प्रधानमंत्री-नीति आयोग बैठक
प्रधानमंत्री नरेंद्र मोदी ह किहीन हे कि बछर दू हजार सैंतालिस तक भारत ल विकसित राष्ट्र बनाना हरेक भारतीय के लक्ष हे। नई दिल्ली म आज नीति आयोग के शासी परिषद के नौवां बइठका ल संबोधित करत हुए श्री मोदी ह किहीन कि ए लक्ष तक पहुंचे म राज्य मन ह सक्रिय भूमिका निभा सकत हे, काबर कि राज्य ह लोगन मन संग सीधा जुड़े हे। प्रधानमंत्री ह किहीन कि विकसित भारत दू हजार सैंतालिस के सपना ल सब्बो राज्य के इकठ्ठा परयास ले पूरा करे जा सकथे। ओमन किहीन कि विकसित राज्य ही विकसित भारत बनाही।
मुख्यमंत्री-नीति आयोग बैठक
मुख्यमंत्री विष्णुदेव साय ह आज नई दिल्ली म नीति आयोग के गवर्निंग काउंसिल के नौवां बइठका म सामिल होइन। एमा श्री साय ह राज्य के विकास योजना के जानकारी दीन। संगेसंग मुख्यमंत्री ह राज्य के प्राथमिकता अउ विकास बर करे जावत परयास के जानकारी घलो बतइन। ओमन ह सिक्षा, मानव संसाधन विकास, स्वास्थ्य अउ तकनीकि उन्नति उपर जोर दीन। मुख्यमंत्री ह किहीन कि छत्तीसगढ़ ह बछर दू हजार सैंतालिस तक विकसित भारत के लक्ष्य ल साकार करे म प्रमुख भूमिका निभाही। ओमन बतइन कि राज्य के जी.एस.डी.पी. ह पांच लाख करोड़ रूपिया ले जादा हे, जेला अवइया पांच बछर म दस लाख करोड़ रूपिया तक बढ़ाय के लक्ष्य हे।
बइठका म श्री साय ह राज्य के विकास म युवा मनके भूमिका उपर जोर देत किहीन कि छत्तीसगढ़ के फोकस पारंगत मानव संसाधन तियार करे उपर हे। राज्य म शिक्षा ल व्यवसायिक कौसल अउ प्रसिक्षण ले जोड़े जावत हे। एखर उद्देस्य पढ़इया ल अइसन क्षमता देना हे, जेन ह ओला रोजगार बर तियार करे। राज्य म हरेक छात्र बर वन नेसन-वन स्टूडेंट आईडी कार्ड बनाय के प्रक्रिया सुरू करे जावत हे। एमा छात्र के शैक्षणिक अनुभव ले जुड़े सब्बो जरूरी जानकारी डिजीटल रूप म इकट्ठा रिही। श्री साय ह बतइन कि घर के लेंटर उपर सौर ऊर्जा उपकरण लगाय के प्रक्रिया ल सरल कर दे गेहे अउ सौ गांव ल पूरा नवीकरणीय ऊर्जा आधारित बनाय के योजना हे। मुख्यमंत्री ह बतइन कि छत्तीसगढ़ म मार्च दू हजार छब्बीस तक छियानवे प्रतिसत घर म पिये के पानी पहुंचा दे जाही।
मन की बात
प्रधानमंत्री नरेंद्र मोदी काल बिहनिया ग्यारा बजे आकाशवाणी के ‘मन की बात‘ कारीकरम म देस-विदेस के लोगन संग अपन बिचार साझा करही। ए मासिक कारीकरम के एक सौ बारहवां कड़ी होही। श्री मोदी के सरलग तीसरइयां पइत प्रधानमंत्री बने के बाद ए ह दूसरा कड़ी होही। ए कारीकरम आकाशवाणी अउ दूरदर्शन के सब्बो नेटवर्क, ए आई आर न्यूज वेबसाइट अउ न्यूज ऑन ए आई आर मोबाइल ऐप म उपलब्ध रइही। आकाशवाणी, डी डी न्यूज, पीएमओ अउ सूचना तथा प्रसारण मंत्रालय के यू ट्यूब चैनल म एखर सीधा प्रसारण करे जाही। ए कारीकरम के तुरते बाद सब्बो क्षेत्रीय भाखा म एखर प्रसारण करे जाही।
जहरीली गैस-मौत
बेमेतरा जिला म आज कुआं के भीतरी जहरीली गैस के रिसाव ले तीन मनखे के मउत होगे। हमर संवाददाता ले मिले जानकारी अनुसार नवागढ़ थाना क्षेत्र के गांव कुआं म दू झन मनखे पंप निकाले बर कुंआ म उतरे रिहीन। ओमन कुंआ के भीतर ही बेहोस होगे, दूनों ल बचाय बर तीसरइयां युवक ह घलो कुंआ म उतरिस अउ उहू ह बेहोस होगे। तीनों झन के कुंआ के अंदर ही मउत होगे। घटना के सूचना पाके तहसीलदार अउ पुलिस टीम ह मउका म पहुंचिस अउ तीनों युवक के सव ल कुंआ ले बाहिर निकालिस। पुलिस ह मर्ग कायम कर लीस हे।
उहें, सूरजपुर जिला के जयनगर थाना क्षेत्र म घलो कुआं के भीतरी जहरीली गैस के रिसाव ले एक झन मनखे के मउत होगे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र एके संघरा रिले करही। ए दारी के अंक म ‘‘कोंडागांव‘‘ जिला के बारे म जानकारी दे जाही।
जनसमस्या निवारण पखवाड़ा
प्रदेस के सब्बो नगरीय निकाय म आज ले जनसमस्या निवारण पखवाड़ा सुरू होगे हे। एमा नगर-निगम, नगर-पालिका अउ नगर-पंचायत मन म वार्ड हिसाब ले सिविर लगाके लोगन मन के समस्या सुलझाय जावत हे।
उप मुख्यमंत्री अउ नगरीय प्रशासन और विकाय विभाग के मंत्री अरूण साव ह सब्बो नगर-निगम के आयुक्त अउ विभाग के पांचो क्षेत्रीय कार्यालय के संयुक्त संचालक मन से फोन म गोठबात करीन अउ मनखे मनके परेसानी ल गंभीरता ले समाधान करे के निरदेस दीन। ओमन जनसमस्या निवारण पखवाड़ा म आधार कार्ड, रासन कार्ड, जन्म-मृत्यु प्रमाण पत्र, मकान बनाय के अर्जी, नल कनेक्सन, राष्ट्रीय परिवार सहायता, वृध्दा अवस्था पेंसन, सामाजिक सुरक्षा पेंसन अउ नामांतरण समेत रोजगार के मामला के निपटारा घलो करे बर किहीन। श्री साव ह ए सिविर मन म महापौर, अध्यक्ष, पार्षद अउ आने जनप्रतिनिधि मन ले घलो जुरे रहय के अपील करे हे।
सुनइया मन ल बतादन कि आज ले सुरू होय ए जनसमस्या निवारण पखवाड़ा ह अवइया दस अगस्त तक चलही।
इही बीच, सिविर के पहिली दिन रईपुर सांसद बृजमोहन अग्रवाल ह रईपुर नगर-निगम के जोन छै म लगाय गे सिविर म पहुंचिन अउ अधिकारी मन ले जानकारी लीन। ओमन किहीन कि पीएम सौर घर योजना के फायदा जादा ले जादा लोगन ल दे जाय।
माओवादी-आत्मसमर्पण/गिरफ्तार
कबीरधाम जिला म आज तेरह लाख रूपिया के एक इनामी महिला माओवादी ह आत्मसमर्पण कर दीस। एखर उपर छत्तीसगढ़ अउ महाराष्ट्र म पांच-पांच लाख अउ मध्य प्रदेस म तीन लाख रूपिया के इनाम घोसित रिहीस। मिले जानकारी अनुसार राज्य सरकार के पुनर्वास नीति ले प्रभावित होके, ए महिला माओवादी ह राजनांदगांव रेंज के पुलिस महानिरीक्षक दीपक कुमार झा अउ कबीरधाम के पुलिस अधीक्षक अभिषेक पल्लव के आगू आत्मसमर्पण करीन। ए ह गोंदिया-राजनांदगांव-बालाघाट जीआरबी डिवीजन म टांडा-मलाजखंड एरिया कमेटी के सदस्य बनके काम करत रिहीस।
ओति, दंतेवाड़ा जिला म दू महिला माओवादी मन डीआरजी कार्यालय म बड़का पुलिस अधिकारी मनके आगू आत्मसमर्पण कर दीस। ए दूनों झन भैरमगढ़ एरिया कमेटी के हुर्रेपाल क्षेत्र म सक्रिय रिहीन।
इही बीच, सुकमा जिला म कुर्रेगुट्टा के जंगल म कोबरा बटालियसन के टीम ह दू माओवादी मन ल बम बनाय के समान संग पकड़े हे। गिरफ्तार दूनों माओवादी मन पाछू महिना जगरगुंडा थाना क्षेत्र म पुलिस गाड़ी ल आईईडी बिस्फोट ले उड़ाय के घटना म सामिल रिहीन। ए घटना म दू झन जवान सहीद हो गे रिहीन। एमन ले कोर्डेक्स वायर, जिलेटिन राड, बारूद, डेटोनेटर अउ नक्सल पर्चा समेत आने-आने सामान बरामद करे गेहे।
हाथी हमला-मौत
जशपुर जिला म पाछू रतिहा एक दंतैल हाथी के हमला म दू भाई के मउत होगे। मिले जानकारी अनुसार तपकरा जंगल के केरसई गांव म एक दंतैल हाथी ह घर म घूसर के दू भाई उपर हमला कर दीस, जेमा दूनों झन के मउकच म मउत होगे। घटना के सूचना मिले म पुलिस अउ वन विभाग के टीम ह मउका म पहुंच के जांच सुरू कर दीस हे।
विस-सत्र समापन
छत्तीसगढ़ विधानसभा के मानसून सत्र ह काली सिरागे। ए सत्र म पांच ठन बइठका होइस। एमा पहिली अनुपूरक बजट पास करेगे। संगेसंग तीन जरूरी विधेयक घलो पास होइस।
विधानसभा अध्यक्ष डॉक्टर रमन सिंह ह मानसून सत्र के सफल संचालन बर मुख्यमंत्री विष्णुदेव साय, नेता प्रतिपक्ष डॉक्टर चरणदास महंत अउ सत्ता पक्ष अउ विपक्ष के सब्बो विधायक समेत विधानसभा सचिवालय के अधिकारी अउ करमचारी मनके आभार जतइन।
सुनइया मन ल बतादन कि मानसून सत्र म इकतीस घंटा उन्नीस मिनट के काम होइस। ए सत्र म चार सौ बयानवे तारांकित अउ चार सौ चौहत्तर अतारांकित प्रश्न के सूचना मिले रिहीस। उहें, ध्यानाकर्षण के मिले तीन सौ सड़सठ सूचना मन ले एक सौ बयालिस सूचना ल, ले गीस। एखरे जइसन सून्य काल म सत्तर सूचना मिले रिहीस, जेमा ले उनतीस सूचना ल, ले गीस। एखर अलावा स्थगन के एक सौ सैंतीस सूचना मिले रिहीस, जेमा ले एक म चर्चा के बाद ओला नइ ले गीस।