देसभक्ति के भावना ल अउ जादा बढ़ावा देबर देसभर म ‘हर घर तिरंगा-अभियान‘ आज ले पंद्रह अगस्त तक चलाय जात हे। प्रधानमंत्री नरेंद्र मोदी ह हर घर तिरंगा अभियान ल यादगार जन आंदोलन बनाय बर देस के जम्मो लोगन मन ले विनती करे हे। ओमन लोगन मन ले केहे हे कि ओमन सोसल मीडिया प्लेटफार्म उपर अपन प्रोफाइल पिक्चर ल तिरंगा के संग बदलय। प्रधानमंत्री ह जम्मो लोगन मन ले हर घर तिरंगा डॉट कॉम म तिरंगा के संग सेल्फी साझा करे के विनती करे हे, त उहे, नई दिल्ली म संवाददाता सम्मेलन म केंद्रीय संस्कृति अउ पर्यटन मंत्री गजेन्द्र सिंह शेखावत ह लोगन मन ले बिनती करे हे कि ओमन अपन घर म तिरंगा झंडा फहराय अउ तिरंगा के संग सेल्फी लेके हर घर तिरंगा वेबसाइट म अपलोड करंय।
ऐति, छत्तीसगढ़ म घलो हर घर तिरंगा अभियान आज ले सुरू होगे हे। एखरे संग प्रदेस म स्वतंत्रता सप्ताह के आयोजन घलो करे जात हे। छत्तीसगढ़ के राज्यपाल रमेन डेका ह जम्मो लोगन मनले हर घर तिरंगा अभियान म उछाह ले भाग लेके अपील करे हे। जम्मो लोगन मन ले केहे हे कि अपन घर म तिरंगा फहराय अउ स्वतंत्रता दिवस ल सम्मान के संग मनावय।
उहें, मुख्यमंत्री विष्णुदेव साय ह किहीन हे कि हर घर तिरंगा कारीकरम म प्रदेस के जम्मो जिला मन म कतकोन कारीकरम होही, जेमा तिरंगा यात्रा, तिरंगा रैली, तिरंगा दौड़, तिरंगा प्रतिज्ञा, तिरंगा सेल्फी अउ तिरंगा मेला जइसन कारीकरम सामिल हे। ओमन किहीन कि हर घर तिरंगा कारीकरम के उद्देस्य तिरंगा के प्रति सम्मान प्रकट करना हे।
विश्व आदिवासी दिवस
आज विश्व आदिवासी दिवस हरय। ए मउका म राजधानी रईपुर के संगेसंग प्रदेस म कतकोन कारीकरम चलत हे। इही कड़ी म बलौदाबाजार भाटापारा जिला के कलेक्टोरेट परिसर म विश्व आदिवासी दिवस उछाह के संग मनाय गीस। ए मउका म होय कारीकरम म कलेक्टर दीपक सोनी के संगेसंग आदिवासी समाज के पदाधिकारी मन ह बड़ा देव के पूजा-पाठ अउ सहीद वीरनारायण सिंह के मूर्ति उपर माला चढ़ाके ओमन ल सुरता करीन। ए कारीकरम म आदिवासी समाज के लोगन मन ह पारंपरिक पहिरावा के संग सामिल होइन। ए दौरान मल्लखम्भ प्रसिक्षण के बीस झिन प्रतिभागी मन ल ड्रेस बांटे गीस अउ संगेसंग वृक्षारोपण करे बर पउधा घलो दे गीस।
उहें, विश्व आदिवासी दिवस के मउका म आज ले ग्यारा अगस्त तक रईपुर के महंत घासीदास संग्राहालय म तीन दिन तक फोटू प्रदर्सनी के आयोजन संस्कृति विभाग डहार ले कराय जात हे।
स्कूल-युक्तियुक्तकरण
प्रदेस के स्कूल मन म शिक्षक मन के कमी ल दूर करे बर राज्य सरकार डहार ले चार हजार ले जादा स्कूल मन के युक्तियुक्तकरण करे जाही। ए बारे म स्कूल शिक्षा विभाग ह उच्च न्यायालय म केवियेट घलो दायर करे देहे। युक्तियुक्तकरण के डा्रफ्ट ल मुख्यमंत्री ले मंजूरी मिले के बाद स्कूल शिक्षा विभाग ह एला लेके काम सुरू कर देहे।
सरकार-कोचिंग सुरक्षा
दिल्ली के एक ठिन कोचिंग सेंटर म होय हादसा के बाद राज्य सरकार ह प्रदेस म चलाय जात जम्मो कोचिंग सेंटर, स्कूल, कालेज, हास्टल, अस्पताल, मॉल अउ सिनेमाघर के संगेसंग जम्मो सार्वजनिक अउ सैक्षणिक संस्थान मन म सुरक्षा जांच के निरदेस देहे। ए निरदेस नगर-निगम के आयुक्त अउ जम्मो मुख्य नगर पालिका के अधिकारी मन ल जारी करे गेहे। एखर बर सहरी क्षेत्र मन म सुरक्षा ऑडिट समिति बनाय बर केहे गेहे। राज्य सरकार डहार ले ऑडिट के काम ल एक महिना म पूरा करके रिपोर्ट देके निरदेस दे गेहे।
फसल बीमा योजना-तिथि
केंद्र सरकार डहार ले कर्जा ले किसान मन बर खरीफ फसल के बीमा कराय के तारीख ल बढ़ाके पचीस अगस्त तक कर दे गेहे, त उहें, जउन किसान मन कर्जा नई लेहे, ओखर मन बर बीमा कराय के आखिरी तारीख सोलह अगस्त तक रइही।
जानबा के मुताबिक प्रधानमंत्री फसल बीमा योजना के तहत पहिली इकतीस जुलाई तक फसल बीमा कराय के आखिरी तारीख राखे गे रिहीस। फेर अब कर्जा लेवइया किसान मन बर फसल बीमा कराय के तारीख ल पचीस अगस्त तक बढ़ा दे गेहे।
राज्य म कृषि विभाग डहार ले चालू खरीफ बछर बर प्रधानमंत्री फसल बीमा योजना के फायदा पाय बर किसान मन ल पंजीयन कराना जरूरी हे। एमा किसान मन धान, सिंचित-असिंचित, सोयाबीन, मूंगफल्ली, मक्का, मूंग, उरीद, कोदो-कुटकी अउ रागी जइसन फसल मनके बीमा करा सकथे।
नगर निगम/पंचायत चुनाव-कमेटी
राज्य सरकार ह नगर पालिक निगम, नगर पालिका, नगर पंचायत, जिला पंचायत अउ जनपद पंचायत मन म एके संघरा चुनई कराय बर एक ठिन कमेटी बनाय हे। कमेटी के अध्यक्ष वन अउ जलवायु परिवर्तन विभाग के अपर मुख्य सचिव ऋचा शर्मा ल बनाय गेहे। त उहें, पंचायत विभाग के सचिव निहारिका बारिक, नगरीय प्रशासन विभाग के सचिव बसवराजू एस., वित्त विभाग के भारसाधक सचिव के प्रतिनिधि ल सदस्य अउ सामान्य प्रशासन विभाग के सचिव अन्बलगन पी. ल सदस्य-सह समन्वयक बनाय गेहे। ए कमेटी मन ल पंद्रह दिन म राज्य शासन ल तीन बिन्दु मन उपर अपन रिपोर्ट पेस करे बर पड़ही। एके संघरा चुनई कराय ल लेके सामान्य प्रशासन विभाग ह आम लोगन मन ले घलो सुझाव मांगे हे।
जानबा के मुताबिक एला लेके विधानसभा म अशासकीय संकल्प घलो लाय गे रिहीस।
उप मुख्यमंत्री-कबीरधाम
उप मुख्यमंत्री अउ गृहमंत्री विजय शर्मा ह कबीरधाम जिला के दउरा म आज तरेगांव, रेंगाखार अउ कवर्धा के पीजी कालेज ऑडिटोरियम म राखेगे विश्व आदिवासी दिवस कारीकरम म सामिल होइन। उप मुख्यमंत्री ह अपन कवर्धा दउरा म दूर-दराज ले आय दिव्यांगजन मन ले मिलिन अउ जिला के पचीस झिन दिव्यांगजन मन ल स्कूटी बांटिन।
जर्जर-स्कूल भवन
गौरेला-पेण्ड्रा-मरवाही जिला के जुन्ना होय उनसठ ठिन स्कूल भवन अउ सौचालय मन ल गिराय बर मरवाही के न्यायालय अनुविभागीय दण्डाधिकारी डहार ले मंजूरी मिल गेहे। एखर ले जुन्ना होय भवन मन ल गिराय जा सकही। एला तोड़े के बाद मलबा अउ आने जिनिस मन ल एखर ले जुड़े ग्राम पंचायत मन ह कार्रवाही करही।
नीरज चोपड़ा-रजत पदक
पेरिस ओलंपिक म नीरज चोपड़ा ह पुरूष मनके भाला फेंक प्रतियोगिता म रजत पदक जीते हे। राष्ट्रपति द्रौपदी मुर्मू, प्रधानमंत्री नरेंद्र मोदी, केंद्रीय गृहमंत्री अमित शाह अउ छत्तीसगढ़ के मुख्यमंत्री विष्णुदेव साय ह पेरिस ओलंपिक म रजत पदक जीतइया नीरज चोपड़ा ल बधई देहे। मुख्यमंत्री ह किहीन कि ओलंपिक म नीरज के प्रदर्सन ह पूरा देसवासी मन के दिल ल जीत लेहे। एखर पहिली के टोकियो ओलंपिक म नीरज चोपड़ा ह गोल्ड मेडल जीते रिहीन।
बलौदाबाजार-संपर्क सुविधा
बलौदाबाजार जिला म आम लोगन मनके समस्या अउ सुझाव के निपटारा बर राज्य शासन डहार ले संपर्क सुविधा केंद्र सुरू करे गेहे। एखर माध्यम ले अब लोगन मन ह अपन समस्या के संगेसंग योजना ले जुड़े जानबा के सुविधा घलो घर बइठे ले सकथे। कलेक्टर दीपक सोनी ह वीडियो काल के माध्यम ले पांच ठिन गांव के लोगन मन ले गोठबात करके संपर्क सुविधा केंद्र के सुरूआत करीन। बलौदाबाजार जिला के कोनो भी मनखे मन नौ दू सून्य एक आठ नौ नौ नौ दू पांच म फोन करके अपन सिकायत दरज करा सकथे। ए सुविधा ल वाट्सअप के माध्यम ले घलो ले सकथे।
सूरजपुर-जलप्रपात विकसित
सूरजपुर जिला के पहाड़गांव अउ कुमेली जलप्रपात ल पर्यटन क्षेत्र के रूप म विकसित करे जाही। सूरजपुर जनपद म सिलफिली के तीर पहाड़गांव हवय। इंहा खोखनिया बांध ले झील बनाय गेहे। इंहा पर्यटन विकास ल देखत प्रशासन कोति ले पहुंच मार्ग के संग जम्मो सुविधा दे जात हे, त उहें, कुमेली जलप्रपात ह सूरजपुर ले करीबन तीस किलोमीटर दूरिहा हे। जिला मुख्यालय ले केतका रोड होवत पचास फीट ऊंचा कुमेली जलप्रपात जाय जा सकथे। जिला प्रशासन डहार ले कुमेली जलप्रपात क्षेत्र के विकास बर एखर ले जुड़े अधिकारी मन ल निरदेस दे गेहे।