केन्द्रीय शिक्षा मंत्री धर्मेन्द्र प्रधान ह राज्य अउ केन्द्रसासित प्रदेस मन ले सरल शिक्षा प्रणाली बर मिलके काम करे आह्वान करे हे। श्री प्रधान ह आज नई दिल्ली म राज्य अउ केन्द्रसासित प्रदेस मनके संग स्कूली सिक्षा अउ साक्षरता विभग के समीक्षा बइठका के उद्घाटन सत्र ल संबोधित करीन। ओमन स्कूली सिक्षा के समग्र विकास बर अवइया पांच बछर के प्रारूप म अपन विचार साझा करीन। ओमन किहीन कि प्रधानमंत्री नरेन्द्र मोदी के विकसित भारत के दृष्टिकोण के सिक्षा एक प्रमुख स्तंभ हे।
मुख्यमंत्री स्कूल जतन योजना
प्रदेस म मुख्यमंत्री स्कूल जतन योजना म बछर दू हजार बाईस-तेईस म करे गे स्कूल मरम्मत, जीर्णोद्वार अउ उपरहा कमरा बनाय के मंजूरी के काम के जांच सुरू कर दे गेहे। स्कूल शिक्षा विभाग के सचिव सिद्धार्थ कोमल सिंह परदेशी ह जम्मों कलेक्टर मन ल जांच करके पन्द्रह दिन के भीतर लोक शिक्षण संचालनालय ल जानकारी उपलब्ध कराय के निरदेस देहे। ओमन कलेक्टर मन ले केहे हे कि गड़बड़ी होय म ओखर ले जुड़े लोगन मन उपर कार्रवाई करे जाय।
केन्द्रीय वित्त आयोग-छत्तीसगढ़
सोलहवां केन्द्रीय वित्त आयोग के अध्यक्ष अरविंद पनगढ़िया के अगुवई म बारह सदस्यीय दल काली ले छत्तीसगढ़ के दउरा म रइही। ए दल मुख्यमंत्री विष्णुदेव साय अउ मंत्रिमंडल के सदस्य अउ अधिकारी मनके संग, राज्य के वित्तीय जरूरत, अधोसंरचना विकास अउ आर्थिक प्रगति समेत आने-आने मुद्दा उपर विचार-विमर्स करही। एखर बाद ए दल ह बारह अउ तेरह जुलाई के जगदलपुर जाही।
केन्द्रीय वित्त आयोग के छत्तीसगढ़ प्रवास ल लेके वित्त सचिव मुकेश बंसल ह तैयारी के समीक्षा करीन अउ अधिकारी मन ल जरूरी दिसा-निरदेस दीन।
स्थापना दिवस
‘‘एक भारत-श्रेष्ठ भारत‘‘ कारीकरम के तहत रायपुर स्थित राजभवन म आज बिहार, ओड़िसा, गुजरात, तेलंगाना अउ सिक्किम राज्य के स्थापना दिवस मनाय गीस। कारीकरम म छत्तीसगढ़ म रहवइया गुजराती, बिहारी, उड़िया, तेलगू समाज अउ सिक्किम के लोगन मन भाग लीन। ए मउका म राज्यपाल विश्वभूषण हरिचंदन ह किहीन कि आने-आने राज्य मनके भासा, संस्कृति, परंपरा अउ प्रथा के ज्ञान अउ समझ ले भारत के एकता अउ अखंडता मजबूत होही। ओमन किहीन कि जम्मों राज्य एक-दूसर के संस्कृति ले सिखही अउ भारत ल जादा सक्तिसाली, समृद्ध अउ आत्मनिर्भर बनाय के दिसा म मिलके आगू बाढ़े बर कोसिस करही।
खबर के मुताबिक केन्द्र सरकार ह ‘‘एक भारत-श्रेष्ठ भारत‘‘ कारीकरम के तहत विविधता म एकता के भावना ल बढ़ावा दे बर जम्मों राज्य म एक-दूसर के स्थापना दिवस मनाय के फइसला लेहे।
भाजपा-कार्यसमिति बैठक
नगरीय निकाय चुनाव ल लेके काली दस जुलाई के रईपुर स्थित पंडित दीनदयाल उपाध्याय ऑडिटोरियम म भारतीय जनता पार्टी के प्रदेस कार्यसमिति राखे गेहे। ए कार्यसमिति म केन्द्रीय शहरी कार्य मंत्री मनोहरलाल खट्टर अउ भाजपा के राष्ट्रीय सह-संगठन महामंत्री शिवप्रकाश ह पार्टी पदाधिकारी अउ कार्यकर्ता मनके संग चर्चा करही। बइठका म नगरीय निकाय अउ पंचायत चुनाव ल लेके विचार-विमर्स करे जाही। एमा मंडल अध्यक्ष अउ जिला अउ प्रदेस स्तर के पदाधिकारी सामिल होही। ए कार्यसमिति म रायपुर दक्षिण विधानसभा सीट म उपचुनाव के तैयारी ल लेके घलो चर्चा होही।
आरएसएस-बैठक
राष्ट्रीय स्वयंसेवक संघ-आरएसएस के अखिल भारतीय स्तर के प्रांत-प्रचारक मनके बइठका बारह ले चौदह जुलाई तक रांची म होही। ए बइठका म देसभर के जम्मों प्रांत-प्रचारक सामिल होही। बइठका म संघ के प्रशिक्षण वर्ग के वृतांत अउ समीक्षा, अवइया बछर के योजना के क्रियान्वयन अउ सर संघचालक डॉक्टर मोहन भागवत के प्रवास उपर चर्चा करे जाही। संगेसंग संघ के सताब्दी बछर ल लेके घलो विचार-विमर्स करे जाही।
माओवादी मुठभेड़
कांकेर जिला के छोटेबेठिया थाना क्षेत्र म बिनागुन्डा के जंगल म आज सुरक्षा बल के संग होय मुठभेड़ म एक महिला माओवादी मारे गेहे। माओवादी के सव के संग एक थ्री नॉट थ्री रायफल, तीन सौ पन्द्रह बोर के एक बंदूक समेत भारी मात्रा म हथियार अउ माओवादी जिनीस बरामद करे गेहे। ए अभियान म डीआरजी, बस्तर फाइटर्स अउ बीएसएफ के जवान सामिल रिहीन।
दुर्घटना
राजिम-अभनपुर मुख्य रद्दा म पाछु रतिहा ट्रक अउ पिकअप म टक्कर म पिकअप ड्राईवर के मउकाच म मउत होगे। उहें, एक झिन मनखे गंभीर रूप ले घायल होगे। हादसा के बाद ट्रक ड्राईवर फरार होगे।
उहें, कबीरधाम जिला म तेज रफ्तार डीजल टैंकर के अनते-तनते होके पलटे ले चालक के मउत होगे।
ऐति, बलरामपुर म अंबिकापुर ले उत्तरप्रदेस कोति जावत एक यात्री बस फूलीडूमर घाट के तीर अनते-तनते होके खाई म गिर गे। बताय जावत हे कि बस म करीबन तीस यात्री सवार रिहीस। एमा ले तीन यात्री मन ल मामूली चोट आय हे।
तहसीलदार-नायब तहसीलदार-अवकाश
प्रदेसभर के तहसीलदार अउ नायब तहसीलदार मन अपन सात सूत्रीय मांग ल लेके काली ले तीन दिन तक सामूहिक छुट्टी म रइही। ए संबंध म छत्तीसगढ़ कनिष्ठ प्रशासनिक सेवा संघ के बैनर तले एक प्रतिनिधिमंडल ह राजस्व मंत्री टंकराम वर्मा ल ज्ञापन सौंपे हे। ज्ञापन म सामूहिक छुट्टी म जाय के खबर विभागीय मंत्री ल दे गेहे। उहें, संघ ह चेतावनी देहे कि कहू उंखर मांग म जल्दी विचार नइ करे गीस, त ओमन ह अनिश्चितकालीन हड़ताल म जाही।
एक पेड़ मां के नाम
‘‘एक पेड़ मां के नाम‘‘ महावृक्षारोपण अभियान म छत्तीसगढ़ म वन विभाग डहार ले वन क्षेत्र म तीन करोड़ पच्यासी लाख पौधा लगाय जाही। ए अभियान के सुरूवात ग्यारह जुलाई के संझा चार बजे ले नवा रईपुर म मुख्यमंत्री विष्णुदेव साय अउ वन मंत्री केदार कश्यप करही। मुख्यमंत्री ह ए अभियान म वृक्षारोपण स्थान के नामकरण देवी-देवता के नाम म करे के आह्वान करे हे। ए दउरान जम्मों जिला मन म गांव अउ पंचायत स्तर म कारीकरम राख के जनप्रतिनिधि मनके भागीदारी ले वृक्षारोपण कारीकरम आयोजित करे जाही। अभियान म जम्मों स्कूल, छात्रावास, आंगनबाड़ी केन्द्र, पुलिस चौकी अउ अस्पताल के संगेसंग कतकोन जघा म पौधारोपण करे जाही।
केदार कश्यप-शाला प्रवेश उत्सव
वन मंत्री केदार कश्यप काली रायपुरा स्थित पंडित गिरिजा शंकर मिश्र उच्चतर माध्यमिक विद्यालय म राखे गे जिला स्तरीय शाला प्रवेश उत्सव म सामिल होइन। ए मउका म ओमन नवप्रवेशी लइका मन ल टीका लगाके अउ मिठाई खंवा के साला प्रवेश करईन। ए दउरान ओमन स्कूल ड्रेस, पुस्तक अउ नोनी मन ल सरस्वती साइकिल योजना के तहत साइकिल दीन। ए मउका म श्री कश्यप ह लइका मन डहार ले लगाय गे नवाचार मॉडल प्रदर्सनी के अवलोकन घलो करीन।
अमृतकाल-निबंध प्रतियोगिता
राज्य नीति आयोग, उच्च शिक्षा विभाग अउ स्कूल शिक्षा विभाग डहार ले अमृतकाल : छत्तीसगढ़ विजन दू हजार सैंतालीस के तहत निबंध प्रतियोगिता के आयोजन करे जाही। ‘‘विकसित छत्तीसगढ़, मेरे सपने का खुशहाल छत्तीसगढ़‘‘ बिसय म राखे गे ए प्रतियोगिता के माध्यम ले युवा अउ विद्यार्थी मन ले सुझाव ले जाही। एमा राज्य के जम्मों महाविद्यालय, सासकीय अउ अनुदान प्राप्त अउ निजी विद्यालय मनके कक्षा ग्यारहवीं अउ बारहवीं के विद्यार्थी सामिल हो सकत हे।
अउ अब थोरकुन समाचार सार म –
– केन्द्रीय जल शक्ति मंत्री सी.आर. पाटिल के अध्यक्षता म आज नई दिल्ली म जल जीवन मिशन ल लेके समीक्षा बइठका आयोजित करे गीस। ए बइठका म छत्तीसगढ़ के उप मुख्यमंत्री अउ लोक स्वास्थ्य यांत्रिकी मंत्री अरूण साव घलो सामिल होइन।
– छत्तीसगढ़ कैडर के दू हजार पांच बैच के आईएएस अधिकारी राजेश सुकुमार टोप्पो ल राज्य सरकार ह जल संसाधन विभाग के विशेष सचिव के पद म पदोन्नत करे हे।
– छत्तीसगढ़ राज्य उपभोक्ता विवाद प्रतितोष आयोग के अध्यक्ष न्यायमूर्ति गौतम चौरड़िया ह काली दस जुलाई के बलौदाबाजार म जिला उपभोक्ता विवाद प्रतितोष आयोग के कार्यालय के सुभारंभ करही।
– कोंडागांव जिला के खालेमुरवेंड गांव म नवा बनाय जात नाला के दीवार गिरे ले ओमा दबके दू झिन मजदूर के मउत होगे।
अउ
– आयुष्मान कार्ड बनाय बर कोंडागांव जिला म ग्यारह जुलाई के महाअभियान चलाय जाही। एखर तहत गांव-गांव म बिसेस शिविर लगाय जाही।