मन की बात
प्रधानमंत्री नरेंद्र मोदी ह किहीन हे कि केंद्र सरकार नसीला दवा के खतरा ले निपटे खातिर जरूरी कदम उठावत हे। आकाशवाणी ले आज ‘मन की बात‘ कारीकरम म ओमन लोगन ले देस ल नसीली दवा ले मुक्त करे के आह्वान करीन। मादक पदार्थ समस्या के चुनौती के जिक्र करत प्रधानमंत्री ह बतइन कि सरकार ह मानस नामक एक ठिन बिसेस पहल करीन हवय।
प्रधानमंत्री ह असम के चराइदेव मोइदाम ल यूनेस्को के विश्व धरोहर जघा मन म सामिल करे जाय ल गर्व के बात बतइन हवय। श्री मोदी ह किहीन कि कोनो देस अपन संस्कृति उपर गर्व करके ही आगू बढ़ सकत हे। प्रधानमंत्री ह कला अउ संस्कृति प्रेमी मन ले सार्वजनिक कला उपर अउ जादा काम करे के अनुरोध करीन। संगेसंग प्रधानमंत्री ह श्रोता मन ले ओलंपिक खिलाड़ी मनके उछाह बढ़ाय बर घलो किहीन। ओमन इंटरनेसनल मैथेमेटिक्स ओलम्पियाड म भारत के पढ़इया लइका मन के सानदार प्रदर्सन खातिर उंखर मनके प्रसंसा घलो करीन।
श्री मोदी ह किहीन कि दुनिया भर म काली अंतर्राष्ट्रीय बाघ दिवस मनाय जाही। ओमन किहीन कि बाघ भारतीय संस्कृति ले जुड़े हवय अउ जंगल के तीर-तखार के गांव मन म लोगन मन बाघ के संग सद्भाव ले रहना जानथे।
प्रधानमंत्री ह श्रोता मन ले 15 अगस्त नजदीक आय म ‘हर घर तिरंगा‘ अभियान म भाग लेबर किहीन हे। ओमन लोगन मन ल ‘हर घर तिरंगा डॉट कॉम‘ म तिरंगा के संग अपन सेल्फी अपलोड करे खातिर प्रोत्साहित घलो करीन। श्री मोदी ह स्वतंत्रता दिवस के पहिली ‘माय जीओवी या फेर नमो ऐप‘ म उंखर सुझाव मांगत किहीन कि, ओमन स्वतंत्रता दिवस के मउका म राष्ट्र के नाव अपन संबोधन म जादा ले जादा सुझाव ल सामिल करहीं।
मन की बात-छत्तीसगढ़
प्रधानमंत्री नरेंद्र मोदी के ‘मन की बात‘ कारीकरम ल देसभर समेत छत्तीसगढ़ म घलो सुने गीस। केंद्रीय महिला अउ बाल विकास राज्यमंत्री सावित्री ठाकुर ह अपन छत्तीसगढ़ प्रवास के दौरान आज अंबिकापुर के पी.जी.कॉलेज ऑडिटोरियम म ‘मन की बात‘ कारीकरम ल सुनिस। मन की बात सुनइया कारीकरम म अंबिकापुर विधायक राजेश अग्रवाल, लुण्ड्रा विधायक प्रबोध मिंज, कलेक्टर विलास भोसकर समेत स्थानीय जनप्रतिनिधि अउ गणमान्य नागरिक मन मौजूद रिहीन।
रामेन डेका-छत्तीसगढ़ राज्यपाल
असम के पूर्व सांसद रामेन डेका ल छत्तीसगढ़ के नवा राज्यपाल नियुक्त करे गे हवय। श्री डेका, राज्यपाल विश्वभूषण हरिचंदन के स्थान लिहीं। राष्ट्रपति द्रौपदी मुर्मू ह काली छत्तीसगढ़ समेत आने-आने राज्य के राज्यपाल मन के नवा नियुक्ति करे हवय। 70 बछर आयु के श्री डेका वर्तमान म भारतीय जनता पार्टी के राष्ट्रीय सचिव हवय अउ दू बार सांसद घलो रह चुके हे।
मुख्यमंत्री विष्णुदेव साय ह श्री डेका ल छत्तीसगढ़ के नवा राज्यपाल नियुक्त होय म अपन सुभकामना दीन हवय। श्री साय ह किहीन कि, एक संरक्षक के रूप म उंखर सामाजिक अउ राजनीतिक अनुभव के फायदा पूरा छत्तीसगढ़वासी मन ल मिलही।
मांडविया-ईएसआईसी
केंद्रीय रोजगार अउ श्रम मंत्री डॉक्टर मनसुख मांडविया ह किहीन हे कि छत्तीसगढ़ के रायगढ़, कोरबा, भिलाई अउ रईपुर म संचालित कर्मचारी राज्य बीमा निगम-ई.एस.आई.सी. अस्पताल मन म डॉक्टर समेत आने-आने जम्मों बेवस्था दुरूस्त करे जाही। ओमन श्रम विभाग के प्रस्ताव म रायगढ़ जिला के लारा अउ खरसिया म ई.एस.आई.सी. दवई दुकान सुरू करे के सहमति घलो दीन।
उहें, केंद्रीय खेल मंत्री डॉक्टर मनसुख मांडविया ह रईपुर म आयोजित बइठका म किहीन कि छत्तीसगढ़ के अउ दू ठिन जिला मन म जल्दीच खेलो इंडिया सेंटर के स्वीकृति दे जाही। बतादन कि प्रदेस म अभी इकतीस ठिन जिला म खेलो इंडिया सेंटर चलत हे।
केंद्रीय राज्यमंत्री-समीक्षा
केंद्रीय महिला अउ बाल विकास राज्यमंत्री सावित्री ठाकुर ह काली नवा रईपुर म विभागीय अधिकारी मन के बइठका लेके आने-आने योजना के समीक्षा करीन। उहें, आज सरगुजा जिला म आंगनबाड़ी केंद्र अउ दर्रीपारा के सखी वन स्टाप सेंटर के घलो निरीक्षण करीन। ए दौरान ओमन अधिकारी मन ल माईलोगिन मन के सुरक्षा उपर बिसेस धियान देवय के निरदेस दीन।
मोर संगवारी योजना
उपमुख्यमंत्री अउ नगरीय प्रशासन मंत्री अरूण साव काली 29 जुलाई के राज्य के 4 ठिन नगर पालिका- मंदिर हसौद, बांकी मोंगरा, लोरमी अउ पंडरिया म ‘‘मोर संगवारी‘‘ योजना के विस्तार करहीं। श्री साव लोरमी म आयोजित कारीकरम म ए योजना के सुरूआत करही। ए कारीकरम म ‘‘मोर संगवारी‘‘ अपांइटमेंट मोबाइल ऐप घलो लॉन्च करे जाही।
‘‘मोर संगवारी‘‘ के अंतर्गत नागरिक मन बर चैट बोट के सुविधा व्हाट्सअप के जरिया ले उपलब्ध कराय जाही। संगेसंग तुरते अपांइटमेंट पाय खातिर अउ मुहैया कराय जावत सेवा मन बर जरूरी दस्तावेज ले जुड़े जम्मों जानकारी घलो प्रदान करे जाही।
आईईडी विस्फोट-बालक मौत
बीजापुर जिला म आई.ई.डी. के चपेट म आय ले 10 बछर के एक झन लइका के मउत होगिस हवय। जिला के पुलिस अधीक्षक ह घटना के पुष्टि करत बतइन कि पीड़िया-मुरूमपारा के तीर म माओवादी मन ह प्रेसर बम लगाय रिहीन, जेखर चपेट म गाय चरइया एक झिन लइका आ गीस। आई.ई.डी. के विस्फोट ले लइका के हाथ अउ गोड़ म बहुत जादा चोट आय रिहीस, जेला सुरक्षा बल के मदद ले जिला अस्पताल म भर्ती कराय गे रिहीस। जिहां इलाज के दौरान ओखर मउत होगिस।
इही बीच, दंतेवाड़ा जिला म सुरक्षा बल मन ह एक ठिन माओवादी स्मारक ल गिरा दीस। बारसूर थाना क्षेत्र के कोसलनार-मंगनार गांव म माओवादी मन के मौजूद होय के सूचना म आज डीआरजी अउ बस्तर फाइटर्स के संयुक्त टीम रवाना करे गे रिहीस। इही दौरान सुरक्षा बल मन ल कोसलनार गांव के तीर टेंट अउ माओवादी स्मारक दिखीस, जेला ओमन पूरा ध्वस्त कर दे गीस।
निशानेबाजी-मनु भाकर
पेरिस ओलंपिक म भारत ल पहिली पदक मनु भाकर ह दिलाय हवय। आज 10 मीटर एयर पिस्टल इवेंट म ओमन दू सौ इक्कीस दसमलव 7 अंक के संग कांस्य पदक अपन नांव करीस। मनु निसानेबाजी म पहिली महिला खिलाड़ी हरय जउन भारत ल 12 बछर बाद पदक दिलवाय हे। एखर ले पहिली रमिता जिंदल ह माईलोगिन मनके 10 मीटर एयर राइफल्स के फाइनल म जघा बनाइन।
छत्तीसगढ़ के मुख्यमंत्री विष्णुदेव साय ह पेरिस ओलंपिक म कांस्य पदक जीते के खुसी म मनु भाकर ल अपन सुभकामना अउ बधई दीन हवय। ओमन किहीन कि ए ह जम्मों भारत खातिर एक एतिहासिक पदक हवय, काबर कि सुश्री भाकर ओलंपिक के निसानेबाजी म पदक जीतइया पहिली भारतीय महिला बनगे हवय।
मौसम के हाल…
प्रदेस म अवइया चौबीस घंटा के दौरान कतकोन जघा मन म हल्का ले मध्यम बरसा होय के संभावना हवय। उहें, एक-दू जघा मन म गरज-चमक के संग गाज गिरे अउ भारी बरसा होय के चेतावनी घलो दे गे हवय। भारी बरसा दक्षिण छत्तीसगढ़ म होही।
मौसम विभाग के मुताबिक उपरी हवा के एक ठिन चक्रीय-चक्रवाती घेरा उत्तर छत्तीसगढ़ अउ उंखर तीर-तखार म हवय। उहें, छत्तीसगढ़ ले होके एक ठिन मानसून द्रोणिका घलो जावत हवय। एखर असर ले राजधानी रईपुर समेत कतकोन जिला मन म पाछू कुछेक दिन ले रूक-रूकके बरसा होवत हवय। सरलग बरसा के चलत कई ठिन नदी-नाला मन ए बेरा उफान म हवय। संगेसंग निचला बस्ती मन म बरसा के पानी घलो घुस गे हवय।