मुख्यमंत्री विष्णुदेव साय ह राजधानी रईपुर के दीनदयाल उपाध्याय ऑडिटोरियम म राखेगे कारीकरम म मितानिन मनके बैंक खाता म नब्बे करोड़ आठ लाख चौरासी हजार ले जादा के रासि दीन। ए रासि म केंद्र अउ राज्य सरकार के अंस के संघरा मितानिन प्रोत्साहन रासि घलो सामिल हे।
ए मउका म मुख्यमंत्री ह किहीन कि स्वास्थ्य के क्षेत्र म राज्यभर म काम करइया लगभग बहत्तर हजार मितानिन मनके अमूल्य योगदान हे।
कारीकरम म उप मुख्यमंत्री अरूण साव अउ विजय शर्मा के संघरा दूसर मंत्री, विधायक अउ अधिकारी मौजूद रिहीन। उहें, कारीकरम के अध्यक्षता स्वास्थ्य मंत्री श्याम बिहारी जायसवाल ह करीन।
अग्निवीर-आरक्षण
केंद्रीय बल मन ह पूर्व अग्निवीर मन बर दस प्रतिसत आरक्षण लागू करे के घोसना करे हे। सीमा सुरक्षा बल, केंद्रीय रिजर्व पुलिस बल, केंद्रीय औद्योगिक सुरक्षा बल अउ सशस्त्र सीमा बल के प्रमुख मन ह किहीन कि पूर्व अग्निवीर मन ल आयु म छूट मिलही अउ ओखर बर कोनो शारीरिक दक्षता परीक्षा घलो नइ होही।
इही बीच, प्रदेस के राजनांदगांव अउ मुंगेली जिला म भारतीय थल सेना म अग्निवीर भर्ती बर राखेगे लिखित परीक्षा म उत्तीर्ण युवा मन ल निसुल्क शारीरिक दक्षता प्रसिक्षण दे जाही। एखर बर अपन नांव, पता, मोबाइल नंबर अउ आधार कार्ड के संघरा जिला अउ स्वरोजगार मार्गदर्सन केंद्र म संपर्क करके पंजीयन कराय जा सकत हे।
केंद्रीय वित्त आयोग-दौरा
केंद्रीय वित्त आयोग के अध्यक्ष डॉक्टर अरविंद पनगढ़िया के अगुवई म बारह सदस्यीय दल ह आज अपन छत्तीसगढ़ दौरा के दूसरइया दिन नवा रईपुर म उद्योग अउ वाणिज्य संगठन के प्रतिनिधि मन संग चर्चा करीन। ए दौरान छत्तीसगढ़ म बेहतर औद्योगिक वातावरण के निर्माण अउ दूसर अधोसंरचना के विकास समेत आने-आने मुद्दा उपर विचार-विमर्स करे गीस। व्यापारिक संगठन के प्रतिनिधि मन आयोग ल छत्तीसगढ़ म व्यापार के संभावना के बारे म बतइन।
एखर पहिली काली देर संझा वित्त आयोग के सदस्य मन रईपुर स्थित नालंदा परिसर के लाइब्रेरी के अवलोकन करीन। ए मउका म सदस्य मन लाइब्रेरी के कार्यप्रणाली, विद्यार्थी मनके बइठे के बेवस्था पुस्तक मन ल इशू कराय के बेवस्था सुरक्षा बेवस्था समेत प्रवेस प्रक्रिया अउ सुल्क के जानकारी लीन अउ पढ़इया लइका मन ले गोठबात करीन। आयोग के सदस्य ह नालंदा लाइब्रेरी के सराहना करत किहीन कि अइसन मॉडल दूसर जघा म घलो लागू होना चाही। प्रतिनिधि मंडल के संग वित्त मंत्री ओ.पी. चौधरी घलो मौजूद रिहीन।
राज्यपाल-स्थापना दिवस
छत्तीसगढ़ राजभवन म आज राज्यपाल विश्वभूषण हरिचंदन के अध्यक्षता म राजस्थान, महाराष्ट्र, पश्चिम बंगाल, हिमांचल प्रदेस अउ गोवा राज्य मनके स्थापना दिवस मनाय गीस। केंद्र सरकार के ‘एक भारत श्रेष्ठ भारत‘ कारीकरम के तहत राजभवन म ए समारोह राखे गे रिहीस, एमा छत्तीसगढ़ म निवास करइया राजस्थान, महाराष्ट्र, पश्चिम बंगाल, हिमांचल प्रदेस अउ गोवा के मनके मन हिस्सा लीन।
ए मउका म राज्यपाल विश्वभूषण हरिचंदन ह किहीन कि हमर संकल्प होना चाही कि जम्मों झन अपन विविधता के संग एक आदर्स अउ मजबूत भारत के निर्माण बर मिलके काम करय। ओमन किहीन कि हमर देस के विविधता इंहा के खान-पान, पहनावा, परंपरा, रीति-रिवाज अउ अनुष्ठान मन म देखे जा सकत हे। भारत के आने-आने क्षेत्र के बोली-भाखा के विविधता देस के समृध्द, सांस्कृतिक, विरासत के प्रमाण हे।
राष्ट्रीय लोक अदालत
प्रदेस म काली राष्ट्रीय लोक अदालत के आयोजन करे जाही। राज्य विधिक सेवा प्राधिकरण बिलासपुर डहार ले प्रदेस के जम्मो जिला न्यायालय अउ व्यवहार न्यायालय मन म घलो लोक अदालत आयोजित करे जाही। ए लोक अदालत म आपसी सुलह ले मोटर दुर्घटना दावा, जल कर, संपत्ति कर अउ राजस्व संबंधी आने-आने मामला मनके निराकरण करे जाही।
मिले जानकारी के अनुसार ए दरी बछर के द्वितीय लोक अदालत होही। राज्य विधिक सेवा प्राधिकरण के अधिकारी मन बतइन कि अवइया लोक अदालत इक्कीस सितंबर अउ चौदह दिसंबर के आयोजित होही।
मुख्यमंत्री-इंटरसेप्टर वाहन
मुख्यमंत्री विष्णुदेव साय अउ उप मुख्यमंत्री विजय शर्मा ह छत्तीसगढ़ म सड़क दुर्घटना मनके प्रभावी नियंत्रण म मदद बर पंद्रह नवा इंटरसेप्टर गाड़ी मन ल रईपुर स्थित अपन निवास कार्यालय ले हरा झंडा दिखाके रवाना करीन। वर्तमान म नवा इंटरसेप्टर वाहन के तैनाती रईपुर, बिलासपुर, दुरूग, सरगुजा, कोरबा अउ रायगढ़ समेत पंदह जिला मन म करे जाही। ए वाहन के संचालन बर कर्मचारी मन ल प्रसिक्षण घलो दे गेहे। इंटरसेप्टर गाड़ी मिले ले नियम के उल्लंघन करइया गाड़ी मन ल चिन्हा करके कार्रवाई करे जा सकही।
ए गाड़ी मन म ध्वनि विस्तारक यंत्र अउ तीन सौ साठ डिग्री निगरानी बर सर्विलांस कैमरा घलो हरय। जेखर ले सड़क दुर्घटना के मामला म कानून बेवस्था के स्थिति के अच्छा निगरानी अउ सुगम यातायात प्रबंधन के कार्रवाई घलो करे जा सकही।
केदार कश्यप-प्रभार
नारायणपुर विधायक अउ वन मंत्री केदार कश्यप ल संसदीय कार्य विभाग के अतिरिक्त प्रभार सौंपे गेहे। वर्तमान म श्री कश्यप के तीर वन अउ जलवायु परिवर्तन, जल संसाधन, कौसल विकास अउ सहकारिता विभाग के प्रभार हे।
मुख्यमंत्री विष्णुदेव साय ले उंखर निवास कार्यालय म वन मंत्री केदार कश्यप ह सौजन्य भेंट करीन। मुख्य मंत्री ह श्री कश्यप ल संसदीय कार्यमंत्री के दायित्व मिले म बधई अउ सुभकामना दीन। मुख्यमंत्री ह किहीन कि श्री कश्यप के लंबा संसदीय अनुभव के लाभ विधानसभा म कार्य संचालन म मिलही।
सौर ऊर्जा-परिपत्र
नगरीय प्रशासन अउ विकास विभाग ह राज्य के जम्मो नगर-निगम के आयुक्त अउ नगर पालिका अउ नगर पंचायत के मुख्य नगर पालिका अधिकारी मन ल सौर ऊर्जा ले जुड़े जम्मों तरह के काम छत्तीसगढ़ राज्य अक्षय ऊर्जा विकास अभिकरण-क्रेडा के माध्यम ले कराय के निरदेस दीन हे। विभाग ह परिपत्र जारी करके सौर ऊर्जा ले जुड़े कोनो भी तरह के काम सीधा न कराके राज्य शासन डहार ले नामित नोडल एजेंसी क्रेडा के माध्यम ले कराय बर किहीन हे।
दीपक बैज-पत्रकारवार्ता
प्रदेस कांग्रेस अध्यक्ष दीपक बैज ह आज रईपुर म एक पत्रकारवार्ता म किहीन कि प्रदेस म बिगड़त कानून बेवस्था ल लेके कांग्रेस चौबीस जुलाई के विधानसभा के घेराव करही। ए घेराव म हजारों कांग्रेस कार्यकर्ता सामिल होही। ओमन आरोप लगइन कि भाजपा के सरकार म प्रदेस के महिला अउ आदिवासी सुरक्षित नइ हे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत छत्तीसगढ़ के आने-आने आकांक्षी जिला मन म चलत संपूर्णता अभियान उपर बिसेस कारीकरम प्रसारित करे जाही। ए कारीकरम आकाशवाणी केन्द्र रायपुर डहार ले काली तेरह जुलाई के बिहनिया साढ़े दस बजे ले प्रसारित करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
जंगली मशरूम-मौत
कबीरधाम जिला के ग्राम सोनवाही म जंगली मशरूम खाय ले दू झन ग्रामीण के मउत होगे। मुख्य चिकित्सा अउ स्वास्थ्य अधिकारी डॉक्टर बी.एल.राज ह बतइन कि मृतक परिवार के दू झिन अउ सदस्य मनके तबियत खराब हे, जेमन ल अस्पताल म भर्ती कराय गेहे।
डायरिया
जांजगीर-चांपा जिला के करमन्दा गांव म डायरिया ले एक सियनहिन के मउत होगे हे। उहें, डायरिया ले अब तक चालिस ले जादा मनखे प्रभावित हे। जेमा ले करीबन दस मरीज मन ल जिला अस्पताल अउ छै मरीज मन ल बलौदा के अस्पताल म भर्ती कराय गेहे। स्वास्थ्य विभाग के टीम गांव म सिविर लगाके पीड़ित मनके जांच करत हे।
राष्ट्रीय शिक्षा नीति-लागू
रईपुर के इंदिरा गांधी कृषि विश्वविद्यालय म इही सैक्षणिक सत्र ले नवा राष्ट्रीय शिक्षा नीति दू हजार बीस के आने-आने प्रावधान मन ल लागू करे जाही। नवा प्रावधान के तहत स्नातक पाठ्यक्रम मन ल चार साल के पढ़ाई पूरा नइ कर पाय वाला विद्यार्थी मन ल बीच म पढ़ाई छोड़े म सर्टिफिकेट अउ डिप्लोमा दे जाही। विद्यार्थी ऑनलाइन प्लेटफार्म के माध्यम ले घलो पढ़ाई कर सकही। अब ले सैध्दांतिक पढ़ाई के बजाय प्रायोगिक शिक्षा उपर जादा जोर दे जाही अउ एला रोजगार मूलक बनाय जाही। विश्वविद्यालय के कुलपति डॉक्टर गिरीश चंदेल के अध्यक्षता म आयोजित विद्या परिषद के बइठका म ए निर्णय ले गीस।