सर्वोच्च न्यायालय-लोक अदालत
सर्वोच्च न्यायालय ह लंबित मामला ल निपटाय बर उनतीस जुलाई ले तीन अगस्त तक बिसेस लोक अदालत के आयोजन करही। ए पहल सर्वोच्च न्यायालय के स्थापना के पचहत्तरवां बछर म मील के पत्थर साबित होही। भारत के मुख्य न्यायाधीश डी.वाई. चन्द्रचूड़ ह ओ नागरिक मन ले एखर फायदा उठाय के अपील करीन हे, जिंखर मामला शीर्ष अदालत म लंबित हवय।
नीट/यूजी-काउंसिलिंग
सर्वोच्च न्यायालय डहार ले नीट-यूजी परीक्षा-दू हजार चौबीस ल दुबारा कराय के इंकार के साथ देशभर म सरकारी अउ निजी मेडिकल कॉलेज म स्नातक पाठ्यक्रम म प्रवेस बर आज ले काउंसिलिंग के प्रक्रिया सुरू होगे हे। एखर पहिली, न्यायालय ह केहे रिहीस कि हमर ए मानना हे कि मिले साक्ष्य के आधार म नीट-यूजी परीक्षा ल रद्द करना ठीक नइ हे।
इही बीच, शिक्षा मंत्री धर्मेन्द्र प्रधान ह नीट मुद्दा उपर सर्वोच्च न्यायालय के फइसला के स्वागत करीन हे अउ एला सत्य के जीत बतईन हे।
विधानसभा-प्रश्नकाल-01
छत्तीसगढ़ विधानसभा के मानसून सत्र के तीसर दिन आज सदन में प्रश्नकाल के दउरान पुलिस-माओवादी मुठभेड़ के मुद्दा उठिस। नेता प्रतिपक्ष डॉक्टर चरणदास महंत ह माओवादी घटना के मुद्दा ल उठावत गृह मंत्री ले पूरा जानकारी मांगीन। एखर बाद कांग्रेस विधायक विक्रम मंडावी ह आरोप लगईन कि कथित फर्जी मुठभेड़ के माध्यम ले माओवादी बता के ग्रामीण मन ल मारे जावत हे अउ ओमन ल गिरफ्तार करे जावत हे। उहें, पूर्व मंत्री कवासी लखमा ह किहीन कि तेंदूपत्ता टोरे बर गे आदिवासी मन ल माओवादी बताके मारे गे हवय।
जवाब म गृह मंत्री विजय शर्मा ह माओवादी बताके ग्रामीण मन ल कथित तौर म मारे जाय के बात ल निराधार अउ झूठा बतईन। संगेसंग नेता प्रतिपक्ष के सवाल के जवाब देवत ओमन किहीन कि अभी तक प्रदेस म दू सौ तिहत्तर माओवादी घटना होय हे, जेमा बयानवे ठन घटना पुलिस अउ माओवादी मुठभेड़ के हवय। मुठभेड़ म सुरक्षा बल के उन्नीस झन जवान मन सहीद होय हे। उहें, माओवादी मन डहार ले चौंतीस झिन ग्रामीण मनके हत्या करे गेहे अउ एक सौ सैंतीस माओवादी मन मारे गेहे।
विधानसभा-प्रश्नकाल-02
उहें, प्रश्नकाल म कांग्रेस विधायक अनिला भेंडिया ह बालोद म माईलोगिन मनके अउ लइका मनके लापता होय के मामला उठइन। ओमन किहीन कि तस्करी बर कतकोन ठेकेदार अउ दलाल मन ह घुमत हे। उंखर मन उपर कोनों कार्रवाई नइ होवत हे। जवाब म गृहमंत्री विजय शर्मा ह किहीन कि सुप्रीम कोर्ट के गाइडलाइन के अनुसार लापता होय लोगन ल खोजे बर ऑपरेशन मुस्कान चलाय जावत हे अउ उंखर खोजबीन बर एस.ओ.पी. घलो जारी करे जाथे।
आज प्रश्नकाल के दउरान सरकारी डॉक्टर मनके घर ले प्रैक्टिस करे के मुद्दा घलो उठीस। सत्ता पक्ष के विधायक भैयालाल राजवाड़े ह किहीन कि सरकारी अस्पताल म अवइया हरेक केस ल रिफर करे जावत हे, जेखर उपर स्वास्थ्य मंत्री श्यामबिहारी जायसवाल ह किहीन कि ए चिंता जायज हे। पन्द्रह दिन के भीतर बैकुंठपुर जिला अस्पताल म सिविल सर्जन, एनेस्थीसिया, स्त्री रोग विशेषज्ञ अउ दूसर डॉक्टर मन ल पदस्थ करे जाही।
अनुपूरक-पारित
छत्तीसगढ़ विधानसभा म प्रथम अनुपूरक ध्वनिमत ले पारित होगीस। वित्त मंत्री ओ.पी. चौधरी डहार ले बछर दू हजार चौबीस-पच्चीस बर प्रस्तुत करे गे सात हजार तीन सौ उनतीस करोड़ रूपिया के प्रथम अनुपूरक म महतारी वंदन योजना, लोकनायक जयप्रकाश सम्मान निधि, नियद नेल्लानार, पीएम जनमन योजना के संग खेल सुविधा, आंगनबाड़ी भवन, देवगुड़ी के निर्माण, इन्क्यूबवेशन सेंटर के स्थापना संघरा कतकोन विकास काम के प्रावधान रखे गेहे। मुख्यमंत्री तीर्थ यात्रा योजना फेर सुरू करे जावत हे, एखर बर घलो बजट म प्रावधान करे गेहे।
महिला सैनिक भर्ती-आवेदन
बस्तर म एक सौ तीस झन महिला नगर सैनिक के भर्ती करे जाही। एखर बर विज्ञापन जारी कर दे गेहे। इच्छुक उम्मीदवार मन ह दस अगस्त तक ऑनलाइन आवेदन कर सकत हे। खबर के मुताबिक बस्तर जिला म बालिका आश्रम अउ छात्रावास म रहइया नोनी मनके सुरक्षा बर महिला नगर सैनिक मनके भर्ती होना हे। एखर बर नगर सेना मुख्यालय स्तर ले विज्ञापन जारी करे गेहे।
नगर सेनानी एस.के. मार्बल ह बतईन कि जिला पुलिस बल म भर्ती बर होम गार्ड के अभ्यर्थी मन ल पच्चीस प्रतिशत तक आरक्षण दे जाही। भर्ती के दउरान मूल निवासी प्रमाण पत्र, शैक्षणिक योग्यता, रोजगार पंजीयन, जाति प्रमाण पत्र अउ शारीरिक योग्यता पूरा करना जरूरी होही।
कांग्रेस-विधानसभा घेराव
प्रदेस म कथित रूप ले बिगड़त कानून बेवस्था अउ नकली खाद-बीज के बिक्री ल लेके प्रदेस कांग्रेस ह आज रईपुर म विधानसभा के घेराव करे के परयास करिस। घेराव के पहिली दिल्ली ले रईपुर पहुंचे कांग्रेस के प्रदेस प्रभारी सचिन पायलट, पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत अउ प्रदेस कांग्रेस अध्यक्ष दीपक बैज संघरा कांग्रेस के कतकोन बड़े नेता मन ह सभा ल संबोधित करीन।
विधानसभा-ध्यानाकर्षण
प्रदेस के सरकारी राशन दुकान मन म निम्न स्तर के चना वितरण के जांच करे जाही। ए घोषणा खाद्य मंत्री दयालदास बघेल ह करीन हे। ओमन ह नेता प्रतिपक्ष डॉक्टर चरणदास महंत डहार ले ध्यानाकर्षण के दउरान राशन दुकान मन ले निम्न स्तरीय चना वितरण के जांच के मांग करे जाय म ए बात ल किहीन। डॉक्टर महंत ह बतईन कि कई ठिन जिला म खराब चना बांटे गे हवय। उहें, पूर्व मुख्यमंत्री भूपेश बघेल ह पूरा प्रकरण के जांच विधायक दल ले कराय के मांग करीन।
ध्यानाकर्षण के दउरान ही भाजपा विधायक रोहित साहू के राजिम म बस स्टैंड बनाय के मुद्दा उपर उप मुख्यमंत्री अरूण साव ह दू करोड़ रूपिया के लागत ले राजिम म बस स्टैंड बनाय के घोसना सदन म करीन।
नगरीय निकाय-लाइब्रेरी निर्माण
रईपुर के नालंदा परिसर के तर्ज म प्रदेस के तेरह नगरीय निकाय म लाइब्रेरी बनाय के प्रस्ताव ल वित्त विभाग ह मंजूरी दे दे हवय। लाइब्रेरी ल ‘‘नॉलेज बेस्ड सोसायटी‘‘ मतलब ‘‘ज्ञान आधारित समाज‘‘ के प्रतीक के रूप म प्रदेस के आने-आने जघा म बनाय जाही। एखर बर पच्यासी करोड़ रूपिया ले जादा के राशि मंजूर करे गेहे। प्रदेस के चार नगरीय निकाय म पांच सौ सीटर अउ नौ नगरीय निकाय म दू सौ सीटर लाइब्रेरी बनाय जाही।
माओवादी गिरफ्तार/समर्पण
दंतेवाड़ा जिला म सुरक्षा बल ह एक लाख रूपिया के इनामी माओवादी ल गिरफ्तार करे हे। ए माओवादी उपर अरनपुर थाना म कतकोन मामला दर्ज हे। मिले जानकारी के अनुसार अरनपुर थाना क्षेत्र के बुरगुम-नीलावाया क्षेत्र म डीआरजी अउ बस्तर फाइटर्स के टीम ह तलाशी अभियान म निकले रिहीस। इही दउरान ग्राम बुरगुम तीर सुरक्षा बल ह ए माओवादी ल घेराबंदी करके पकड़ीस। ए माओवादी बुरगुम क्षेत्र म जनताना सरकार के अध्यक्ष पद म काम करत रिहीस।
ओति, कांकेर जिला म तीन झन ईनामी महिला माओवादी मन ह पुलिस के आगू आत्मसमर्पण करीन हे। एमा ले एक झन माओवादी उपर पांच लाख अउ दू झन उपर एक-एक लाख रूपिया के इनाम रिहीस। ए महिला मन म एक झन गढ़चिरौली डिवीजन म एरिया कमेटी सदस्य रिहीस अउ दूसर टेलर टीम के सदस्य रिहीस।
इही बीच, कोंडागांव जिला के इरागांव क्षेत्र म अवइया कोटकोडो-तमोरा इलाका ले पुलिस ह पांच-पांच किलो के दू ठन आईईडी बरामद करे हे।
कांवड़ यात्रा-व्यवस्था
सावन के महिना म शिवभक्त मन डहार ले अमरकंटक ले भोरमदेव मंदिर तक डेढ़ सौ किलोमीटर के कांवड़ यात्रा सुरू होगे हे। उप मुख्यमंत्री विजय शर्मा के निरदेस म ए यात्रा ल सुरक्षित बनाय बर बिसेस इंतजाम करे गे हवय। उहें, कांवड़िया मन बर पंद्रह ले जादा जघा म डॉक्टर अउ स्वास्थ्य कर्मी मनके ड्यूटी लगाय गे हवय। सुरक्षा ल देखत पुलिस पेट्रोलिंग घलो करे जावत हे।
मौसम
मौसम विभाग के अनुसार उपरी हवा के एक ठन चक्रीय-चक्रवाती घेरा झारखंड अउ ओखर तीर-तखार म मौजूद हे। उहें, एक ठन मानसून द्रोणिका बीकानेर ले उत्तर-पूर्व बंगाल के खाड़ी तक बने हे। एखर असर ले प्रदेस म अवइया चौबीस घंटा म जादा ले जादा जघा म हल्का ले मध्यम बरसा होय के या गरज-चमके के संग छींटा पड़े के संभावना हे। मौसम विभाग ह ऑरेंज अलर्ट जारी करत बिलासपुर, राजनांदगांव, मुंगेली, कांकेर अउ बीजापुर जिला म एक-दू जघा म भारी ले अतिभारी बरसा होय के चेतावनी दीन हे।