म ध्वजारोहण करके परेड के सलामी लिही। उहें, केंद्रीय राज्य मंत्री तोखन साहू मनेन्द्रगढ़-चिरमिरी-भरतपुर जिला मुख्यालय म उप मुख्यमंत्री अरूण साव बिलासपुर अउ विजय शर्मा बस्तर म राखेगे समारोह म तिरंगा फहराही। एखर संगेसंग विधानसभा अध्यक्ष डॉ. रमन सिंह राजनांदगांव, मंत्री रामविचार नेताम सरगुजा, दयालदास बघेल महासमुंद, केदार कश्यप दुरूग, लखनलाल देवांगन कोरबा, श्याम बिहारी जायसवाल बलौदाबाजार भाटापारा, ओ.पी.चौधरी जांजगीर-चांपा, लक्ष्मी राजवाड़े बलरामपुर- रामानुजगंज अउ टंकराम वर्मा सारंगढ़-बिलाईगढ़ जिला मुख्यालय म राखेगे समारोह म झंडा फहरा के परेड के सलामी लिही। अइसने सांसद विधायक अउ आने जनप्रतिनिधि अपन-अपन क्षेत्र म राखेगे कारीकरम म तिरंगा फहराही।
विधानसभा सचिवालय म काली बिहनिया साढ़े आठ बजे ध्वजारोहण होही। ए मउका म विधानसभा भवन आम नागरिक मन बर बिहनिया दस बजे ले संझा पांच बजे तक खुल्ला रिही। स्वतंत्रता दिवस के पूर्व संध्या म राज्यपाल रमेन डेका अउ मुख्यमंत्री विष्णुदेव साय ह प्रदेसवासी समेत देसभर के लोगन, सेना के जवान अउ स्वतंत्रता सेनानी मन ल बधई अउ सुभकामना दीन हे।
राष्ट्रपति संबोधन
राष्ट्रपति द्रौपदी मुर्मू स्वतंत्रता दिवस के पूर्व संध्या म आज संझा सात बजे राष्ट्र ल संबोधित करहीं। ए आकाशवाणी के आधिकारिक यूट्यूब चैनल आकाशवाणी एआईआर म घलो उपलब्ध होही।
स्वतंत्रता दिवस विशेष अतिथि
ए बछर नई दिल्ली म होवइया अठहत्तरवां स्वतंत्रता दिवस समारोह म देसभर ले करीबन छै हजार बिसेस अतिथि मन ल नेवता दे गेहे। ए बिसेस अतिथि म महिला, युवा, किसान अउ आदिवासी मनके संग समाज के आने-आने वरग के लोगन अउ स्वतंत्रता दिवस प्रश्नोत्तरी प्रतियोगिता के विजेता सामिल हे। आदिवासी वरग के छत्तीसगढ़ ले तेइस झन ल, नीति आयोग कोति ले बीस झन ल स्कूल विभाग म प्रेरणा के रूप म तेइस झन, चार आंगन बाड़ी कार्यकर्ता अउ पंचायत विभाग ले सात झन ल बलाय गेहे।
एसो स्वतंत्रता दिवस समारोह के बिसय हरय विकसित भारत।
बीजापुर मेघावी बच्चे-रायपुर
बीजापुर जिला के कक्षा नवमीं अउ ग्याहरवीं के सौ मेघावी लइका राज्य स्तर म राखेगे आजादी के महापरब म सामिल होय बर रईपुर पहुंच गेहे। ए विद्यार्थी पाछू बारह अउ तेरह अगस्त के हवाई जहाज ले रईपुर पहुंचिन अउ काली राज्यपाल, मुख्यमंत्री निवास, पुरखौती मुक्तांगन, मंत्रालय, ऊर्जा पार्क अउ सॉपिंग मॉल घूमही। बीजापुर कलेक्टर अनुराग पांडेय ह बतइन कि राज्य शासन के परयास ले दूर-दराज के चौबीस ठिन बंद स्कूल ल इही सत्र म फेर ले खोले गेहे।
स्वतंत्रता दौड़
स्वतंत्रता दिवस ले एक दिन पहिली आज प्रदेस के आने-आने जिला म स्वतंत्रता दौड़ राखे गीस। एमा बड़ संख्या म लोगन संघरीन। जगदलपुर म स्वतंत्रता तिरंगा दौड़ बस्तर के आराध्य देवी मां दंतेश्वरी मंदिर के आगू ले सुरू होइस, जउन आने-आने रद्दा ले होवत दंतेश्वरी मंदिर तीर सिराइस। ए तिरंगा दौड़ म पद्मश्री धरमपाल सैनी, बस्तर सांसद महेश कश्यप समेत पुलिस अर्धसैनिक बल के जवान सामिल होइन।
ऑपरेशन सिपाही-रक्षासूत्र
छत्तीसगढ़ म सुरू होय ऑपरेसन सिपाही रक्षासूत्र अभियान काली दिल्ली पहुंचिस। ए रक्षासूत्र म एक चुटकी माटी, एक मौली धागा अउ रक्षक सिपाही मन बर एक पाती सामिल हे। अइसन नौ लाख रक्षासूत्र छत्तीसगढ़ ले दिल्ली पहुंचिस। केंद्रीय राज्यमंत्री तोखन साहू के अगुवई म एक प्रतिनिधि मंडल ह रक्षा राज्यमंत्री संजय सेठ ल सीमा म तैनात जवान मन बर ए रक्षासूत्र सौंपिन। ए अभियान के दिल्ली के सेना मुख्यालय म जोरदरहा सुवागत करे गीस। ए मउका म वाइस चीफ ऑफ आर्मी स्टाफ लेफ्टिनेंट जनरल, एम.वी.सूचिन्द्र कुमार घलो मौजूद रिहीन। ए अभियान ल पूर्व सैनिक संगठन-सिपाही अउ पूर्व सैनिक महासभा ह छत्तीसगढ़ सरकार के मदद ले चलाय गीस। रक्षा राज्यमंत्री ह फोन म राज्य के मुख्यमंत्री विष्णुदेव साय ह ए अभियान बर बधई दीन।
विभाजन विभीषिका दिवस
केन्द्रीय सूचना अउ प्रसारण मंत्रालय के केंद्रीय संचार ब्यूरो प्रादेसिक कार्यालय रईपुर कोति ले विभाजन विभीषिका दिवस के मउका म आज ले बिलासपुर के चिंगराजपारा के शासकीय स्कूल परिसर म तीन दिवसीय मल्टीमीडिया चित्र प्रदर्सनी लगाय गे हे। ए बेरा म केंद्रीय संचार ब्यूरो के प्रमुख शैलेष फाय ह बतइन कि हर बछर चौदह अगस्त के विभाजन विभीषिका दिवस मनाय के फैसला भारत सरकार ह लेहे। कारीकरम म पहुंचे अतिथि मन कोति ले कक्षा नवमीं के सौ झिन छात्र मन ल मुफत म साइकिल बांटे गीस। चित्र प्रदर्सनी के पहिली दिन आज रंगोली प्रतियोगिता होइस अउ काली निबंध अउ चित्रकला प्रतियोगिता होही। उहें, रईपुर रेलवे स्टेसन म घलो आज विभाजन विभीषिका ल देखात चित्र प्रदर्सनी लगाय गीस।
जोहार तिरंगा कार्यक्रम
मुख्यमंत्री विष्णुदेव साय काली रईपुर के इंडोर स्टेडियम म राखेगे जोहार तिरंगा कारीकरम म सामिल होइन। संस्कृति विभाग कोति ले राखेगे ए कारीकरम म देस के मसहूर गायक कैलाश खेर अउ ओखर टीम ह देसभक्ति गीत प्रस्तुत करीन। कारीकरम म बोलत मुख्यमंत्री ह किहीन कि प्रदेस म नौ तारीख ले तिरंगा सप्ताह मनाय जात हे, ए दौरान देसभर समेत प्रदेस म घलो देसभक्ति ले जुड़े कतकोन करीकरम होवत हे। ए मउका म मुख्यमंत्री ह प्रदेसवासी मन ले अपन-अपन घर म तिंरगा फहराय के अपील करीन।
अतिरिक्त न्यायधीश-नियुक्ति
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली विभूदत्त गुरू अउ अमितेंद्र किशोर प्रसाद ल उच्च न्यायालय के अतिरिक्त न्यायाधीश के रूप म सपथ देवाइन।
कांग्रेस संविधान यात्रा
प्रदेस कांग्रेस कमेटी केति ले देस के आजादी के ससत्तरवां वर्षगांठ के पहिली आज प्रदेस के जम्मो वार्ड म संविधान यात्रा निकाले गीस। प्रदेस कांग्रेस अध्यक्ष दीपक बैज रईपुर म राखेगे संविधान यात्रा म सामिल होइन। ए मउका म आने जिला म घलो कांग्रेस के बड़का नेता अउ कार्यकर्ता बड़ संख्या म संघरीन।
आईआईएफटी-एमओयू
मुख्यमंत्री विष्णुदेव साय अउ उद्योग मंत्री लखनलाल देवांगन के मौजूदगी म काली छत्तीसगढ़ म भारतीय विदेस व्यापार संस्थान- आईआईएफटी कोलकाता के निर्यात सुविधा केंद्र अउ भारतीय उद्यमिता विकास संस्थान अहमदाबाद के प्रसिक्षण केंद्र के स्थापना बर एमओयू म दस्खत करीन। आईआईएफटी के सुविधा केंद्र के छत्तीसगढ़ म स्थापना होय ले प्रदेस ले निर्यात करइया व्यापारी मन ल जानकारी मिलही। संगेसंग प्रसिक्षण केंद्र ले इंहा के युवा मन ल उद्यमिता विकास के प्रसिक्षण दे जाही।
गौरेला-पेण्ड्रा-नगर पंचायत
राज्य शासन ह गौरेला-पेण्ड्रा-मरवाही जिला के गौरेला नगर पंचायत अउ पेण्ड्रा नगर पंचायत ल नगर पालिका परिसद बनाय के संबंध म अधिसूचना जारी कर दे हे। राजपत्र म प्रकासित अधिसूचना के मुताबिक नगर पंचायत गौरेला के सीमा नगर पालिका परिसद गौरेला के सीमा होही। अइसने नगर पंचायत पेण्ड्रा के सीमा ही नगर पालिका परिसद के सीमा रइही।
अब मौसम के हाल….
मौसम विभाग ह अवइया चौबीस घंटा के दौरान उत्तर छत्तीसगढ़ के एक-दू जघा म गरज-चमक संग गाज गिरे के संभावना जताय हे। उहें, प्रदेस के जशपुर, कोरिया, मनेन्द्रगढ़-चिरमिरी-भरतपुर, सूरजपुर, बलरामपुर जिला म कुछेक जघा म भारी बरसा हो सकत हे। इही बीच जांजगीर-चांपा जिला के कापन गांव म गाज गिरे ले एक माईलोगन के मउत होगे। उहें, खेत म बूता करत छै झिन आने माईलोगन बिजली के चपेट म आय ले बांच गे।