आज राजभवन के दरबार हाल म आयोजित समारोह म रमेन डेका ह छत्तीसगढ़ के दसवां राज्यपाल के रूप म अपन पद के सपथ लीन। छत्तीसगढ़ उच्च न्यायालय के मुख्य न्यायाधीश रमेश सिन्हा ह उनला शपथ दिलइन। राज्यपाल श्री डेका ह ईश्वर के नाम म सपथ लीन। ए अवसर पर प्रथम महिला रानी डेका काकोटी घलो उपस्थित रिहीन। प्रदेस के मुख्यमंत्री विष्णुदेव साय, विधानसभा अध्यक्ष डॉक्टर रमन सिंह अउ मुख्य न्यायाधीश ह राज्यपाल श्री डेका ल पुष्पगुच्छ भेंट कर उंखर अभिनंदन करीन अउ सुभकामना दीन।
ए समारोह म मुख्य सचिव अमिताभ जैन ह श्री डेका ल छत्तीसगढ़ के राज्यपाल नियुक्त करे बर राष्ट्रपति द्रौपदी मुर्मू डहार ले जारी वारंट ऑफ अपॉइंटमेंट ल पढ़ीन। शपथ ग्रहण समारोह के सुभारंभ अउ समापन सेरेमोनियल पुलिस बैंड डहार ले बजाय गे राष्ट्रगान संग होइस। ए अवसर पर राज्यगीत के धुन घलो बजाय गीस। सपथ ग्रहण के बाद श्री डेका ल गॉड ऑफ ऑनर दे गीस। ए अवसर म उप मुख्यमंत्री अरूण साव समेत मंत्रिमंडल के अन्य सदस्य, सांसद बृजमोहन अग्रवाल, पूर्व मुख्यमंत्री भूपेश बघेल अउ विधायक उपस्थित रिहीन।
शपथ ग्रहण समारोह के बाद राज्यपाल श्री डेका आज नई दिल्ली बर रवाना होगे। ओमन उहां राष्ट्रपति द्रौपदी मुर्मू के अध्यक्षता म राष्ट्रपति भवन म आयोजित होवइया दो दिवसीय राज्यपाल मनके सम्मेलन म सामिल होही। ए सम्मेलन दू अउ तीन अगस्त के आयोजित करे जाही।
एखर पहिली, राज्यपाल श्री डेका आज आदिम जाति विकास मंत्री रामविचार नेताम के नवा रायपुर स्थित निवास के गृह प्रवेस कार्यक्रम म सामिल होइन। ए मउका म ओमन निवास परिसर म रूद्राक्ष के पौधा लगइन।
पीएम ई-बस सेवा-बैठक
प्रदेस के मुख्य सचिव अमिताभ जैन के अध्यक्षता म काली मंत्रालय म प्रधानमंत्री ई-बस सेवा योजना के अंतर्गत राज्य स्तरीय स्टेयरिंग कमेटी के पहिली बइठका होइस। बइठका म समिति डहार ले राज्य के अलग-अलग सहर म सार्वजनिक परिवहन सुविधा बर बस मनके स्वीकृति प्रदान करे गीस। समिति डहार ले रायपुर बर सौ मिडी ई-बस, दुर्ग-भिलाई बर पचास, बिलासपुर बर पैंतीस मिडी अउ पन्द्रह मिनी ई-बस अउ कोरबा बर बीस मिडी अउ बीस मिनी ई-बस मनके स्वीकृति के प्रस्ताव के अनुमोदन करे गीस।
बतादन कि सहर मनके सार्वजनिक परिवहन के ढांचा ल दुरूस्त करे बर केन्द्र सरकार डहार ले पीएम ई-बस सेवा योजना सुरू करे गेहे।
प्रधानमंत्री आवास योजना-शहरी
उपमुख्यमंत्री अरूण साव ह किहीन हे कि राज्य सरकार, प्रधानमंत्री आवास योजना-सहरी के तहत गरीब परिवार मन ल आवास दिलाय बर प्रतिबद्ध हे। ओमन किहीन कि ए बछर जनवरी ले जून महीना तक राज्य म तीस हजार ले जादा आवास मनके निर्माण करे गेहे। श्री साव ह किहीन कि प्रधानमंत्री आवास योजना-सहरी के तहत ए बछर जनवरी ले जून महीना तक एक सौ पैंसठ करोड़ तीस लाख रूपिया के केन्द्रांश अउ चौरानवे करोड़ रूपिया ले जादा के राज्यांश स्वीकृत करे गेहे। योजना के तहत तीन सौ अंठावन करोड़ रूपिया ले जादा के रासि के भुगतान हितग्राही मन ल करे गेहे। ओमन किहीन कि केन्द्र सरकार ले मंजूरी मिले के बाद ग्रामीण क्षेत्र मन म घलो आवास निर्माण म तेजी आही।
जनसमस्या निवारण पखवाड़ा-समीक्षा
उपमुख्यमंत्री अउ नगरीय प्रशासन मंत्री अरूण साव ह विभागीय अधिकारी मनके संग प्रदेस के सबो नगरीय निकाय मन म सत्ताईस जुलाई ले सुरू होय जनसमस्या निवारण पखवाड़ा के समीक्षा करीन। ओमन वीडियो कान्फ्रेंसिंग के माध्यम ले आयोजित बइठका म सबो नगर निगम के आयुक्त, नगर पालिका अउ नगर पंचायत के मुख्य नगर पालिका अधिकारी मन ल जनसमस्या निवारण शिविर मन म मिलत आवेदन मनके निराकरण करे के निरदेस दीन। ओमन सहर मनके समस्या के निदान अउ जनसुविधा विकसित करे बर व्यापक हित म योजना बनाय बर किहीन। बइठका म अधिकारी मन ह बतईन कि जनसमस्या निवारण पखवाड़ा के तहत अब तक प्रदेसभर ले साढ़े उन्नीस हजार ले जादा आवेदन प्राप्त होय हे। एमा ले साढ़े सात हजार ले जादा आवेदन मनके मउका म ही निराकरण करे गेहे।
माओवादी आत्मसमर्पण/स्मारक ध्वस्त
उहें, सुकमा जिला म सुरक्षा बल ह माओवादी मन डहार ले बनाय गे स्मारक ल ध्वस्त कर देहे। मिले जानकारी के अनुसार ए स्मारक माओवादी मन ह टेकलगुड़ा इलाका के तिम्मापुर गांव म बनाय रिहीन। केन्द्रीय रिजर्व पुलिस बल-सीआरपीएफ के कोबरा बटालियन अउ जिला पुलिस बल के टीम ह ए कार्रवाई करे हे।
शिक्षा महाविद्यालय-आवेदन
रायपुर के शंकर नगर स्थित शासकीय शिक्षा महाविद्यालय म सत्र दू हजार चौबीस-छब्बीस बर एम.एड. अउ बी.एड. म प्रवेस बर आवेदन के प्रक्रिया काली एक अगस्त ले सुरू होही। इच्छुक उम्मीदवार सात अगस्त तक एस.सी.ई.आर.टी. के आधिकारिक वेबसाइट म ऑनलाइन आवेदन कर सकत हे। आवेदन पत्र के हार्डकॉपी चौदह अगस्त तक महाविद्यालय म जमा कराना होही।
अवकाश प्राप्ति/स्वीकृति-आवेदन
लोक शिक्षण संचालनालय डहार ले काली ले प्रदेस के सबो विकासखंड शिक्षा अधिकारी कार्यालय मन म अउ बारह अगस्त ले सबो शैक्षणिक अउ प्रशासनिक कार्यालय मन म अवकाश प्राप्ति अउ स्वीकृति के प्रक्रिया ऑनलाइन पोर्टल के माध्यम ले करे जाही। ए तिथि के बाद ऑफलाइन माध्यम ले करे गे आवेदन निरस्त माने जाही। ए आदेस, संचालक लोक शिक्षण संचालनालय डहार ले जारी कर दे गेहे।
मुंशी प्रेमचंद जयंती-समारोह
राजीव गांधी राष्ट्रीय भूमि जल प्रशिक्षण अउ अनुसंधान संस्थान के सहयोग ले आज नवा रायपुर म मुंशी प्रेमचंद के जयंती के अवसर म कार्यक्रम के आयोजन करे गीस। ए मउका म राजीव गांधी भू-जल अनुसंधान संस्थान के वैज्ञानिक मन ह प्रेमचंद के कहानी उपर नाट्य मंचन करीन। उहें, समारोह म हरिशंकर परसाई के प्रेमचंद के जीवन उपर आधारित निबंध ‘‘प्रेमचंद के फटे जूते‘‘ उपर एकल मंचन करे गीस। एखर अलावा राजभाषा अधिकारी गोपाल प्रसाद ह प्रतिभागी मनके बीच प्रेमचंद के जीवन उपर आधारित प्रश्नोत्तरी प्रतियोगिता करवइन। कार्यक्रम म राजीव गांधी राष्ट्रीय भूमि जल प्रशिक्षण अउ अनुसंधान संस्थान, नेहरू युवा केन्द्र रायपुर, नगरीय विमानन अउ सुरक्षा ब्यूरो, केन्द्रीय जल आयोग, एकीकृत नाशीजीव प्रबंधन केन्द्र, अंतर राज्य पुलिस बेतार केन्द्र अउ एम.एस.टी.सी. के अधिकारी मनके संग सौ ले जादा प्रतिभागी मन भाग लीन।
अउ अब मौसम के हाल…
प्रदेस म काली अधिकतर जगह म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक-दू जगह म आकाशीय बिजली गिरे अउ भारी बरसा होय के चेतावनी दे गेहे। मध्य अउ दक्षिण छत्तीसगढ़ म भारी बरसा रेहे के संभावना हे। मौसम विभाग ह काली ले तीन अगस्त तक प्रदेस म पानी गिरे के संभावना जताय हे।
अउ अब थोरकुन समाचार सार म –
– पूर्व केन्द्रीय स्वास्थ्य सचिव अउ उन्नीस सौ तिरासी बैच के आईएएस अधिकारी प्रीति सूदन ल संघ लोक सेवा आयोग-यूपीएससी के नवा अध्यक्ष नियुक्त करे गेहे।
– मुख्यमंत्री विष्णुदेव साय के रायपुर स्थित निवास कार्यालय म हर गुरूवार के होवइया जनदर्शन कार्यक्रम काली एक अगस्त के कोनों कारण ले स्थगित कर दे गेहे।
– बलौदाबाजार के गांव भदरा म पाछु दिन होय दोहरा हत्याकांड के खुलासा कसडोल पुलिस ह कर देहे। ए मामला म पुलिस ह भदरा निवासी एक झन आरोपी ल गिरफ्तार करे हे।