संसद के बजट सत्र आज ले सुरू होगे हे। आर्थिक सर्वेक्षण दू हजार तेईस-चौबीस म वित्त बछर दू हजार चौबीस-पचीस बर सकल घरेलू उत्पाद के वृध्दि दर साढ़े छै ले सात प्रतिसत के बीच रहय के अनुमान लगाय गे हवय। केंद्रीय वित्त मंत्री निर्मला सीतारमण ह आज बजट सत्र के पहिली दिन दूनों सदन म आर्थिक सर्वेक्षण पेस करीन।
उहें, केंद्रीय वित्त मंत्री काली एनडीए सरकार के तीसर कार्यकाल के पहिली आम बजट पेस करही।
एखर पहिली, प्रधानमंत्री नरेंद्र मोदी ह किहीन कि काली पेस होवइया बजट ह अमृत काल के बड़े बजट होही। ओमन किहीन कि ए बजट सरकार के कार्यकाल के पांच बछर के दिसा तय करही अउ एहा दू हजार सैंतालिस के विकसित भारत अभियान के सपना के नींव बनही। बजट सत्र ले पहिली संसद के बाहिर संवाददाता मन ले गोठबात म श्री मोदी ह किहीन कि लोकसभा चुनाव म देस के जनता ह फइसला दे गेहे अउ सबो राजनीतिक दल ल मिलके अवइया पांच बछर बर देस बर खडे़ होना चाही। श्री मोदी ह कथित रूप ले नकारात्मक राजनीतिक करइया विपक्षी दल के आलोचना करत किहीन कि ओमन ह अपन विफलता ल छिपाय बर संसद के समय के उपयोग करीन।विधानसभा सत्र-01
छत्तीसगढ़ विधानसभा के मानसून सत्र आज ले सुरू होगे हे। सत्र के पहिली दिन आज विपक्षी सदस्य मन ह बलौदाबाजार म होय आगजनी अउ तोड़फोड़ के मामला ल जोरसोर ले उठाइन। सून्यकाल के दौरान विपक्षी सदस्य मन ह ए मामला म स्थगन प्रस्ताव लाइन। स्थगन प्रस्ताव के ग्राह्यता उपर चर्चा के दौरान पक्ष अउ विपक्ष के सदस्य मनके बीच नांक-झांक होइस। नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल संघरा दूसर विपक्षी सदस्य मन ह आरोप लगाइन कि ए घटना प्रदेस के समरसता अउ भाईचारा ल खतम करे के षड़यंत्र हे।
जवाब म उप मुख्यमंत्री अउ गृहमंत्री विजय शर्मा ह सदन म बतइन कि अमरगुफा घटना म कार्रवाई करे गेहे, आगजनी अउ तोड़फोड़ के दौरान चालीस झन पुलिस कर्मी मन ह घायल होय रिहीन अउ चौदह ठन केस दर्ज करे गे रिहीस। एखर बाद विधानसभा अध्यक्ष डॉक्टर रमन सिंह ह बलौदाबाजार आगजनी अउ हिंसा मामला म स्थगन ल आग्राह्य कर दीन। विधानसभा अध्यक्ष डहार ले स्थगन प्रस्ताव ल आग्राह्य करते साथ विपक्ष डहार ले नाराबाजी सुरू होगे। नाराबाजी अउ हंगामा के बीच सदन के कार्यवाही ल मंझनिया तीन बजे तक बर स्थगित कर दे गीस।
जब सदन के कार्यवाही फेर सुरू होइस तब विपक्ष ह फेर एक घाव बलौदाबाजार मामला म लाय गे स्थगन प्रस्ताव उपर चर्चा कराय के मांग करीन। एमा विधानसभा अध्यक्ष डॉक्टर रमन सिंह ह विपक्ष के आग्रह ल स्वीकार नइ करीन, जेखर बाद विपक्षी सदस्य मन ह नारा लगावत गर्भगृह म प्रवेस करीन, जेखर सेति ओमन सबो झन खुदे निलंबित होगिन।
विधान सत्र-02
एखर पहिली सत्र के सुरूआत म आज पांच झन दिवंगत पूर्व विधानसभा सदस्य-मकसूदन लाल चंद्राकर, अमीन साय, लक्ष्मीप्रसाद पटेल, अग्नि चंद्राकर अउ अंतु राम कश्यप ल श्रध्दांजलि दे के संग उंखर राजनीतिक अउ सामाजिक योगदान ल सुरता करे गीस।
उहें, सदन म आज भाजपा विधायक भावना बोहरा अउ अजय चंद्राकर डहार ले कबीरधाम जिला के पिपरिया थाना के बिरकोना गांव म एक झन किसान के हत्या के मामला म पेस ध्यानाकर्षण प्रस्ताव उपर घलो चर्चा होईस।
एखर अलावा आज प्रश्नकाल के दौरान स्कूल म शिक्षक मनके कमी अउ वनभूमि पट्टा हेतु फर्जी मांग पत्र बनाय ले जुड़े मामला, प्रश्न के माध्यम ले उठाय गीस।
वित्त मंत्री ओ.पी.चौधरी ह आज सदन म वर्तमान वित्तीय बछर बर पहिली अनुपूरक अनुमान पटल म राखिन। एखर उपर चर्चा काली सदन म होही।
केंद्र-आरएसएस/कर्मचारी
केंद्र ह सरकारी कर्मचारी मन उपर राष्ट्रीय स्वयं सेवक संघ आरएसएस के गतिविधि म भाग ले जाय उपर लगे रोक ल हटा ले हे। नवंबर उन्नीस सौ छियासठ म तत्कालीन प्रधानमंत्री इंदिरागांधी के शासनकाल के दौरान कार्मिक, लोक सिकायत अउ पेंसन मंत्रालय ह ए प्रतिबंध ल लागू करे रिहीन। भारतीय जनता पार्टी के सूचना प्रौद्योगिकीय प्रकोष्ठ प्रमुख अमित मालवीय ह अपन सोसल मीडिया पोस्ट म किहीन कि अंठावन बछर पहिली जारी होय ए असंवैधानिक आदेस ल मोदी सरकार ह वापिस ले ले हवय। छत्तीसगढ़ संघरा हरियाणा, हिमाचल प्रदेस अउ मध्य प्रेदस जइसन कतकोन राज्य सरकार मन ह सरकारी कर्मचारी मनके आरएसएस ले जुड़े उपर लगे रोक ल पहिलीच ले हटा ले हवय।
अउ अब मौसम के हाल…
प्रदेस म अवइया चौबीस घंटा के दौरान सरगुजा संभाग अउ ओखर ले लगे बिलासपुर संभाग के जिला म भारी बरसा हो सकत हे। मौसम विभाग के अनुसार राज्य के अधिकांश जघा म काली हल्का ले मध्यम बरसा होय के संभावना हे।
इही बीच, दुरूग जिला म पाछू तीन दिन ले सरलग होवत बरसा के सेति शिवनाथ नदी के जलस्तर बाढ़के खतरा के निसान तीर पहुंच गे हवय। महमरा एनीकट म पानी आठ फीट उपर बहत हे, जेखर सेति एनीकट के दस ठन गेट ल खोल दे गेहे। मोंगरा जलासय ले तीस हजार क्यूसेक पानी छोड़े जावत हे। एखर सेति शिवनाथ नदी के तीर-तखार के एक दर्जन ले जादा गांव मन म मुनादी कराके लोगन ल बाढ़ के खतरा चेतावनी दे गेहे हवय। जल संसाधन विभाग के अनुसार शिवनाथ नदी म तीर-तखार के नदी नाला मन ले घलो बहुत पानी आवत हे। एखर ले रात म नदी के जल स्तर अउ जादा बाढ़ सकत हे। ग्रामीण मन ल नदी ले दूरिहा रेहे के सलाह दे गेहे।
शिवनाथ नदी म बाढ़के खतरा ल देखत एसडीआरएफ के टीम ल तैनात कर दे गेहे।
सावन सोमवार
आज सावन के पहिली सम्मार हे। ए मउका म राजधानी रईपुर संघरा प्रदेसभर के शिव मंदिर मन म श्रध्दालु मन के भीड़ उमड़े रिहीस, जउन मन ह भगवान शिव के जल अउ दूध ले अभिषेक करके बिसेस पूजा-पाठ करीन। रईपुर म कांवड़िया मन ह महादेव घाट के हटकेश्वर महादेव म जल चढ़ाइन। उहें, बुढ़ेश्वर महादेव संघरा दूसर शिव मंदिर मन म घलो आज बिहनिया ले भक्त मनके भीड़े लगे रिहीस।
ओति, कबीरधाम जिला के भोरमदेव मंदिर म जलाभिषेक करे बर आज कवर्धा ले भोरमदेव तक पदयात्रा निकाले गीस, जेमा कांवड़िया मन संघरा बड़ संख्या म लोगन सामिल होइन। उहें, राजिम के कुलेश्वर महादेव, चंपारण के चंपेश्वर महादेव, बम्हनी के ब्रम्हेश्वर महादेव, सिरपुर के गंधेश्वर महादेव अउ जांजगीर-चांपा जिला के खरौद के लक्ष्मणेश्वर महादेव मंदिर संघरा प्रदेस के प्राचीन शिव मंदिर मन म घलो आज बिसेस पूजा-अर्चना करे गीस।
उहें, जगदलपुर के इंद्रावती तट के महादेव मंदिर, झाड़ेश्वर मंदिर, बोधघाट कालोनी के शिव मंदिर संघरा सबो शिव मंदिर मन म श्रध्दालु मनके भीड़ देखे गीस।
बस्तर-स्थानीय बोली प्रसारण
बस्तर के जगदलपुर आकाशवाणी केंद्र ले स्थानीय बोली म करीब पचास प्रतिसत कारीकरम के प्रसारण करे जावत हे। अब बस्तर के श्रोता मन ह स्थानीय बोली- हल्बी, गोंडी, भतरी, धुरवी म अपन पसंदीदा कारीकरम ल सुन सकही। आकाशवाणी केंद्र जगदलपुर डाहर ले बस्तर डायरी, जीवना चो शोर, आमचो रान, आमचो जीवना, आजी चो सगा, मोचो माटी, रूसरूसा, नानोली, कुड़ईफूल, डांडामाली नाव ले आदिवासी लोकगीत, लोकगाथा अउ भेंटवार्ता संग दूसर कारीकरम प्रसारित करे जावत हे।
आकाशवाणी केंद्र जगदलपुर के कारीकरम प्रमुख बलबीर सिंह कच्छ ह बतइन कि ए कारीकरम के प्रसारण के उद्देस्य स्थानीय बोली मन ल बढ़ावा देना हे।
वित्तमंत्री-लोकार्पण
वित्तमंत्री ओ.पी.चौधरी ह आज रायगढ़ के एक ठन निजी स्कूल म बीस लाख तैंतीस हजार रूपिया के लागत के बाक्स क्रिकेट अउ आठ लाख इकहत्तर हजार रूपिया के लागत के बैडमिंटन कोर्ट के लोकार्पण करीन। ए दौरान वित्त मंत्री ह रायगढ़ म नया गार्डन बनाय के घोसना करीन अउ एखर बर दस करोड़ रूपिया के मंजूरी दीन हे। ओमन अधिकारी मन ल एखर बर जल्दीच प्रस्ताव तियार करे के निरदेस दीन। एखर अलावा वित्त मंत्री श्री चौधरी ह कमला नेहरू गार्डन म छब्बीस लाख इक्यासी हजार रूपिया के लागत ले गार्डन म होवइया काम के भूमिपूजन करीन।