स्वतंत्रता दिवस-स्वागत समारोह
स्वतंत्रता दिवस के मउका म राज्यपाल रमेन डेका के मौजूदगी म राजभवन म ‘‘स्वागत समारोह‘‘ के आयोजन करे जाही। समारोह म शहीद होय सैनिक मनके परिवार, पद्मश्री अउ पद्मभूषण ले सम्मानित राज्य के मनखे, जनप्रतिनिधि समेत प्रसासन के वरिष्ठ अधिकारी मन ल नेवता दे जाही। राज्यपाल के सचिव यशवंत कुमार के अगुवई म आज राजभवन म एक ठन बइठका राखे गीस। ए बइठका म राजभवन परिसर के साफ-सफाई, दीवार के पोतई-लिपई अउ बिजली व्यवस्था समेत आने-आने बिसय म गोठबात करके जरूरी दिसा-निरदेस अधिकारी मन ल दे गीस।
रामविचार नेताम-केन्द्रीय मंत्री मुलाकात
आदिम जाति विकास मंत्री रामविचार नेताम ह आज दिल्ली प्रवास के दउरान केन्द्रीय जनजाति कार्य मंत्री जुएल उरांव ले भेंट करीन। ए दउरान ओमन श्री उरांव ले छत्तीसगढ़ म अनुसूचित जाति-जनजाति समेत कमजोर अउ पिछड़ा वर्ग के विकास के बारे म चर्चा करीन। श्री नेताम ह केन्द्रीय मंत्री ले प्रधानमंत्री आदि आदर्श ग्राम योजना के तहत बछर दू हजार बाईस-तेईस के बांचे रासि जारी करे के अनुरोध करीन। उहें, ओमन एकलव्य आदर्श आवासीय विद्यालय म गुणात्मक सिक्षा बर पचपन करोड़ चौदह लाख रूपिया ले जादा के रासि के प्रस्ताव ल मंजूरी देके घलो आग्रह करीन। श्री नेताम ह केन्द्रीय मंत्री ल बस्तर के पांच जिला म चलाय जावत नियद नेल्लानार योजना अउ प्रधानमंत्री जन-मन योजना के प्रगति के जानकारी दीन।
उहें, वन मंत्री केदार कश्यप ह घलो आज नई दिल्ली म केन्द्रीय जनजातीय कार्य मंत्री जुएल उरांव ले भेंट करके राज्य के आने-आने जनजातीय बिसय म चर्चा करीन। ओमन बतईन कि राज्य म जनजाति मनके संरक्षण अउ उंखर उत्थान बर राज्य सरकार प्रतिबद्ध हे।
मुख्यमंत्री-जशपुर
मुख्यमंत्री विष्णुदेव साय ह ‘‘एक पेड़ मां के नाम‘‘ अभियान के तहत जशपुर जिला के बंदरचुंआ म आज महतारी वंदन योजना के हितग्राही नीलम टोप्पो ल ए अभियान म लगाय जावत पौधा के दू लाख नंबर के पौधा ल लगाय बर सौंपीन। एखरे संग ओमन जिला म चलाय जावत पौधा बांटे के अभियान के तहत हितग्राही मन ल प्रमाण-पत्र घलो दीन। खबर के मुताबिक ‘‘एक पेड़ मां के नाम‘‘ अभियान के सुरूआत मुख्यमंत्री ह पाछु महीना चौदह जुलाई के दुलदुला ले करे रिहीन, जेमा पौधा बांटे के संख्या दू लाख होगे हे।
उहें, बंदरचुआं के सासकीय उच्चतर माध्यमिक विद्यालय म राखे गे संकुल स्तरीय पालक-सिक्षक सम्मेलन म घलो मुख्यमंत्री ह सामिल होइन। ए दउरान ओमन राष्ट्रीय शिक्षा नीति म सिक्षक मन ले गोठबात करीन। स्कूल म लइका मन ह प्रदर्सनी लगाय रिहीन, जेला मुख्यमंत्री ह देखीन। प्रदर्सनी म लइका मन ह सिक्षा डिजिटल ऐप के बारे म मुख्यमंत्री ल जानकारी दीन। लइका मन ले गोठबात करत मुख्यमंत्री ह ओमन ल पढ़ाई के संगेसंग खेल अउ आने-आने सैक्षणिक गतिविधि म सामिल होय के सलाह दीन।
दीक्षारंभ कार्यक्रम
मुंगेली के शासकीय महाविद्यालय म दीक्षारंभ समारोह के आयोजन करे गीस। ए कारीकरम म माईपहुना के रूप म विधायक पुन्नूलाल मोहले सामिल होइन। दीक्षारंभ समारोह म पहिली बछर के छात्र-छात्रा मन बर राष्ट्रीय शिक्षा नीति के बारे म प्रोफेसर बी.के. उपाध्याय ह विस्तार ले चर्चा करीन। उहें, मास्टर ट्रेनर ह राष्ट्रीय शिक्षा नीति म पाठयक्रम क्रेडिट अउ चॉइस बेस्ड के बारे म बतईन। कारीकरम म बी.ए. अउ बी.कॉम के छात्र-छात्रा मन भाग लीन।
ओति, नारायणपुर के सरकारी आदर्श महिला महाविद्यालय म राखे गे दीक्षारंभ कार्यक्रम म कुम्हरपारा के पार्षद महिला प्रधान अउ सहायक अध्यापक राजेन्द्र कुमार यादव सामिल होइन। कारीकरम म कालेज म प्रवेस ले नवा छात्र-छात्रा मनके टीका लगाके स्वागत करे गीस।
दीक्षांत समारोह
दुर्ग स्थित हेमचंद यादव विश्वविद्यालय के दूसर दीक्षांत समारोह काली सात अगस्त के आयोजित करे जाही। समारोह म अड़सठ सोध करइया पीएचडी उपाधि अउ अड़तालीस विद्यार्थी मन ल स्वर्ण पदक दे जाही। एखर पहिली, आज भिलाई इंस्टीट्यूट ऑफ टेक्नोलॉजी के सभागार म रिहर्सल करे गीस।
मौसम
मौसम विभाग के मुताबिक प्रदेस म अवइया चौबीस घंटा के दउरान ज्यादातर जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। एक मानसून द्रोणिका सीकर अउ ग्वालियर हे होवत पुरूलिया अउ उंखर बाद पूर्व-मध्य बंगाल के खाड़ी तक बने हे। एखर असर ले मध्य छत्तीसगढ़ म एक-दू जघा म गरज-चमक के संग भारी बरसा होय अउ गाज गिरे के आसंका हे।
इही बीच, आज मंझनिया बाद राजधानी रायपुर समेत प्रदेस के कतकोन जघा म गरज-चमक के संग झमाझम बरसा होवत हे।
स्वास्थ्य मंत्री-बैठक
स्वास्थ्य मंत्री श्याम बिहारी जायसवाल के पगरइति म आज मंत्रलाय म सीजी.एम.एस.सी. संचालक मंडल के बइठका होइस। बइठका म जेम पोर्टल ले उपकरण अउ रीएजेंट के खरीदी करे के निर्णय ले गीस। उहें, अभी के अनुबंध दर ल निरस्त करे गीस। बइठका म स्वास्थ्य मंत्री ह जरूरी निर्माण काम के वस्तुस्थिति अउ नवा काम के जानकारी घलो लीन।
महादेव सट्टा ऐप-आरोपी गिरफ्तार
दुरूग जिला के भिलाई-खुर्सीपार क्षेत्र म एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू के टीम ह महादेव सट्टा ऐप के पैनल चलइया दू झिन आरोपी ल गिरफ्तार करे हे। दूनों झन आरोपी मन ल पूछताछ बर रायपुर लाने गेहे। एखर पहिली, काली एसीबी अउ ईओडब्ल्यू के टीम ह खुर्सीपार के बंगाली मोहल्ला निवासी ए दूनों आरोपी के घर म छापा मारके ओमन ल गिरफ्तार करे रिहीस। खबर के मुताबिक महादेव सट्टा ऐप मामला म सामिल आरोपी मनके खिलाफ एसीबी अउ ईओडब्ल्यू के टीम प्रदेसभर म छापामारी के कार्रवाई करत हे। एखर बर सोलह टीम के गठन करे गेहे।
प्रशिक्षण कार्यक्रम
राज्य सासन के काम म पारदर्सिता लाय बर मंत्रालय के अधिकारी अउ कर्मचारी मन बर ई-ऑफिस के तीन दिवसीय प्रसिक्षण कारीकरम आज ले सुरू होगे हे। आज पहिली दिन मंत्रालय के आने-आने विभाग म काम करत उप सचिव, सहायक-ग्रेड-तीन के अधिकारी-कर्मचारी मन ल ई-ऑफिस के प्रसिक्षण दे गीस। उहें, दूसर दिन काली विशेष सचिव, संयुक्त सचिव अउ अवर सचिव स्तर के अधिकारी मनके प्रसिक्षण होही। अइसने, आखिरी दिन आठ अगस्त के मंत्रालय के आने-आने विभाग के जम्मो भारसाधक सचिव मन ल ई-ऑफिस के प्रसिक्षण दे जाही।
ट्रांसजेंडर-कार्यक्रम
रायपुर के महंत घासीदास संग्रहालय म काली राज्य स्तरीय ट्रांसजेंडर सांस्कृतिक संध्या ‘सांझ-छह‘ के आयोजन करे गीस। ए कारीकरम के आयोजन संस्कृति अउ पुरातत्व विभाग के संग छत्तीसगढ़ मितवा संकल्प समिति के सामलात ले होइस। कारीकरम म तृतीय लिंग समुदाय के कलाकार मन ह सुघ्घर प्रस्तुति दीन। कारीकरम म जिहां समाज म व्याप्त दहेज के कुरीति ले जुड़े संगीतमय नृत्य वाटिका के प्रस्तुति दे गीस। उहें, ट्रांसजेंडर युवा मन ह फैसन-शो घलो करीन। कारीकरम के आखिरी म समुदाय के बड़का लोगन मन डहार ले जम्मों कलाकार मनके सम्मान करे गीस।
कोविड-19 सहायता राशि
प्रदेस म कोविड-नाइंटीन ले मउत होय आश्रित मन ल अनुदान सहायता देवाय बर राज्य आपदा मोचन निधि के तहत बछर दू हजार चौबीस-पच्चीस बर चौदह जिला ल एक करोड़ सात लाख रूपिया के रासि आवंटित करे गेहे। ए रासि के वितरण डीबीटी या ओखर ले जुड़े हितग्राही या आश्रित के बैंक खाता के माध्यम ले करे जाही।
अउ अब थोरकुन समाचार सार म –
– मुख्यमंत्री विष्णुदेव साय के पगरइति म राज्य मंत्रिमंडल के बइठका काली बिहनिया ग्यारह बजे मुख्यमंत्री निवास कार्यालय म होही।
– राज्यपाल रमेन डेका ले आज नई दिल्ली म आदिम जाति विकास मंत्री रामविचार नेताम ह मुलाकात करीन।
अउ
– जांजगीर-चांपा जिला के नवागढ़ थाना क्षेत्र म जेल जावत बेरा एक झिन आरोपी फरार होगे। ए मामला म पुलिस अधीक्षक ह आरक्षक सोमनाथ कैवर्त ल निलंबित कर देहे।