केंद्रीय सामाजिक न्याय अउ अधिकारिता मंत्रालय ह आज देस म नसा मुक्त भारत अभियान के तहत नसीला दवई मनके गलत परयोग के खिलाफ एक ठिन सामूहिक रूप ले प्रतिज्ञा लेके कारीकरम राखिस। ए दौरान केंद्रीय सामाजिक न्याय अउ अधिकारिता मंत्री डॉ. विरेन्द्र कुमार ह आज नई दिल्ली म नसा नइ करे के सपथ देवाइन। एसो के बिसय हे – ‘‘विकसित भारत का मंत्र, भारत हो नशे से स्वतंत्र‘‘ ए मउका म केंद्रीय मंत्री ह किहीन कि अब तक ग्यारह करोड़ लोगन मन ए अभियान के भागीदार बन चुके हे।
ऐति, देस व्यापी नशामुक्ति अभियान म प्रदेस के रईपुर स्थित जे.आर.दानी स्कूल के पढ़इया लइका मन ल नशा ले दूर रेहे के सपथ देवाय गीस। ए लइका मन ल केंद्रीय सामाजिक न्याय अउ अधिकारिता मंत्री डॉ. विरेन्द्र कुमार ह वर्चुअल रूप ले सपथ देवाइन।
त उहें, महासमुंद के कलेक्टर विनय कुमार लंगेह ह अधिकारी, करमचारी मन के संग नशा मुक्ति अभियान म वर्चुअल रूप ले जुड़िन। कारीकरम म करीबन दू हजार अधिकारी अउ करमचारी मन ल नशा नइ करे के सपथ देवाय गीस। सपथ ग्रहण करे के बाद रैली घलो निकाले गीस।
मुख्यमंत्री-कृषि किस्म
मुख्यमंत्री विष्णुदेव साय ह प्रधानमंत्री नरेंद्र मोदी के बढ़िया उत्पादन वाले मौसम के हिसाब से बायोफोर्टिफाइड फसल मनके एक सौ नौ किसम मन ल जारी करे उपर बधई अउ सुभकामना दे हवय। एमा चौतीस ठिन खेत के फसल अउ सत्ताईस ठिन बागवानी के फसल घलो सामिल हे। वैज्ञानिक मनके मुताबिक धान के अइसन किसम तियार करे गेहे, जेमा बीस प्रतिसत कम पानी लगही। मुख्यमंत्री ह किहीन कि फसल के ए नवा किसम ले छत्तीसगढ़ म धान के उत्पादन म अउ बढ़ोत्तरी होही।
पीएम-सूर्य घर-मृफ्त बिजली योजना
केंद्र सरकार ह पीएम सूर्य घर मुफ्त बिजली योजना म आदर्स सौर ग्राम योजना बर दिसा-निरदेस जारी करे हे। नवीन अउ नवीकरणीय ऊर्जा मंत्रालय ह आज किहीन कि ए योजना ले पूरा देस के हरेक जिला म एक ठिन आदर्स सौर ग्राम बनाय उपर जोर दे गेहे। ए योजना म एक गांव के आबादी पांच हजार अउ बिसेस श्रेणी के राज्य बर दू हजार ले जादा होना चाही।
हर-घर तिरंगा अभियान
हर-घर तिरंगा अभियान के तहत काली रईपुर के इंडोर स्टेडियम म जोहार तिरंगा कारीकरम राखे गेहे। मुख्यमंत्री विष्णुदेव साय के अगुवई म काली संझा ए कारीकरम होही। ए मउका म जानेमाने गायक कैलाश खेर डहार ले देसभक्ति उपर सुघ्घर गीत गाय जाही। ए कारीकरम संस्कृति विभाग के मदद ले करे जात हे।
त ओति, सक्ति जिला के जैजेपुर म आजादी के ससत्तरवां वर्षगांठ के मउका म ससत्तर फीट तिरंगा लेके भारतीय जनता युवा मोर्चा के कार्यकर्ता मन ह तिरंगा यात्रा निकालिन।
उहें, रईपुर म मसीही समाज डहार ले काली तिरंगा रैली निकाले जाही अउ संगेसंग पंद्रह अगस्त के सेंट पॉल्स कैथेड्रल के पास्ट्रेट यूथ फैलोशिप डहार ले प्रदेस स्तरीय देसभक्ति गीत-संगीत प्रतियोगिता के आयोजन करे जाही।
मुख्यमंत्री-मिनीमाता दिवस
मुख्यमंत्री विष्णुदेव साय ह राजनांदगांव के पùश्री गोविंदराम निर्मलकर ऑडिटोरियम म होय मिनीमाता निर्वाण दिवस अउ जिला स्तरीय सपथ ग्रहण समारोह म सामिल होइन। ए दौरान मुख्यमंत्री ह शासकीय नवीन महाविद्यालय ठेलकाडीह के नांव ल संत गुरूघासीदास बाबा के नांव उपर राखे के घोसना करीन। मुख्यमंत्री ह राजनांदगांव, सोनेसरार, साकरदाहरा अउ मोतीपुर गांव म आने-आने काम-काज बर दस-दस लाख रूपिया देके घोसना करीन। संगेसंग शासकीय पॉलीटेक्निक कालेज राजनांदगांव म मिनीमाता के मूर्ति स्थापना बर पांच लाख रूपिया देके घोसना करीन। कारीकरम म विधानसभा अध्यक्ष अउ इंहा के सांसद घलो सामिल होइन।
ध्वजारोहण
पंद्रह अगस्त स्वतंत्रता दिवस के मउका म झंडा फहराय बर सामान्य प्रशासन विभाग डहार ले मुख्य अतिथि मनके नांव के सूची जारी कर दे गेहे। मुख्यमंत्री विष्णुदेव साय ह राजधानी रईपुर के पुलिस परेड ग्राउण्ड म होवइया समारोह म झंडा फहराय के संगेसंग परेड के सलामी लिही। त उहें, केंद्रीय राज्य मंत्री तोखन साहू ह मनेन्द्रगढ़-चिरमिरी-भरतपुर जिला मुख्यालय म अउ उप मुख्यमंत्री अरूण साव ह बिलासपुर के संगेसंग उप मुख्यमंत्री विजय शर्मा ह बस्तर म होवइया मुख्य समारोह म झंडा फहराही।
ऐति, विधानसभा अध्यक्ष डॉ. रमन सिंह ह राजनांदगांव म, मंत्री रामविचार नेताम सरगुजा म, दयालदास बघेल महासमुंद म, केदार कश्यप दुरूग म, लखनलाल देवांगन कोरबा म, श्याम बिहारी जायसवाल बलौदाबाजार भाटापारा म, ओ.पी.चौधरी जांजगीर-चांपा म, लक्ष्मीराजवाड़े बलरामपुर रामानुजगंज म अउ टंकराम वर्मा ह सारंगढ़-बिलाईगढ़ जिला मुख्यालय म होवइया मुख्य समारोह म सामिल होही।
उच्च न्यायालय-अतिरिक्त न्यायाधीश
अधिवक्ता बिभु दत्त गुरू अउ अमितेंद्र किशोर प्रसाद ल छत्तीसगढ़ उच्च न्यायालय के अतिरिक्त न्यायाधीश के रूप म नियुक्त करे गेहे। ए बारे म केंद्र सरकार के विधि अउ न्याय मंत्रालय ह आज अधिसूचना जारी कर देहे। ए दूनो जज मन के नियुक्ति प्रभार ग्रहण करे के तारिख ले दू बछर बर होही। जज मनके नियुक्ति के बाद छत्तीसगढ़ उच्च न्यायालय म अब न्यायाधीश मनके संख्या सत्रह होगे हे। वइसे प्रदेस बर न्यायाधीश मनके कुल बाईस पद मंजूर हवय।
‘एक पेड़ मां के नाम‘
‘एक पेड़ मां के नाम‘ अभियान के तहत उप मुख्यमंत्री विजय शर्मा ह रईपुर के निमोरा स्थित ठाकुर प्यारेलाल पंचायत अउ ग्रामीण विकास संस्थान म नीम के पउधा लगइन। ए कारीकरम म सचिव निहारिका बारिक सिंह, राजेश सिंह राणा, प्रधानमंत्री आवास योजना ग्रामीण के संचालक रजत बंसल अउ आने अधिकारी अउ करमचारी मन ह घलो कतकोन पउधा लगइन।
लखन लाल देवांगन-पुस्तक विमोचन
वाणिज्य उद्योग अउ श्रम मंत्री लखन लाल देवांगन ह कोरबा म पंडित मुकुटधर पांडेय साहित्य भवन समिति डहार ले राखेगे अभिनंदन अउ पुस्तक विमोचन समारोह म सामिल होइन। ए मउका म ओमन तीन झिन साहित्यकार मनके पुस्तक-बहतरीन के दुलरवा, मधु मंजरी अउ पारस पखना के विमोचन करीन। कारीकरम के दौरान ओमन साहित्य भवन म आने-आने बिकास काम बर विधायक फंड ले बीस लाख रूपिया देके घोसना करीन।
सावन सोमवार
आज सावन के चौथा सोमवार हरय। ए मउका म प्रदेस के शिव मंदिर मन म भगवान भोलेनाथ के बिसेस श्रृंगार करे जात हे। भक्त मन डहार ले लाय गे आने-आने नदिया के जल ले भगवान शिव के जल अभिषेक करे जात हे। राजधानी रईपुर के शिवमंदिर मन म घलो बिहनिया ले पूजा-पाठ करइया मन के भीड़ लगे रिहीस। बुढ़ेश्वर महादेव, हटकेश्वरनाथ मंदिर महादेवघाट के संगेसंग जम्मो मंदिर मन म कांवड़िया मन डहार ले जलाभिषेक करे गीस।
ऐति, उप मुख्यमंत्री अउ गृहमंत्री विजय शर्मा ह अमरकंटक के मृत्युंजय आश्रम म कांवड़िया मन बर करे गे बेवस्था के निरीक्षण करीन। ए मउका म ओमन बतइन कि अमरकंटक ले भोरमदेव मंदिर तक एक सौ पचास किलोमीटर लंबा कांवड़ यात्रा ल सरल बनाय बर बिसेस बेवस्था करे गेहे। कांवड़ियां मन बर डॉक्टर मनके बेवस्था करे गेहे।
गृह निर्माण मंडल-राशि
आवास अउ पर्यावरण मंत्री ओ.पी.चौधरी ह छत्तीसगढ़ गृह निर्माण मंडल म हितग्राही मनके लंबित भुगतान बर पइसा वापसी के निरदेस दीन हे। ए पहल ले करीबन एक सौ अठयासी परिवार मन ल तीन करोड़ रूपिया ले जादा के पइसा मंडल डहार ले वापिस करे गेहे। ए मउका म छत्तीसगढ़ गृह निर्माण मंडल डहार ले तुरते कार्रवाई करके पात्र हितग्राही मन ल पइसा वापिस करे गीस।
आईपीएस-तबादला
राज्य सरकार ह भारतीय पुलिस सेवा के दू झिन अधिकारी मनके प्रभार म बदलाव करे हे। गृह विभाग डहार ले जारी आदेस के मुताबिक आईपीएस अरूण देव गौतम के गृह विभाग के सेवा सामान्य प्रशासन विभाग ले प्रतिनियुक्ति ले वापिस लेवत ओमन ल नगर सेना अउ नागरिक सुरक्षा के संगेसंग अग्निसमन विभाग के महानिदेसक के पद म पदस्थ करे गेहे अउ संगेसंग लोक अभियोजन के संचालक पद के उपराहा प्रभार घलो सौंपे गेहे। उहें, पुलिस महानिरीक्षक नेहा चंपावत ल गृह विभाग के सचिव के पद म पदस्थ करे के संगेसंग सामान्य प्रशासन विभाग के प्रतिनियुक्त उपर सौंपे गेहे।