बइठका म केंद्रीय मंत्री ह सुझाव दीन कि क्लिन सिटी म रईपुर ल मिले सौ ठन बस के उपयोग नया रईपुर अउ रईपुर के बीच चलाय बर घलो करे जा सकत हे। ओमन ह प्रधानमंत्री आवास योजना, पीएम स्वनिधि, अमृत मिशन, स्वच्छ भारत मिशन, पीएम ई-बस सेवा, स्मार्ट सिटी मिशन अउ राष्ट्रीय सहरी विकास मिसन के काम के घलो समीक्षा करीन।
उहें, मुख्यमंत्री विष्णुदेव साय ह केंद्र सरकार के योजना के जानकारी केंद्रीय मंत्री ल दीन। बइठका म उप मुख्यमंत्री अरूण साव, केंद्रीय आवासन अउ सहरी कार्य राज्य मंत्री तोखन साहू अउ मुख्य सचिव अमिताभ जैन सामिल रिहीन।
मंत्रिमंडल-निर्णय
उहें, नवा रईपुर म आवासहीन आर्थिक रूप ले कमजोर अउ निम्नवर्ग के परिवार ल आवास देवाय बर पंजीयन के तिथि म तीन बछर के बढ़ोत्तरी करे गेहे।
बइठका म वन अधिकार पत्रधारक मनके मौत होय म परिवार वाला मनके नाव म काबिज वन भूमि के हस्तांतरण राजस्व ल वन अभिलेख म दर्ज करे ले जुड़े कार्यवाही बर प्रक्रिया प्रारूप के अनुमोदन करे गीस। उहें, राज्य सरकार के जनकल्याणकारी नीति के सफल काम-काज, सुशासन अउ जन समस्या के निपटारा बर ‘‘सुशासन तथा अभिसरण विभाग‘‘ बनाय गे हवय। एखर अलावा मंत्री मंडल ह अधीक्षण अभियंता ले मुख्य अभियंता के पद म पदोन्नति बर तय करे गे न्यूनतम अवधि पांच बछर म सिरिफ एक घांव एक बछर के छूट दे जाय के फैसला लेगे हवय।
बइठका म सशस्त्र सहायक प्लाटून कमांडर, मेल नर्स, फिमेल नर्स, प्रधानआरक्षक, लैब टेक्नीशियन, फार्मासिस्ट, कम्पाउंडर, ड्रेसर, नर्सिंग सहायक अउ आरक्षक भर्ती प्रक्रिया बछर दू हजार तेईस के तहत छत्तीसगढ़ के स्थानीय निवासी मन ल तय करे गे अधिकतम आयु सीमा म पांच बछर के छूट दे जाय के फैसला करे गीस। बइठका म वर्तमान म प्रचलित सीएसआईडीसी के सबो रेट कांट्रैक्ट ए महिना के आखिरी म निरस्त करे के फैसला करे गेहे।
केंद्रीय वित्त आयोग-छत्तीसगढ़
सोलहवां केंद्रीय वित्त आयोग के अध्यक्ष अरविंद पनगढ़िया के अगुवई म बारह झन सदस्य वाले दल थोरकुन देर बाद रईपुर पहुंचही। ए दल ह मुख्यमंत्री विष्णुदेव साय अउ मंत्री मंडल के सदस्य अउ अधिकारी मन संग राज्य के वित्तीय आवश्यकता, अधोसंरचना विकास अउ आर्थिक प्रगति संघरा आने-आने मुद्दा उपर चर्चा करही। एखर बाद ए दल ह बारह अउ तेरह जुलाई के जगदलपुर दौरा म जाही।
संपूर्णता अभियान
नीति आयोग डहार ले पिछड़ा अउ दूर-दराज के क्षेत्र के विकास म तेजी लाय बर देसभर म आकांक्षी जिला अउ विकासखंड म संपूर्णता अभियान सुरू करे गेहे। इही कड़ी म कांंडागांव जिला के माकड़ी विकासखंड के बागबेड़ा, मगेदा, पीढ़ापाल, बालोंड अउ उरीदगांव म जन-जागरूकता बर स्कूली लइका मन ह रैली निकालिन। माकड़ी विकासखंड म काली ले सबो सड़सठ ग्राम पंचायत म आने-आने विभाग के सिविर लगाय जाही।
एक पेड़ मां के नाम
राज्यपाल विश्वभूषण हरिचंदन ह आज राजभवन म ‘एक पेड़ मां के नाम‘ अभियान म पौधा रोपण करीन। ओमन ह अपन माता स्वर्गीय पद्मावती देवी के सुरता म आम के पौधा लगाइन। ए मउका म राज्यपाल ह अपन संदेस म किहीन कि पौधा रोपण करना सब्बो झन बर जरूरी हे। पूरा विश्व ल पर्यावरण प्रदूषण ले बचाय बर सबो झन ल परयास करना चाही।
उहें, राज्य शासन के जनसंपर्क संचालनालय डहार ले ए अभियान के प्रचार-प्रसार बर सोसल मीडिया म ‘एक पेड़ मां के नाम‘ के प्रोफाइल पिक्चर फ्रेम अभियान सुरू करे गेहे। ए प्रोफाइल पिक्चर म लोगन अपन घर, आंगन अउ खेत म अपन मां संग या मां के सुरता म पौधा लगावत अपन फोटू लगा सकत हे।
खबर के मुताबिक प्रधानमंत्री नरेंद्र मोदी ह पर्यावरण दिवस के मउका म पूरा देस म ‘एक पेड़ मां के नाम‘ अभियान के सुरूआत करीन हे।
भाजपा-कार्यसमिति बैठक-01
रईपुर के पंडित दीनदयाल उपाध्याय ऑडिटोरियम म आज भारतीय जनता पार्टी के प्रदेस कार्यसमिति के बइठका होईस। बइठका म केंद्रीय मंत्री मनोहरलाल खट्टर संघरा राष्ट्रीय सह-संगठन मंत्री शिवप्रकाश, मुख्यमंत्री विष्णुदेव साय , प्रदेस प्रभारी नितिन नबीन, विधानसभा अध्यक्ष डॉक्टर रमन सिंह, भाजपा प्रदेस अध्यक्ष किरण सिंह देव, केंद्रीय राज्यमंत्री तोखन साहू, उप मुख्यमंत्री अरूण साव अउ विजय शर्मा, सांसद बृजमोहन अग्रवाल, मंत्री रामविचार नेताम संघरा बड़े भाजपा नेता अउ कार्यकर्ता मन सामिल होइन।
उद्घाटन सत्र म केंद्रीय मंत्री श्री खट्टर ह किहीन कि भाजपा बर छत्तीसगढ़ ह गोल्डन प्रदेस हे, काबर कि प्रदेस ह पार्टी ह लगातार जीतत हे। लोकसभा चुनाव म भाजपा ह अपन कार्यकर्ता मनके बदौलत बने सफलता हासिल करे हे।
भाजपा कार्यसमिति के समापन सत्र म मुख्यमंत्री विष्णुदेव साय ह किहीन कि हमर सरकार मोदी के गारंटी ल पूरा करत हे। राज्य सरकार ह भ्रष्टाचार के मामला म जीरो टॉलरेंस के नीति ल लेके चलत हे। पहिली सरकार म जउन भी घोटाला होय हे, ओखर उपर कार्रवाई चलत हे। मुख्यमंत्री ह कार्यकर्ता मन ले ‘एक पेड़ मां के नाम‘ अभियान म पौधा लगाय के आह्वान करीन।
श्री साय ह किहीन कि छै महिना के भीतर हमर सरकार ह एक सौ बयालिस ले जादा माओवादी मन ल मार गिराय हे। उहें, कतकोन माओवादी मन ह आत्मसमर्पण घलो करे हे। माओवाद प्रभावित क्षेत्र म बत्तीस सुरक्षा कैंप लगाय गे हवय। अवईया बेरा म उनतीस ठन कैंप अउ लगाय जाही। नियदनेल्लानार योजना म सुरक्षा कैंप के पांच किलोमीटर के दायरा म गांव के विकास करे जाही।
कांग्रेस-बैठक
रईपुर के प्रदेस कांग्रेस कार्यालय राजीव भवन म आज दू ठन बड़े बइठका राखे गीस। पहिली बइठका कांग्रेस के बड़े नेता मन के होईस, जेमा प्रदेस कांग्रेस अध्यक्ष दीपक बैज, नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल, सांसद ज्योत्सना महंत अउ फूलोदेवी नेताम संघरा पदाधिकारी अउ कार्यकर्ता मन सामिल होइन। उहें, दूसर बइठका रईपुर दक्षिण विधानसभा क्षेत्र के नेता मनके होइस, जेमा उप चुनाव के बारे म चर्चा करे गीस।
एखर पहिली काली रईपुर म प्रदेस कांग्रेस अध्यक्ष दीपक बैज के अगुवई म एक ठन बइठका होइस, जेमा विधानसभा सत्र के दौरान उठाय जाने वाला मुद्दा उपर चर्चा करे गीस। संगेसंग बलौदाबाजार घटना ल लेके चोबीस जुलाई ेके विधानसभा के घेराव करे के फैसला करे गीस। बइठका म नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल, सांसद ज्योत्सना महंत अउ फूलोदेवी नेताम संघरा पदाधिकारी अउ कार्यकर्ता मन सामिल होइन।
आरक्षक-ईओडब्ल्यू कार्रवाई
महोदव सट्टा ऐप मामला म बहुत बेरा ले फरार बहुचर्चित आरक्षक सहदेव यादव ल आर्थिक अपराध अन्वेसन ब्यूरो-ईओडब्ल्यू ह राजनांदगांव के सोमनी ले गिरफ्तार करे हे। ईओडब्ल्यू के टीम ह सहदेव यादव ल लेके राजधानी बर रवाना होगे हे।