बारिश
बस्तर संभाग के कतकोन जिला म पाछू दू दिन ले होवत रूक-रूकके बरसात ले जनजीवन प्रभावित होगे हे। बीजापुर टापू बन गेहे। उहें, सुकमा म होवत लगातार बारिस ले जनजीवन म असर पड़े हे। कई नदी-नरवा उफान म हे। बस्तर के इंद्रावंती नदी के जलस्तर बड़ गेहे।
जिला मुख्यालय जगदलपुर के निचला इलाका म पानी भर गेहे। बस्तर कलेक्टर विजय दयाराम के. ह सहर के जलमग्न इलाका के निरीक्षण करीन अउ नगर-निगम के अधिकारी मन ल पानी निकासी के व्यवस्था करे के निरदेस दीन।
ऐति, लगातार बारिस ले बीजापुर-भोपालपट्टनम राष्ट्रीय राजमार्ग म जघा-जघा पानी भरे ले अवागमन बाधित होगे हे। भैरमगढ़ कन्या आश्रम म पानी भरे ले बाढ़ जइसन स्थिति बने हे। इंहा, लइका मन ल रेस्क्यू के माध्यम ले आश्रम ले सुरक्षित जघा ले जाय गीस।
राष्ट्रीय शिक्षा नीति -शिक्षा सप्ताह
रईपुर राष्ट्रीय शिक्षा नीति के चार बछर होय के उपलक्ष्य म देसभर के जम्मो सरकारी अउ निजी स्कूल मन म एक हफ्ता तक सिक्षा सप्ताह के आयोजन करे जाही। एखर बर स्कूल सिक्षा विभाग डहार ले जम्मो जिला के कलेक्टर मन ल निरदेस जारी कर दे गेहे।
गुरू पूर्णिमा
प्रदेस के जम्मों शासकीय अउ अशासकीय स्कूल मन म बाईस जुलाई के गुरू पूर्णिमा के मउका म आने-आने कारीकरम आयोजित करे जाही। ए संबंध म स्कूल सिक्षा विभाग डहार ले दिसा निरदेस जारी करे गेहे। जारी निरदेस म केहे गे हे कि गुरू पूर्णिमा उत्सव के गरिमामय आयोजन साधू-संत, गुरूजन, शिक्षक अउ पूर्व छात्र-छात्रा के संगेसंग गणमान्य लोगन मनके उपस्थिति म करे जाय। ए बेरा सरस्वती वंदना, गुरू वंदना, दीप प्रज्ज्वलन के संग गुरूजन अउ शिक्षक मनके सम्मान करे जाही। कारीकरम के बेरा प्राचीनकाल म प्रचलित गुरूकुल व्यवस्था अउ ओखर भारतीय संस्कृति म प्रभाव बिसय म निबंध लेखन के संग विद्यार्थी अउ गुरू संस्मरण म संभाषण घलो होही।
माओवादी मुठभेड़-आत्मसमर्पण
सुकमा जिला म आज सुरक्षा बल के संग होय मुठभेड़ म एक माओवादी मारे गीस। मउका ले मृत माओवादी के सव बरामद कर ले गेहे। मिले खबर के मुताबिक काली बिहनिया जगरगुंडा थाना क्षेत्र म जिला पुलिस बल, डिस्ट्रिक्ट रिजर्व गार्ड-डीआरजी अउ बस्तर फाइटर्स के संयुक्त टीम ह तलासी अभियान म निकले रिहीन। आज बिहनिया ए टीम जब लहूटत रिहीन, तभे तुमारगुट्टा-सिंगावरम के जंगल म माओवादी मन ह जवान मन उपर फायरिंग सुरू कर दीन। जवाबी कार्रवाई म एक माओवादी मारे गीस। घटनास्थल ले एक हथियार समेत भारी मात्रा म माओवादी जिनिस बरामद करे गेहे।
इही जिला म आज पुलिस अधीक्षक कार्यालय म पांच माओवादी मन ह आत्मसमर्पण करे हे। आत्समर्पित माओवादी मन ल राज्य सरकार के पुनर्वास नीति के तहत सहायता रासि अउ सुविधा दे जाही।
यूनिसेफ सराहना
यूनिसेफ ह छत्तीसगढ़ म कमजोर वर्ग के समुदाय के बीच सामाजिक सुरक्षा के पहुंच बढ़ाय बर अउ लइका मनके अधिकार बर करे जात काम बर सराहीन। यूनिसेफ नई दिल्ली के सामाजिक नीति अउ सामाजिक सुरक्षा प्रमुख ह्यून ही बान ह काली संझा राज्य नीति आयोग के बइठका म किहीन कि राज्य नीति आयोग के सामाजिक नीति तकनीकी सहायता इकाई के नवोन्वेषी मॉडल आने राज्य बर अनुकरणीय हे। ओमन आयोग के सदस्य मन ल नई दिल्ली स्थित नीति आयोग म प्रस्तुतीकरण देबर नेवता देहे।
प्रमुख सचिव-समीक्षा
आदिम जाति अउ अनुसूचित जाति विकास विभाग के प्रमुख सचिव सोनमणि बोरा ह विभागीय अधिकारी मनके बइठका लेके पी.एम.जनमन योजना के प्रगति के समीक्षा करीन। बइठका म श्री बोरा ह किहीन कि बिसेस पिछड़ी जनजाति समूह -पीवीटीजी के संस्कृति अउ रीति-रिवाज ल धियान म राखत प्रधानमंत्री आवास के निर्माण करे जाय। ओमन योजना के तहत बिसेस रूप ले कमजोर जनजाति समूह के बसाहट के सत्यापन इकतीस अगस्त ले पहिली करे के निरदेस दीन। श्री बोरा ह अधिकारी मन ल अवइया एक नवंबर ले पंद्रह नवंबर तक पीवीजीटी विकास संबंधी एक पखवाड़ा आयोजित करे बर किहीन।
मलेरिया-सावधानी अपील
मुंगेली जिला म लोरमी विकासखंड के अचानकमार क्षेत्र म मलेरिया के प्रकरण पाय गेहे। मुख्य चिकित्सा अउ स्वास्थ्य अधिकारी डॉक्टर देवेन्द्र पैकरा ह बतइन कि अचानकमार सेक्टर के ग्राम अचानकमार, तिलैईडबरा, छपरवा अउ सारसडोर म मलेरिया जांच के अलावा स्वास्थ्य जागरूकता सिविर के आयोजन करे गीस। ए बेरा मलेरिया पॉजीटिव पाय गे मरीज मन ल मउका म ही एंटी मलेरिया दवई दे गीस। उहें, स्वास्थ्य कार्यकर्ता मरीज मन ले सरलग संपर्क म हे अउ ओमला जरूरी सलाह देवत हे। श्री पैकरा ह बतइन कि स्वास्थ्य विभाग डहार ले जिला के आने-आने गांव मन म स्वास्थ्य सिविर के आयोजन करे जात हे।
इही बीच, स्वास्थ्य विभाग ह टाइफाइड, डायरिया, डेंगू अउ मलेरिया ले बचाव बर लोगन मल ले सावधानी बरते के अपील करीन।
‘एक पेड़ मां का नाम‘
राजनांदगांव जिला के डोंगरगांव क्षेत्र म ‘एक पेड़ मां के नाम‘ अभियान के तहत राजनीतिक अउ सामाजिक स्तर म पौधारोपण के कार्य करे जात हे। इही कड़ी म बीते दिन गांव टप्पा अउ ओराड़बांध के ग्रामीण मन ह राष्ट्रीय राजमार्ग के तीरे-तीर ‘एक पेड़ मां के नाम‘ के पौधा लगाइन। ए मउका म ओराड़बांध के सरपंच सुनीता साहू, सचिव वेदनाथ उइके अउ स्वास्थ्य कार्यकर्ता सविता तिवारी के अगुवई म ग्रामीण महिला मन ह पौधारोपण करीन।
जल जीवन मिशन-निलंबित
जल जीवन मिसन के काम म लापरवाही के सेति लोक स्वास्थ्य यांत्रिकी विभाग ह छै कार्यपालन अभियंता मन ल निलंबित कर देहे। संगेसंग चार जिला के कार्यपालन अभियंता मन ल कारण बताओ नोटिस जारी करे हे। अधिकारिक जानकारी के मुताबिक लोक स्वास्थ्य यांत्रिकी विभाग जल जीवन मिसन के काम म लापरवाही करे अउ त्रुटिपूर्ण रिपोर्टिंग करे जाय ल गंभीर लापरवाही अउ अनुशासनहीनता मानत जगदलपुर के कार्यपालन अभियंता जगदीश कुमार, बिलासपुर के यू.के.राठिया, बैकुण्ठपुर के चंद्रबदन सिंह, बेमेतरा के आर. के. धनंजय, अंबिकापुर के एस.पी.मंडावी अउ सुकमा के कार्यपालन अभियंता जे.एल. महाला ल तुरते प्रभाव ले निलंबित कर दे गेहे। उहें, दुरूग के कार्यपालन अभियंता उत्कर्ष पाण्डेय, बालोद के सुक्रांत साहू, मनेन्द्रगढ़-चिरमिरी-भरतपुर के एस.एस.पैकरा अउ सारंगगढ़-बिलाईगढ़ के कार्यपालन अभियंता कमल कंवर ल कारण बताओ नोटिस जारी करे हे।
कवर्धा/अमरकंट बस सेवा
कवर्धा ले अमरकंटक बर आज ले नानस्टाप वातानुकूलित बस सेवा सुरू होगे हे। उप मुख्यमंत्री विजय शर्मा ह कवर्धा ले बस ल हरी झंडी दिखाके रवाना करीन। ए बस हरेक दिन कवर्धा ले बिहनिया आठ बजे अउ रतिहा दस बजे अइसने अमरकंटक ले संझा पांच बजे अउ रतिहा नौ बजे रवाना होही।
बतादन कि धार्मिक अउ पर्यटन दृष्टि ले ए बस सेवा के सुरूआत करे गेहे।
जवान-श्रद्धांजलि
नारायणपुर कलेक्टर बिपिन मांझी अउ प्रभारी पुलिस अधीक्षक शंकर बघेल ह बीजापुर जिला म माओवादी हमला म मारे गे स्पेसल टास्क फोर्स-एसटीएफ के जवान सत्तेर सिंह ल उंखर गृहगांव बम्हनी पहुंच के श्रध्दा सुमन अर्पित करीन। अधिकारी मन ए बेरा जवान के परिवार के लोगन मन ले भेंट करीन अउ संवेदना प्रकट करीन।
बतादन कि बीजापुर जिला म पाछू सत्रह जुलाई के माओवादी मन डहार ले करे गे हमला म एसटीएफ के दू जवान के मौत होगे रिहीस अउ चार जवान घायल होय हे।
कांग्रेस-विधानसभा घेराव
प्रदेस कांग्रेस अवइया चौबीस जुलाई के विधानसभा के घेराव करही। एखर बर प्रदेस ले लेके जिला स्तर म रणनीति बनाय जात हे। प्रदेस कांग्रेस अध्यक्ष दीपक बैज ह काली रईपुर अउ धमतरी म जिला कांग्रेस कमेटी के बइठका लीन। उहें, जांजगीर के चांपा म नेता प्रतिपक्ष डॉक्टर चरणदास महंत के नेतृत्व म कांग्रेस के जिला स्तरीय बइठक संपन्न होइस अउ पदाधिकारी मन ल जरूरी दिसा निरदेस दीन। नेता प्रतिपक्ष ह किहीन कि प्रदेस म कानून बेवस्था सरलग बिगड़त हे।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र एके संघरा रिले करही। ए दारी के अंक म ‘‘नारायणपुर‘‘ जिला के बारे म जानकारी दे जाही।