राज्यपाल मनके दू दिन के सम्मेलन काली राष्ट्रपति भवन म संपन्न होइस। समापन समारोह म राष्ट्रपति द्रौपदी मुर्मू ह किहीन कि राज्य मनके समावेसी अउ सरलग बिकास म ही देस के भविष्य निर्भर करथे अउ सबो राज्य मन ल एक-दूसर के सबले बढ़िया कारज अउ अनुभव ले सीख के आगु बढ़ना चाही। सम्मेलन म एक-दूसर के अनुभव ले सीखे के भावना ले करे गे बिस्तार ले चर्चा बर राज्यपाल मनके प्रसंसा करिन। ओमन किहीन कि राजभवन के महौल भारतीय जीवन-सैली के अनुरूप होना चाही अउ राज्यपाल मन ल आम लोगन ले जुरे रेहे के परयास करना चाही। ए मउका म उप राष्ट्रपति जगदीप धनखड़ ह किहीन कि राज्यपाल मन ल अपन राज्य सरकार के संग सरलग संवाद बनाय रखना चाही। सम्मेलन म प्रधानमंत्री नरेंद्र मोदी ह राज्यपाल मन ले अपील करिन कि ओमन राजभवन म सासन के आदर्स मॉडल बिकसित करंय।
ए सम्मेलन म छत्तीसगढ़ के राज्यपाल रमेन डेका घलो सामिल होइन। ए मउका म राज्यपाल ह छत्तीसगढ़ के जनजातीय इलाका के आकांक्षी जिला, ब्लॉक अउ सीमा क्षेत्र के बिकास उपर अपन प्रस्तुति देइन। ओमन छत्तीसगढ़ म जनजाति बिकास बर बने सरकारी योजना अउ कारीकरम के बिस्तार ले जानकारी देइन। बिसेस रूप ले बीजापुर जिला के माओवादी गतिविधि ले प्रभावित ग्राम मुड़ावेडी के गोठ करिन, जिहां सड़क के बिस्तार अउ सुरक्षा बढ़ाय गे हे।
हरेली
छत्तीसगढ़ के लोक परब हरेली आज जम्मो प्रदेसभर म अब्बड़ उछाह के संग मनाय जावत हे। सावन महीना के अमावस्या के दिन मनाय जवइया हरेली परब किसान मन अपन पुरखा अउ खेती-खार म बौरइया जिनिस मनके पूजा -पाठ करिन। संगे लइका अउ युवा मन गेड़ी चढ़के तिहार के खुसी मनाइन।
ऐति, राजधानी रइपुर म घलो मुख्यमंत्री निवास म हरेली तिहार के आयोजन करे गीस। जिहां मुख्यमंत्री विष्णुदेव साय अउ उंखर धर्मपत्नी कौशल्या साय के संगे सबो परिवार ह बिधि-बिधान ले खेती-किसानी के जिनिस के पूजा-पाठ करिन अउ बढ़िया उपज होय के संग किसान अउ प्रदेसवासी मनके खुसहाली के कामना करिन। हरेली तिहार के मउका म मुख्यमंत्री निवास ल बड़ सुघ्घर ढंग ले सजाय गे रिहीस, जिहां छत्तीसगढ़ी संगीत, लोकनृत्य, पारंपरिक गड़वा बाजा, राउत नाचा अउ गेड़ी नृत्य के घलो बिसेस रूप ले आयोजन करे गीस। हरेली तिहार म मुख्यमंत्री विष्णुदेव साय ह गाय अउ बछवा मन ल लोंदी अउ चारा खवाके पसुधन संरक्षन के संदेस देइन।
उहें, उप-मुख्यमंत्री अरूण साव ह घलो रइपुर स्थित अपन निवास म पूजा-पाठ करके हरेली तिहार मनाइन। ए मउका म ओमन बढ़िया उपज होय के संग किसान अउ प्रदेसवासी मनके खुसहाली के कामना करिन। उप-मुख्यमंत्री ह हरेली कारीकरम म कलाकार मन के संग नृत्य करिन संगे गेड़ी घलो चढ़िन। ए बेरा श्री साव ह प्रदेस ल हरियर बनाय बर अउ धरती दाई के सिंगार बर ‘एक पेड़ मां के नाम‘ अभियान के तहत लोगन ले पौधा लगाय के अपील करिन।
बस्तर दशहरा
आज ले ही बिश्व प्रसिध्द बस्तर दसहरा परब के सुरूआत घलो होइस। सावन अमावस्या के मउका म माई दंतेश्वरी मंदिर के आगु पाटजात्रा के रसम करे गीस। बस्तर दसहरा म रथ बनाय बर पहिली लकड़ी ल स्थानीय बोली म तुरलु खोटला अउ टीकापाटा केहे जाथे। ए लकड़ी बिरौली के जंगल ले जगदलपुर के दंतेश्वरी मंदिर लाने गीस। ए बेरा गांव के पुजारी ह रथ बनाय बर बउरे जवइया पहिली लकड़ी के बिधि-बिधान ले पूजा-पाठ करिस। ए पूजा म बस्तर सांसद अउ बस्तर दसहरा समिति के अध्यक्ष महेश कश्यप संगे आने-आने नेता अउ इलाका के लोगन सामिल होइन। बतादन कि एसो बस्तर दसहरा 77 दिन तक चलही।
चिकित्सा अधिकारी-नियुक्ति
स्वास्थ्य मंत्री श्याम बिहारी जायसवाल के निरदेस उपर प्रदेस म 535 चिकित्सा अधिकारी मनके संविदा नियुक्ति करे गेहे। स्वास्थ्य विभाग डहार ले एखर पदस्थापना के आदेस जारी कर दे गेहे। ए डॉक्टर मनके नियुक्ति ले प्रदेस म स्वास्थ्य सेवा सुधरही अउ दूरिहा इलाका के लोगन मन ल बढ़िया चिकित्सा सुविधा के लाभ मिलही।
अनुसूचित जाति/जनजाति-आवेदन
संघ लोकसेवा आयोग माने यूपीएससी के सिविल सेवा प्रारंभिक परीक्षा बछर-2024 म सफल होवइया प्रदेस के अनुसूचित जाति अउ जनजाति वर्ग के पात्र अभ्यर्थी मन ल राज्य सरकार ह एक लाख रूपिया के प्रोत्साहन रासि देही। एखर बर पात्र अभ्यर्थी मन ले 6 अगस्त तक अर्जी मंगाय गे हे। पात्र अभ्यर्थी मन अर्जी के प्रारूप बिभाग के वेबसाइट ले डाउनलोड कर सकत हें।
जांजगीर-सामुदायिक पुलिसिंग
जांजगीर-चांपा जिला के नवागढ़ सरकारी महाविद्यालय म ‘हमर पुलिस-हमर संग‘ कारीकरम के आयोजन करे गीस, जेमा सामुदायिक पुलिसिंग के जरिया ले लोगन ल साइबर क्राइम अउ ऑनलाइन ठगी ले बचाव के जानकारी दे गीस। उहें, नवा कानून के बारे म घलो लोगन ले जानकारी साझा करे गीस। कारीकरम म यातायात पुलिस के डहार ले बाढ़त सड़क दुर्घटना ल चेत म राखत नसा के हालत म गाड़ी नइ चलाय के अपील के संगे गाड़ी चलावत बेरा हेलमेट पहिरे बर जरूरी गोठ केहे गीस।
स्वर्णप्राशन
लइका मन म रोग प्रतिरोधक क्षमता बढ़ाय बर रइपुर के आयुर्वेद महाविद्यालय चिकित्सालय म काली स्वर्णप्रासन के आयोजन करे गीस, जिहां एक हजार तीन सौ सत्तर लइका मन ल स्वर्णप्रासन कराय गीस। एखर संगे लइका मनके स्वास्थ्य परीक्षण घलो करे गीस। बतादन कि रइपुर के आयुर्वेद महाविद्यालय चिकित्सालय के कौमार भृत्य विभाग डहार ले हर पुष्य नक्षत्र तिथि म सून्य ले सोलह बछर तक के लइका मन ल स्वर्णप्रासन कराय जाथे।
भालू हमला
गौरेला-पेण्ड्रा-मरवाही जिला म भालू के हमला ले युवक के मउत होगे। उहें, दू झन आने मनखे गंभीर रूप ले घायल होगिन। मिले जानकारी ले आज बिहनिया-बिहनिया गांव के लोगन मरवाही इलाका के सिवनी-बदरोड़ी के जंगल लकड़ी कांटे बर गे रिहीन, उही बेरा जंगल म भालू ह इखर उपर हमला कर दीस। मउका म कुछ लोगन भागके अपन परान बचाइन। उहें, भालू के हमला म गंभीर घायल दू झन मनखे ल बिलासपुर मेडिकल कॉलेज भेजे गीस।
ट्रेन परिचालन
माओवादी गतिविधि अउ भारी बरसा के सेति किरंदुल ले विसाखापट्टनम तक चलइया यात्री रेलगाड़ी अवइया 8 अगस्त तक किरंदुल नइ जाही। ए रेलगाड़ी के संचालन दंतेवाड़ा ले विसाखापट्टनम के बीच ही करे जाही। ए दउरान नाइट एक्सप्रेस अउ किरंदुल – विसाखापट्टनम पैसेंजर के परिवहन बाधित रइही। बतादन कि एनएमडीसी के चेक डैम के बांध टूटे के सेति रेलगाड़ी के अवागमन प्रभावित होय हे। दक्षिण पूर्व रेलवे ह 8 अगस्त के बाद ही ए रद्दा म अवागमन फेर सुरू करे के निरदेस जारी करे हे।
संक्षिप्त समाचार
– छत्तीसगढ़ के राज्यपाल रमेन डेका आज नई दिल्ली म उपराष्ट्रपति जगदीप धनखड़ ले सौजन्य भेंट करिन।
– जांजगीर-चांपा जिला के डोंगरी गांव के खेत म बूता करत बेरा करेंट लगे ले पति-पत्नी के मउत होगिस।
अउ
– गौरेला-पेण्ड्रा-मरवाही जिला के रामगढ़ गांव म भारी बरसा के सेति एक ठन घर के दीवाल गिरगे। ए घटना ले घर म मौजूद पति-पत्नी के मउत होगे। उहें, 8 बछर के एक झन लइका घायल होगे।