‘हर घर तिरंगा‘ अभियान के तहत राज्यभर म कई ठिन कारीकरम करे जात हे। ए दउरान लोगन मन ल अपन-अपन घर म तिरंगा झंडा फहराय बर प्रेरित करे जात हे। इही कड़ी म श्रम मंत्री लखनलाल देवांगन के मौजूदगी म कोरबा के घंटाघर म तिरंगा यात्रा निकाले गीस। श्री देवांगन ह ए यात्रा ल हरियर झंडा देखाके रवाना करीन। ए यात्रा ल सहर के कई ठिन रद्दा ले घुमईन अउ एसईसीएल फुटबॉल मैदान म खतम करे गीस।
ओति, बेमेतरा जिला म जिला स्तरीय तिरंगा यात्रा म जिला के कर्मचारी अउ अधिकारी मन ह सामिल होइन। ए तिरंगा यात्रा म कैबिनेट मंत्री दयालदास बघेल के संग बड़ संख्या म लोगन मन ह सामिल होइन।
ऐति, जांजगीर-चांपा म निकाले गे तिरंगा रैली म सांसद कमलेश जांगड़े अउ पूर्व नेता प्रतिपक्ष नारायण चंदेल ह सामिल होइन।
हाथी दिवस-कार्यक्रम
केन्द्रीय पर्यावरण, वन अउ जलवायु परिवर्तन मंत्री भूपेन्द्र यादव ह देस म हाथी मनके प्रति सहानुभूति के भावना ल बढ़ावा दे अउ मनखे अउ हाथी मनके बीच होवत हादसा ल रोके म जोर दीन। श्री यादव ह रईपुर म विश्व हाथी दिवस के मउका म राखे गे एक ठिन कारीकरम के सुरूवात करत किहीन कि हाथी मनके संरक्षण और मनखे मनके भलई ल ध्यान म राखके हम जम्मों झन ल मिलके काम करना चाही।
ए मउका म मुख्यमंत्री विष्णुदेव साय ह किहीन कि राज्य सरकार डहार ले हाथी अउ मनखे मनके बीच म होवत हादसा ल रोके बर ठोस कदम उठाही। ओमन किहीन कि हाथी मनके जानकारी दे खातिर सरगुजा ले ‘‘हमर हाथी-हमर गोठ‘‘ रेडियो कार्यक्रम के प्रसारण घलो करे जाथे। मुख्यमंत्री ह किहीन कि छत्तीसगढ़ म हाथी मनके सुरक्षा ल ध्यान म राखत बादलखोल, तमोरपिंगला अउ एलीफेंट रिजर्व बनाय गेहे।
ई-ऑक्शन प्रणाली
मुख्यमंत्री विष्णुदेव साय अउ केन्द्रीय वन मंत्री ह नवा रईपुर के अरण्य भवन म राज्य म इलेक्ट्रॉनिक ऑक्शन प्रणाली के शुरूआत करीन। ए मउका म वन विभाग डहार ले दू करोड़ रूपिया के लागत ले बनाय गे ‘दण्डकारण्य‘ के सुरूवात करीन। ए ऑडिटोरियम म आतंरिक साज-सज्जा, लाइट, साउंड सिस्टम, एलईडी स्क्रीन जइसन सुविधा के संग एक सौ चालीस झन मनखे मनके बइठे के व्यवस्था करे गेहे।
पोषण आहार नाश्ता
राज्य के श्रम मंत्री लखनलाल देवांगन ह कोरबा जिला के जमनीपाली के सरकारी प्राथमिक अउ माध्यमिक स्कूल म पोषण आहार नाश्ता कारीकरम के सुरूवात करीन। ए मउका म श्री देवांगन ह किहीन कि डी.एम.एफ. के राशि ले कोरबा नगरीय क्षेत्र अउ पोड़ी उपरोड़ा विकासखंड म सरकारी प्राथमिक अउ पूर्व माध्यमिक शाला के लइका मन ल स्कूल शुरू होय के पहिली पौष्टिक नाश्ता दे जाही, जेखर ले लइका मन ह कुपोषित होय ले बाच जही। ओमन किहीन कि ए योजना ल राज्य के जम्मों जिला म जल्दीच सुरू करे जाही।
नई शिक्षा नीति-कार्यशाला
प्रदेस के स्कूल मन म नवा शिक्षा नीति के तहत पाठ्य-पुस्तक मन म जरूरी बदलाव लाय खातिर राज्य स्तरीय पाठ्य पुस्तक लेखन कार्यशाला के कारीकरम करे जात हे। ए कार्यशाला म अवइया बछर ले पहिली ले तीसरी अउ छठवीं कक्षा के पाठ्य पुस्तक मन ल बदले के योजना म विचार करे जात हे। ए दउरान राज्य शैक्षिक अनुसंधान अउ प्रशिक्षण परिषद डहार ले रईपुर म दू दिन के कार्यशाला राखे गीस। ए मउका म स्कूल सिक्षा सचिव सिद्धार्थ कोमल सिंह परदेशी ह किहीन कि प्रारंभिक कक्षा म विद्यार्थी मन ल उंखर स्थानीय भासा म पढ़ाय जाना चाही।
जायसवाल-रेल मंत्री मुलाकात
प्रदेश के स्वास्थ्य मंत्री श्यामबिहारी जायसवाल ह आज दिल्ली प्रवास के दउरान रेल मंत्री अश्वनी वैष्णव ले भेंट करीन। ए दउरान श्री जायसवाल ह केन्द्रीय मंत्री ल चिरमिरी-नागपुर हाल्ट नवा रेललाइन बनाय बर राज्य सरकार डहार ले रासि देके जानकारी दीन। उहें, ओमन बिलासपुर-चिरमिरी-बिलासपुर रेलगाड़ी ल दुरूग रेलवे स्टेसन तक या गोंदिया रेलवे तक बढ़ाय के मांग करीन। उहें, श्री जायसवाल ह शहडोल-नागपुर ट्रेन ल चिरमिरी ले चलाय जाय के मांग राखीन, जेमा रेल मंत्री ह जायसवाल ल आशा देवावत किहीन कि ए जम्मों मांग उपर सही निर्णय ले जाही।
लोक निर्माण विभाग-निर्देश
लोक निर्माण विभाग डहार ले राज्य के नंदियां मन म बने पुलिया के दूनों मुड़ा म अस्थायी बैरियर, रिफ्लेक्टर अउ साइन बोर्ड लगाय के निरदेस दीन, जेखर ले बाढ़ या नंदियां म कतका पानी चलत हे, तेखर पता लगाय जा सकय। ए संबंध म लोक निर्माण विभाग के प्रमुख अभियंता ह सुरक्षित यातायात बर जम्मों परिक्षेत्र मनके मुख्य अभियंता, मंडल मनके अधीक्षण अभियंता अउ संभागीय कार्यपालन अभियंता मन ल परिपत्र जारी कर देहे।
जनसमस्या निवारण शिविर
राज्य के जम्मों नगरीय निकाय मन म सत्ताईस जुलाई ले दस अगस्त तक राखे गे ‘‘जनसमस्या निवारण शिविर‘‘ म करीबन एक लाख बारह हजार अरजी मिले हवय, जेमा ले करीबन पैंतालीस हजार अरजी मनके मउकाच म निराकरण करे गीस। उहें, दूसर विभाग के आवेदन मन ल संबंधित विभाग मन ल भेज दे गेहे। अरजी मनके परीक्षण करके निराकरण करे जाही।
‘एक पेड़ मां के नाम‘
केन्द्रीय पर्यावरण अउ जलवायु परितर्वन मंत्रालय के विशेष सचिव अउ वन विभाग के महानिदेशक जितेन्द्र कुमार ह छत्तीसगढ़ प्रवास के दउरान आज नवा रईपुर के जंगल सफारी म ‘एक पेड़ मां के नाम‘ अभियान के तहत मउहा पेड़ लगईन। ए दउरान ओमन स्कूल म पढ़ईया लइका अउ वन विभाग के कर्मचारी मन ल मोमेंटो भेंट करीन।
उहें, मुख्यमंत्री विष्णुदेव साय ह आज ले ‘एक पेड़ मां के नाम‘ अभियान जइसन ‘एक पेड़ महतारी के नाव‘ अभियान के सुरूवात करीन। मुख्यमंत्री ह ‘एक पेड़ महतारी के नाव‘ रथ ल हरियर झंडा देखाके रवाना करीन।
निर्माण श्रमिक-राशि
राज्य के श्रम मंत्री लखनलाल देवांगन ह प्रदेश के तैंतीस हजार ले जादा निर्माण मजदूर अउ उंखर परिवार वाले मन बर रक्षाबंधन के मउका म करीबन साढ़े चौदह करोड़ रूपिया के राशि मंजूर करे हे। ए राशि ल श्रम विभाग डहार ले मजदूर अउ उंखर परिवार वाले मन बर चलाय जात योजना के तहत डीबीटी के माध्यम ले दे जाही। ए राशि ल छत्तीसगढ़ भवन निर्माण अउ अन्य सन्निर्माण कर्मकार कल्याण मंडल डहार ले मंजूर करे गेहे।
ज्योति पाल-उपलब्धि
राज्य के गौरेला-पेण्ड्रा-मरवाही जिला के कोरजा गांव के ज्योति पाल ल नई दिल्ली म स्वतंत्रता दिवस समारोह म विशिष्ट अतिथि के रूप म नेवता मिले हवय। खबर के मुताबिक जिला के राष्ट्रीय ग्रामीण आजीविका मिशन-बिहान समिति के सदस्य मन ल पहिली घांव ए सम्मान मिले हवय। ज्योति पाल ह आज रईपुर हवाई अड्डा ले नई दिल्ली बर रवाना होगे हे।
अब मौसम के हाल..
मौसम विभाग के मुताबिक राज्य म काली ले कई ठिन जघा म गरज-चमक के संग हल्का बरसा होय के संभावना हे। उहें, कोनों-कोनों जघा म बिजली गिरे के संगेसंग उत्तरी छत्तीसगढ़ म भारी वर्षा होय के चेतावनी दे गेहे।
टेलीविजन चैनल-परामर्श
केंद्रीय सूचना अउ प्रसारण मंत्रालय ह जम्मों प्राईवेट सैटेलाईट टेलीविजन चैनल मन ल परामर्स जारी करके किहीन कि ओमन आपदा अउ दुर्घटना मनके वीडियो ल तारीख अउ दिन के संग देखाय। ए सुझाव म केहे गेहे कि जब कोनों भी प्राकृतिक आपदा आथे, तब टेलीविजन चैनल मन डहार ले कई दिन तक लगातार खबर मन ल चलावत रहिथे, जेखर ले अनावश्यक रूप ले भ्रम के स्थिति पैदा हो जथे।
अउ अब थोरकुन समाचार सार म –
– रईपुर के इंदिरा गांधी कृषि विश्वविद्यालय ले संबद्ध उनचालीस ठन सरकारी अउ प्राईवेट कॉलेज मन ल चालू शैक्षणिक सत्र म बीएससी कृषि स्नातक पाठ्यक्रम म नवा शिक्षा नीति के तहत दाखिला खातिर ऑनलाइन काउंसलिंग सुरू करे गेहे। अभ्यर्थी मन ले पन्द्रह अगस्त तक ऑनलाइन आवेदन मंगाय गेहे।
– चिकित्सा शिक्षा विभाग डहार ले राज्य के सरकारी अउ प्राईवेट चिकित्सा के संगेसंग दंत चिकित्सा कॉलेज मनके स्नातक पाठ्यक्रम के काउंसलिंग प्रक्रिया ल वेबसाइट म प्रकासित कर दे गेहे।
– जांजगीर-चांपा जिला के पुटपुरा गांव म मिडिल स्कूल के छत के प्लास्टर गिरे ले पांच झन लइका मन ल चोट आय हे। ए लइका मन ल जिला अस्पताल म भर्ती कराय गेहे।
अउ
– बलौदाबाजार-भाटापारा जिला के कोसमंदी अउ गातापारा गांव के बीच म बाईस ठन गाय के लास बरामद करे गेहे। पुलिस ह जांच सुरू कर देहे।