मुख्यमंत्री निर्देश
मुख्यमंत्री विष्णुदेव साय ह मौसमी बीमारी मनके रोकथाम अउ बचाव बर जागरूकता अभियान चलाय के निरदेस देहे। ओमन स्वास्थ्य विभाग के अधिकारी मन ले केहे हे कि प्रदेस के कोनो भी क्षेत्र म मलेरिया, डायरिया समेत मौसमी बीमारी के जानकारी मिले उपर स्वास्थ्य सिविर लगाके प्रभावित मनके उपचार करे जाय। श्री साय ह सबो जरूरी जीवन रक्षक दवई मन ल स्टोर करना तय करे बर घलो किहीन हे।
उहें, उप मुख्यमंत्री विजय शर्मा ह कबीरधाम जिला के बोड़ला ब्लाक के गांव चिल्फी, झलमला, तरेगांव अउ सोनवाही के दौरा करके स्वास्थ्य बारे म जानकारी दीन। ओमन गांव सोनवाही पहुंच के गांव के मनखे मन के संगे डायरिया पीड़ित परिवार वाले मन ले भेंट करके राज्य शासन ले हरसंभव मदद देवाय खातिर भरोसा देवाइन।
‘एक पेड़ मां के नाम‘
मुख्यमंत्री विष्णुदेव साय ह ‘एक पेड़ मां के नाम‘ अभियान के चलत जशपुर जिला म पौधारोपण कारीकरम के सुभारंभ करीन। ओमन दुलदुला म राखेगे कारीकरम म महतारी वंदन योजना के दस झिन हितग्राही माईलोगिन मन ल जाम के पौधा अउ संदेस पत्र भेंट करीन। ए मउका म मुख्यमंत्री ह किहीन कि प्रधानमंत्री नरेंद्र मोदी ह ए अभियान के सुरूआत करे हे, जेखर ले भविष्य म अवइया पीढ़ी ल एखर फायदा मिल सकत हे।
इंहा ए बतादन कि ‘एक पेड़ मां के नाम‘ ए अभियान के चलत जशपुर जिला म दू लाख ले जादा पौधा बांटे जाही।
ओति, जांजगीर-चांपा जिला पंचायत परिसर म ‘एक पेड़ मां के नाम‘ ए अभियान के चलत निसुल्क पौधा बांटे बर ‘हरियाली रथ‘ ल पठोय गेहे। ए दौरान स्थानीय विधायक, कलेक्टर अउ एसपी ह ए गाड़ी ल हरा झंडी दिखाइन।
ए मउका म आय मनखे मन ल पौधा घलो बांटे गीस। संगे, कलेक्टर ह जिला वाले मन ले ‘एक पेड़ मां के नाम‘ ए अभियान म पौधा लगाय के अपील करीन।
केंद्रीय राज्यमंत्री-सियान सदन
केंद्रीय आवास अउ सहरी कार्य राज्यमंत्री तोखन साहू ह आज मुंगेली जिला के रामगढ़ म आनंद आश्रम परिसर म नवा बने सियान सदन भवन के लोकार्पण करीन। रामगढ़ म करीबन बीस लाख रूपिया के लागत ले सर्वसुविधा वाले सियान सदन भवन बनाय गेहे, जेमा एक ठिन हाल, दू ठिन कमरा अउ दू ठिन टॉयलेट हे। कारीकरम म आनंदआश्रम के सत्रह झिन सियनहा मन ल साल अउ नरियर भेंट करके सम्मानित करे गीस।
ए मउका म केंद्रीय राज्य मंत्री तोखन साहू ह किहीन कि सियान मन हमर समाज के गौरव हरय। उंखर मार्गदर्सन ल झोंकत हमन सबो झिन अपन समाज अउ देस के कल्याण कर सकत हन। ओमन यहू किहीन कि संसार म सबले बड़का भगवान हमर महतारी-बाप अउ गुरू होथे। ए कारीकरम ल उप मुख्यमंत्री अरूण साव घलो संबोधित करीन।
नेशनल लोक अदालत
छत्तीसगढ़ म काली होय राष्ट्रीय लोक अदालत म आठ लाख एकतीस हजार ले जादा केस के निपटारा करे गीस। एमा ले दू सौ तीस करोड़ नौ लाख रूपिया ले जादा के आवार्ड पास करे गीस। हाईकोर्ट के मुख्य न्यायाधीश रमेश सिन्हा ह नेशनल लोक अदालत के तहत राज्य के सबो तेईस ठिन जिला मनके वर्चुअल माध्यम ले निरीक्षण करीन।
उहें, न्यायाधीश गौतम भादुड़ी ह नेसनल लोक अदालत के सुभारंभ करीन। ए मउका म ओमन किहीन कि लोक अदालत के उद्देस्य अउ प्रयास हे कि आपसी झगरा अउ विवाद ह जतका जल्दी होय थिराय ओमन किहीन कि नेसनल लेवल म केस मन ल सुलझाय के मामला म छत्तीसगढ़ ह आने कई ठिन बड़का राज्य ले आगू हे।
ओति, कोंडागांव म राखे गे नेसनल लोक अदालत म हाईकोर्ट के जज संजय कुमार जायसवाल सामिल होइन। ए दौरान ओमन न्याय के बड़का भूमिका उपर गोठबात करीन।
अनिल टुटेजा-यूपी पुलिस
छत्तीसगढ़ के कथित सराब घोटाला मामला म उत्तर प्रदेस पुलिस ह पूर्व आईएएस अनिल टुटेजा ल प्रोडक्सन वारंट म गिरफ्तार करे हे। उत्तर प्रदेस पुलिस ह ए वारंट बर अर्जी दे रिहीस, जेला कोर्ट ह मंजूर कर लीस। अनिल टुटेजा ल पुलिस ह काली मेरठ कोर्ट म पेस कर सकत हे।
मुख्यमंत्री-संकल्प जशपुर
मुख्यमंत्री विष्णुदेव साय ह आज जशपुर जिला के दुलदुला म सामाजिक जागरूकता व्यवहार परिवर्तन बर चलत संकल्प जशपुर कारीकरम के सुभारंभ करीन। ए कारीकरम के माध्यम ले जिला म माईलोगिन मन ल जागरूक करना बाल विवाह ल रोकना, टीकाकरण, सिकलसेल अउ सांप कांटे ले रोकथाम बर जागरूकता अभियान चलाय जात हे। उहें, नुक्कड़ नाटक के जरिया ले लोगन मन ल जागरूक करे जात हे। ए मउका म मुख्यमंत्री ह संकल्प कारीकरम के वीडियो अउ कटआउट के विमोचन घलो करीन।
बीजापुर मलेरिया-मौत
बीजापुर जिला के संगमपल्ली पोटाकेबिन के एक झिन पढ़इया नोनी के मलेरिया ले मउत होगे हे। ए पढ़इया नोनी ल बेहोसी के हालत म काली जिला अस्पताल म भर्ती कराय गे रिहीस। फेर इलाज बेरा ए नोनी के मउत होगे। इंहा ए बतादन कि संगमपल्ली पोटाकेबिन म पाछू कुछ दिन के दौरान तीन झिन आने लइका घलो मलेरिया ले पीड़ित पाय गेहे।
जनसमस्या निवारण शिविर
कोंडागांव जिला के गांव धनोरा म काली जिला स्तरीय जनसमस्या निवारण सिविर राखेगे रिहीस। जेमा कांकेर सांसद भोजराज नाग अउ केसकाल विधायक नीलकंठ टेकाम सामिल होइन। सिविर म कई ठिन विभाग के स्टाल लगाय गे रिहीस। जेमा लोगन मन ल सरकार के जनकल्याणकारी योजना बारे म जानकारी दे गीस। ए मउका म सांसद भोजराज नाग ह अधिकारी मन ल लोगन मनके समस्या ल तुरते निपटाय के निरदेस दीन। संगे ओमन प्रधानमंत्री नरेंद्र मोदी के पहल उपर ‘एक पेड़ मां के नाम‘ ए अभियान के चलत लोगन मन ले पेड़ लगाय के अपील करीन।
अंतर्राज्यीय आरोपी-गिरफ्तार
रईपुर पुलिस ह मेडिकल रिप्रजेंटेटिव फ्रेन्चायसी खोलवाय के झांसा देके लाखो रूपिया के ठगी करइया दू झिन अंतर राज्यीय आरोपी ल दिल्ली ले गिरफ्तार करे हे। आरोपी ह सोसल मीडिया म विज्ञापन देके लोगन मन ल अपन सिकार बनात रिहीस। पुलिस ह आरोपी मन तीर ले पचीस हजार रूपिया नगद अउ दू ठिन मोबाईल फोन जब्त करे हे। पुलिस ह बतइस हे कि आरोपी मन एक झिन मनखे ले साढ़े चौदह लाख रूपिया के ठगी करे रिहीस। ओखर मनके खिलाफ दिल्ली अउ झारखंड म घलो मामला दर्ज हे। उहें, एक झिन आने आरोपी फरार हे, जेला खोजे म पुलिस लगे हे।
नीति आयोग-‘नीति गियर शिफ्ट चैलेंज‘
नीति आयोग ह ई-फास्ट इंडिया पहल के चलत ‘नीति गियर सिफ्ट चैलेंज‘ सुरू करे के घोसना करे हे। ए हैकथॉन के उद्देस्य देस के आर्थिक अउ पर्यावरण चुनौती मनके समाधान करत भारत म कार्बन उत्सर्जन नइ करइया ट्रक गाड़ी ल चलाय बर नवा व्यवसाय मॉडल ल बढ़ावा देना हे। नीति आयोग ह नवा व्यवसाय मॉडल बनाय बर पढ़इया लइका, पेसेवर माल डोहरइया, सिक्षाविद अउ सोधकर्ता मन ल घलो नेवते हे।
बास्केटबॉल-स्वर्ण पदक
राजनांदगांव म होय अखिल भारतीय अंतर साई बास्केटबॉल प्रतियोगिता म राजनांदगांव के बालक वर्ग के टीम ह गोल्ड मेडल जीते हे। राजनांदगांव के टीम ह फाइनल मुकाबला म वाराणसी के टीम ल हराइस। प्रतियोगिता के समापन मउका म पूर्व सांसद मधुसूदन यादव ह माई पहूना के रूप म सामिल होइन। ए मउका म विजेता अउ उप विजेता टीम ल पुरस्कार दे गीस। संगे कई ठिन वर्ग म सुघ्घर प्रदर्सन करइया खिलाड़ी मन ल घलो सम्मानित करे गीस।
अउ मौसम के हाल…
मौसम विभाग के मुताबिक अवइया चौबीस घंटा के दौरान उत्तर अउ मध्य छत्तीसगढ़ म जोरदरहा पानी गिर सकत हे। उहें, काली प्रदेस के कई ठिन जघा म गरजई-चमकई के संगे आंधी अउ करा गिरे के संभावना हे।