राष्ट्रपति द्रौपदी मुर्मू ह आज राष्ट्रपति भवन म राज्यपाल मनके दू दिवसीय सम्मेलन के उद्घाटन करीन। ए मउका म राष्ट्रपति ह किहीन कि देस म तीन नवा कानून लागू होय ले न्याय प्रणाली के एक नवा युग सुरू होय हे। ओमन यहू किहीन कि लोगन के सोच म बदलाव कानून के नाम-भारतीय न्याय संहिता, भारतीय नागरिक सुरक्षा संहिता अउ भारतीय साक्ष्य अधिनियम ले स्पष्ट हवय। राष्ट्रपति मुर्मू ह किहीन कि लोकतंत्र बर ए जरूरी हवय कि आने-आने केंद्रीय एजेंसी सबो राज्य संग, बने ढंग ले जुर मिलके काम करय। ओमन राज्यपाल मन ले किहीन कि राज्य संवैधानिक प्रमुख के रूप म एला बढ़ावा के दे सकत हे। राष्ट्रपति किहीन राष्ट्रीय शिक्षा नीति म सैक्षणिक संस्थान के मान्यता अउ मुल्यांकन प्रणाली म सुधार उपर जोर दे गेहे।
राष्ट्रपति ह किहीन जलवायु परिवर्तन अउ ग्लोबल वार्मिंग जइसन चुनौती ले निपटे बर कतकोन परयास होवत हे। राज्यपाल ‘एक पेड़ मां के नाम‘ अभियान ल जन आंदोलन बनाके एमा अपन योगदान दे सकत हे। उहें, उप राष्ट्रपति जगदीप धनखड़ ह सम्मेलन म बोलत किहीन कि सामाजिक कल्याण योजना अउ विकास के संबंध म लोगन ल जागरूक करय। ए कारीकरम म प्रधानमंत्री नरेंद्र मोदी ह राज्यपाल मनले केंद्र अउ राज्य के बीच एक प्रभावी भूमिका निभाय के अपील करीन। ओमन योजना ले वंचित लोगन के मदद बर राज्यपाल मन ल जनता अउ सामाजिक संगठन संग गोठबात करे बर किहीन हे। ए सम्मेलन म छत्तीसगढ़ के राज्यपाल रमेन डेका घलो सामिल होइन।
मुख्यमंत्री बस्तर
मुख्यमंत्री विष्णुदेव साय ह अपन जगदलपुर दउरा के बेरा घोसना करीन कि राज्य सरकार जल्दीच चरण पादूका वितरण योजना अउ सरस्वती साइकिल योजना फेर ले सुरू करही। मुख्यमंत्री ह काली जगदलपुर के कृषि महाविद्यालय परिसर म राखेगे जिला स्तरीय महिला सम्मेलन कारीकरम म ए बात किहीन। ए मउका म मुख्यमंत्री ह विधायक किरण देव के मांग म जगदलपुर सहर म पाछू कतकोन बेरा ले अधूरा बने ऑडिटोरियम ल बनाय बर एक करोड़ रूपिया के रकम मंजूर करीन।
कारीकरम म बोलत मुख्यमंत्री ह किहीन केंद्र सरकार असन छत्तीसगढ़ के सरकार घलो गरीब के कल्याण विकास अउ खुसहाली बर समर्पित हे। गांव, गरीब, किसान, महिला, युवा, आदिवासी अउ पिछड़े जम्मो वरग के विकास बर योजना चलाय जात हे। मुख्यमंत्री श्री साय ह किहीन कि दू हजार सैंतालिस तक भारत ल विकसित देस बनाय के मिसन म केंद्र सरकार के मदद छत्तीसगढ़ ल मिलत हे।
जन समस्या निवारण शिविर
उप मुख्यमंत्री अरूण साव बिलासपुर के तारबहार म राखेगे जन समस्या निवारण सिविर म संघरीन। ओमन करीबन डेढ़ दर्जन माईलोगन मन ल सिविर म नवीनीकरण होय रासन कारड बांटिन। संगेसंग सिविर म लगे जम्मो स्टाल ल देखिन अउ उंहा मिलत सिकइत अउ ओखर निराकरण के जानकारी लीन। श्री साव ह लोगन ले भेंट करत उंखर समस्या म गोठबात करीन अउ जल्दी समस्या सुलझाय बर अधिकारी मन ल निरदेस दीन। ए बेरा म विधायक सुशांत शुक्ला, कलेक्टर अवनीश शरण अउ नगर-निगम के आयुक्त अमित कुमार मौजूद रिहीन। ओमन बतइन कि तारबहार जन समस्या निवारण सिविर म दू सौ तेरह अर्जी मिले रिहीस।
तबादला
राज्य सरकार ह काली भारतीय प्रशासनिक सेवा के बीस झिन अधिकारी मनके तबादला कर देहे। एमा तीन जिला के कलेक्टर अउ दू संभाग के कमिश्नर हवय। महादेव कावरे ल रईपुर संभाग के आयुक्त बनाय गेहे। उहें, नीलम नागदेव एक्का ल बिलासपुर संभाग के आयुक्त नियुक्त करे गेहे। एखर संगेसंग विनय कुमार लंगेह ल महासमुंद जिला के कलेक्टर, चंदन संजय त्रिपाठी ल कोरिया कलेक्टर अउ संबित मिश्रा ल बीजापुर के नवा कलेक्टर बनाय गेहे।
नई औद्योगिक नीति
वाणिज्य अउ उद्योग मंत्री लखन लाल देवांगन ह छत्तीसगढ़ राज्य औद्योगिक विकास निगम के बइठका लीन। बइठका म ओमन किहीन कि प्रदेस के नवा औद्योगिक नीति अवइया एक नवंबर ले लागू होही। एखर ले प्रदेस म बने औद्योगिक वातावरण बनही अउ रोजगार के मउका बाढ़ही।
बइठका म नवा रईपुर म फार्मास्यूटिकल पार्क बनाय बर सैध्दांतिक मंजूरी दे गीस। पार्क बने ले निवेस के संगेसंग इंहा के लोगन ल रोजगार मिलही। उहें, जांजगीर-चांपा अउ राजनांदगांव जिला म औद्योगिक क्षेत्र स्थापित करे बर मंजूरी दे गीस। बइठका म सीएसआईडीसी के नवा रईपुर के भुंईया म उद्योग भवन बनाय खातिर गोठबात करे गीस।
वित्तमंत्री-केंद्रीय बजट
छत्तीसगढ़ के वित्त मंत्री ओ.पी.चौधरी ह अपन कोरबा दउरा के बेरा केंद्र सरकार के आम बजट के संबंध म जानकारी दीन। ओमन किहीन कि केंद्रीय बजट अमृत काल के विजन के नींव हे। ए बजट विकसित भारत के संकलप यात्रा के दिसा निरदेसक बजट हे। जउन विकसित भारत के संकलप ल नवा मजबूती दिही। ए बजट देस के आर्थिक बढ़वार म सहायक हे। संगेसंग सबो वरग के लोगन के हित ल धियान म राखे गेहे।
वित्त मंत्री-आईआईएम
नवा रईपुर के भारतीय प्रबंधन संस्थान आईआईएम म राखेगे कार्यसाला म वित्त मंत्री ओ.पी. चौधरी सामिल होइन। ए दउरान ओमन किहीन कि दू हजार सैंतालिस तक प्रदेस ल विकसित बनाय बर सरकार प्रतिबध्दता ले काम करत हे। छत्तीसगढ़ म विकास के बढ़ संभावना हवय। एला देखत राज्य सरकार ह छत्तीसगढ़ ल विकसित राज्य बनाय के रणनीति तियार करे हे। वित्त मंत्री छत्तीसगढ़ के ग्रामीण अर्थव्यवस्था ल मजबूत अउ विकसित बनाय बर राखेगे कार्यसाला म बोलत रिहीन। ए कार्यसाला के आयोजन रूरल इंडिया कोति ले करे गे रिहीस हे।
अग्निवीर-प्रशिक्षण
वित्तमंत्री ओ.पी.चौधरी ह रायगढ़ जिला मुख्यालय के पुलिस लाइन उर्दना म अग्निवीर प्रसिक्षण कारीकरम के सुभारंभ करीन। ए मउका म ओमन किहीन कि अग्निवीर म चुनेगे युवा मन ल देस सेवा के मउका मिलही। उंखर आत्म सम्मान बाढ़ही अउ ओमन आत्म निर्भर बनही। श्री चौधरी ह किहीन कि अग्निवीर मन ल प्रदेस के स्थानीय भर्ती म प्राथमिकता देके फइसला लेहे। ओमन जम्मों प्रसिक्षण लेवइया मन ल स्वेच्छानुदान मद ले पांच-पांच हजार रूपिया सहायता रासि देके घोसना करीन।
श्रमिक कल्याण-बैठक
श्रम मंत्री लखन लाल देवांगन के अगुवई म नवा रईपुर म छत्तीसगढ़ भवन अउ अन्य सन्निर्माण कर्मकार कल्याण मंडल के संचालक मंडल के बइठका राखे गीस। एमा निर्माण श्रमिक अउ उंखर परिवार वाले मनके हित बर कतकोन फइसला ले गीस। बइठका म फइसला ले गीस कि पहिली ले पंजीयन होय निर्माण श्रमिक जउन मन नवीनीकरण नइ कराय हे, ओमन अब इकतीस दिसंबर तक अपन पंजीयन के नवीनीकरण करा सकत हे। बइठका म जादा ले जादा श्रमिक मनके पंजीयन ई-श्रम पोर्टल म कराय के फइसला ले गीस। जेखर ले ओमन ल सरकारी योजना के फायदा मिल सकय। संगेसंग मुख्यमंत्री निर्माण श्रमिक कोचिंग सहायता योजना म मजदूर मनके लइका मन बर प्रतियोगी परीक्षा म सामिल होय खातिर मुफत म ऑनलाइन अउ ऑफलाइन कोचिंग के बेवस्था करे के फइसला ले गेहे।
माओवादी स्मारक ध्वस्त
बीजापुर जिला म सुरक्षा बल ह माओवादी मन कोति ले बनाय गे दू स्मारक ल ध्वस्त कर दीन। खबर के मुताबिक डीआरजी अउ बस्तर फाइटर के टीम मद्देड़ थाना क्षेत्र के बंदेपारा- कोरंजेड़ कोति तलासी अभियान बर निकले रिहीन। इही दौरान संयुक्त टीम कोति ले गांव बंदेपारा म माओवादी मन कोति ले बनाय गे पंद्रह-पंद्रह फीट ऊंच दू माओवादी स्मारक ल ध्वस्त कर दे गीस। क्षेत्र म पुलिस के गस्त चलत हे।
अउ अब मौसम के हाल…
पश्चिम बंगाल अउ ओखर ले लगे झारखंड के उपर एक निम्न दबाव के क्षेत्र बने हुए हे। जेखर परभाव ले प्रदेस म कतकोन जघा म हल्का ले मध्यम बरसा होय अउ गरज-चमक संग छींटा-बौछार पड़े के संभावना हे। संगेसंग उत्तर अउ मध्य छत्तीसगढ़ के कुछेक जघा म भारी बरसा होय अउ गाज गिरे के आसंका जताय गेहे।
मौसम विभाग के मुताबिक अवइया अड़तालिस घंटा म राजधानी रईपुर समेत सरगुजा, जशपुर, बिलासपुर, मुंगेली, बलौदाबाजार, महासमुंद, दुरूग, बालोद, बेमेतरा अउ कबीरधाम जिला म भारी बरसा हो सकत हे। उहें, कोरिया, मनेन्द्रगढ़-चिरमिरी-भरतपुर, सूरजपुर, बलरामपुर अउ कोरबा जिला म अतिभारी बरसा होय के संभावना हवय।