मुख्यमंत्री-बस्तर
मुख्यमंत्री विष्णुदेव साय ह आज बस्तर जिला के प्रवास के दउरान जगदलपुर के कार्यक्रम म महतारी वंदन योजना के छठवां किश्त के राशि हितग्राही मनके खाता म ऑनलाइन अंतरित करीन। ए मउका म मुख्यमंत्री ह महतारी वंदन ऐप घलो लांच करीन अउ तीन हजार ले जादा महिला स्व-सहायता समूह मन ल स्वरोजगार बर सौ करोड़ रूपिया के करजा दीन।
एखर पहिली, मुख्यमंत्री ह बस्तर जिला म ‘‘एक पेड़ मां के नाम‘‘ अभियान के सुरूवात करीन।
उहें, मुख्यमंत्री ह जल संरक्षण बर बस्तर वासी मन ल जागरूक करे के उद्देश्य ले जलशक्ति अभियान म जागरूकता वाहन ल जगदलपुर ले झंडा दिखाके रवाना करीन। ए वाहन जिला के सबो गांव म जाके जल संरक्षण के उपाय के जानकारी देवत आम नागरिक मन ल जागरूक करही।
जगदलपुर प्रवास के दउरान श्री साय ह महरानी जिला अस्पताल परिसर म प्रधानमंत्री भारतीय जनऔषधि केन्द्र के सुरूवात करीन। ए केन्द्र के खुले ले अब अस्पताल परिसर म ही मरीज मन ल सस्ता जेनेरिक दवई मिल सकही। ओमन ह मरीज मन ल ताजा अउ सुपाज्य भोजन देवाय बर बनत अन्नापूर्णा रसोई घर के घलो लोकार्पण करीन। ए रसोई घर के संचालन मां दंतेश्वरी महिला स्व-सहायता समूह डहार ले करे जाही।
संपूर्णता अभियान
कोंडागांव जिला के माकड़ी विकासखंड म आज संपूर्णता अभियान म साप्ताहिक बाजार म पीएमश्री स्वामी आत्मानंद स्कूल के विद्यार्थी अउ सिक्षक मन ह नुक्कड़ नाटक देखाके लोगन ल जागरूक करीन। संपूर्णता अभियान के नोडल अधिकारी अखिलेश गायधने ह बतईन कि ए अभियान के सुरूवात प्रधानमंत्री नरेन्द्र मोदी ह चार जुलाई के करीन। तीस सितंबर तक चलइया ए अभियान म लोगन ल मधुमेह, उच्च रक्तचाप जइसन बीमारी मनके रोकथाम अउ इलाज के संगेच टीकाकरण, गर्भवती माईलोगिन मन ल निःशुल्क पोषण आहार, मृदा कार्ड, समूह ल सहायता राशि जइसन योजना के जानकारी लोगन ल दे जावत हे। कार्यक्रम म माकड़ी विकासखंड के सरपंच हेमलाल वट्टी अउ सचिव लक्ष्मण सोरी संघरा दूसर हितग्राही मन घलो मौजूद रिहीन।
जीएसटी काउंसिल पुनर्गठन
वस्तु अउ सेवा कर-जीएसटी म सुधार बर ग्रुप ऑफ मिनिस्टर-जीओएम के पुनर्गठन करे गेहे। एमा छत्तीसगढ़ के वित्त मंत्री ओ.पी. चौधरी ल सदस्य के रूप म नामित करे गेहे। ए ग्रुप म दू ठन राज्य के उप मुख्यमंत्री संघरा कुल आठ झन सदस्य हे। ए समिति के मुख्य उद्देश्य जीएसटी कानून, प्रक्रिया अउ नीति मन ल प्रभावी बनाय बर सिफारिश करना हे।
कार्यशाला
छत्तीसगढ़ के ग्रामीण अर्थव्यवस्था ल सशक्त अउ विकसित बनाय बर आज नवा रईपुर के भारतीय प्रबंधन संस्थान म ट्रांसफॉर्म रूरल इंडिया फाउंडेशन डहार ले कार्यशाला के आयोजन करे गीस। ए कार्यसाला के सुरूवात पंचायत अउ ग्रामीण विकास विभाग के प्रमुख सचिव निहारिका बारिक सिंह ह करीन। ए मउका म पंचायत अउ ग्रामीण विकास विभाग ह फाउंडेशन के संग समझौता ज्ञापन म हस्ताक्षर करीन। ए एमओयू के उद्देश्य राज्य के ग्रामीण क्षेत्र म विकास के गति ल बढ़ाना अउ समृद्ध छत्तीसगढ़ के निर्माण करना हे। ए समझौता पांच बछर बर करे गे हवय। कार्यशाला म ग्रामीण विकास, पर्यावरणीय स्थिरता अउ सामाजिक प्रगति ले जुड़े मुद्दा उपर विचार-विमर्श करे गीस।
कार्यशाला म मौजूद अतिथि मन ह विकसित छत्तीसगढ़ बर गुड गवर्नेंस ल बढ़ावा दे बर अउ सरकार के सबो विभाग के संघरा परयास ल लागू करे के बारे म अपन व्याख्यान दीन।
स्वप्निल कुसाले-कांस्य पदक
पेरिस ओलंपिक म पुरूष मनके पचास मीटर रायफल थ्री पोजिसन म स्वप्निल कुसाले ह कांस्य पदक जीते हे। ए उपलब्धि बर मुख्यमंत्री विष्णुदेव साय ह स्वप्निल ल बधाई दीन हे। श्री साय ह अपन संदेस म किहीन कि उंखर मेहनत अउ एकाग्रता के सार्थक परिणाम पेरिस म दिखीस अउ एखर बर देस ल उंखर मन उपर गर्व हे। पेरिस ओलंपिक म ए ह भारत बर तीसरा पदक हे।
केदार कश्यप-पौधारोपण
वन मंत्री केदार कश्यप ह वन विभाग के अधिकारी मनके बइठका म निरदेस दे हवय कि सामाजिक संगठन अउ स्वयंसेवी संस्था के मदद ले ‘‘एक पेड़ मां के नाम‘‘ अभियान के तहत पौधारोपण करे जाय। ओमन किहीन कि पौधारोपण कार्यक्रम के संगेच पौधा मन ल सहेजे के अभियान घलो चलाय जाय। वन मंत्री ह किहीन कि पन्द्रह अगस्त के ध्वजारोहण के बाद बिसेस रूप ले पौधा लगाय जाय। श्री कश्यप ह किहीन कि अवइया बेरा म शहीद गूंडाधूर के सुरता म वन सुरक्षा गुंडाधूर के माध्यम ले जंगल के सुरक्षा के बारे म परयास करे जाही।
अरूण साव-मुलाकात
उप मुख्यमंत्री अरूण साव ह बीजापुर म पाछु दिन आईईडी विस्फोट म मारे गे जवान भरत साहू के रायपुर के निवास पहुंचीन अउ उंखर परिवार वाला मन ले भेंट करीन। श्री साव ह ओमन मन ले किहीन कि सरकार ह उंखर परिवार के हरसंभव मदद करही। ओमन ह रायपुर नगर निगम के आयुक्त ले चर्चा करके जल्दीच मोवा चौक म शहीद भरत साहू के मूर्ति लगाय के निरदेस दीन।
ए दउरान उप मुख्यमंत्री श्री साव के संग रायपुर ग्रामीण के विधायक मोतीलाल साहू अउ साहू समाज के पदाधिकारी मन मौजूद रिहीन।
एनसीसी कैडेट-स्वच्छता अभियान
सैंतीसवां सीजी बटालियन एनसीसी दुरूग के निरदेस म आज भिलाई के सेंट थॉमस महाविद्यालय के एनसीसी कैडेट मन डहार ले ‘‘स्वच्छता अभियान‘‘ कार्यक्रम कराय गीस, जेमा लोगन ल जागरूक करे बर भिलाई के रूआबांधा बस्ती म नुक्कड़ नाटक के प्रस्तुति दे गीस। संगेसंग स्वच्छता अभियान के संदेश जन-जन तक पहुंचाय बर एक ठिन रैली निकाले गीस अउ एनसीसी कैडेट मन डहार ले महाविद्यालय अउ ओखर तीर-तखार के इलाका के साफ-सफाई घलो करे गीस।
हाथी हमला-ग्रामीण मौत
जशपुर जिला के नारायणपुर थाना क्षेत्र म पाछु रतिहा जंगली हाथी के हमला म एक झन ग्रामीण के मउत होगे। बताय जात हवय कि मृतक ग्रामीण ह अपन परिवार ल दूसर जघा लेगत रिहीस। इही दउरान जंगली हाथी ह ओखर उपर हमला कर दीस। ए हाथी ह दस ले बारह ठन घर ल घलो नुकसान पहुंचाय हे। वन विभाग के अधिकारी मन ह मउका म पहुंच के परिवार वाला मन ल मदद के रासि दीन।
डीएफओ जितेन्द्र उपाध्याय ह बतईन कि क्षेत्र म पांच ले छह ठन दंतैल हाथी मन घूमत हे। वन विभाग अउ वन मित्र मन डहार ले ग्रामीण मन ल जंगल कोति नइ जाय के बारे म सलाह दे जावत हे।
अउ अब मौसम के हाल…
एक ठन मानसून द्रोणिका ह श्रीगंगानगर ले लेके उत्तर पूर्व बंगाल के खाड़ी तक स्थित हे। उहें, उपरी हवा के एक ठन चक्रीय चक्रवाती घेरा ह पश्चिम बंगाल अउ ओखर ले लगे दक्षिण बांग्लादेश के उपर बने हे। एखर असर ले प्रदेस म काली जादा ले जादा जघा म हल्का ले मध्यम बरसा होय के अउ गरज-चमक के संग छींटा पड़े के संभावना हे। उहें, बिलासपुर अउ सरगुजा संभाग म एक-दू जघा म भारी ले अतिभारी बरसा होय के अउ आकाशीय बिजली गिरे के चेतावनी दे गे हवय।
राजधानी रईपुर संघरा प्रदेस के कुछेक जघा म पाछु रतिहा तेज बरसा होइस। एखर सेती सड़क अउ निचला बस्ती मन म पानी भर गे। मौसम विभाग ह काली रईपुर म बादल छाय के गरज-चमक के संग बरसा होय के संभावना जताय हे।
इही बीच, राजस्व अउ आपदा प्रबंधन विभाग डहार ले बनाय गे राज्य स्तरीय नियंत्रण कक्ष डहार ले मिले जानकारी के अनुसार अभी तक राज्य म पांच सौ इक्यासी मिलीमीटर औसत बरसा दर्ज करे जा चुके हे।