मुख्यमंत्री विष्णुदेव साय के अगुवई म आज रईपुर के उंखर निवास कार्यालय म राज्य मंत्रिपरिषद के बइठका होइस। बइठका के बाद पत्रकार मन ले गोठबात करत उप मुख्यमंत्री अरूण साव ह बतईन कि मंत्रिमंडल ह गुरूघासीदास-तमोर पिंगला टाइगर रिजर्व बनाय के फइसला लेहे। मंत्रिपरिषद कोति ले मनेन्द्रगढ़, चिरमिरी, भरतपुर, कोरिया, सूरजपुर अउ बलरामपुर जिला के गुरू घासीदास राष्ट्रीय उद्यान अउ तमोर पिंगला अभ्यारण्य क्षेत्र ल मिलाके करीबन उनतीस सौ वर्ग किलोमीटर क्षेत्रफल म गुरूघासीदास-तमोर पिंगला टाईगर रिजर्व अधिसूचित करे के फइसला ले गेहे। श्री साव ह बतईन कि टाईगर रिजर्व बनाय ले राज्य म ईको पर्यटन के बढ़वार होही। संगेसंग कोर अउ बफर क्षेत्र म गांव के लोगन ल गाईड, पर्यटक वाहन अउ रिसार्ट चलाय म रोजगार मिलही।
पीएससी-घोटाला-सीबीआई छापा
राज्य लोक सेवा आयोग-पीएससी के भर्ती म होय कथित गड़बड़ी के जांच करत सीबीआई ह आज रईपुर, भिलई, दुरूग, बिलासपुर अउ कुरूद समेत प्रदेस के कतकोन जघा म एक संघरा दबिस दीन। सीबीआई जउन लोगन के ठिकाना म जांच करत हे, ओमा पूर्व आईएएस, पुलिस अधिकारी अउ नेता सामिल हे। सीबीआई ह आज बिहनिया राज्यपाल के पूर्व सचिव आईएएस अमृत खलको, पीएससी के पूर्व चेयरमैन टामन सिंह सोनवानी अउ कांग्रेस नेता राजेन्द्र शुक्ला के निवास म पहुंच के छापा के कार्रवाई सुरू करीन। प्रदेस म सोलह जघा म सीबीआई के जांच अभी चलत हे।
सीबीआई के कार्रवाई म मुख्यमंत्री विष्णुदेव साय ह सोशल मीडिया एक्स लिखीन कि ए कार्रवाई ले प्रदेस के युवा मन ल न्याय मिलही। ओमन लिखीन कि अब सुशासन के सरकार म घोटाला के तह तक जांच होवत हे, कोनांं भ्रष्टाचारी नइ बांचही।
राज्यपाल-बैठक
राज्यपाल रमेन डेका ह जलवायु परिवर्तन अउ पर्यावरण प्रदूषण के दुष्पप्रभाव ले बाचे बर हरेक लोगन ल परयास करे के अपील करीन हे। श्री डेका ह आज राजभवन म अधिकारी-कर्मचारी मनके बइठका लीन। ओमन किहीन कि ऊर्जा के बचत खातिर सबो झन ल परयास करे बर पड़ही। उहें, प्लास्टिक प्रदूषण ले बाचे बर पानी के बोतल ल कमती बउरे, अपन तीर-तखार म साफ-सफई के ध्यान रखना चाही। ओमन किहीन कि प्रधानमंत्री नरेन्द्र मोदी के आह्वान म ‘‘एक पेड़ मां के नाम‘‘ अभियान म सबो झन ल पेड़ लगाना चाही। बइठका म राज्यपाल ह किहीन कि राज्य म जैविक खेती ल बढ़ावा दे बर अउ जादा परयास करे बर पड़ही। राज्य के आकांक्षी जिला म जउन काम चलत हे, ओखर रोजे मॉनिटरिंग होवय। राज्यपाल ह किहीन कि राज्य के सबो विश्वविद्यालय म खाली पद म भर्ती बर विश्वविद्यालय मन ल निरदेसित करे जाय।
राज्यपाल ह नारायणपुर जिला माओवादी मन ले लड़ के अपन पिता जान बचइया हिम्मती नोनी ल राजभवन म बलाके सम्मानित करे के बात किहीन।
रिजर्व बैंक-किसान ऋण
केन्द्र सरकार कोति ले संशोधित ब्याज सहायता योजना जारी राखे के फइसला ल देखत भारतीय रिजर्व बैंक ह बैंक मन ले फसल ऋण, पशुपालन, डेयरी, मछली पालन, मधुमक्खी पालन समेत कतकोन कामकाज बर कमती ब्याज दर म कमती दिन बर करजा देवाय बर किहीन हे। किसान मन ल सात प्रतिशत के ब्याज दर म तीन लाख रूपिया के रकम दे जाही। रिजर्व बैंक ह केहे हे कि करजा देवइया संस्था ल बछर दू हजार चौबीस-पच्चीस बर ब्याज म डेढ़ प्रतिशत के छूट मिलही। उहें, बेरा म करजा चुकइया किसान मन ल तीन प्रतिशत अउ छूट दे जाही।
पालक-शिक्षक मीटिंग
प्रदेश म गुणवत्तापूर्ण सिक्षा अउ नई सिक्षा नीति के संबंध म पालक मन ल जानकारी दे खातिर राज्य म मेगा पालक-सिक्षक मीटिंग करे जात हे। स्कूल सिक्षा विभाग के सचिव सिद्धार्थ कोमल परदेशी ह बतईन कि अभी तक साढ़े पांच हजार संकुल म पालक-सिक्षक मीटिंग होगे हे। एमा साढ़े सात लाख ले जादा पालक-सिक्षक सामिल होइन। ओमन किहीन कि ए बइठका के उद्देश्य पढ़ई-लिखई अउ स्कूल म चलत गतिविधि म सिक्षक संग पालक मनके भागीदारी तय करना हे। ओमन किहीन कि चालू सैक्षणिक सत्र म तिमाही अउ अर्द्धवार्षिक परीक्षा नतीजा के बाद फेर ए बइठका करे के योजना हे।
कोचिंग सेंटर-जांच
दिल्ली के कोचिंग सेंटर म होय हादसा के बाद जांजगीर-चांपा जिला म एसडीएम ममता यादव के अगुवई म कोचिंग संस्थान मनके जांच करे गीस। जांच टीम म तहसीलदार, नायब तहसीलदार, सीएमओ अउ टीआई सामिल रिहीन। जांच के दउरान बेसमेंट म चलत एक कोचिंग सेंटर ल सील करे गीस। एसडीएम ह किहीन कि कोचिंग सेंटर के सरलग जांच करे जाही।
दीक्षांत समारोह
दुरूग के हेमचंद यादव विश्वविद्यालय के दूसर दीक्षांत समारोह आज सिरा गे। समारोह म राज्यपाल रमेन डेका अउ मुख्यमंत्री विष्णुदेव साय सामिल होइन। ए समारोह म अड़सठ झिन विद्यार्थी मन ल सोध उपाधि अउ अड़तालीस विद्यार्थी मन ल प्रावीण्य सूची म अव्वल आय म स्वर्ण पदक दे गीस। ए मउका म संभाग आयुक्त, कलेक्टर, पुलिस अधीक्षक अउ विश्वविद्यालय के कुलपति समेत जनप्रतिनिधि अउ गणमान्य लोगन मौजूद रिहीन।
कृषि विश्वविद्यालय-अनुबंध
रईपुर के इंदिरा गांधी कृषि विश्वविद्यालय म चलत जम्मों कृषि प्रदर्शन क्षेत्र म भारतीय मानक ब्यूरो कोति ले तय कृषि पद्धति बउरे जाही। ए संबंध म कृषि विश्वविद्यालय अउ भारतीय मानक ब्यूरो के बीच एक अनुबंध करे गेहे। अनुबंध पत्र म विश्वविद्यालय के कुलपति डॉक्टर गिरीश चंदेल अउ भारतीय मानक ब्यूरो के उप महानिदेशक दिव्येंदु चक्रवर्ती ह दस्तखत करीन।
भाजपा आमजन-मुलाकात
भारतीय जनता पार्टी के प्रदेश महामंत्री संजय श्रीवास्तव ह बतईन कि रईपुर के कुशाभाऊ ठाकरे परिसर के प्रदेस भाजपा कार्यालय के सहायता केन्द्र म राज्य सरकार के मंत्री अउ संगठन पदाधिकारी आम लोगन ले भेंट करके उंखर समस्या के समाधान करत हे। काली आठ अगस्त के वित्त मंत्री ओ.पी. चौधरी मंझनिया दू बजे ले संझा पांच बजे तक लोगन के समस्या सुनही। उहें, नौ तारीख के महिला अउ बाल विकास मंत्री लक्ष्मी राजवाड़े लोगन के परेसानी ल सुलझाय खातिर प्रदेस कार्यालय पहुंचही।
श्रम मंत्री-जांजगीर
जांजगीर के दउरा म पहुंचे श्रम अउ उद्योग मंत्री लखनलाल देवांगन ह भारतीय जनता पार्टी कोति ले प्रदेस म ग्यारह अगस्त ले सुरू होवइया तिरंगा यात्रा के जानकारी दीन। ओमन किहीन कि ए यात्रा म हर घर म तिरंगा फहराय जाही। पत्रकार मन ले गोठबात करत श्री देवांगन ह किहीन कि केन्द्रीय बजट म सबो वरग के ध्यान राखे गेहे अउ देस ल आगू बढ़ाय बर बजट म हर किसम के पहल हवय। ए मउका म पूर्व नेता प्रतिपक्ष नारायण चंदेल अउ पूर्व संसदीय सचिव अम्बेश जांगड़े समेत आने नेता मौजूद रिहीन।
रामविचार नेताम-केन्द्रीय मंत्री मुलाकात
आदिम जाति विकास मंत्री रामविचार नेताम ह काली नई दिल्ली म केन्द्रीय वन अउ पर्यावरण मंत्री भूपेन्द्र यादव ले भेंट करीन। बइठका म श्री नेताम ह केन्द्रीय मंत्री ल बतईन कि सरगुजा संभाग के तीर-तखार हाथी के सेती गांव-गंवई म फसल बर्बाद होवत हे। संगेसंग उहां के रहवइया लोगन बर खतरा बने रहिथे। ए समस्या के सुलझाय बर ओमन हाथी विचरण वाले गांव म सोलर लाइट लगाय बर किहीन। संगेसंग श्री नेताम ह केन्द्रीय मंत्री ले हाथी मित्र दल मन बर आर्थिक सहायता देके आग्रह करीन। ए संबंध म केन्द्रीय मंत्री ह श्री नेताम ल उचित कार्रवाई करे के भरोसा देवइन।
मौसम विभाग ले मिले जानकारी के मुताबिक प्रदेस म काली हल्का ले मध्यम बरसा होय के संभावना हरय। उहें, एक-दू जघा म गाज गिरे अउ भारी बरसा होय के चेतावनी दे गेहे।
मौसम विभाग ह नौ तारीख के बाद प्रदेस म बरसा म कमी आय के संभावना जताय हे। अवइया चौबीस घंटा म मौसम विभाग ह बीजापुर जिला बर रेड अलर्ट अउ कोरबा, बालोद, राजनांदगांव, दंतेवाड़ा समेत आठ जिला बर आरेंज अलर्ट जारी करे गेहे। उहें, बिलासपुर, दुरूग, बलौदाबाजार जिला समेत सोलह जिला बर यलो अलर्ट जारी हवय।
अउ अब थोरकुन समाचार सार म –
– मुख्यमंत्री विष्णुदेव साय के रईपुर स्थित निवास कार्यालय म काली आठ अगस्त के बिहनिया ग्यारह बजे ले मंझनिया एक बजे तक जनदर्शन कार्यक्रम राखे जाही।
– रक्षाबंधन परब ल देखत भारतीय डाक विभाग ह बहिनी मन कोति ले भेज जात राखी बर बिसेय व्यवस्था करे हे। एखर बर विशेष राखी लिफाफा के प्रकासन कराय गेहे। संगेसंग पिवरा रंग के पेटी लगाय गेहे।
अउ
– कोरबा जिला म हाथी के दल के बिछड़ के एक हाथी जांजगीर-चांपा जिला के छाता जंगल पहुंच गे, जेखर ले उहां के लोगन दहसत म हवय। वन विभाग ह मउका म पहुंच के गांव के लोगन मन ल सतर्क रेहे बर केहे हे।