मुख्यमंत्री विष्णुदेव साय ह आज रायपुर जिला के आरंग म पांच ठन कन्या छात्रावास मन के सुभारंभ करीन। ए छात्रावास मनके सुरू होय ले अनुसूचित जाति के तीन सौ छात्रा मन ल ओखर पढ़ाई बर आवासीय सुविधा मिलही। ए मउका म मुख्यमंत्री ह प्रदेस के सब्बो हास्टल, छात्रावास मन म दू हजार सीट ल बढा़य के घोसना करीन। संगेसंग मुख्यमंत्री ह आरंग एसडीएम अउ तहसील कार्यालय के करमचारी मन बर आवास के निर्माण, आरंग रेस्ट हाउस के विस्तार अउ जीर्णोध्दार करे के घोसना घलो करीन।
मुख्यमंत्री-फोरलेन स्वीकृति
केंद्र सरकार ह रायपुर ले रांची नेशनल हाईस्पीड कॉरीडोर प्रोजेक्ट के तहत पत्थलगांव-जशपुर ले गुमला-झारखंड तक हाईस्पीड फोरलेन सड़क के स्वीकृति दे देहे। एमा छत्तीसगढ़ अउ झारखंड के विकास ल नवा गति मिलही। मुख्यमंत्री विष्णुदेव साय ह ए परियोजना के स्वीकृति म प्रधानमंत्री नरेंद्र मोदी ल धन्यवाद दे हे। ओमन किहीन हे कि ए सड़क के निर्माण ले रायपुर अउ रांची के बीच यात्रा सुगम होय के संगेसंग समय के घलो बचत होही।
बतादन कि प्रधानमंत्री नरेंद्र मोदी ह केंद्रीय मंत्रिमंडल म पचास हजार, छै सौ पचपन करोड़ रूपिया के लागत अउ करीबन नौ सौ छत्तीस किलोमीटर लंबाई के आठ राष्ट्रीय हाईस्पीड सड़क परियोजना मन के स्वीकृति दे जाय के जानकारी ट्वीटर म साझा करे हे।
भाजपा-बैठक
भारतीय जनता पार्टी के छत्तीसगढ़ प्रभारी नितिन नबीन ह आज रायपुर म पार्टी के प्रदेस पदाधिकारी अउ पार्टी कोरग्रुप के बइठका लीन। बइठका म श्री नबीन ह आगामी संगठनात्मक कारीकरम अउ नगरीय निकाय चुनाव के अलावा हर घर तिरंगा अभियान अउ विभाजन विभीषिका दिवस ल लेके जरूरी निरदेस दीन। ओमन किहीन कि आगामी ग्यारा ले चौदह अगस्त तक हर घर तिरंगा अभियान के तहत तिरंगा यात्रा के आयोजन करे जाय। ए कारीकरम म युवा मोर्चा के कार्यकर्ता मन अग्रणी भूमिका निभावय। श्री नबीन ह किहीन कि चौदह अगस्त के विभाजन विभीषिका स्मृति दिवस आय। ए अवसर म संगोष्ठी अउ सम्मेलन के आयोजन करे जाय। बइठका ल प्रदेस भाजपा अध्यक्ष किरण सिंह देव अउ प्रदेस संगठन महामंत्री पवन साय ह घलो संबोधित करीन।
फसल बीमा-तिथि
प्रदेस के सब्बो ऋणी अउ अऋणी किसान अब सोलह अगस्त तक खरीफ कृषि फसल अउ मौसम आधारित उद्यानिकी फसल मनके बीमा करा सकही। राज्य सरकार के प्रस्ताव म केंद्र सरकार ह फसल बीमा कराय जाय के अंतिम तिथि बढ़ा देहे। पहिली ए तिथि इकतीस जुलाई तक निर्धारित रिहीस।
मुख्यमंत्री विष्णुदेव साय अउ कृषि मंत्री रामविचार नेताम ह कृषि विभाग के अधिकारी मन ल योजना के लाभ देवाय बर किसान मन ल मार्गदर्सन दे अउ उंखर पंजीयन कराय बर केहे हे, ताकि प्राकृतिक आपदा ले फसल नुकसान होय उपर उनला क्षतिपूर्ति मिल सकय। राज्य के किसान, प्रधानमंत्री फसल बीमा योजना के तहत धान सिंचित, असिंचित, सोयाबीन, मूंगफली, मक्का, मूंग, उड़द, कोदो-कुटकी अउ रागी फसल के बीमा करा सकत हे।
एसीबी-कार्रवाई
एंटी करप्सन ब्यूरो एसीबी अउ आर्थिक अपराध अन्वेसन ब्यूरो- ईओडब्ल्यू के टीम ह आय ले जादा संपत्ति के मामला म आज बिलासपुर के जिला शिक्षा अधिकारी टी.आर. साहू के बिलासपुर अउ कवर्धा स्थित ठिकाना म छापामार करीन। मिले जानकारी के अनुसार आज बिहनिया एसीबी अउ ईओडब्ल्यू के टीम जिला शिक्षा अधिकारी के खिलाफ अनुपातहीन संपत्ति के सिकायत मनके जांच पड़ताल करे के बाद छापामार कार्रवाई करे हे। एखर अलावा दूसर अधिकारी मनके इंहा घलो छापामार कार्रवाई करे जाय के खबर हे। छापा के दौरान अधिकारी मन द्वारा दस्तावेज मनके जांच करे जात हे।
कांग्रेस-ज्ञापन
प्रदेस युवा कांग्रेस के अध्यक्ष आकाश शर्मा के नेतृत्व म एक प्रतिनिधि मंडल ह आज रायपुर पुलिस अधीक्षक ल ज्ञापन सौंप के राजधानी के यातायात व्यवस्था ल सुधारे के मांग करीन। ज्ञापन म केहे गे कि राजधानी रायपुर म सड़क दुर्घटना के मामला लगातार बाढ़त हे, अइसन म दुर्घटना मन म रोक लगाय बर सुचारू ढंग ले यातायात व्यवस्था के जरूरत हे। श्री शर्मा ह किहीन हे कि अवइया समय म युवा कांग्रेस यातायात व्यवस्था ल लेके अलग-अलग अभियान चलाही।
बस्तर ओलंपिक-समीक्षा
खेल संचालक तनूजा सलाम ह काली जगदलपुर म बस्तर संभाग के सब्बो खेल अधिकारी मनके बइठका लेके बस्तर ओलंपिक के तैयारी के समीक्षा करीन। ए दौरान श्रीमती सलाम ह खेल अउ युवा कल्याण विभाग के योजना मनके क्रियान्वयन म तेजी लाय के निरदेस दीन। ओमन किहीन कि बस्तर संभाग म खेल मनके नैसर्गिक प्रतिभा उपलब्ध हे, उनला खेल मनके प्रसिक्षण देके उंखर प्रतिभा ल तरासे के हर संभव प्रयास करय। श्रीमती सलाम ह बतइन कि खेल अउ युवा कल्याण विभाग के रिक्त पद मन ल जल्द ले जल्द भरे के कार्रवाई करे जाही।
अपन बस्तर प्रवास के दौरान खेल संचालक ह जगदलपुर म संचालित हॉकी खेल इंडिया सेंटर अउ जगदलपुर म प्रस्तावित कृत्रिम हॉकी टर्फ बर जघा के निरीक्षण घलो करीन।
माओवादी-मुठभेड़
नारायणपुर जिला म पुलिस अउ सुरक्षा बल के बीच होय मुठभेड़ म काखरो आहत होय के खबर नइ हे। घटना स्थल ले पुलिस ल पाइप अउ कुकर बम बरामद होय हे, जेला बम निरोधक दस्ता के टीम ह मउका म ही निष्क्रिय कर देहे। मिले जानकारी के अनुसार जिला के कोहकामेटा थाना क्षेत्र ले डीआरजी, जिला पुलिस बल, बीएसएफ अउ बीडीएस के संयुक्त टीम तलासी अभियान म निकले रिहीन। ए दौरान कच्चापाल पहाड़ के उपर पहिली ले घात लगाय बइठे माओवादी मन ह सुरक्षा बल मन उपर फायरिंग सुरू कर दीन। जवान मन घलो जवाबी कार्रवाई करीन। सुरक्षा बल ल भारी पड़त देख माओवादी मन जंगल के आड़ लेके भाग गे।
नियद नेल्लानार योजना-समीक्षा
मुख्य सचिव अमिताभ जैन ह काली मंत्रालय म बस्तर संभाग के कांकेर, दंतेवाड़ा, नारायणपुर, बीजापुर अउ सुकमा जिला म शासन के महत्वाकांक्षी योजना नियद नेल्लानार के समीक्षा करीन। ए दौरान श्री जैन ह अधिकारी मन ल योजना के तहत अवइया गांव मन म लोगन मनके सबो बुनियादी सुविधा अउ कल्याणकारी योजना मनके लाभ देवाय बर योजनाबध्द काम करे के निरदेस दीन। ओमन किहीन कि योजना के तहत गांव मन म सबो हितग्राही मन ल रासनकार्ड म चांवल,गुड़ चीनी अउ चना अनिवार्य रूप ले मिलय, एखर सतत निगरानी होना चाही।
हरेली
छत्तीसगढ़ के पहलइया तिहार हरेली काली प्रदेस भर म बड़ उछाह के संग मनाय जाही। सावन महिना के अमावस के दिन मनाय जाने वाला हरेली तिहार म किसान मन अपन कुल देवता अउ खेती म उपयोग होवइया औजार मनके पूजा करथे। ए दिन लइका अउ जवान मन गेड़ी चढ़े के आनंद घलो लेथे।
ए मउका म काली मुख्यमंत्री निवास म घलो परंपरागत ढंग ले हरेली के तिहार मनाय जाही। एखर बर जोर-सोर ले तैयारी करे जात हे। ए अवसर म सांस्कृतिक कारीकरम के अलावा परंपरागत खेल मनके आयोजन घलो करे जाही। करमा, राउत नाचा के गीत अउ लयबध्द नृत्य के संग ए कारीकरम के सुरूआत करे जाही।
मुख्यमंत्री ह हरेली के पहिली अपन संदेस म प्रदेस के नागरिक मन ल केहे हे कि धरती मां के श्रृंगार करे बर एक पेड़ जरूर लगावव। ए दिन पूरा प्रदेस म लोगन मन पौधा लगाके ए तिहार ल मनाही।
अउ मौसम के हाल…
मौसम विभाग ह काली प्रदेस के एक-दू जघा म भारी बरसा होय अउ आकाशीय बिजली गिरे के चेतावनी देहे। भारी बरसा के मुख्य क्षेत्र उत्तर छत्तीसगढ़ संभावित हे।
राजधानी रायपुर समेत प्रदेस भर म आज कई जघा म रूक-रूक के बरसा होय के खबर हे। खासकर मध्य अउ उत्तरी छत्तीसगढ़ म पाछू कुछ दिन ले होवत लगातार बरसा ले जन-जीवन प्रभावित होवत हे।
आवास मंत्री-समीक्षा बैठक
आवास अउ पर्यावरण मंत्री ओ.पी.चौधरी ह काली रायपुर स्थित छत्तीसगढ़ पर्यावरण संरक्षण मंडल के कार्यालय म विभागीय अधिकारी मनके समीक्षा बइठका लीन। बइठका म श्री चौधरी ह अधिकारी मन ले सबो काम म पारदर्सिता लाय, प्रदेस अउ जिला स्तरीय कार्यालय मन म बायोमैट्रिक उपस्थिति, सीसीटीवी कैमरा लगाय अउ डैसबोर्ड तैयार करे के निरदेस दीन। आवास मंत्री ह सबो क्षेत्रीय अधिकारी मन ल मिले के समय घलो निर्धारित कर एखर सूचना कार्यालय के सूचना पटल म लगाय बर किहीन। उहें, श्री चौधरी ह उद्योग मनके फ्लाईऐस के परिवहन अउ निपटारा बर नियम मनके कड़ाई ले पालन करे के निरदेस दीन। संगेसंग ओमन उद्योग मन ल दे जाने वाला पर्यावरणीय स्वीकृति के शर्त मन म सामिल वृक्षारोपण के शर्त के पालन कड़ाई ले सुनिश्चित कराय बर किहीन।
वन महोत्सव
राज्य अउ खेल मंत्री टंकराम वर्मा काली बलौदाबाजार भाटापारा जिला के लवन म वन विभाग डहार ले आयोजित जिला स्तरीय वन महोत्सव कारीकरम म सामिल होइन। ए मउका म ‘एक पेड़ मां के नाम‘ अभियान के तहत मंत्री श्री वर्मा समेत जनप्रतिनिधि अउ अधिकारी मन करीब पांच सौ पौधा लगाइन। कारीकरम ल संबोधित करत हुए खेल मंत्री ह किहीन कि छत्तीसगढ़ ल हरियर प्रदेस बनाय बर खेत-खलिहान अउ जिहां भी खाली जमीन मिलय उंहा पेड़ पौधा जरूर लगावय।
प्रदेस के सब्बो नगरीय निकाय मन म ए बखत जनसमस्या निवारण पखवाड़ा चलत हे। बीते सत्ताईस जुलाई ले सुरू होय ए पखवाड़ा के पहलइया छै दिन म ही प्रदेस भर ले अब तक साढ़े छब्बीस हजार ले जादा आवेदन प्राप्त होय हे। एमा ले करीब साढ़े चार हजार आवेदन मनके मउका म ही निराकरण कर लोगन मनके समस्या ल दूर करे गीस।
उप मुख्यमंत्री अउ नगरीय प्रशासन मंत्री अरूण साव ह काली वीडियो कॉन्फ्रेंसिंग के माध्यम ले जनसमस्या निवारण पखवाड़ा के समीक्षा करीन। ए दौरान ओमन सबो आयुक्त, मुख्य नगर पालिका अधिकारी अउ क्षेत्रीय संयुक्त संचालक मन ल जादा ले जादा आवेदन मनके मउका म ही निराकरण करे के निरदेस दीन।
बतादन कि जनसमस्या निवारण पखवाड़ा आगामी दस अगस्त तक चलही।