छत्तीसगढ़ उच्च न्यायालय के मुख्य न्यायाधीश न्यायमूर्ति रमेश सिन्हा डहार ले काली बिहनिया राजभवन म छत्तीसगढ़ के नवा राज्यपाल रमेन डेका ल राज्य के दसवां राज्यपाल के रूप म सपथ देवाय जाही। सपथ ग्रहण समारोह के जम्मों तैयारी पूरा कर ले गेहे।
एखर पहिली, रमेन डेका ह आज संझा विशेष हवाई जहाज ले रईपुर पहुंचीस। ए दउरान प्रदेस के मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह उंखर स्वागत करीन। ए मउका म मंत्रिमंडल के सदस्य मन ह घलो मौजूद रिहीन।
छत्तीसगढ़ के निवर्तमान राज्यपाल विश्वभूषण हरिचंदन ल आज राजभवन म बिदाई दे गीस। एखर बाद श्री हरिचंदन ह ओड़िसा के भुवनेश्वर बर रवाना होगे। ए मउका म उंखर संग ओखर गोसईन ह घलो मौजूद रिहीन। राज्यपाल श्री हरिचंदन ल एखर पहिली गार्ड ऑफ ऑनर दे गीस। ओमन ह राजभवन के जम्मों अधिकारी अउ कर्मचारी मन ले भेंट करीन। श्री हरिचंदन ह किहीन कि छत्तीसगढ़ के मनखे मन ह मोला बहुत मया-दुलार दीन हे। ओमन आसा जताय हे कि मुख्यमंत्री विष्णुदेव साय के अगुवई म छत्तीसगढ़ राज्य ह अउ जादा विकास करही। ओमन किहीन कि छत्तीसगढ़ के मनखे मन ह बहुत जादा सरल हवय अउ इहां के धरती ह प्राकृतिक संपदा ले भरे हवय। ए दउरान मुख्यमंत्री विष्णुदेव साय ह किहीन कि राज्यपाल श्री हरिचंदन के संग काम करे के मोला बहुत जादा अनुभव मिलीन हे।
बिदाई कार्यक्रम म उपमुख्यमंत्री अरूण साव, पूर्व मुख्यमंत्री भूपेश बघेल के संगेसंग मंत्रिमंडल के कई झन सदस्य मन ह मौजूद रिहीन।
ट्रेन हादसा
झारखंड म आज बिहनिया हावड़ा-मुंबई रेलगाड़ी ह दुर्घटनाग्रस्त होगे। टाटानगर के तीर चक्रधरपुर म ए रेलागाडी के अट्ठारह ठन डब्बा ह पटरी ले उतर गे। ए हादसा म दू झन यात्री के मउत होगे। उहें, कई झिन यात्री मन ह घायल होगे। खबर के मुताबिक ए हादसा ह चक्रधरपुर डिवीजन के पोटोबेड़ा गांव के तीर होइस। घटना के सूचना मिलतेच रेलवे के कर्मचारी अउ अधिकारी मन ह मउका म जाके बचाव काम म लगे हे।
हादसा के सेती रईपुर रेलमंडल ले अवइया-जवइया सालीमार लोकमान्य तिलक एक्सप्रेस अउ टाटानगर इतवारी एक्सप्रेस ल टाटानगर-बिलासपुर के बीच रद्द कर दे गेहे। उहें, करीबन पन्द्रह ठन रेलगाड़ी ल दूसर रद्दा ले चलाय जावत हे।
मनु/सरबजोत-कांस्क पदक
भारतीय निशानेबाज मनु भाकर अउ सरबजोत सिंह ह आज पेरिस ओलंपिक म दस मीटर एयर पिस्टल मिक्स्ड टीम इवेंट म भारत बर दूसरा कांस्य पदक जीतीन। मनु भाकर ह ओलंपिक प्रतियोगिता म दू ठन पदक जीतइया पहिली भारतीय खिलाड़ी बन गेहे। दक्षिण कोरिया के ‘ओह ये जिन‘ अउ ‘ली वोन्हो‘ ले सोलह-दस के अंतर ले जीतके मनु अउ सरबजोत के जोड़ी ह कांस्य पदक हासिल करीन। मनु भाकर ह पाछु इतवार के दिन दस मीटर पिस्टल सूटिंग म कांस्य पदक जीतके भारत ल पहिली पदक देवाय रिहीन।
प्रधानमंत्री नरेन्द्र मोदी अउ राज्य के मुख्यमंत्री विष्णुदेव साय ह मनु भाकर अउ सरबजोत सिंह ल बधाई अउ सुभकामना दीन।
मुंशी प्रेमचंद जयंती-समारोह
भारत के जाने-माने कहानीकार मुंशी प्रेमचंद के जयंती ल काली मनाय जाही। ए मउका म बिहनिया ग्यारह बजे नवा रईपुर के राजीव गांधी राष्ट्रीय भूमि जल प्रशिक्षण अउ अनुसंधान संस्थान म एक ठिन कारीकरम राखे जाही। ए कार्यक्रम म मुंशी प्रेमचंद उपर व्याख्यान अउ उंखर उपन्यास म आधारित फोटू प्रदर्सनी के संगेसंग उंखर कहानी अउ नाटक के मंचन करे जाही।
माओवादी-आत्मसमर्पण/गिरफ्तार
कबीरधाम जिला म आज दू झन इनामी माओवादी मन ह आत्मसमर्पण कर दीन। एमा एक झिन माओवादी ह कान्हा भोरमदेव एरिया कमेटी के सक्रिय सदस्य रिहीन। उहें, एक झिन माओवादी उपर पन्द्रह लाख रूपिया अउ दूसर माओवादी उपर दस लाख रूपिया के इनाम घोषित करे गे रिहीस। ए माओवादी मन उपर माओवादी गतिविधि म सामिल होय के आरोप हे। ए माओवादी मन ल राज्य सरकार के पुनर्वास नीति के तहत पच्चीस-पच्चीस हजार रूपिया के सहायता राशि दे जाही।
ओति, बीजापुर जिला म पुलिस के टीम डहार ले चार झिन माओवादी मन ल गिरफ्तार करे गेहे। डीआरजी के टीम ह गंगालूर थाना क्षेत्र के पीड़िया, मुतवेंडी अउ अंडरी कोति सर्चिंग म निकले रिहीन, उही समे पुलिस के टीम ह ए माओवादी मन ल गिरफ्तार करीन।
उहें, इही जिला के कुटरू-बैटरी रद्दा म माओवादी मन डहार ले लगाय गे आईईडी बम ल सुरक्षा बल के बम निरोधक दस्ता टीम ह निष्क्रिय कर दीन।
कर्मचारी-अधिकारी फेडरेशन-हड़ताल
छत्तीसगढ़ करमचारी-अधिकारी फेडरेशन ह अपन कई ठन मांग ल लेके आंदोलन करे चेतावनी देहे। फेडरेशन डहार ले आंदोलन के जानकारी ल राज्य के मुख्य सचिव ल दे देहे। फेडरेशन डहार ले छह अगस्त के मसाल रैली निकाल के आंदोलन के सुरूवात करे जाही। उहें, सत्ताईस सितंबर के सामूहिक अवकाश अउ कलमबंद-काम बंद हड़ताल सुरू करे जाही।
खबर के मुताबिक छत्तीसगढ़ करमचारी-अधिकारी फेडरेशन ह केन्द्र सरकार के करमचारी मनके जइसे महंगाई भत्ता, महंगाई भत्ता के लंबित एरियर्स, करमचारी मन ल चार स्तरीय समयमान वेतन, मकान भाड़ा भत्ता अउ दू सौ चालीस दिन के जघा म अवकाश ल तीन सौ दिन करे के मांग करे हे।
उहें, छत्तीसगढ़ प्रदेस राजपत्रित अधिकारी संघ ह कर्मचारी-अधिकारी फेडरेशन के आंदोलन ल अपन समर्थन देके फइसला लेहे।
अग्निवीर भर्ती रैली
राज्य के जम्मों जिला मन म अग्निवीर सेना भर्ती रैली के आयोजन चार दिसंबर ले बारह दिसंबर के बीच होय के संभावना हे। खबर के मुताबिक जांजगीर-चांपा जिला रोजगार अधिकारी ह बतईन हे कि जिला के जवान लइका मन ल मुफत म सारीरिक प्रसिक्षण देवाय जाही। ऑनलाइन परीक्षा म पास होवइया युवा मन ह अगर ए प्रसिक्षण सिविर म भाग लेना चाहत हे, त ओमन अपन पंजीयन ल सोलह अगस्त तक जिला रोजगार कार्यालय म करा सकत हे।
संदीप साहू-निलंबन कार्रवाई
छत्तीसगढ़ गृह निर्माण मंडल डहार ले रईपुर के एकलव्य खेलकूद प्रकल्प परिसर, छात्रावास भवन अउ स्पोर्ट्स कॉम्पलेक्स के निर्माण काम म गड़बड़ी पाय के सेती तत्कालीन कार्यपालन अभियंता संदीप साहू ल निलंबित कर दे गेहे। श्री साहू ह अभी वर्तमान म छत्तीसगढ़ गृह निर्माण मंडल के प्रभारी उपायुक्त के पद म काम करत रिहीन।
खबर के मुताबिक संदीप साहू डहार ले तैयार करे गे प्रारंभिक अनुमान अउ बछर दू हजार बाईस म स्वीकृत अनुमान म विसंगति पाय गेहे। ए अनुमान मनके आधार म टेंडर मंजूर करे गे रिहीस। फेर, निर्माण काम म जादा बजट के जरूरत पड़ीस, त ओमन उपरहा धनराशि मांगे बर गलत जानकारी दे रिहीस। ए मामला के जांच करे खातिर वित्तमंत्री ओ.पी. चौधरी ह आयुक्त कुंदन कुमार ल आदेस दे रिहीन। जांच म दोषी पाय के सेती संदीप साहू के खिलाफ निलंबन के कार्रवाई करे गेहे।
प्रदेस म काली इकतीस जुलाई ले तीन अगस्त तक भारी बरसा होय के संभावना हे। मौसम विभाग ले मिले खबर के मुताबिक दक्षिण पूर्व मध्यप्रदेश अउ उंखर तीर-तखार म एक ठन चक्रवात बनत हे। एखर असर ले प्रदेस के कोनों-कोनों जघा म भारी बरसा होय के आसंका जताय हे। उहें, एक ठन द्रोणिका ह जैसलमेर ले बालासोर होवत उत्तर-पूर्व बंगाल के खाड़ी तक बने हवय, जेखर सेती अवइया चौबीस घंटा के दउरान गरज-चमक के संग बरसा होय के संभावना हे।
ऐति, राजस्व अउ आपदा प्रबंधन विभाग के मुताबिक अब तक राज्य म पांच सौ इंक्यावन मिलीमीटर औसत वर्षा दरज करे हे। बीजापुर जिला म सबले जादा एक हजार तीन सौ पच्चीस मिलीमीटर अउ सरगुजा जिला म सबसे कमती दू सौ पांच मिलीमीटर औसत बरसा रिकॉर्ड दरज करे गेहे।