प्रधानमंत्री-फसल किस्म
प्रधानमंत्री नरेंद्र मोदी ह आज नई दिल्ली म भारतीय कृषि अनुसंधान संस्थान म जादा पैदावार देवइया फसल मनके एक सौ नौ किस्म जारी करिन। जेमा इकसठ फसल सामिल हें। उहें, चौंतीस खेती के अउ सत्ताईस ठन बगवानी के फसल हें। खेती के फसल म बाजरा, तिलहन, दलहन, गन्ना, कपास अउ आने फसल के बीजा घलो सामिल हें। बागवानी फसल म साग-भाजी, कंदमूल, मसाला, फूल अउ औषधि पौधा के बीजा घलो सामिल हें।
ए मउका म प्रधानमंत्री ह किसान अउ वैज्ञानिक मनले घलो गोठबात करिन। ए बेरा प्रधानमंत्री ह नवा फसल के किसम उपर गोठियावत किहीन कि एखर ले खेती किसानी म मूल्यवर्धन होही। ऐति किसान मन किहीन कि नवा किसम ले उंखर खरचा कमती आही अउ पर्यावरण उपर सकारात्मक परभाव परही।
हर-घर तिरंगा अभियान
हर घर तिरंगा अभियान के तहत प्रदेसभर म आने-आने कारीकरम के आयोजन करे जावत हे। इही कड़ी म राजनांदगांव म घलो भारतीय जनता युवा मोर्चा के डहार ले तिरंगा यात्रा निकाले गीस, जेला मुख्यमंत्री विष्णुदेव साय अउ विधानसभा अध्यक्ष डॉ. रमन सिंह ह झंडा दिखाके के रवाना करिन।
उहें, वित्त मंत्री ओपी चौधरी रायगढ़ जिला के ग्राम छींच म ‘हर घर तिरंगा‘ अभियान के तहत आयोजित कारीकरम म सामिल होइन। कारीकरम के बेरा गांव के युवा अउ लइका मन रैली निकालिन अउ स्व-सहायता समूह के दीदी मन मानव श्रृंखला बनाके तिरंगा के सम्मान करिन। ए मउका म वित्त मंत्री ओपी चौधरी ह ग्रामीण, युवा अउ लइका मन ल स्वतंत्रता सेनानी, वीर सपूत मनके भावना के आदर-सम्मान करे के संग देस के प्रगति खातिर समर्पित रेहे बर सपथ देवाइन।
ओति, मुंगेली जिला के विकासखंड मुंगेली, पथरिया अउ लोरमी के कतकोन स्कूल म हर घर तिरंगा कारीकरम के आयोजन करे गीस। ए बेरा स्कूली लइका, गुरूजी, एन.सी.सी. अउ एन.एस.एस कैडेट मन घलो तिरंगा रैली निकालिन। उहें, मुंगेली जिला म काली तिरंगा अउ मैराथन दौड़ के आयोजन करे जाही।
विश्व हाथी दिवस-कार्यक्रम
विश्व हाथी दिवस के मउका म राजधानी रइपुर म काली हाथी मनके संरक्षण अउ संवर्धन बर कारीकरम के आयोजन करे जाही। कारीकरम के मुख्य अतिथि केंद्रीय पर्यावरण, वन अउ जलवायु परिवर्तन मंत्री भूपेन्द्र यादव होहीं। उहें, मुख्यमंत्री विष्णुदेव साय अउ वन मंत्री केदार कश्यप बिसेस अतिथि के रूप म सामिल होहीं। कारीकरम म केंद्रीय पर्यावरण, वन अउ जलवायु परिवर्तन मंत्रालय के वन महानिदेसक जितेन्द्र कुमार घलो हिस्सा लिहीं। एखर आयोजन केंद्र अउ राज्य वन, जलवायु परिवर्तन विभाग के डहार ले संयुक्त रूप ले करे जावत हे।
उहें, केंद्रीय मंत्री भूपेन्द्र यादव अपन रइपुर दउरा के बेरा 13 अगस्त के नंदनवन जंगल सफारी म ‘‘एक पेड़ मां के नाम‘‘ अभियान के तहत पउधारोपण करहीं। संगेसंग स्कूली लइका मनले गोठबात घलो करहीं।
स्कूल-पौष्टिक नाश्ता
प्रदेस के सरकारी स्कूल मन म लइका मन ल मध्यान्ह भोजन ले पहिली पोष्टई जिनिस नास्ता दे जाही। ए पोषण आहार नास्ता कारीकरम के सुरूआत एनटीपीसी जमनीपाली के सरकारी प्राथमिक अउ माध्यमिक साला ले काली होही। ए कारीकरम म मंत्री लखनलाल देवांगन सामिल होहीं। पहिली चरण म कोरबा विधानसभा अउ पोड़ी-पोड़ा ब्लाक म योजना के सुरूआत करे जावत हे।
बतादन कि नवा राष्ट्रीय शिक्षा नीति म मध्यान्ह भोजन के संगे सरकारी या सहायता प्राप्त स्कूल म लइका मन ल मुफत म नास्ता करवाय के प्रावधान राखे ेके घलो प्रस्ताव हे। एखर तहत स्कूली लइका मन ल स्कूल अमरतेच नास्ता दे जाना हे।
बलौदाबाजार-गुणवत्ता आश्वासन प्रमाण
बलौदाबाजार जिला अस्पताल ल स्वास्थ्य सुविधा म बढ़िया कारज करे के सेति राष्ट्रीय गुणवत्ता आश्वासन मानक प्रमाण पत्र मिले हे। राष्ट्रीय स्तर ले अमरे जांच टीम ह तीन दिन तक, अस्पताल म दे जवइया पंद्रह विभाग के सेवा मनके निरीक्षण करिस। जेखर बाद जिला अस्पताल ल गुणवत्ता प्रमाण पत्र जारी करे गीस। ए मउका स्वास्थ्य मंत्री श्याम बिहारी जायसवाल ह अस्पताल ल मिले ए उपलब्धि के सेति बधई अउ सुभकामना दीन हें। बतादन कि जिला अस्पताल ल एखर ले पहिली घलो गुणवत्ता प्रमाण पत्र मिल चुके हे।
वित्त मंत्री-सम्मान समारोहवित्त मंत्री ओपी चौधरी ह रायगढ़ म साहू समाज के डहार ले आायोजित प्रतिभा सम्मान समारोह अउ करियर मार्गदर्सन कारीकरम म सामिल होइन। ए बेरा ओमन साहू समाज के चौरासी झन लइका मन ल सिल्ड अउ प्रमाण पत्र देके सम्मानित करिन। वित्त मंत्री कारीकरम ल संबोधित करत किहीन कि बड़का सोच अउ रणनीति बनाके पढ़ई करे ले ही बड़का ले बड़का लक्ष्य पाय जा सकथे, सिरिफ डिग्री हासिल करे बर पढ़ई झन करंय। ओमन यहू किहीन कि अवइया महिना रायगढ़ म प्रयास आवासीय विद्यालय सुरू हो जाही, जेमा लइका मन बढ़िया पढ़ई के संगे आने-आने प्रतियोगी परीक्षा मन के घलो निसुल्क तियारी घलो कर सकत हें। इही ढंग ले प्रदेस म बाईस ठन नालंदा परिसर सुरू करे जाही, जेमा रायगढ़ घलो सामिल हे।
तेंदूपत्ता-पारिश्रमिक भुगतान
बस्तर जिला के तेंदूपत्ता संग्राहक मन ल बैंक मित्र अउ बैंक सखी के माध्यम ले भुगतान करे जावत हे। जगदलपुर वनमंडल अधिकारी अउ प्रबंध संचालक जिला सहकारी यूनियन उत्तम गुप्ता ह बतइन कि जिला म एसो 36 हजार ले जादा तेंदूपत्ता संग्राहक मन ल 12 करोड़ 43 लाख रूपिया ले जादा पारिश्रमिक भुगतान करे गेहे।
माओवादी मुठभेड़
दंतेवाड़ा जिला म सुरक्षाबल अउ माओवादी मनके बीच होय मुठभेड़ म एक लाख रूपिया के इनामी माओवादी मारे गीस। मिले जानकारी ले डीआरजी अउ बस्तर फाइटर के टीम करीबन पंद्रह माओवादी मनके मौजूद होय के सूचना उपर गस्त म निकले रिहीस। इही बेरा गुमलनार, गिरसापारा अउ करकावाड़ा के जंगल म माओवादी मन सुरक्षाबल उपर गोली चलाइन, जेखर बाद जवान मन घलो जवाबी कारवाही करिन। ए मुठभेड़ म मिलिसिया प्लाटून कमांडर पल्लेवाया मारे गीस। सुरक्षाबल मन घटनास्थल ले माओवादी के सव अउ अब्बड़ अकन माओवादी जिनिस बरामद करे गीस।
बतादन कि ए मामला म मुख्यमंत्री विष्णुदेव साय ह नाराजगी जतावत कलेक्टर ल कारवाही करे के निरदेस दे रिहीन।
ए मउका म मुख्यमंत्री ह किहिन कि मिनीमाता ह अपन जिनगी ल जनसेवा बर समर्पित कर दीस। ओमन दलित मनके अधिकार के संगे बाल विवाह अउ दहेज प्रथा के बिरोध म समाज ले संसद तक अपन आरो देइन। मिनीमाता मजदूर मनके हित अउ नारी शिक्षा बर घलो जागरूक अउ सहयोगी रिहीन हे। मुख्यमंत्री ह यहू बतइन कि समाज अउ महिला मनके उत्थान म जबर योगदान बर मिनीमाता के नांव म राज्य सरकार के डहार ले राज्य अलंकरण पुरस्कार घलो देय जाथे।