मुख्यमंत्री-केंद्रीय कृषि मंत्री मुलाकात
मुख्यमंत्री विष्णुदेव साय ह आज नई दिल्ली के कृषि भवन म केंद्रीय कृषि अउ ग्रामीण विकास मंत्री शिवराज सिंह चौहान ले भेंट करीन। ए दौरान ओमन ह कृषि क्षेत्र ले जुड़े आने-आने मुद्दा, कृषि विकास अउ ग्रामीण विकास के बारे म कृषि मंत्री ले गोठबात करीन। ए दौरान कृषि मंत्री श्री चौहान ह किहीन कि केंद्र सरकार ह छत्तीसगढ़ म गरीब मन बर आवास अउ सड़क के विकास बर वचनबध्द हे। बइठका म ग्राम सड़क योजना, प्रधानमंत्री आवास योजना-ग्रामीण, महात्मा गांधी राष्ट्रीय ग्रामीण रोजगार गारंटी योजना संघरा आने-आने बिसय म चर्चा होइस।
चर्चा के दौरान मुख्यमंत्री ह नक्सली हमला म सहीद के परिवार वाला मन ल अउ आत्मसमर्पण करइया लोगन बर प्रधानमंत्री आवास योजना के तहत मकान दे जाय के बात किहीन। एमा कृषि मंत्री ह किहीन कि केंद्र अउ राज्य सरकार ह मिलके राज्य के कल्याणकारी काम ल पूरा करही। बइठका म उप मुख्यमंत्री विजय शर्मा घलो मौजूद रिहीन।
प्रधानमंत्री-चर्चा
प्रधानमंत्री नरेंद्र मोदी ह काली नई दिल्ली म भाजपा शासित राज्य के मुख्यमंत्री अउ उपमुख्यमंत्री मन संग गोठबात करीन। श्री मोदी ह सबो झन ल अपन-अपन राज्य म शासन व्यवस्था ल बेहतर बनाय बर कतकोन सुझाव दीन अउ कल्याणकारी योजना मन म जादा काम करे जाय उपर जोर दीन। ए बइठका के उद्देस्य शासन अउ कल्याणकारी योजना के समीक्षा करना रिहीस। दू दिन के बइठका म प्रधानमंत्री ह भाजपा शासित राज्य के मुख्यमंत्री मन ले विकास कारीकरम अउ दूसर प्रयास म जनभागीदारी म जादा जोर देके, देस के अर्थव्यवस्था ल पांच ट्रिलियन डॉलर तक ले जाय के अपील करीन।
पीएम आवास योजना
प्रधानमंत्री आवास योजना-सहरी म अभी तक कुल एक करोड़ अट्ठारा लाख ले जादा मकान स्वीकृत करे गे हवय। केंद्रीय आवास अउ सहरी मामला के राज्यमंत्री तोखन साहू ह आज राज्य सभा म एक ठन प्रश्न के जवाब म ए बात किहीन। ओमन किहीन कि कुल स्वीकृत घर म एक करोड़ चौदह लाख ले जादा आवास निर्माणाधीन हे, अउ पचयासी लाख ले जादा के निर्माण काम पूरा होगे हवय।
बीजापुर-अनुकंपा नियुक्ति
नक्सली हिंसा म मृतक के परिवार वाला मन ल छत्तीसगढ़ शासन के पुनर्वास नीति के तहत शासकीय सेवा म अनुकंपा नियुक्ति दे जाही। ए बारे म बीजापुर म जिला स्तरीय पुनर्वास समिति के बइठका कलेक्टर अनुराग पांडेय के अध्यक्षता म होइस, जेमा अंठावन झन पात्र आवेदक मन ल प्रथम चरण म अनुकंपा नियुक्ति दे जाय के फैसला ले गीस। उहें, एखर पहिली जिला स्तरीय समीक्षा बइठका म पुलिस अधीक्षक कार्यालय ले मिले प्रकरण के समीक्षा करे गीस। बीजापुर कलेक्टर ह बतइन कि आने-आने विभाग म चतुर्थ वर्ग के पद मन म नियुक्ति बर प्रथम चरण म अंठावन झन आवेदक मन ल पात्र पाय गे हे। ओमन बतइन कि काली तीस जुलाई के आवेदक मन के काउंसिलिंग इंदिरावती सभाकक्ष म बिहनिया ग्यारा बजे ले सुरू होही।
राज्यपाल-रेडक्रॉस समिति
राज्यपाल विश्वभूषण हरिचंदन ह आज राजभवन म रेडक्रॉस समिति के छत्तीसगढ़ इकाई डहार ले प्रकासित बछर दू हजार तेईस-चौबीस के स्मारिका के विमोचन करीन। ए मउका म रेडक्रॉस समिति के मुख्य कार्यपालन अधिकारी एम.के.राउत ह बतइन कि रेडक्रॉस डहार ले सबको सुविधा वाल भवन बनाय जावत हे, जेखर बर राज्यपाल ह स्वेच्छा अनुदान मद ले बहत्तर लाख रूपिया दीन हे। एखरे संग आकस्मिक स्थिति म प्राथमिक चिकित्सा देवाय बर सरकारी डॉक्टर मन ल प्रसिक्षक के रूप म नियुक्त करे गेहे। राज्यपाल के पहल म आने-आने औद्योगिक संस्थान डहार ले अपन कार्पोरेट सोसल रिस्पांसीबिलीटी -सी.एस.आर. मद ले पचास लाख के रासि रेडक्रॉस ल दे गे हवय। संगेसंग केंद्र सरकार के संस्था ग्रामीण विद्युत कार्पोरेसन डहार ले चार करोड़ तिरालिस लाख रूपिया के लागत के चार ठन मेडिकल मोबाइल यूनिट एम्बुलेंस आदिवासी क्षेत्र बर देवाय गेहे।
स्वास्थ्य अधिकारी-तबादला
राज्य सरकार ह स्वास्थ्य विभाग के सत्रह झन अधिकारी मन के तबादला कर देहे। एमा ग्यारा ठन जिला के मुख्य चिकित्सा अधिकारी अउ सिविल सर्जन सामिल हे। लोक स्वास्थ्य अउ परिवार कल्याण विभाग ह ए आदेस जारी करे हे।
जारी आदेस के अनुसार डॉक्टर एफ.आर. निराला ल सारंगगढ़-बिलाईगढ़ के प्रभारी मुख्य चिकित्सा अउ स्वास्थ्य अधिकारी बनाय गे हवय। उहें, राजेश अवस्थी ल बलौदाबाजार-भाटापारा, विजय कुमार ल मोहला-मानपुर-अंबागढ़ चौकी, यशवंत कुमार ध्रुव ल बेमेतरा, अजय रामटेके ल दंतेवाड़ा, रामेश्वर शर्मा ल गौरेला-पेण्ड्रा-मरवाही, कपिलदेव पैकरा ल सूरजपुर, संजय बसाक ल बस्तर अउ अवधेश पाणिग्रही ल सक्ति जिला के प्रभारी मुख्य चिकित्सा अउ स्वास्थ्य अधिकारी बनाय गे हवय।
कांग्रेस-प्रदर्शन
छत्तीसगढ़ युवा कांग्रेस डहार ले आज प्रदेसभर म बाढ़े बिजली बिल के सेति धरना प्रदर्सन करे गीस। युवा कांग्रेस के कार्यकर्ता मन डहार ले महंगा बिजली बिल अउ स्मार्ट मीटर के विरोध म ए आंदोलन करे गीस। इही कड़ी म राजधानी रईपुर म प्रदेस अध्यक्ष आकाश शर्मा के अगुवई म बूढ़ातालाब के बिजली ऑफिस के आगू आंदोलन करे गीस। ए आंदोलन म युवा कांग्रेस के सैकड़ो कार्यकर्ता मन डहार ले बिजली ऑफिस के आगू धरना प्रदर्सन करे गीस।
राज्यपाल-कुलपति मुलाकात
राज्यपाल विश्वभूषण हरिचंदन ह आज राजभवन म आने-आने विश्वविद्यालय के कुलपति मन ले भेंट करीन। कुलपति मन ह उच्च शिक्षा के बेहतर बर उंखर कार्यकाल म मिले महत्वपूर्ण निरदेस, मार्गदर्सन अउ सहयोग बर राज्यपाल के आभार जतइन।
ए मउका म आयुष विश्वविद्यालय के कुलपति प्रोफेसर प्रदीप कुमार पात्रा, इंदिरा गांधी कृषि विश्वविद्यालय के कुलपति डॉक्टर गिरिश चंदेल, पंडित रविशंकर शुक्ल विश्वविद्यालय के कुलपति प्रोफेसर सच्चिदानंद शुक्ला अउ कुशाभाऊ ठाकरे पत्रकारिता एवं जनसंचार विश्वविद्यालय के कुलपति प्रोफेसर बलदेव शर्मा मौजूद रिहीन।
ठगी आरोपी-गिरफ्तार
शेयर ट्रेडिंग के नाव म ठगी करइया दू झन आरोपी मन ल रईपुर के साइबर थाना पुलिस ह गिरफ्तार करे हे। ठगी म सामिल सॉफ्टवेयर इंजीनियर अउ बैंक अकाउंट सप्लायर ल दुरूग ले गिरफ्तार करे हे, जेखर तीर ले मोबाइल, लैपटॉप, डेबिट कार्ड, कार अउ बैंक खाता म जमा आठ लाख रूपिया ल पुलिस ह होल्ड करा देहे। आरोपी मन के नाव ले आने-आने राज्य के लगभग अस्सी ठन पुलिस थाना अउ साइबर सेल म घलो रिपोर्ट दर्ज हे।
सावन सोमवार
आज सावन के दूसर सम्मार हे। ए मउका म प्रदेस भर के शिव मंदिर मन म भगवान भोलेनाथ के बिसेस श्रृंगार करे जात हे। भक्त मन डहार ले लाय गे आने-आने नंदिया के जल ले भगवान के अभिषेक करे जावत हे। इही कड़ी म सक्ति जिला के तुर्रीधाम म शिवभक्त मन के भीड़ लगे हे। तुर्रीधाम म सावन महिना म मेला घलो लगथे।
इंहा, स्थापित शिवलिंग ल प्रमुख ज्योतिंर्लंग मन जइसनेच पूजे जाथे, काबर कि इंहा पहाड़ ले जल के धारा बहते जउन ह भगवान शिव के अभिषेक करथे।
राजधानी रईपुर के शिवमंदिर मन म घलो आज बिहनिया ले शिवभक्त मनके लाइन लगे हे। बुढ़ेश्वर महादेव, हटकेश्वर नाथ मंदिर महादेवघाट समेत सबो मंदिर मन म कांवड़िया मन डहार ले जलाभिषेक करे गीस।
अउ अब मौसम के हाल…
मौसम विभाग ह काली दक्षिण छत्तीसगढ़ म भारी बरसा के चेतावनी देहे। उहें, प्रदेस के अधिकांस जघा म काली हल्का ले मध्यम बरसा होय के अउ गरज-चमक के संग छींटा पड़े के संभावना जताय हे। एखरे संग एक-दू जघा म बिजली गिरे के अउ भारी बरसा के आसंका हे।
एक ठन मानसून द्रोणिका ह बीकानेर, गुना, रायसेन, मंडला, पेण्ड्रा रोड, कोंटाई अउ ओखर बाद दक्षिण-पूर्व कोति बंगाल के खाड़ी तक फैले हे। एखर असर ले सुकमा अउ बीजापुर जिला म भारी बरसा होय के आसार हे।