मुख्यमंत्री विष्णुदेव साय ह आज रईपुर के अपन निवास कार्यालय म राखे गे ‘‘जनदर्शन‘‘ कार्यक्रम म आय लोगन ल राष्ट्रीय ध्वज तिरंगा बांट के ‘‘हर घर तिरंगा‘‘ अभियान के सुरूवात करीन। आजादी के अमृत महोत्सव म नौ ले पन्द्रह अगस्त तक स्वतंत्रता सप्ताह मनाय जाही। ए दउरान ‘‘हर घर तिरंगा‘‘ कार्यक्रम के आयोजन करे जाही, जेमा सबो नागरिक मन ल राष्ट्रीय ध्वज ल अपन घर म फहराय बर प्रेरित करे जाही अउ राज्य ले जिला स्तर तक तिरंगा यात्रा, तिरंगा रैली, तिरंगा दउड़ अउ मैराथन जइसन कतकोन कारीकरम कराय जाही। ए दउरान तिरंगा प्रतिज्ञा घलो ले जाही। कार्यक्रम म सामिल होवइया लोगन ल तिरंगा संग सेल्फी ले बर प्रोत्साहित करे जाही। संगेसंग स्वतंत्रता संग्राम सेनानी अउ उंखर परिवार वाला मन ल स्थानीय कार्यक्रम म नेवता देके ओमन ल सम्मानित करे जाही। तिरंगा बर सम्मान प्रकट करे बर स्थानीय स्तर म बाईक, सायकल अउ कार रैली निकाले जाही।
संस्कृति विभाग डहार ले सबो जिला कलेक्टर मन ल स्वतंत्रता सप्ताह के दउरान ‘‘हर घर तिरंगा‘‘ कार्यक्रम के आयोजन के संबंध म निरदेस जारी करे बर केहे गे हवय। संगेसंग ए कार्यक्रम म सार्वजनिक उपक्रम, स्व-सहायता समूह अउ सामाजिक संगठन के भागीदारी सुनिश्चित करे के घलो निरदेस दे गे हवय।
जनदर्शन कार्यक्रम
रायपुर के मुख्यमंत्री निवास कार्यालय म राखे गे जनदर्शन कार्यक्रम म मुख्यमंत्री विष्णुदेव साय ह आज लोगन के समस्या सुनीन। ए मउका म मुख्यमंत्री ह श्रम विभाग के आने-आने योजना म छह हजार ले जादा श्रमिक परिवार मन ल ग्यारह करोड़ इकचालीस लाख रूपिया के सहायता राशि के वितरण के सुरूआत बारह झन हितग्राही मन ल सहायता रासि देके करीन।
जनदर्शन कार्यक्रम म रायपुर जिला के ग्राम पंचायत परसुलीडीह के सरपंच के आग्रह म मुख्यमंत्री ह स्कूल भवन म मध्यान्ह भोजन बनाय बर शेड निर्माण के निरदेस दीन। उहें, श्री साय ह बलौदाबाजार जिला के डोंगरिया गांव के किसान मनके केमिकल प्लांट के सेती फसल खराब होय के सिकायत म अधिकारी मन ल कार्रवाई के निरदेस दीन। अइसने, बालोद निवासी बोधन लाल ह मुख्यमंत्री ले भू-अर्जन के मुआवजा राशि के मांग करीन। एमा मुख्यमंत्री ह बालोद कलेक्टर ल कार्रवाई के निरदेस दीन। कार्यक्रम म रईपुर निवासी रोशन साहू के बेटा के गंभीर बीमारी बर स्वास्थ्य विभाग के अधिकारी मन ल इलाज के बने व्यवस्था करे जाय बर किहीन। उहें, बालोद जिला के खपरी गांव के सरपंच जनक बाई के मांग म मुख्यमंत्री ह ईरागुड़ा ले पायला तक जर्जर रद्दा के मरम्मत के आश्वासन दीन। जनदर्शन कार्यक्रम म मुख्यमंत्री ल रक्षाबंधन ले पहिली बहिनी मन ह राखी बांधीन। ए दउरान बिलासपुर के रिशी अग्रवाल अउ बेमेतरा के सिद्धका गोस्वामी ह अपन-अपन पिता के जघा म अनुकंपा नियुक्ति के आग्रह मुख्यमंत्री ले करीन।
कार्यक्रम म मुख्यमंत्री ह रायपुर अउ धमतरी जिला के तीन झन दिव्यांग मन ल बैटरी ले चलइया ट्राईसायकल दीन। उहें, मुख्यमंत्री ले सैंतीसवां राष्ट्रीय खेल म मिनी गोल्फ म कांस्य पदक विजेता महासमुंद के चयन कुमारी अउ रायपुर के रंजीता खलको ह घलो भेंट करीन।
विश्व आदिवासी दिवस
काली विश्व आदिवासी दिवस हे। ए मउका म काली ले रईपुर के महंत घासीदास संग्रहालय म तीन दिवसीस फोटो प्रदर्शनी लगाय जाही, जेखर मुख्य उद्देश्य छत्तीसगढ़ के जनजातीय संस्कृति के बारे म लोगन ल जागरूक करना अउ जनजातीय संस्कृति ल ओखर मूल रूप म बचा के राखे म सहयोग देना हे। ग्यारह अगस्त तक चलइया ए कारीकरम के आयोजन संस्कृति विभाग डहार ले करे जाही।
इही बीच, राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह विश्व आदिवासी दिवस के मउका म प्रदेश के लोगन ल सुभकामना दीन हे। अपन संदेस म राज्यपाल ह किहीन कि ए दिन ह बिसेस रूप ले जनजातीय मन ल अपन संस्कृति, रीति-रिवाज, भासा, मान्यता अउ विचार म गौरव करे के मउका देथे।
राज्यपाल-बैठक
राज्यपाल रमेन डेका ह आज राजभवन म मुख्य सचिव अमिताभ जैन, पुलिस महानिदेशक अशोक जुनेजा, महानिदेशक अरूण देव गौतम अउ दूसर बड़े अधिकारी मन संग बइठका करीन। ए दउरान ओमन ह राज्य म प्रशासन, कानून व्यवस्था, माओवाद परभावित आदिवासी क्षेत्र म केन्द्र अउ राज्य शासन के योजना के क्रियान्वयन के स्थिति, आपदा प्रबंधन के तैयारी संघरा दूसर विसय के बारे म जानकारी लीन। ओमन किहीन कि जउन माओवादी मन आत्मसमर्पण करत हे ओमन ल समाज के मुख्यधारा म लाय के उपाय करे जाय। संगेसंग ए क्षेत्र के लोगन ल केन्द्र अउ राज्य सरकार के योजना के फायदा देवाय जाय। बइठका म राज्यपाल ह मानव तस्करी ल रोके बर करे गे उपाय अउ नवा कानून ल लागू करे बर पुलिस डहार ले करे गे तैयारी के घलोक जानकारी लीन। बइठका म पुलिस महानिदेशक अशोक जूनेजा ह राज्यपाल के आगू पुलिस विभाग के काम के बारे म एक ठन प्रेजेंटेशन दीन। उहें, राज्यपाल ह अनुसूचित क्षेत्र म विकास काम बर सीएसआर अउ जिला खनिज न्यास के राशि के खरचा के जानकारी लीन।
कांग्रेस-पत्रकारवार्ता
प्रदेश कांग्रेस अध्यक्ष दीपक बैज ह राज्य सरकार ले बिजली के कीमत म करे गे आठ प्रतिशत के बढ़ोतरी ल वापस लेके मांग करीन हे। आज रईपुर म पत्रकार मन ले चर्चा करत श्री बैज ह किहीन कि पाछु एक हफ्ता ले राज्य के इस्पात संयंत्र मन ह बंद हवय, जेखर सेती दू लाख ले जादा मजदूर, ट्रांसपोर्टर अउ उद्योग ले जुड़े दूसर लोगन के आगू रोजी-रोटी के संकट खड़े होगे हवय। श्री बैज ह किहीन कि प्रदेसभर म म होवत गाय के मउत अउ खुल्ला घूमत मवेसी मनके सेती सड़क दुर्घटना एक ठन बड़े समस्या बन गे हवय, जेला लेके सोलह अगस्त के कांग्रेस ह प्रदेस के सबो जिला ब्लॉक मुख्यालय म गौ-सत्याग्रह करही। ओमन किहीन कि चौदह अगस्त के कांग्रेस ह प्रदेस के सबो वार्ड अउ गांव मन म संविधान यात्रा निकालही। उहें, पार्टी ह नगरीय निकाय के अध्यक्ष मनके वित्तीय अधिकार के वापसी अउ विश्व आदिवासी दिवस म नवा आरक्षण विधेयक म हस्ताक्षर करे के मांग सरकार ले करे हे।
डॉक्टरेट उपाधि
छत्तीसगढ़ के दू झन आईपीएस अधिकारी – रतनलाल डांगी अउ संतोष कुमार सिंह ल उंखर सोध प्रबंध म दुरूग के हेमचंद यादव विश्वविद्यालय ह डॉक्टरेट के उपाधि देहे। विश्वविद्यालय परिसर म राखे गे दीक्षांत समारोह म राज्यपाल रमेन डेका अउ मुख्यमंत्री विष्णुदेव साय ह ए अधिकारी मन ल डॉक्टरेट के उपाधि दीन हे।
भारतीय मानव विज्ञान सर्वेक्षण अउ राजा राममोहन राय पुस्तकालय प्रतिष्ठान डहार ले सार्वजनिक पुस्तकालय कर्मी मन बर राष्ट्रीय पुस्तकालय मिशन के छियालीसवां क्षमता निर्माण कार्यक्रम दस ले चौदह अगस्त तक रईपुर के पंडित रविशंकर शुक्ल विश्वविद्यालय म कराय जाही, जेमा छत्तीसगढ़, मध्यप्रदेश, पश्चिम बंगाल अउ महाराष्ट्र ले करीबन साठ झन प्रतिभागी मन हिस्सा लीहीं। देसभर म अभी तक पैंतालीस ठन प्रसिक्षण कारीकरम कराय गे हवय। एमा पुस्तकालय स्व-चालन सॉफ्टवेयर, गुणवत्ता बुनियादी ढांचा, संसाधन, आईसीटी उपकरण अउ तकनीक, उभरत रूझान, पुस्तकालय संसाधन के संरक्षण अउ आधुनिक पुस्तकालय सेवा के प्रबंधन के बारे म प्रसिक्षण दे गे हवय।
धनंजय यादव-कांस्य पदक
जांजगीर-चांपा जिला के लटिया गांव के वेटलिफ्टर धनंजय यादव ह वेस्ट इंडिया सीनियर राष्ट्रीय क्लासिक पावर लिफ्टिंग चैंपियनशिप म कांस्य पदक जीतीन हे। राजस्थान के चितौड़गढ़ म राखे गे ए प्रतियोगिता म धनंजय यादव ह उनसठ किलोग्राम वर्ग म कुल चार सौ नब्बे किलोग्राम वजन उठाके पदक ल अपन नाव करीन। ए प्रतियोगिता म छत्तीसगढ़ संघरा सात ठन राज्य के खिलाड़ी मन ह भाग लीन।
अउ अब मौसम के हाल…
मौसम विभाग के अनुसार एक ठन चक्रीय चक्रवाती घेरा पश्चिम झारखंड अउ ओखर तीर-तखार म बने हे। उहें, एक ठन मानसून द्रोणिका गंगानगर ले बालासोर अउ पूर्व मध्य बंगाल के खाड़ी तक बने हे। एखर असर ले प्रदेस म काली कतकोन जघा म हल्का ले मध्यम बरसा होय के अउ गरज-चमक के संग छींटा पड़े के संभावना हे। उहें, एक-दू जघा म आकाशीय बिजली गिरे के घलो आसंका हे।
इही बीच, जांजगीर-चांपा जिला म पाछु दू दिन ले होवत बरसा के सेती सिवनी-बहेराडीह गांव म जमड़ी नाला के जलस्तर बाढ़ गेहे। पुल ले तीन फीट उपर पानी बोहावत हे। एखर सेती गांव के संपर्क जिला मुख्यालय ले कट गे हवय।
अउ अब थोरकुन समाचार सार म –
– उच्च सिक्षा विभाग ह प्रदेस के महाविद्यालय अउ विश्वविद्यालय म प्रवेस के तिथि इकतीस जुलाई ले बढ़ाके सोलह अगस्त कर देहे। ए संबंध म उच्च सिक्षा विभाग ह आदेस जारी कर देहे।
– बिलासपुर के मल्हार के पीएमश्री स्कूल जवाहर नवोदय विद्यालय म सैक्षणिक सत्र दू हजार पच्चीस-छब्बीस म कक्षा छठवीं म प्रवेस बर गौरेला-पेण्ड्रा-मरवाही जिला के विद्यार्थी मन ले सोलह सितंबर तक ऑनलाइन आवेदन मंगाय गे हवय। एखर बर चयन परीक्षा अट्ठारह जनवरी के कराय जाही।
– कोरिया जिला के ग्राम पंचायत कैलाशपुर के सरपंच रूपवती चेरवा ल काम म लापरवाही बरते के मामला म दोसी पाय जाय म निलंबित कर दे गेहे।
अउ
– बालोद जिला के पुरूर पुलिस ह एक ठन ट्रेक्टर ले एक सौ तीन किलो गांजा जब्त करे हे। जब्त गांजा के कीमत लगभग दस लाख तीस हजार रूपिया बताय गे हवय।