केन्द्रीय वित्त मंत्री निर्मला सीतारमण ह आज लोकसभा म बछर दू हजार चौबीस-पच्चीस के आम बजट पेस करीन। ए ह नरेन्द्र मोदी सरकार के तीसरइया कार्यकाल के पहिली बजट हरय। श्रीमती सीतारमण ह सातवां घांव बजट पेस करीन। वित्त मंत्री ह व्यक्तिगत आयकर राशि के संबंध म नवा कर व्यवस्था के विकल्प चुनइया मन बर दू ठन घोसना करीन। वेतनभोगी कर्मचारी मन बर स्टैंडर्ड डिडक्शन यानी मानक कटौती ल पचास हजार रूपिया ले बढ़ाके पचहत्तर हजार रूपिया करे के प्रावधान करे गेहे। पेंशनभोगी मन बर पारिवारिक पेंशन म कटौती ल पन्द्रह हजार ले बढ़ाके पच्चीस हजार रूपिया करे के प्रस्ताव बजट म करे गेहे। ए नवा कर व्यवस्था ले करीबन चार करोड़ वेतनभोगी अउ पेंसनभोगी मन ल फायदा मिलही।
नवा कर व्यवस्था म कर राशि संरचना म घलो संसोधन करे गेहे। तीन लाख रूपिया तक के आय म कोनों कर राशि नइ लगय। नवा कर व्यवस्था म वेतनभोगी कर्मचारी मन ल आयकर म सत्रह हजार पांच सौ रूपिया तक के बचत हो सकही। वित्तमंत्री ह किहीन कि सरकार के प्रयास कराधान ल सरल बनाना हे।
बजट म रोजगार, कौशल प्रशिक्षण, एम.एस.एम.ई. अउ मध्यम वर्ग मन ल उपर उठाना हे। रोजगार, कौशल प्रशिक्षण अउ आने अवसर के सुविधा उपलब्ध कराय बर प्रधानमंत्री के पांच ठन योजना अउ पैकेज के घोसना करे गेहे। प्रधानमंत्री पैकेज के भाग के रूप म रोजगार संबंधित प्रोत्साहन दे बर तीन ठन योजना लागू करे जाही। उहें, कौशल प्रशिक्षण कारीकरम अउ औद्योगिक प्रसिक्षण संस्थान मनके उन्नयन बर पांच बछर म हब अउ स्कोप व्यवस्था म एक हजार आईटीआई संस्थान खोले जाही।
आम बजट-02
वित्तमंत्री ह बतईन कि कृषि अउ ओखर ले जुड़े क्षेत्र मन बर एक लाख बावन हजार करोड़ रूपिया के प्रावधान करे गेहे। बजट म विदेशी पूंजी ल आकर्षित करइया विदेसी कंपनी मन उपर कापोर्रेट के कर रासि ल चालीस प्रतिसत ले घटाके पैंतीस प्रतिसत करे गेहे। वित्त मंत्री ह ग्रामीण बुनियादी ढांचा के संगेसंग जम्मों ग्रामीण विकास काम बर दू लाख छैसठ हजार करोड़ रूपिया के प्रावधान के घोसना करे हे। अवइया दू बछर के भीतर देसभर म एक करोड़ किसान मन ल प्राकृतिक कृषि बर सहायता दे जाही।
वित्तमंत्री ह यहू किहीन कि सरकार ह जनजातीय समुदाय मनके सामाजिक, आर्थिक स्थिति म सुधार लाय बर प्रधानमंत्री जनजातीय उन्नत ग्राम अभियान चलाय जाही। ओमन किहीन कि महिला नीत विकास ल बढ़ावा दे खातिर माईलोगिन अउ नोनी मन बर तीन लाख करोड़ रूपिया ले जादा के प्रावधान करे जाही। वित्त मंत्री ह किहीन कि प्रधानमंत्री आवास योजना शहरी के दूसरइया चरण बर सरकार ह दस लाख करोड़ रूपिया खरचा करही।
बजट-छत्तीसगढ़ प्रतिक्रिया
बजट पेस होय के बाद प्रधानमंत्री नरेन्द्र मोदी ह वीडियो संदेस म किहीन कि ए बजट ह हरेक वर्ग के मनखे मन बर लाभकारी हे। ए बजट ले आर्थिक विकास अउ जादा मजबूत होही। ओमन किहीन कि एखर ले रोजगार अउ स्व-रोजगार के मउका ह जादा मिलही। ए बजट ह गांव के मनखे अउ युवा मनके बजट हरय।
छत्तीसगढ़ के मुख्यमंत्री विष्णुदेव साय ह किहीन कि ए बजट ह सबके बजट हरय। एखर ले जम्मों झन के विकास होही। ओमन किहीन कि ए बजट ह प्रधानमंत्री नरेन्द्र मोदी के बछर दू हजार सैंतालीस म भारत ल विकसित भारत बनाय के संकलप वाला बजट हरय। मुख्यमंत्री ह यहू किहीन कि जनजातीय उन्नत ग्राम योजना ले जनजातीय समाज के तिरसठ हजार गांव अउ पांच करोड़ मनखे मन ल एखर फायदा मिलही।
भारतीय जनता पार्टी के प्रदेस अध्यक्ष किरण सिंह देव ह किहीन कि ए बजट ह गांव, गरीब, किसान के संगेसंग जम्मों वर्ग के मनखे मन बर लाभकारी होही।
दूसर कोति, कांग्रेस पार्टी ह ए बजट ल केन्द्र सरकार के सहयोगी दल ल फायदा देवइया बतईन हे। पूर्व मुख्यमंत्री भूपेश बघेल ह एक्स म लिखे हे कि बजट म बिहार, अउ आंध्रप्रदेश के जिकर ल घेरी-भेरी करे हे। श्री बघेल ह आरोप लगईन हे कि ए बजट म आंध्रप्रदेश अउ बिहार राज्य बर खजाना खोले हे। श्री बघेल ह यहू किहीन कि अउ दिगर राज्य के संगेसंग छत्तीसगढ़ राज्य के संग ए बजट म भेदभाव करे गेहे।
उहें, कांग्रेस के प्रदेस अध्यक्ष दीपक बैज ह किहीन कि केन्द्र सरकार के बजट ह देस के जनता मन ल निरास कर देहे। ए बजट म छोटे अउ मध्यम वर्ग के मनखे मन उपर जादा भार डार देहे।
विधानसभा-सत्र
छत्तीसगढ़ विधानसभा के मानसून सत्र के दूसरइया दिन आज सदन म जल जीवन मिशन म कथित गड़बड़ी के संगेसंग नकली खातू-बीजा अउ बिजली कटौती के मुद्दा ल जोरसोर ले उठाय गीस। शून्यकाल के दउरान प्रमुख विपक्षी दल कांग्रेस के विधायक मन डहार ले राज्य म नकली खातू-बीजा, बिजली कटौती अउ खातू-बीजा के कमी के मुद्दा ल उठावत स्थगन प्रस्ताव लाय गीस।
पूर्व मुख्यमंत्री भूपेश बघेल अउ दिगर विधायक मन ह आरोप लगईन हे कि राज्य म नकली खातू-बीजा के बिक्री होवत हे। उहें, किसान मन ह बिजली कटौती के समस्या ले जुझत हे। जुवाब म कृषि मंत्री रामविचार नेताम ह विपक्ष के जम्मों आरोप ल गलत बतईन। पक्ष अउ विपक्ष म बहस के बीच विधानसभा अध्यक्ष डॉक्टर रमन सिंह ह स्थगन प्रस्ताव ल अग्राह्य कर दीन। एखर बाद कांग्रेस के विधायक मन ह गर्भगृह के भीतर जाके नाराबाजी करीन। गर्भगृह म जाय के बाद कांग्रेस के जम्मांं झन विधायक मन ह स्वयं निलंबित होगे।
उहें, प्रश्नकाल म भाजपा विधायक धरमलाल कौशिक ह जल जीवन मिशन के के मुद्दा उठावत किहीन कि उंखर कि विधानसभा क्षेत्र बिल्हा म दस प्रतिसत काम होय हे। जवाब म मंत्री अरूण साव ह बतईन कि राज्य म कुल आठ सौ तिरासी ठन संस्था मन ल पंजीकृत करे गेहे। गड़बड़ी पाय के बाद उनयासी ठन संस्था मनके पंजीयन ल रद्द कर दे गेहे। उहें, काम म लापरवाही करइया नौ झिन अधिकारी अउ करमचारी मन ल निलंबित घलो कर दे गेहे। ओमन किहीन कि जल जीवन मिशन के काम म जिहां भी गड़बड़ी पाय जाही। उंखर मनके खिलाफ कड़ा कार्रवाई करे जाही।
सुप्रीम कोर्ट-नीट सुनवाई
सुप्रीम कोर्ट ह आज पेपर लीक अउ कदाचार के आधार म नीट-यूजी दू हजार चौबीस परीक्षा ल रद्द करे ले इंकार कर दीन। मुख्य न्यायाधीश डी.वाई. चन्द्रचूड़, न्यायामूर्ति जे.बी. पारदीवाला अउ न्यायमूर्ति मनोज मिश्रा के पीठ ह याचिकाकर्ता मनके एक समूह म एक आदेस पारित करीन। न्यायालय ह किहीन कि दूसरइया घांव परीक्षा के आदेस देय ले तेईस लाख ले जादा छात्र मन उपर असर पड़ही।
बारिश
दुरूग जिला म पाछु चार दिन ले होवत सरलग बरसा के सेती शिवनाथ, तांदुला अउ खरखरा नंदियां मनके संगेसंग शिवनाथ के सहायक नंदियां अउ नाला मनके जलस्तर सरलग बाढ़त हे। महमरा एनीकट म पानी दस फीट उपर बोहावत हे। मांगरा जलाशय ले घलो पांच हजार क्यूसेक पानी छोड़े जावत हे। एखर ले सिवनाथ नंदियां म बाढ़ के खतरा बढ़ गेहे। नदी के तट म गांव अउ बस्ती मन बर हाईअलर्ट घोसित करे गेहे।
राम लला दर्शन
श्रीराम लला दर्सन योजना के तहत दुरूग अउ बस्तर संभाग के आठ सौ पचास श्रद्धालु मनके जत्था अयोध्याधाम बर रवाना होइस। दुरूग रेलवे स्टेसन म कमिश्नर सत्यानारायण राठौर ह स्पेशल रेलगाड़ी ल आज हरियर झंडा ेदेखाके रवाना करीन।
बीजापुर-रेस्क्यू
बीजापुर जिला म पाछु चार-पांच दिन ले होवत बरसा के सेती नंदियां-नरवा मन ह पूरा आ गेहे। उहें, कई ठन गांव के संपर्क ह जिला मुख्यालय ले टूट गे हवय। खबर के मुताबिक उसूर अउ नम्बी के बीच नम्बीधारा नंदियां म अब्बड़ पानी चलत हे। ए दउरान सीआरपीएफ के कोबरा बटालियन के जवान मन ह एक झन नवजात शिशु अउ माईलोगिन ल नंदियां पार करा के अस्पताल पहुंचईन।