आयुष औषधि निर्माता, विज्ञापनदाता, विज्ञापन एजेंसी मन ल भ्रामक विज्ञापन म रोक लगाय बर सर्वोच्च न्यायालय ह निरदेस जारी करे हे। एखर अनुसार विज्ञापनदाता, विज्ञापन एजेंसी मन ल उपभोक्ता ल घोसना करके ए प्रमाणित करना होही कि विज्ञापन निर्धारित कोड के उल्लंघन नइ हे। एखर बर सूचना अउ प्रसारण मंत्रालय के प्रसारण सेवा पोर्टल अउ प्रेस कांउसिल ऑफ इंडिया के पोर्टल म स्व-घोसना अपलोड करे के सुविधा पाछू चार जून ले सुरू कर दे गेहे। छत्तीसगढ़ के आयुष संचालनालय ले मिले जानकारी के अनुसार भ्रामक विज्ञापन म रोक लगाय अउ उपभोक्ता हित के रक्षा करे बर लगाय गे याचिका म सर्वोच्च न्यायालय डहार ले सात मई के आदेस पारित करे गीस, जेखर तहत विज्ञापनदाता, विज्ञापन एजेंसी डहार ले अपन विज्ञापन के प्रसारण प्रकासन ले पहिली स्व-घोसना प्रस्तुत करके ए प्रमाणित करे जाही कि ओखर विज्ञापन केबल टेलीविजन नेटवर्क नियम के तहत निर्धारित विज्ञापन कोड के उल्लंघन नइ करथे।
मुख्यमंत्री-पुष्प वर्षा
मुख्यमंत्री विष्णुदेव साय ह आज कबीरधाम जिला के भोरमदेव मंदिर म सावन के मउका म पहुंचे हजारो कावड़िया मन के हेलीकॉप्टर ले फूल बरसा के सुवागत करीन। मुख्यमंत्री के संग उपमुख्यमंत्री विजय शर्मा ह घलो सबो कांवड़िया मनके अभिनंदन करीन। जेखर बाद मुख्यमंत्री ह भोरमदेव मंदिर म भगवान शिव के बिसेस पूजा-पाठ करीन। मुख्यमंत्री अउ उपमुख्यमंत्री ह मंदिर परिसर म श्रध्दालू मनले मिलके ओमन ल अपन हाथ ले प्रसाद बांटिन।
राज्यपाल-प्रधानमंत्री मुलाकात
छत्तीसगढ़ के राज्यपाल रमेन डेका ह नई दिल्ली म प्रधानमंत्री नरेंद्र मोदी अउ केंद्रीय गृहमंत्री अमित शाह अउ केंद्रीय सड़क परिवहन अउ राजमार्ग मंत्री नितिन गडकरी ले सौजन्य मुलाकात करीन। ए बेरा म राज्यपाल ह प्रधानमंत्री नरेंद्र मोदी ल पुष्पगुच्छ अउ सॉल भेंट करीन। ए दौरान प्रथम महिला रानी डेका काकोटी घलो मौजूद रिहीन।
मुख्यमंत्री-स्वास्थ्य
मुख्यमंत्री विष्णुदेव साय ह किहीन कि आदिवासी बहुल छत्तीसगढ़ राज्य म स्वास्थ्य सुविधा ल अउ अच्छा बनाय बर राज्य सरकार के संगेसंग निजी क्षेत्र के भागीदारी घलो जरूरी हे। छत्तीसगढ़ राज्य बने के बाद ले अब तक प्रदेस म स्वास्थ्य सुविधा तेजी ले फैले हे। राज्य सरकार के ए प्रयास हे कि प्रदेस के नागरिक मन ल बिसेस रूप ले दूरस्थ अंचल के मरीज मन ल घलो बढ़िया सुविधा मिल सकय। मुख्यमंत्री श्री साय राजधानी रईपुर के एक निजी अस्पताल के सुभारंभ कारीकरम ल संबोधित करत रिहीस। मुख्यमंत्री ह प्रधानमंत्री आयुष्मान भारत योजना ल बतात हुए किहीन कि एमा जरूरतमंद मरीज मन ल पांच लाख रूपिया तक के निसुल्क इलाज के सुविधा मिलत हे। ओमन ह यहू बतइन कि प्रधानमंत्री राहतकोस के जरिया ले ईलाज बर पइसा स्वीकृत होय म सात दिन के अंदर संबंधित अस्पताल ल पइसा उपलब्ध कराय के व्यवस्था करे गेहे।
विद्यार्थी प्रदर्शन
शिक्षक मनके कमी ले नाराज होके कांकेर जिला के प्रयास आवासीय विद्यालय के छात्र-छात्रा मन ह आज राष्ट्रीय राजमार्ग म प्रदर्सन करीन। ओखर मनके प्रदर्सन ले सड़क के दूनो तरफ लंबा जाम लग गे रिहीस, जेखर ले एक घंटा तक रईपुर-जगदलपुर मार्ग म गाड़ी मनके लंबा कतार लगे रिहीस। स्कूल प्रबंधन अउ पुलिस प्रशासन ह छात्र मन ल समझाय के कोसिस करीन, फेर ओमन नइ मानिन, जेखर बाद पुलिस ह बल पूर्वक छात्र-छात्रा मन ल सड़क ले हटाइन।
संपूर्णता अभियान
संपूर्णता अभियान के तहत कोंडागांव जिला के मर्दापाल गांव के स्कूली लइका मन ह नुक्कड़ नाटक अउ डांस के माध्यम ले सप्ताहिक बाजार म लोगन मन ल जागरूक करीन। ए बेरा म मर्दापाल के सरपंच अउ सचिव घलो मौजूद रिहीन। सरपंच ह लोगन मन ल योजना ले अवगत कराइस अउ लाभ लेके अपील करीन।
संपूर्णता अभियान के सुरूआत प्रधानमंत्री नरेंद्र मोदी डहार ले चार जुलाई ले करे गीस। देसभर के 112 आकांक्षी जिला के संग प्रदेस के जिला मन ल त्वरित अउ प्रभावी बदलाव लाय के लक्ष्य दे गेहे। अभियान के जिला स्तरीय नोडल अधिकारी अखिलेश गायधने ह बतइन कि संपूर्णता अभियान पांच विषय वस्तु-शिक्षा, स्वास्थ्य अउ पोषण, कृषि अउ जलसंसाधन, वित्तीय समावेसन अउ कौसल विकास उपर केंद्रीत हे। ओमन ह बतइन कि संपूर्णता अभियान तीस सितंबर तक पूरा देस म चलाय जाही।
अरूण साव-जनसमस्या निवारण
उप मुख्यमंत्री अउ नगरीय प्रशासन मंत्री अरूण साव काली लोकपर्व हरेली के बेरा म जनसमस्या निवारण पखवाड़ा के तहत रईपुर के चंगोराभांठा म आयोजित सिविर म सामिल होइस। ए दौरान ओमन ह कृषि औजार अउ गेड़ी के पूजा करके प्रदेसवासी अउ किसान मनके सुख-समृध्दि के कामना करीन। श्री साव ह डॉक्टर खूबचंद बघेल उद्यान म ‘एक पेड़ मां के नाम‘ अभियान के तहत हरिशंकरी के पौधा लगइन। श्री साव ह जनसमस्या निवारण सिविर म दिव्यांग जन मन ल व्हील चेयर, वार्डवासी मन ल नवा बने रासन कार्ड, भवन अनुज्ञा प्रमाण पत्र, स्व-सहायता समूह के महिला, पीएम स्वनिधि अउ प्रधानमंत्री आवास योजना के हितग्राही मन ल चेक दीन। ओमन ह सफाई मित्र मन ल घलो सम्मानित करीन। श्री साव ह सिविर म रईपुर नगर-निगम के चैक बोर्ड के सुभारंभ घलो करीन। एखर माध्यम ले अब लोगन मन ल ऑनलाइन संपत्ति कर जमा करे, नवा नल कनेक्सन बर आवेदन दे अउ जमीनी खरीदी बिक्री जइसन सुविधा मिलही। ए बेरा म ओमन ह वार्ड म आने-आने विकास काम बर एक करोड़ रूपिया देके घोसना करीन।
खाद्य मंत्री-कार्यक्रम
खाद्यमंत्री दयालदास बघेल आज बेमेतरा जिला के नवागढ़ विकासखंड के शासकीय कोदूराम दलित महाविद्यालय के दीक्षारंभ कारीकरम म सामिल होइन। ए दौरान महाविद्यालय के नवा भर्ती विद्यार्थी मन ल राष्ट्रीय शिक्षा नीति के प्रावधन के संबंध म जानकारी दे गीस। शिक्षानीति के तहत विद्यार्थी मन डहार ले चुने जाय वाले विषय जेनेरिक-इलेक्टिव के समूह अउ वैल्यू एडिशन कोर्स के समूह के व्याख्या करे गीस। कारीकरम म विद्यार्थी मन ल क्रेडिट आधारित कोर्सेस, सतत आंतरिक मूल्यांकन अउ आखिरी सेमेस्टर परीक्षा ले संबंधित प्रावधान के बारे म समझाय गीस। ए दौरान विद्यार्थी अउ पालक मन के संका के समाधान घलो करे गीस। कारीकरम के बाद खाद्यमंत्री ह परिसर म पौधा लगाइन।
उहें, राजस्व मंत्री टंकराम वर्मा बलौदाबाजार जिला के आने-आने कालेज मन म होवइया दीक्षांत समारोह म सामिल होइन। समारोह ल संबोधित करत श्री वर्मा ह किहीन कि मुख्यमंत्री विष्णुदेव साय के नेतृत्व म नवा शिक्षानीति के सफलता पूर्वक संचालन करे जात हे। ओमन ह किहीन कि नवा शिक्षा नीति म नौकरी के जघा म स्वरोजगार उपर जोर दे गेहे। कारीकरम म ओमन ह नवा प्रवेस कालेज छात्र-छात्रा के तिलक लगाके स्वागत करीन अउ उत्कृष्ट छात्र-छात्रा मन ल प्रमाण पत्र देके सम्मानित करीन।
भाजपा नेता-गिरफ्तार
बीजापुर के भाजपा नेता अजय सिंह ल पुलिस ह धमकी दे के आरोप म गिरफ्तार करे हे। जानबा के मुताबिक भैरमगढ़ निवासी एक मनखे अउ एक आने मामला म ठेकेदार ह पुलिस म अजय सिंह के खिलाफ जान ले मारे के धमकी दे अउ पंद्रह लाख रूपिया मांगे के सिकायत करे रिहीस। ए आधार म पुलिस ह कार्रवाई करत हुए भाजपा नेता अजय सिंह ल गिरफ्तार कर लेहे।
अउ अब मौसम के हाल…
मौसम विभाग के मुताबिक अवइया चौबीस घंटा के दौरान प्रदेस म अधिकांस जघा म हल्का ले मध्यम बरसा होय के आसार हे। एक पूर्व पश्चिम द्रोणिका राजस्थान ले लेके उत्तरीय उड़ीसा तक बने हे। एखर असर ले प्रदेस म एक-दू जघा म आकासीय बिजली गिरे अउ भारी बरसा होय के संभावना हे।
इही बीच, राज्य शासन के राजस्व एवं आपदा प्रबंधन विभाग डहार ले आंकड़ा बनाय गीस, जेमा राज्य स्तरीय नियंत्रण कक्ष डहार ले संकलित जानकारी के मुताबिक एक जून 2024 ले अब तक राज्य म 670 मिलीमीटर औसत बरसा दर्ज करे जा चुके हे। बीजापुर जिला म सबले जादा 1504 मिलीमीटर अउ सरगुजा जिला म सबले कम 309 मिलीमीटर बरसा दर्ज करे गेहे।