सीएजी-रिपोर्ट
भारत के नियंत्रक अउ महालेखा परीक्षक सीएजी के सार्वजनिक स्वास्थ्य अधोसंरचना अउ स्वास्थ्य सेवा मनके प्रबंधन उपर रिपोर्ट आज मानसून सत्र के पांचवां दिन छत्तीसगढ़ विधानसभा म प्रस्तुत करे गीस। रिपोर्ट के अनुसार छत्तीसगढ़ सरकार ह भारतीय सार्वजनिक स्वास्थ्य मानक आईपीएचएस के मानदंड के अनुसार स्वास्थ्य संस्थान मन म डॉक्टर, नर्स अउ पैरामेडिकल के उपलब्धता सुनिश्चित करे बर कोनो मानव संसाधन नीति नइ बनाय हे।
रिपोर्ट म प्रदेस के तेईस जिला अस्पताल मन म आईपीएचएस मानदंड के अनुसार बिसेसज्ञ डॉक्टर के तीन प्रतिसत, स्टाफ नर्स के सत्ताईस प्रतिसत अउ पैरामेडिकल स्टाफ के चौबीस प्रतिसत स्वीकृत पद मनके कमी रिहीस। उहें, आईसीयू म स्टाफ नर्स अउ बिस्तर के अनुपात एक अनुपात एक के मुकाबला एक अनुपात बीस तक रिहीस अउ गैर-आईसीयू वार्ड मन म एक अनुपात उनतालीस बताय गीस। सीएजी के रिपोर्ट म स्वास्थ्य सेवा क्षेत्र बर मानव संसाधन नीति तियार करे बर कुछ सिफारिस अउ सुझाव घलो दे गेहे।
विधानसभा-01
राज्य विधानसभा के मानसून सत्र के आखिरी दिन आज प्रश्नकाल म गर्भवती महिला मन ल गरम खाना नइ दे जाय के मुद्दा उठिस। पूर्व मंत्री अनिला भेड़िया ह गर्भवती माईलोगिन मन ल मिलइया गरम भोजन बंद करे के मामला सदन म उठाइन। एमा महिला बाल विकास मंत्री लक्ष्मी राजवाडे़ ह बतइन कि ए योजना बंद नइ होय हे। डीएमएफ, सीएसआर फंड ले गरम भोजन दे जात हे। जवाब ले असंतुष्ट होके विपक्षी सदस्य मन सदन ले बहिरगमन कर दीन।
उहें, सदन म आज भारतीय जनता पार्टी के विधायक मोतीलाल साहू ह प्रदेस म मलेरिया अउ डायरिया बीमारी ले लोगन मनके मउत के मुद्दा म ध्यानाकर्षण लाइन। ए ध्यानाकर्षण म चर्चा के दौरान कांग्रेस के दूसर सदस्य घलो सामिल होइन। जेखर बाद सत्ता पक्ष अउ विपक्ष म जमके बहस होइस। नेता प्रतिपक्ष डॉक्टर चरणदास महंत अउ पूर्व मुख्यमंत्री भूपेश बघेल ह किहीन कि छत्तीसगढ़ म मलेरिया अउ डायरिया के स्थिति डरावना हे। इही सेति, हाईकोर्ट ह स्वतः संज्ञान लेहे। एमा स्वास्थ्य मंत्री श्याम बिहारी जायसवाल ह किहीन कि मलेरिया ले पंद्रह मनखे मन के मउत होय हे, फेर डायरिया ले कोनो के मउत नइ होय हे। स्वास्थ्य मंत्री के जवाब ले असंतुष्ट होके विपक्षी सदस्य मन सदन ले बहिरगमन कर दीन।
उहें, भाजपा सदस्य विक्रम उसेंडी कोति ले लाय गे ध्यानाकर्षण के जवाब म उप मुख्यमंत्री अउ पंचायत मंत्री विजय शर्मा ह सदन म घोसना करीन कि प्रधानमंत्री ग्राम सड़क योजना के अंतर्गत पखांजूर ले मायापुर सड़क के उन्नयन करे जाही।
विधानसभा-02
सदन म आज वित्त मंत्री ओ.पी.चौधरी के जघा संसदीय कार्यमंत्री केदार कश्यप ह भारत के नियंत्रक महालेखा परीक्षक के बछर दू हजार तेईस के राज्य वित्त उपर लेखा परीक्षा प्रतिवेदन ल सदन पटल म रखिन। उहें, मुख्यमंत्री विष्णुदेव साय ह छत्तीसगढ़ लोकसेवा आयोग के वार्षिक प्रतिवेदन अउ उप मुख्यमंत्री विजय शर्मा ह छत्तीसगढ़ स्वामी विवेकानंद तकनीकी विश्वविद्यालय के संसोधन अध्यादेस के प्रतिवेदन प्रस्तुत करीन।
विधानसभा सत्र के आखिरी दिन पूर्व सदस्य विजय सिंह के निधन उपर सदस्य मन सोक जतावत श्रध्दांजलि दीन। श्रध्दांजलि दे के बाद सदन के कार्रवाई पांच मिनट बर स्थगित कर दे गीस।
उड़ान योजना-छत्तीसगढ़
केंद्र सरकार ह उड़ान योजना के तहत छत्तीसगढ़ के अंबिकापुर, बिलासपुर अउ जगदलपुर हवाई अड्डा मन ल क्षेत्रीय संपर्क योजना-आरसीएस बर चिन्हित करे हे। ए योजना के तहत ए हवाई अड्डा मन ल विकास बर करीबन दू सौ पंद्रह करोड़ रूपिया आबंटित करे गेहे, जेमा ले तीस जून तक लगभग एक सौ बयानवे करोड़ रूपिया खर्चा करे गेहे। ए योजना के अंतर्गत अंबिकापुर बर नब्बे करोड़, बिलासपुर बर पचपन करोड़ अउ जगदलपुर बर सत्तर करोड़ रूपिया ले जादा के रासि स्वीकृत करे गेहे। ए जानकारी राज्यसभा म सांसद फूलोदेवी नेताम के अतारांकित प्रश्न के उत्तर म केंद्रीय नागरिक उड्डयन राज्य मंत्री मुरलीधर मोहोल ह दीन।
करगिल विजय दिवस
अब देसभर म आज पच्चीसवां करगिल दिवस मनाय जात हे। ए दिन भारत के कई वीर सपूत मन जान के बाजी लगा दीन। प्रधानमंत्री नरेंद्र मोदी ह सोसल मीडिया पोस्ट म किहीन कि हरेक भारतीय बर ए दिन बहुत जरूरी हे। ओमन किहीन कि ए देस के रक्षक मन बर श्रध्दासुमन अर्पित करे के दिन हरय।
उहें, राज्यपाल विश्वभूषण हरिचंदन ह करगिल विजय शौर्य दिवस के मउका म करगिल युध्द के सहीद मन ल श्रध्दांजलि दीन हे। राज्यपाल ह किहीन कि करगिल विजय शौर्य दिवस हमन ल वीर जवान मनके अदम्य साहस अउ बलिदान के सुरता देवाथे।
इही बीच, सूचना अउ प्रसारण मंत्रालय के मीडिया इकाई अउ केंद्रीय संचार ब्यूरो डहार ले करगिल विजय दिवस के रजत जयंती के मउका म आज रईपुर के डब्ल्यू आर.एस. कालोनी स्थित केंद्रीय विद्यालय म चित्रप्रदर्सनी के आयोजन करे गीस। प्रदर्सनी के संघरा चित्रकला प्रतियोगिता, भाषण प्रतियोगिता के आयोजन करे गीस। एमा विद्यालय के छात्र-छात्रा अउ एनसीसी कैडेट मन हिस्सा लीन।
जनसमस्या निवारण शिविर
प्रदेस के जम्मों नगरीय निकाय मन म काली सत्ताईस जुलाई ले दस अगस्त तक जनसमस्या निवारण पखवाड़ा के आयोजन करे जाही। ए दौरान नगर-निगम, नगर-पालिका अउ नगर-पंचायत मन म वार्ड वार सिविर मनके आयोजन करके समस्या के निदान करे जाही। उप मुख्यमंत्री अउ नगरीय प्रशासन मंत्री अरूण साव ह जनसमस्या निवारण पखवाड़ा म नागरिक मनके समस्या ल हल करे बर विभागीय अधिकारी, नगर-निगम के आयुक्त, नगर-पालिका अउ नगर पंचायत के मुख्य नगर पालिका अधिकारी मन ल जरूरी इंतजाम के निरदेस दीन हे।
विस-चना वितरण
प्रदेस म चना वितरण ल लेके विभागीय मंत्री दयालदास बघेल ह स्वीकार करीन कि स्टाक के कमी के सेति चना वितरण म देरी होय हे। एखरे संग ओमन सदन म यहू किहीन कि हितग्राही मन ल जतका महिना के चना नइ मिले हे, ओला पूरा इही महिना के इकतीस जुलाई तक दे दिया जाही।
एखर पहिली, पूर्व सीएम भूपेश बघेल ह चना वितरण ल लेके आज सदन म सवाल पूछे रिहीन। ओमन चना वितरण म गड़बड़ी करइया वाला मन उपर कार्रवाई ल लेके सवाल करीन। एमा मंत्री दयालदास बघेल ह मानिन की चना वितरण म देरी होय हे। ओमन एखर उपर कार्रवाई करे के बात किहीन।
प्रभात झा-निधन
भारतीय जनता पार्टी के वरिष्ठ नेता प्रभात झा के आज गुरूग्राम के एक निजी अस्पताल म निधन होगे, उंखर निधन म मुख्यमंत्री विष्णुदेव साय ह संवेदना जताइन। ओमन किहीन कि भाजपा के राष्ट्रीय उपाध्यक्ष, मध्य प्रदेस भाजपा के अध्यक्ष, राज्यसभा सांसद के रूप म प्रभात झा ह सत्ता अउ संगठन म अपन बिसेस योगदान दीन।
बारिश-स्कूल अवकाश
बेमेतरा जिला म जोरदरहा बरसात के सेति जम्मों स्कूल अउ आंगनबाड़ी केंद्र ल तीन दिन बर बंद रखे जाही। कलेक्टर रणवीर शर्मा ह ए बारे म आदेस जारी कर दे हे। आदेस म कहे गे ह,े कि जिला म सत्ताईस, अट्ठाईस अउ उनतीस जुलाई के जम्मों सरकारी स्कूल के संघरा अशासकीय अनुदान प्राप्त स्कूल अउ जिला के जम्मों आंगनबाड़ी केंद्र मन म अवकास रिही। लेकिन ए अवकास के पात्र शिक्षक, स्कूल के स्टाफ अउ आंगनबाड़ी कार्यकर्ता नइ होही।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत केंद्रीय वित्त मंत्री डहार ले तेईस जुलाई के पेस करे गे बजट उपर रईपुर के पंडित रविशंकर शुक्ल विश्वविद्यालय के अर्थशास्त्र विभाग के अध्यक्ष आर.के.ब्रम्हे ले लेगे भेंटवार्ता प्रसारित करे जाही। ए कारीकरम आकाशवाणी केन्द्र रायपुर ले काली सत्ताईस जुलाई के बिहनिया साढ़े दस बजे ले प्रसारित करे जाही। एला छत्तीसगढ़ स्थित आकाशवाणी के जम्मो केन्द्र एके संघरा रिले करही।
अउ अब मौसम के हाल…
मौसम विभाग के अनुसार बंगाल के खाड़ी म बने सिस्टम के सेति प्रदेस म काली आने-आने जघा मन म हल्का ले मध्यम बरसा होय या गरज-चमक के संग छींटा पड़े के संभावना हे। उहें, मध्य छत्तीसगढ़ म एक-दू जघा म गरज-चमक के संग गाज गिरे अउ भारी बरसा होय के संभावना हे।