बइठका म बस्तर जिला पंचायत अध्यक्ष वेदवती कश्यप ह बतइन कि बस्तर जिला के ग्राम पंचायत म आश्रित गांव अउ पारा दूरिहा तक फइले हवय। एला धियान म राखत आयोग डहार ले 70 प्रतिसत जनसंख्या अउ 30 प्रतिसत क्षेत्रफल के आधार म आबंटन प्रदान करना चाही। ओमन किहीन कि बस्तर के संस्कृति म प्रमुख स्थान रखइया देवगुड़ी, मेला अउ मड़ई खातिर आबंटन के प्रावधान घलो करे जाना चाही।
बइठका म बस्तर जिला पंचायत अध्यक्ष मनीराम कश्यप ह बस्तर संभाग म माओवाद अउ पेसा जिला ल जादा आबंटन देवय के बात किहीन। संगेसंग ओमन बस्तर म लघु वनोपज के जिनिस मन के वैल्यू एडिसन कर सह उत्पाद के श्रेणी म लाय के बेवस्था करे खातिर घलो जादा आबंटन के जरूरत बतइन।
केंद्रीय आयोग के अध्यक्ष ह बइठका के दौरान जिला अउ पुलिस प्रशासन डहार ले दे गीस पावर प्वाइंट प्रेजेन्टेसन के तारीफ करत एला स्थानीय आधारभूत जरूरत म केंद्रीत बतइस। ए मउका म आयोग के अध्यक्ष श्री पनगढ़िया अउ टीम के सदस्य मन ह कलेक्ट्रेट परिसर म ‘‘एक पेड़ मां के नाम‘‘ अभियान के तहत पौधा घलो लगाइन।
एखर ले पहिली, केंद्रीय वित्त आयोग के टीम ह घूमे बर जगदलपुर के तीर चित्रकोट जलप्रपात गीन।
उहें, बस्तर पहुंचे आयोग के सदस्य मन के सम्मान म जिला प्रशासन डहार ले बस्तर के लोक गीत अउ लोक नाचा के रंगा-रंग सांस्कृतिक कारीकरम के आयोजन करे गीस।
एखर बाद आज संझा केंद्रीय वित्त आयोग के अध्यक्ष अउ उंखर टीम ल रईपुर स्थित स्वामी विवेकानंद विमानतल ले नई दिल्ली रवाना होय बखत वित्त सचिव मुकेश बंसल अउ एन.आर.डी.ए. के सी.ई.ओ. सौरभ कुमार समेत आने बड़का अधिकारी मन ह बिदाई दीन।
छत्तीसगढ़ विजन डाक्यूमेंट दू हजार सैंतालिस म नवाचार, तकनीकीकरण, विकेन्द्रीकरण, जनभागीदारी अउ नागरिक सेवा मन म गुणवत्ता सुधार जइसन बिसय ल सामिल करवाय खातिर विचार-विमर्स करे गीस। ए सिलसिला म नवा रईपुर स्थित राज्य नीति आयोग के कार्यालय म अयोजित बइठका म सुशासन बिसय म गठित वर्किंग समूह के सदस्य मन ह जरूरी सुझाव दीन।
मंत्रिमंडल-अयोध्याधाम यात्रा
मुख्यमंत्री विष्णुदेव साय अउ मंत्रिमंडल के जम्मो सदस्य मन ह आज अयोध्या म प्रभू श्रीराम के दर्सन करीन। ए मउका म मुख्यमंत्री ह किहीन कि ओला प्रभू श्रीराम के दर्सन करे के सौभाग्य मिलिस अउ ओमन रामलला ले देस अउ प्रदेस के खुसहाली अउ समृध्दि के कामना करीन। श्री साय ह प्रभु श्रीराम ल छत्तीसगढ़ के विष्णुभोग चांवल, सीताफल, बिसेस रूप ले तियार करवाय गे मिठाई, अईरसा अउ करी लाडू के भोग चढ़ाइन।
गौरतलब हे कि मुख्यमंत्री श्री साय अउ मंत्रिमंडल के जम्मो सदस्य आज रईपुर ले बिसेस विमान ले अयोध्याधाम के यात्रा बर रवाना होय रिहीन।
कोयला/महादेव सट्टा ऐम मामला
छत्तीसगढ़ म होय कथित कोयला घोटाला मामला म रईपुर जिला म बंद जम्मों पंद्रह झिन आरोपी मनके न्यायिक हिरासत बिसेस कोर्ट ह 18 जुलाई तक बढ़ा देगे हवय। न्यायिक रिमांड सिराय के बाद निलंबित उपसचिव सौंम्या चौरसिया, निलंबित आई.ए.एस. रान साहू अउ आई.ए.एस. समीर बिश्नोई, कांग्रेस नेता सूर्यकांत तिवारी समेत पंद्रह झिन आरोपी मन ल काली बिसेस कोर्ट म पेस करे गे रिहीस।
विजय शर्मा-निर्देश
उप मुख्यमंत्री विजय शर्मा ह कबीरधाम जिला के वनांचल क्षेत्र मन म स्वास्थ्य सिविर लगाय अउ मलेरिया, डायरिया समेत आने-आने मौसमी बीमारी ले बचाव खातिर जागरूकता अभियान चलाय के निरदेस दीन हवय। उप मुख्यमंत्री ह काली कबीरधाम जिला के सुदूर वनांचल, सोनवाही गांव पहुंचके जंगली मसरूम खाय ले जउन गांव के मनखे मन के पाछू दस जुलाई के मौत होगे रिहीन, उंखर परिजन ले मिलके अपन संवेदना जतइन। उप मुख्यमंत्री ह ए ग्रामीण मनके मौत के कारण के मुख्य चिकित्सा अउ स्वास्थ्य अधिकारी डॉक्टर बी.एल.राज. ले जानकारी लीन। डॉक्टर राज ह बतइन कि ए गांव वाला मन के मौत डायरिया ले नइ, बल्कि पहिली जांच म दूषित भोजन करे ले होय हे। उप मुख्यमंत्री ल डॉक्टर राज ह मौत होय दू झिन मनखे मनके पोस्टमार्टम रिपोर्ट अभी तक नइ आय के जानकारी घलो दीन अउ किहीन कि रिपोर्ट आय के बाद मौत काय सेती होय हे ए मालूम होही।
उप मुख्यमंत्री ह चिल्फी, झलमला, तरेगांव के शासकीय अस्पताल खातिर डी.एम.एफ. मद ले जल्द ही सोनोग्राफी मसीन खरीदे बर किहीन।
परीक्षा
संघ लोक सेवा आयोग अउ छत्तीसगढ़ व्यावसायिक परीक्षा मंडल के परीक्षा काली आायोजित करे जाही। संघ लोक सेवा आयोग डहार ले कम्बाईण्ड मेडिकल सर्विस के पहिली पाली के परीक्षा काली बिहनिया साढ़े नौ बजे ले अउ दूसरइया पाली के परीक्षा मंझनिया दू बजे ले सुरू होही। उहें, छत्तीसगढ़ व्यावसायिक परीक्षा मंडल डहार ले बी.एस.सी.नर्सिंग परीक्षा बिहनिया दस बजे ले आयोजित करे जाही।
रायपुर-गोलीबारी
राजधानी रईपुर के तेलीबांधा इलाका म स्थित कोयला कारोबारी के ऑफिस के तीर आज दिनदहाड़े अज्ञात नाकाबपोस मन ह गोलीबारी करीन। जानबा के मुताबिक मोटरसाइकिल सवार आरोपी मन ह कंपनी कार्यालय के बाहिर खड़े कार ल निसाना बनाके गोली चलाके भाग गीन। ए घटना म काखरो घायल होय के सूचना नइ हे।
अउ अब मौसम के हाल…
मानूसन द्रोणिका अउ चक्रवाती घेरा के असर ले काली राज्य म बहुत अकन जघा मन म हल्का ले मध्यम बरसा होय अउ गरज-चमक के संग छींटा पड़े के संभावना हवय। मौसम विभाग ह एक-दू जघा मन म गाज गिरे, हवागरेर चले अउ भारी बरसा होय के चेतावनी घलो दीन।
मानसून सक्रिय होतेच छत्तीसगढ़ समेत देस के कई ठिन हिस्सा मन म बने बारिस होवत हे। मौसम विभाग ह राज्य के 13 ठिन जिला मन खातिर यलो अलर्ट जारी करे हवय।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र एके संघरा रिले करही। ए दारी के अंक म ‘‘महासमुंद‘‘ जिला के बारे म जानकारी दे जाही।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन परसारित करे जाही। ए दूनों बुलेटिन आकाशवाणी केंद्र, जगदलपुर ले परसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे परसारित करे जाही।