मुख्यमंत्री-उद्योग स्थापना
मुख्यमंत्री विष्णुदेव साय ह किहीन हे कि राज्य सरकार ह प्रदेस म उद्योग के स्थापना बर हरसंभव मदद करही। ए बात मुख्यमंत्री ह आज रईपुर म भारतीय उद्योग परिसंघ डहार ले नई औद्योगिक नीति बर दे गे सुझाव म गोठबात के दउरान कहिन। ओमन किहीन कि सरकार के मंसा हे कि नवा उद्योग के संग छत्तीसगढ़ म वैल्यू एडिशन के काम होवय अउ संगेसंग स्थानीय युवा मन ल रोजगार मिलय। ए मउका म भारतीय उद्योग परिसंघ के सदस्य मन ह प्रदेस म सिंगल विंडो सिस्टम अउ मुख्यमंत्री डहार ले रोजगार सृजन बर उद्योग मन ल बढ़ावा दे जाय के प्रयास के सराहना करीन।
छत्तीसगढ़ विजन डाक्यूमेंट
राज्य नीति आयोग डहार ले छत्तीसगढ़ विजन डाक्यूमेंट दू हजार सैंतालीस तैयार करे अउ रईपुर म संवाद कारीकरम के आयोजन करे गीस। एखर सुभारंभ वित्त मंत्री ओ.पी. चौधरी करीन। ए कारीकरम म छत्तीसगढ़ ल देस म कृषि अउ प्रसंस्कृत सुपरफूड के पावर हाउस बनाय बर किसान मन ह कृषि अउ खाद्य प्रसंस्करण, बागवानी फसल अउ कृषि के क्षेत्र म बुनियादी ढांचा म सुधार समेत आने-आने मुद्दा म अपन सुझाव दीन। बइठका म कृषि ले जुड़े लक्ष्य, चुनौती अउ सामर्थ्य बिसय उपर गोठबात करे गीस। ए संवाद कारीकरम म युवा, किसान, माईलोगिन अउ प्रबुद्धजन मन ह भाग लीन।
ए मउका म वित्त मंत्री ह किहीन कि देस अउ राज्य ल ऊंचाई तक पहुंचाय म आपके विचार प्रभावी योगदान दे सकत हे।
ए कार्यक्रम के समापन मुख्यमंत्री विष्णुदेव साय ह आज करीन। ए मउका म ओमन किहिन कि अमृतकाल के विजन डाक्यूमेंट एक नवंबर के जारी करे जाही।
छत्तीसगढ़-पुरस्कार
छत्तीसगढ़ ल दीनदयाल अंत्योदय योजना-राष्ट्रीय शहरी आजीविका मिशन म सुघ्घर काम बर पांच राष्ट्रीय पुरस्कार दे जाही। केन्द्र सरकार डहार ले राज्य शहरी विकास अभिकरण-सूडा अउ प्रदेस के चार नगरीय निकाय – बिलासपुर, रायगढ़, चांपा अउ भाटापारा के चुनई ‘स्पार्क‘ पुरस्कार बर करे गेहे। राज्य म सहरी गरीब परिवार मन ल ससक्त बनाय अउ उंखर आजीविका के मउका ल बढ़ाय म सुघ्घर काम बर ए पुरस्कार दे जाही। केन्द्रीय आवासन अउ सहरी कार्य मंत्रालय डहार ले अट्ठारह जुलाई के नई दिल्ली म राखे गे समारोह म सूडा अउ चार नगरीय निकाय मन ल इनाम दे जाही। केन्द्रीय आवासन अउ सहरी कार्य मंत्री मनोहर लाल खट्टर अउ केन्द्रीय राज्यमंत्री तोखन साहू ह ए पुरस्कार दीहीं।
उपमुख्यमंत्री अरूण साव ह ए उपलब्धि बर सूडा अउ चारों नगरीय निकाय के टीम ल बधाई दीन हे।
केन्द्र-गवाह की जांच
केन्द्र सरकार ह राज्य अउ केन्द्रसासित प्रदेस मन ले कहिन कि पुलिस स्टेसन अउ पुलिस विभाग के नियंत्रण वाले जघा मन ल गवाह ले पूछताछ बर निर्धारित नइ करे जाना चाही। केन्द्रीय गृह सचिव अजय भल्ला ह ए बारे म जम्मों राज्य अउ केन्द्रसासित प्रदेस के मुख्य सचिव मन ल चिट्ठी लिखे हे। भारतीय नागरिक सुरक्षा संहिता-दू हजार तेईस के अंतर्गत जम्मों पुलिस स्टेसन मन ल ऑडियो-वीडियो इलेक्ट्रॉनिक माध्यम ले गवाह मन ले पूछताछ बर एक स्थान के पहिचान करे बर केहे गेहे।
जनसमस्या निवारण पखवाड़ा
प्रदेस के जम्मों नगरीय निकाय म सत्ताईस जुलाई ले दस अगस्त तक जनसमस्या निवारण पखवाड़ा के आयोजन करे जाही। ए दउरान नगर निगम, नगर पालिका अउ नगर पंचायत म वार्डवार सिविर मनके आयोजन करके स्थानीय समस्या मनके निदान करे जाही। नगरीय प्रसासन अउ विकास विभाग ह ए बारे म जम्मों आयुक्त अउ मुख्य नगर पालिका अधिकारी मन ल परिपत्र जारी करे हे।
नगरीय प्रशासन मंत्री अरूण साव ह राज्य के जम्मों एक सौ चौरासी नगरीय निकाय म स्थानीय समस्या मनके निराकरण बर वार्डवार शिविर राख के उंखर मउका म ही निराकरण करे के निरदेस विभाग ल देहे। ओमन ए सिविर म नगर निगम, नगर पालिका अउ नगर पंचायत के महापौर, अध्यक्ष, पार्षद अउ आने-आने जनप्रतिनिध मन ल घलो मौजूद रेहे के अपील करीन हे।
स्वास्थ्य मंत्री-बीजापुर
स्वास्थ्य मंत्री श्याम बिहारी जायसवाल ह बीजापुर जिला के एकदिवसीय दउरा के दउरान काली स्वास्थ्य विभाग के काम के समीक्षा करीन। ए दउरान ओमन जम्मों आवासीय स्कूल, पोटाकेबिन, छात्रावास, आश्रम, एकलव्य विद्यालय समेत नवोदय अउ जम्मों आवासीय संस्था म मलेरिया जांच के निरदेस दीन। ओमन किहीन कि बरसात के मौसम म मलेरिया, डायरिया अउ पानी के बीमारी के संक्रमण ल रोके बर उपाय करे जाय। श्री जायसवाल ह किहीन कि मलेरिया जांच अउ रिपोर्ट बर बस्तर संभाग के जम्मों ब्लॉक मुख्यालय मन म माइक्रोस्कोप के व्यवस्था करे जाही, जेमा मलेरिया के स्लाईड के जांच करे जा सकय।
स्वास्थ्य मंत्री ह बीजापुर के पोटाकेबिन पहुंच के इहां के व्यवस्था मनके जानकारी लीन। ओमन आने-आने कक्षा म पहुंच के लइका मन ले पढ़ाई, मध्यान्ह भोजन समेत मौसमी बीमारी के रोकथाम बर रोज मच्छरदानी के उपयोग करे के बात किहीन। ओमन पढ़ईया लइका मन ल रोज गरम भोजन देके जिला प्रसासन डहार ले निर्धारित करे गे मीनू चार्ट के पालन करे समेत स्वच्छता उपर बिसेस ध्यान देके निरदेस दीन।
अपन प्रवास के दउरान श्री जायसवाल ह बीजापुर जिला अस्पताल के घलो निरीक्षण करीन। ए दउरान ओमन आने-आने वार्ड के मरीज अउ उंखर परिवार वाले मन ले मिलके स्वास्थ्य सुविधा के जानकारी लीन। ओमन आईसीयू म बेड के कमी ल देखत तुरते दस बेड समेत दू ठिन डायलिसिस मसीन के मंजूरी दीन।
केदार कश्यप-सुकमा
वन मंत्री केदार कश्यप ह किहीन हे कि बरसात के मौसम म मौसमी अउ जलजनित बीमारी के रोकथाम बर जम्मों जरूरी कदम उठाय जाय। ओमन किहीन कि स्वास्थ्य विभाग मलेरिया उन्मूलन बर मच्छरदानी बांटय अउ डीडीटी छिड़काव सुनिश्चित करय। श्री कश्यप ह काली सुकमा म राज्य सरकार डहार ले चलाय जात आने-आने कारीकरम के क्रियान्वयन के समीक्षा करीन।
वन मंत्री श्री कश्यप ह बइठका म स्वास्थ्य विभाग के अधिकारी मन ल मौसमी बीमारी के रोकथाम बर दवाई के उपलब्धता अउ जरूरत पड़े म चिकित्सा सिविर लगाय के निरदेस दीन। ओमन किहीन कि सांप चाबे के इलाज बर पर्याप्त मात्रा म एंटी वेनम के व्यवस्था करे जाय। ओमन कोंटा इलाका के डूबान क्ष्ज्ञेत्र म बाढ़ ल लेके जरूरी सतर्कता बरते अउ बिजली के व्यवस्था म ध्यान देके बात किहीन। एखरे संग गांव वाले मन ल बैंकिंग सुविधा देवाय बर मोबाइल एटीएम सुरू करे बर किहीन।
संपूर्णता अभियान
संपूर्णता अभियान के तहत कोंडगांव जिला के आकांक्षी विकासखंड माकड़ी म आने-आने कारीकरम आयोजित करे जावत हे। इही कड़ी म शिक्षा विभाग डहार ले स्कूली लइका मन बर निबंध, नारा लेखन अउ रंगोली प्रतियोगिता के आयोजन करे गीस। एमा छात्र-छात्रा मन ह भाग लेके संपूर्णता अभियान उत्सव ल सफल बनाय के संदेस दीन अउ ए अभियान म लोगन मन ले घलो सहभागिता निभाय के अपील करीन।
दुर्घटना
सारंगढ़-बिलाईगढ़ जिला म एक पिकअप गाड़ी के अनते-तनते होके पलटे ले एक झिन मनखे के मउत होगे। उहें, बीस झिन मनखे घायल होगे हे। घायल मन ल बरमकेला के अस्पताल म भर्ती कराय गेहे। ए हादसा बरमकेला थाना क्षेत्र के चांटीपाली जंगल म होइस। पिकअप गाड़ी म इक्कीस झिन लोगन बइठे रिहीन, जउन मन सारंगढ़ ले मजदूरी करके बरमकेला जावत रिहीन।
उहें, जांजगीर-चांपा जिला के हरदीविशाल गांव म एक ठन चारपहिया गाड़ी पेड़ ले टकराय के बाद दुकान म घुसर गे। ए दउरान सड़क म जावत एक झिन मनखे के मउत होगे। उहें, एक झिन मनखे अउ ड्राईवर घायल होगे हे, जउन मन ल जिला अस्पताल म भर्ती कराय गेहे। हादसा के बाद गुस्साय लोगन मन ह बलौदा-हरदीबाजार कोरबा रद्दा म चक्काजाम कर दीन।
उहें, रायगढ़ जिला के धरमजयगढ़ म पिकअप अउ दुपहिया गाड़ी के बीच टक्कर म एक झन युवक घायल होगे, जेखर इलाज के दउरान मउत होगे।
माओवादी-आत्मसर्पण
सुकमा जिला म दू झिन माईलोगिन माओवादी समेत चार झिन इनामी माओवादी मन ह आत्मसमर्पण करे हे। एमा ले एक झिन माओवादी उपर आठ लाख रूपिया, दू झिन उपर पांच-पांच लाख रूपिया अउ एक झिन माओवादी उपर दू लाख रूपिया के इनाम घोसित रिहीस। ए जम्मों माओवादी मन उपर कतकोन घटना म सामिल रेहे के आरोप हे।
कोरबा-वन महोत्सव
कोरबा जिला के भालूसटका गांव म कोरबा वनमंडल डहार ले राखे गे वन महोत्सव कारीकरम म स्कूली लइका अउ कर्मचारी मन ह एक संग, एके बेरा अउ एकेच जघा म सबले जादा दू हजार दू सौ तिहत्तर पौधा लगाके गोल्डन बुक ऑफ वर्ल्ड रिकॉर्ड म विश्व कीर्तिमान स्थापित करे हे। ए मउका म श्रम मंत्री लखन लाल देवांगन ह किहीन कि प्रधानमंत्री नरेन्द्र मोदी के आह्वान म ‘‘एक पेड़ मां के नाम‘‘ अभियान के तहत जम्मों लोगन मन ह एक पेड़ जरूर लगावयं।