मुख्यमंत्री विष्णुदेव साय ह रईपुर म पंचायत सचिव संघ छत्तीसगढ़ डहार ले राखेगे सम्मान समारोह म भाग लीन। ए मउका म मुख्यमंत्री ह घोसना करत किहीन कि प्रदेस पंचायत सचिव संघ डहार ले शासकीयकरण के मांग ल पूरा करे जाही, अउ एखर बर कमेटी बनाय जाही। मुख्यमंत्री के ए घोसना उपर संघ के पदाधिकारी मन ह आभार जताय हे। ए मउका म विधानसभा अध्यक्ष ह घलो कारीकरम म अपन बात राखिस। कारीकरम म उप मुख्यमंत्री पंचायत ग्रामीण विकास विभाग मंत्री विजय शर्मा ह किहीन कि छत्तीसगढ़ म सरकार के बनतेच मोदी के गारंटी ल पूरा करे के काम मुख्यमंत्री के सरकार ह करत हे। ए मउका म महिला अउ बाल विकास मंत्री लक्ष्मी राजवाड़े, दुर्ग सांसद विजय बघेल के संगेसंग कतकोन पदाधिकारी मन आय रिहीन।
शहीद पुलिस सेल-गठन
उप मुख्यमंत्री विजय शर्मा ह राज्य के पुलिस कर्मी अउ उंखर परिवार मनके समस्या के निपटारा बर सहीद पुलिस सेल बनाय के निरदेस जारी करे हे। एखर उद्देस्य सहीद पुलिस कर्मी मनके परिवार मन ल जरूरी मदद देवाना हे। उप मुख्यमंत्री ह बतइन कि हरेक रेंज पुलिस महानिरीक्षक ऑफिस म सहीद पुलिस सेल के गठन करे जाही, जेखर अध्यक्ष संभाग के पुलिस महानिरीक्षक होही, त उहें, अतिरिक्त पुलिस अधीक्षक अउ पुलिस महानिरीक्षक डहार ले नामांकित उप पुलिस अधीक्षक अउ निरीक्षक स्तर के अधिकारी मन ह एखर सदस्य होही। सहीद पुलिस सेल के समस्या मन के निपटारा बर हरेक महिना के दूसर बुधवार के पुलिस मुख्यालय स्तर म बइठका होही।
जानबा के मुताबिक थोरिक दिन पहिली सहीद पुलिस कर्मी मनके परिवार मन ह अपन समस्या ल लेके उप मुख्यमंत्री अउ गृह मंत्री विजय शर्मा ले मिले रिहीन।
उप मुख्यमंत्री-लोकार्पण
उप मुख्यमंत्री अरूण साव ह आज बिलासपुर जिला के बेलतरा विधानसभा क्षेत्र म चौदह करोड़ तिहत्तर लाख रूपिया के चौरान्वे ठिन विकास काम के सिलान्यास अउ भूमि भूजन करीन। कारीकरम के अध्यक्षता विधायक सुशांक शुक्ला करीन। ए जम्मो विकास काम ल पंद्रहवां वित्त आयोग, अधोसंरचना मद अउ निकाय मद के तहत मंजूर करे गेहे। ए मउका म उप मुख्यमंत्री श्री साव के संगेसंग विधायक ह ‘एक पेड़ मां के नाम‘ अभियान के तहत खेल परिसर म नीम के पौधा लगाइन।
त, ऐति उप मुख्यमंत्री विजय शर्मा ह आज अपन कबीरधाम दउरा म बोड़ला म करीबन अड़तालिस लाख रूपिया के लागत ले बने कस्तूरबा गांधी बालिका आवासीय विद्यालय बर छै ठिन उपराहा कक्ष भवन के लोकार्पण करीन।
सुप्रीम कोर्ट-नीट सुनवाई
उच्चतम न्यायालय ह राष्ट्रीय पात्रता सह-प्रवेश परीक्षा-नीट यूजी ले जुड़े कतकोन याचिका उपर आज सुनवाई करीन। जेमा नीट- दू हजार चौबीस परीक्षा म गड़बड़ी के आरोप के संगेसंग एक घांव फेर पूरा परीक्षा करवाय के निरदेस देके मांग वाले याचिका घलो सामिल हे। याचिकाकर्ता कोति के वकील ह न्यायालय ले किहीन कि ए परीक्षा पेपर लीक, ओएमआर सीट म गड़बड़ी अउ नकल के सेति रद्द कर दे जाना चाही। जुवाब म न्यायालय ह किहीन कि परीक्षा ल रद्द करना आखिरी उपाय होना चाही।
मुख्य न्यायाधीश डी.वाई.चंद्रचूड़, न्यायमूर्ति जे.बी. पारदीवाला अउ न्यायमूर्ति मनोज मिश्रा के पीठ ह कुल अड़तिस ठिन याचिका मन उपर सुनवई करत हे।
एखर पहिली, शीर्ष अदालत के आगू दायर एक ठिन हलफनामा म केंद्र अउ राष्टी्रय परीक्षा एजेंसी, एनटीए ले केहे रिहीन कि परीक्षा म गड़बड़ी के कोनो भी सबूत नइ मिले के सेति परीक्षा दूबारा करवाय के जरूरत नइ हे। दुबारा परीक्षा करवाय ले लाखो उम्मीदवार परभावित होही।
राष्ट्रीय परीक्षा एजेंसी सरकारी अउ प्राइवेट संस्थान मन बर देसभर म नीट यूजी के परीक्षा के आयोजन एमबीबीएस, बीडीएस, आयुष अउ आने जुड़े पाठ्यक्रम बर करथे।
सुप्रीम कोर्ट-महिला अवकाश
सर्वोच्च न्यायालय ह केंद्र ल निरदेस देहे कि ओमन राज्य अउ आने हितधारक मनके संग सलाह करके महिला कर्मचारी मन बर मासिक धर्म अवकास उपर एक ठिन मॉडल नीति तियार करे।
मुख्य न्यायाधीश डी.वाई. चंद्रूचूड़, न्यायमूर्ति जे.बी.पारदीवाला अउ न्यायमूर्ति मनोज मिश्रा के पीठ ह आज मासिक धर्म अवकास नीति के मांग करइया जनहित याचिका के निपटारा कर दीन। महिला अउ बाल विकास मंत्रालय ल एखर बर एक ठिन नीति तियार करके हितधारक मनके संग बइठका करे के निरदेस दीन।
प्रयास विद्यालय-परिणाम
आदिम जाति, अनुसूचित जाति अउ अन्य पिछड़ा वर्ग के संगेसंग अल्पसंख्यक विकास विभाग डहार ले राखेगे प्रयास आवासीय विद्यालय अउ एकलव्य आदर्स आवासीय विद्यालय के प्रवेस परीक्षा के परीक्षा परिणाम घोसित कर दे गेहे। अभ्यर्थी मन एकलव्य डॉट सीजी डॉट एनआईसी डॉट इन म अपन रिजल्ट देख सकथे। रिजल्ट म कोनो प्रकार के गलती होही, त बारह जुलाई तक अर्जी विभाग के ई-मेल म सुधार करवाय जा सकथे।
कांग्रेस-धरना/प्रदर्शन
छत्तीसगढ़ प्रदेस कांग्रेस कमेटी के अध्यक्ष दीपक बैज के अगुवई म आज कांग्रेस ह बिजली के भाव म बढ़ोत्तरी ल लेके प्रदेस म धरना प्रदर्सन करीन। राजधानी रईपुर के राजीव गांधी चौक म पूर्व मुख्यमंत्री भूपेश बघेल, प्रभारी महामंत्री मलकीत गैंदू, रईपुर महापौर एजाज ढेबर, युवा कांग्रेस के प्रदेस अध्यक्ष आकाश शर्मा, एनएसयूआई के प्रदेस अध्यक्ष नीरज पांण्डेय के संगेसंग बड़ संख्या म प्रदेस पदाधिकारी मन ह बूढ़ापारा बिजली ऑफिस तक पैदल मार्च करीन अउ विद्युत विभाग के बड़का अधिकारी मन ल ज्ञापन दीन।
जानबा के मुताबिक राज्य सरकार ह पाछू दिन बिजली के भाव म आठ प्रतिसत के बढ़ोत्तरी करे हे।
रानू साहू-जमानत
छत्तीसगढ़ म कथित कोयला घोटाला मामला म गिरफ्तार आईएएस अधिकारी रानू साहू ल उच्चतम न्यायालय ह आज अंतरिम जमानत दे दीन। छत्तीसगढ़ हाईकोर्ट ले जमानत याचिका खारिज होय के बाद रानू साहू ह सुप्रीम कोर्ट म जमानत बर याचिका लगाय रिहीन। आज सुनवई के बाद कोर्ट ह ओमन ल राहत देहे। ऐति, एंटी करप्सन ब्यूरो एसीबी अउ आर्थिक अपराध अन्वेसन ब्यूरो ईओडब्ल्यू ह रानू साहू, समीर बिश्नोई अउ राज्य प्रशासनिक सेवा के अधिकारी सौम्या चौरसिया के खिलाफ आज आय ले जादा संपत्ति के मुकदमा घलो दरज करे हे। जेखर सेति सुप्रीम कोर्ट ले अंतरिम जमानत मिले के बाद घलो रानू साहू ह जेल ले रिहा नइ होय पाय हे। एखर पहिली एसीबी ह कोयला घोटाला मामला म घलो रानू साहू ल आरोपी बनाय हे।
जानबा के मुताबिक ईडी ह रानू साहू ल बाईस जुलाई दू हजार तेईस के गिरफ्तार करे रिहीन। एखर पहिली रायगढ़ कलेक्टर रहिते ईडी ह उंखर रायगढ़ स्थित बंगला के संगेसंग आने-आने ठिकाना म छापा मारे रिहीन।
धान खरीदी-गिरफ्तार
बलरामपुर जिला के भवरमाल धान खरीदी केंद्र म पाछू खरीफ बछर म ससत्तर लाख रूपिया के गबन के मामला म पुलिस ह चार झिन आरोपी मन ल गिरफ्तार करे हे।
जानबा के मुताबिक खरीफ बछर दू हजार तेईस-चौबीस म समर्थन मूल्य म धान बिसाय के बाद हिसाब-किताब के दौरान ए मामला आगू आइस, जेखर बाद फूड इंस्पेक्टर ह एखर सिकायत रामानुजगंज थाना म दरज कराय रिहीन। जेखर उपर पुलिस ह भवरमाल धान खरीदी केंद्र के ग्यारह झिन लोगन मनके खिलाफ मामला दरज करे रिहीन। पुलिस ह ए मामला म चार झिन आरोपी मन ल गिरफ्तार कर लेहे अउ भागे आरोपी मनके खोजबीन करत हे।
रेल महाप्रबंधक-दौरा
दक्षिण पूर्व मध्य रेल के महाप्रबंधक नीनु इटियेरा ह काली रईपुर रेल मंडल के अभनपुर, सीबीडी अउ मंदिर हसौद स्टेसन के निरीक्षण करीन। ए मउका म ओमन किहीन कि केंद्री ले अभनपुर के बीच इंहा के पूरा काम होय के बाद रेल चलाय जाही। निरीक्षण के मउका म रेल प्रबंधक संजीव कुमार, वरिष्ठ मंडल वाणिज्य प्रबंधक अवधेश कुमार त्रिवेदी के संगेसंग रईपुर रेल मंडल के बड़का अधिकारी अउ पर्यवेक्षक मन घलो आय रिहीन।
अउ अब मौसम के हाल…
प्रदेस म काली कतकोन जघा म गरज-चमक के संग हल्का ले मध्यम बरसा होय के संभावना हे। त उहे, एक-दू जघा म भारी बरसा हो सकथे। मौमस विभाग के मुताबिक एक ठिन द्रोणिका जैसलमेर, रायसेन, मण्डला, रईपुर, कलिंगपट्टनम अउ ओखर बाद मध्य बंगाल के खाड़ी तक फैले हे अउ संगेसंग एक ठिन उपरी हवा के चक्रीय चक्रवाती घेरा पश्चिम मध्य बंगाल के खाड़ी अउ ओखर ले लगे दक्षिण तटीय आंध्र प्रदेस के उपर बने हे। जेखर असर ले दक्षिण छत्तीसगढ़ के कोनो-कोनो जघा म भारी बरसा होय के चेतावनी दे गेहे।