माओवादी मुठभेड़-जवान शहीद
बीजापुर जिला म तर्रेम क्षेत्र के मंडीमरका के जंगल म माओवादी मन कोति ले करे गे बम विस्फोट म एसटीएफ के दू जवान सहीद होगे। उंहे ए घटना म चार जवान घायल होगे हे, जउन ल बने इलाज बर हेलीकॉप्टर ले रईपुर लाय गेहे। जिला के पुलिस अधीक्षक जितेन्द्र यादव ह बतइन कि सीआरपीएफ, कोबरा बटालियन, सीएएफ, डीआरजी अउ एसटीएफ के जवान सर्च आपरेसन ले लहुटत रिहीन, इही बेरा माओवादी मन ह पाइप बम म बिस्फोट कर दीन, जेखर चपेट म आय ले एसटीएफ के प्रधान आरक्षक भरतलाल साहू अउ आरक्षक सतेर सिंह सहीद होगे।
बीजापुर के पुलिस लाइन म आज सहीद जवान मन ल श्रध्दांजलि दे गीस। ए बेरा म बस्तर सांसद महेश कश्यप, चित्रकोट विधायक विनायक गोयल, बस्तर रेंज के पुलिस महानिरीक्षक सुंदरराज पी., कलेक्टर विजय दयाराम के. पुलिस अधीक्षक शलभ सिन्हा समेत पुलिस विभाग के अधिकारी अउ जवान मौजूद रिहीन। श्रध्दांजलि देके बाद सहीद जवान के पार्थिव सरीर ल उंखर गृहग्राम बर रवाना करे गीस।
इही बीच, मुख्यमंत्री विष्णुदेव साय ह जवान मनके सहादत म दुख जतात सहीद जवान के परिवार मन बर संवेदना जतइन। मुख्यमंत्री ह किहीन कि माओवाद के खातमा बर राज्य सरकार कोति ले चलाय जात अभियान माओवादी डर्रात हे अउ अइसन हरकत ल अंजात देवत हे। ओमन किहीन कि जवान मनके सहादत बेकार नइ जाय।
पटवारी हड़ताल खत्म
राजस्व मंत्री टंकराम वर्मा ले भेंट के बाद प्रदेस के पटवारी मन ह अपन हड़ताल खतम कर देहे। श्री वर्मा ह पटवारी मन ल उंखर मांग उपर बिचार करे के भरोसा देवादन। खबर के मुताबिक आज राजस्व मंत्री ह पटवारी संघ के नेता मन ले भेंट करे बर बलाय रिहीन। करीबन चालीस मिनट चले बइठका के बाद पटवारी मन ह अपन मांग राजस्व मंत्री के आगू राखिन। बताय जात हे कि ए दौरान पटवारी मनके चौतीस ठिन मांग म गोठबात होइस।
मुख्यमंत्री-केंद्रीय मंत्री मुलाकात
छत्तीसगढ़ के मुख्यमंत्री विष्णुदेव साय ह केंद्रीय गृहमंत्री अमित शाह ले नई दिल्ली म भेंट करीन। ए दौरान मुख्यमंत्री ह केंद्रीय मंत्री ले छत्तीसगढ़ के विकास बर बनाय गे छत्तीसगढ़ विजन दू हजार सैंतालिस म गोठबात करीन। मुख्यमंत्री ह केंद्रीय गृहमंत्री ल बतइन कि राज्य सरकार ह माओवादी मनके गतिविधि रोके अउ उंखर नेटवर्क ल खतम करे बर कड़ा कदम उठाय हे। एखर संगेसंग नक्सल आपरेसन अउ माओवाद प्रभावित क्षेत्र म विकास काम के संबंध म जानकारी दीन। भेंट के बेरा गृहमंत्री ह छत्तीसगढ़ सरकार के करे जात प्रयास के प्रसंसा करीन।
मुख्यमंत्री ह दिल्ली दौरा के बेरा केंद्रीय सड़क अउ परिवहन मंत्री नितिन गडकरी ले घलो भेंट करके प्रदेस म सड़क परियोजना अउ आदिवासी क्षेत्र के संग अयोध्या तक सोज्झे कनेक्टिविटी बढ़ाय म गोठबात करीन। ए दौरान मुख्यमंत्री ह रायगढ़-धरमजयगढ़-मैनपॉट-अंबिकापु
नीट-यूजी/सुनवाई
नीट-यूजी परीक्षा म होय गड़बड़ी ल लेके आज उच्चतम न्यायालय म सुनवाई होइस। कोर्ट ह एनटीए ल निरदेस देहे कि छात्र मनके नंबर वेबसाइट म अपलोड करे जाय। फेर, नंबर ल अपलोड करत बेरा अभ्यर्थी के पहिचान ल गुप्त रखे जाय। कोर्ट ह केहे हे कि नतीजा सहर अउ केन्द्र के हिसाब ले अलग-अलग घोषित होना चाही। एखर संगेसंग कोर्ट ह मामला के सुनवाई बर नवा तारीख तय करे हे, जेखर मुताबिक अब नीट के परीक्षा म पेपर लीक अउ गड़बड़ी के आरोप लगइया याचिका म बाईस जुलाई के आगू के सुनवाई होही।
कोयला मंत्रालय
छत्तीसगढ़ के गेवरा अउ कुसमुंडा खदान दुनिया के पांच सबले बड़े कोयला खदान म दूसर अउ चौथा स्थान म हवय। ए खदान कोल इंडिया के सहायक कंपनी एसईसीएल कोति ले चलाय जात हे। ए जानकारी कोयला मंत्रालय ह देहे। गेवरा अउ कुसमुंडा खदान एक संघरा मिलके बछर घर म सौ मिलियन टन ले जादा कोयला के उत्पादन करथे, जउन भारत के कुल कोयला उत्पादन के करीबन दस प्रतिसत हे। गेवरा ओपन कास्ट खदान के परिचालन बछर उन्नीस सौ इक्यासी म सुरू होय रिहीस, जेखर वार्षिक उत्पादन क्षमता सत्तर मिलियन टन हे। गेवरा ओपन कास्ट खदान ह पाछू वित्तीय बछर म उनसठ मिलियन टन कोयला उत्पादन करे रिहीन। एमा अवइया दसक बर देस के ऊर्जा जरूरत ल पूरा करे बर भरपूर कोयला भंडार हे।
इही बीच, कुसमुंडा खदान ह पाछू बछर पचास मिलियन टन ले जादा कोयला के उत्पादन करीस।
पहाड़ी कोरवा मौत जांच
कोरबा जिला म एक पहाड़ी कोरवा अउ एक आने किसोरी के मौत के मामला म खंड चिकित्सा अधिकारी अउ प्राथमिक स्वास्थ्य केंद्र के टीम ह जांच प्रतिवेदन सीएमएचओ ल दीन। सीएमएचओ डॉक्टर एस.एन. केसरी ह बतइन कि पोस्टमार्टम रिपोर्ट के मुताबिक दूनों नोनी मन के मौत बुखार अउ पीलिया के सेति होय हे। उहें, स्वास्थ्य विभाग के जांच प्रतिवेदन के मुताबिक क्षेत्र म हालात सामान्य होवत हे। सिविर लगाके गांव के लोगन के स्वास्थ्य जांच करे जात हे। ओमन जिला के सबो मितानिन अउ स्वास्थ्य कार्यकर्ता मन ल निरदेस दीन कि ओमन अपन-अपन क्षेत्र के दउरा करके बुखार, दस्त, पीलिया के मरीज मिले म प्राथमिक उपचार के बाद सेक्टर चिकित्सक बीएमओ अउ जिला कार्यालय ल सूचना देवय।
रामलला दर्शन योजना
श्री रामलला दर्सन योजना म सरगुजा संभाग के साढ़े आठ सौ श्रध्दालू काली बिसेस ट्रेन ले अयोध्या धाम बर रवाना होइन। ए ट्रेन ल सांसद चिंतामणि महाराज, विधायक राजेश अग्रवाल अउ प्रबोध मिंज ह हरियर झंडी देखाके रवाना करीन। ए बिसेस ट्रेन म सरगुजा संभाग के छै जिला जशपुर, सूरजपुर, कोरिया, बलरामपुर, सरगुजा अउ मनेन्द्रगढ़-चिरमिरी, भरतपुर जिला के श्रध्दालू सामिल हे।
खबर के मुताबिक श्री रामलला दर्सन योजना म श्रध्दालू मन ल पूरा पैकेज मिलही, जेमा छत्तीसगढ़ ले अयोध्या जाय उंहा रूके अउ मंदिर दर्सन के बेवस्था रइही। ए ट्रेन म सुरक्षाकर्मी अउ चिकित्सक के दल मौजूद रइही।
रेलवे स्वच्छता
भारतीय रेलवे ह ट्रेन म साफ-सफाई के कड़ाई ले पालन करे के निरदेस दीन। रेलवे ह सबो पेंट्रीकार प्रबंधक मन ल चेतावनी जारी करत सबो एक्सप्रेस सुफर फास्ट ट्रेन म बने साफ-सफाई राखे बर किहीन। एमा रईपुर स्टेसन म क्लीन ट्रेन स्टेसन अउ मंडल ले चलइया सबो एक्सप्रेस ट्रेन म ऑन होल्डिंग, हाउस कीपिंग स्टाफ जइसन व्यवस्था देवाय गेहे। एखर संगेसंग लंबी दूरी के ट्रेन म यात्रा के बेरा पेंट्रीकार ले निकलइया कूड़ा के निस्तारण बर आने-आने जघा म गारबेज कलेक्सन प्वांइट घलो बनाय गेहे। एखर ले ट्रेन अउ रेल परिसर म साफ-सफाई बने रइही।
अउ अब थोरकुन समाचार सार म –
– न्यायमूर्ति नोंगमेइकापम कोटिस्वर सिंह अउ न्यायमूर्ति आर. महादेवन ह आज सर्वोच्च न्यायालय के न्यायाधीश के रूप म सपथ लीन। भारत के मुख्य न्यायाधीश न्यायमूर्ति डी.वाई. चंद्रचूड़ ह दूनों जज ल सपथ देवईन।
– वित्त मंत्री ओ.पी. चौधरी काली रायपुर म विद्या भारती अखिल भारतीय शिक्षा संस्थान ले जुड़े सरस्वती शिक्षा संस्थान म राखे गे कारीकरम म सामिल होइन अउ संस्कृति बोध माला पुस्तक के विमोचन करीन।
– पाछु दस जून के बलौदाबाजार के कलेक्ट्रेट परिसर अउ पुलिस अधीक्षक कार्यालय म होय आगजनी अउ तोड़फोड़ के मामला के आरोपी सिक्षक मोहन बंजारे ल तत्काल प्रभाव ले निलंबित कर दे गेहे।
अउ
– रईपुर रेलमंडल के सिरसा अंडरब्रिज के मरम्मत काम बर बीस जुलाई के बिहनिया नौ बजे ले बाईस जुलाई के संझा छह बजे तक अंडरब्रिज ल अस्थायी रूप ले बंद करे जाही।