विधानसभा-प्रश्नकाल
राज्य विधानसभा म आज प्रश्नकाल के बेरा सोलर लाइट बिसाय म गड़बड़ी अउ प्रतिबंधित भूईंया के रजिस्ट्री के मुद्दा उठईन। भाजपा विधायक लता उसेंडी ह सदन म प्रधानमंत्री आदर्श ग्राम योजना म सोलर लाइट बिसाय म गड़बड़ी के जांच के मांग करीन। एमा आदिम जाति विकास मंत्री रामविचार नेताम बछर दू हजार इक्कीस ले चौबीस के बीच होय सोलर लाइट बिसाय के जांच सदन के समिति ले कराय के घोसना करीन।
प्रश्नकाल के दउरान भाजपा विधायक सुशांत शुक्ला, राजेश मूणत, राजेश अग्रवाल, गजेन्द्र सिंह, धरमजीत सिंह अउ कांग्रेस विधायक रामकुमार यादव ह अपन-अपन विधानसभा क्षेत्र म जमीन रजिस्ट्री ले जुड़े मुद्दा ल सदन म उठईन। एखर जुवाब म वित्तमंत्री ओ.पी. चौधरी ह आसंदी ल बतईन कि पंजीयन कार्यालय ल साफगोई बनाय बर कतकोन परयास करे जात हे। नगद भुगतान म घलो पैन अउ आधार लिंक होना जरूरी करे गेहे। एखर बादों कहूं नगद भुगतान लेनदेन म कोनों किसम के गड़बड़ी पाए जाथे, त एखर जांच कराय जाही।
विधानसभा-स्थगन प्रस्ताव
राज्य विधानसभा म आज छत्तीसगढ़ कृषि उपज मंडी संशोधन विधेयक दू हजार चौबीस-सर्वसम्मति ले पारित होगे। उहें, एखर पहिली सदन म प्रदेश के कतकोन जिला म फइले डेंगू अउ मलेरिया के मुद्दा म नेता प्रतिपक्ष डॉक्टर चरणदास महंत ह स्थगन प्रस्ताव लइन। ओमन अस्पताल म दवई के कमी ले मरीज मन ल होवत परेसानी के संगेसंग सरकारी अस्पताल म अव्यवस्था के मामला उठा के गोठबात कराय के मांग करीन। नेता प्रतिपक्ष के मांग के समर्थन कांग्रेस के आने विधायक विक्रम मंडावी, राघवेन्द्र सिंह अउ उमेश पटेल ह घलो करीन, जेमा आसंदी ह किहीन कि ए बिसय म गोठबात बर काली सदन म फइसला ले जाही।
सदन म आज भाजपा विधायक धरमलाल कौशिक ह ध्यानाकर्षण ले दवई अउ उपकरण बिसाय म गड़बड़ी के मामला उठईन। एमा स्वास्थ्य मंत्री श्यामबिहारी जायसवाल ह जानकारी दीन कि तीन आई.ए.एस. अधिकारी के कमेटी ए मामला के जांच करत हे।
स्वदेश दर्शन योजना
केन्द्रीय पर्यटन मंत्रालय ह स्वदेश दर्शन योजना म छत्तीसगढ़ के बिलासपुर अउ जगदलपुर समेत देशभर म संतावन ठिन जघा के चिन्हारी करे हे। ए योजना म उनतीस परियोजना ल मंजूरी दे गेहे। स्वदेश दर्शन योजना छत्तीसगढ़ के मयाली बगीचा समेत देश म बयालीस ठिन जघा ल विकसित करे जाही। एखर संगेसंग पर्यटन मंत्रालय ह तीर्थयात्रा कायाकल्प अउ अध्यात्मिक संवर्धन अभियान-प्रसाद योजना म छत्तीसगढ़ म सूरजपुर जिला के कुदरगढ़ मंदिर समेत देस म उनतीस परियोजना ल सामिल करे हे।
मुख्यमंत्री-ग्रीन स्टील समिट
नवा रईपुर के एक प्राईवेट होटल म आज सी.आई.आई. कोति ले ग्रीन स्टील समिट के आयोजन करे गीस। एमा देसभर के प्रमुख उद्योगपति अउ व्यापारी सामिल होइन। कार्यक्रम म मुख्यमंत्री विष्णुदेव साय माईपहुंना के रूप म संघरीन। समिट म बोलत मुख्यमंत्री ह किहीन कि छत्तीसगढ़ देस के सबले प्रमुख स्टील निर्माता हवय। छत्तीसगढ़ के देस म कुल उत्पादित स्टील म करीबन बीस प्रतिसत योगदान हे अउ राज्य के अर्थव्यवस्था म उद्योग के भागीदारी पचास प्रतिसत ले ज्यादा हवय। ओमन किहीन कि प्रदेस म सार्वजनिक क्षेत्र के भिलाई स्टील प्लांट अउ नगरनार स्टील प्लांट जइसन बड़े इकाई तो हई हे। एखर संगेसंग प्राईवेट क्षेत्र के कतकोन छोटे-बड़े इस्पात घलो चलत हे। ओमन यहू किहीन कि ग्रीन स्टील ले सून्य कार्बन उत्सर्जन के लक्ष्य के संगेसंग आर्थिक संभावना के द्वार खुलही। मुख्यमंत्री ह सबो प्रतिनिधि मन ले ग्रीन स्टील उत्पादन के नवा तकनीक ल अपनाय बर आह्वान करीन अउ समिट के आयोजन खातिर सी.आई.आई. ल बधाई अउ सुभकामना दीन।
एक पेड़ मां के नाम
एक पेड़ मां के नाम अभियान म आज छत्तीसगढ़ विधानसभा के आवासीय परिसर म पौधा लगाय के कार्यक्रम राखे गीस। ए मउका म मुख्यमंत्री विष्णुदेव साय ह अपन मां के सम्मान म बेल के पौधा लगईन। उहें, विधानसभा अध्यक्ष डॉक्टर रमन सिंह ह सीताफल, नेता प्रतिपक्ष डॉक्टर चरणदास महंत हनुमान फल, अउ उप मुख्यमंत्री अरूण साव ह नीम के पौधा रोपीन। पौधा लगाय के कार्यक्रम म मंत्री विधायक अउ राज्य सरकार के बड़का अधिकारी मन घलो अपन मां के सुरता अउ सम्मान म पौधा लगईन।
माओवादी-आत्समसमर्पण
सुकमा जिला म सक्रिय तीन महिला समेत पांच माओवादी मन ह आत्मसमर्पण करीन हे। पुलिस के मुताबिक ए माओवादी मन ह संगठन म अत्याचार अउ सोषण ले तंग आके आत्मसमर्पण करीन। एमा ले तीन झिन उपर पांच-पांच लाख अउ दू झिन माओवादी उपर दू-दू लाख रूपिया के इनाम घोसित रिहीस। आत्मसमर्पण करइया ए सबो माओवादी प्लाटून नंबर-तीस अउ किस्टाराम एरिया टेलर टीम के सक्रिय सदस्य रिहीन। ए माओवादी मन ल राज्य सरकार कोति ले पच्चीस-पच्चीस हजार रूपिया के प्रोत्साहन राशि दे गीस।
एनआईए-छापा
राष्ट्रीय जांच एजेंसी-एनआईए ह देसभर म फंडिग के जांच ल लेके आज भिलाई म एक एनजीओ के ठिकाना म छापा मारीन। ए दउरान एनआईए के टीम ह एनजीओ संचालक कलादास डहरिया के घर म पहुंच के उंखर ले पूछताछ करीन। कलादास डहरिया कला नाव के जनवादी सांस्कृतिक संगठन चलाथे। ए संगठन किसान, आदिवासी अउ मजदूर मन बर काम करथे। एखर बर ओला देसभर ले आर्थिक मदद मिलथे। एनआईए कलादास के माओवादी मनके संपर्क के जांच घलो करत हे। बताय जात हे कि आज बिहनिया करीबन साढ़े पांच बजे एनआईए के टीम ह छापा के कार्रवाई सुरू करीन। ए दउरान तीर-तखार के लोगन के अवई-जवई म रोक लगा दे गीस।
चूना पत्थर-उत्खनन कार्रवाई
राजनांदगांव जिला के चवेली गांव म चूना पत्थर के अवैध उत्खनन के मामला म खदान के संचालक ल करीबन पांच करोड़ रूपिया के अर्थदंड जारी करीन हे। उहें, संचालक के खिलाफ कानूनी प्रकरण दरज करे के आदेस जारी करे गेहे। ए कार्रवाई अपर कलेक्टर न्यायालय के आदेस म होय हे। खबर के मुताबिक पाछु कतकोन बछर ले क्षेत्र म राजनीतिक संरक्षण म चूना पत्थर के अवैध उत्खनन के सिकईत मिलत रिहीस हे। संगेसंग खदान म उत्खनन बर विस्फोट घलो करे जात रिहीस, जेखर ले तीर-तखार के गांव के लोगन हलाकान रिहीन। गांव के लोगन एखर सिकईत प्रसासन ले करे रिहीन, जेमा अपर कलेक्टर न्यायालय ह पाछु उन्नीस जुलाई के कार्रवाई के आदेस दीन।
ठगी
सक्ती जिला म नौकरी लगाय के नाम छह लाख साठ हजार रूपिया के ठगी के मामला म बाराद्वार पुलिस ह एक युवती ल गिरफ्तार करे हे। पुलिस ह ओला न्यायिक रिमांड म जेल भेज देहे।
उहें, गौरेला-पेण्ड्रा मरवाही जिला म एक आरोपी ल खुद ल मंत्रालय के अधिकारी बता के सिक्षा विभाग म नौकरी लगाय के नाव म एक युवक ले करीबन साढ़े तीन लाख रूपिया के ठगी करे हे। भारतीय न्याय संहिता के तहत अपराध दरज करके पुलिस मामला के जांच करत हे।
जैव विविधता संरक्षण-प्रशिक्षण
राज्य वन अनुसंधान अउ प्रशिक्षण संस्थान के कैम्पस म ‘‘पैराटैक्सोनॉमी और जैव विविधता संरक्षण‘‘ खातिर इक्कीस दिवसीय प्रसिक्षण कार्यक्रम सुरू करे गेहे। एखर ले प्रदेस म जैव विविधता के संरक्षण, संवर्धन अउ प्रबंधन म मदद मिलही। ए प्रसिक्षण के पहिली चरण म अड़तालीस प्रशिक्षणार्थी सामिल होवत हे।
अउ अब मौसम के हाल..
मौसम विभाग ह अवइया चौबीस घंटा म प्रदेस के बिलासपुर, जशपुर, सूरजपुर, गौरेला-पेण्ड्रा-मरवाही, बस्तर, दंतेवाड़ा, बीजापुर अउ नारायणपुर जिला म एक-दू जघा म भारी बरसा होय के संभावना जताय हे। भारी वर्षा के मुख्य क्षेत्र सरगुजा संभाग के जिला होही। उहें, काली प्रदेस के कतकोन जघा म हल्का ले मध्यम बरसा के संग गरज-चमक के संग छींटा बौछार के आसार हवय।
इही बीच, राजस्व अउ आपदा प्रबंधन विभाग कोति ले अभी तक राज्य म चार सौ साठ मिलीमीटर औसत बरसा दरज करे गेहे। बीजापुर जिला म सबले जादा एक हजार नब्बे मिलीमीटर अउ सरगुजा जिला म सबले कमती एक सौ अस्सी मिलीमीटर औसत बरसा दरज होय हे।