मुख्यमंत्री विष्णुदेव साय आज रायपुर के कृषि विश्वविद्यालय म आयोजित प्रदेस स्तरीय कृषि सहकार सम्मेलन अउ सम्मान समारोह म सामिल होइन। ए मउका ओमन नमो ड्रोन दीदी मन ले भेंट मुलाकात करीन अउ ड्रोन के प्रदर्सन ल घलो देखीन। समारोह म कृषि मंत्री रामविचार नेताम अउ रायपुर सांसद बृजमोहन अग्रवाल मौजूद रिहीन।
उहें, मुख्यमंत्री ह आज रायपुर के इंडोर स्टेडियम म प्रदेस पंचायत सचिव संघ डहार ले आयोजित सम्मान समारोह म घलो सामिल होइन। ए मउका विधानसभा अध्यक्ष डॉक्टर रमन सिंह, उप मुख्यमंत्री विजय शर्मा, महिला अउ बाल विकास मंत्री लक्ष्मी राजवाड़े अउ दुरूग सांसद विजय बघेल मौजूद रिहीन।
संपूर्णता अभियान
नीति आयोग डहार ले पिछड़ा अउ दूरदराज इलाका के विकास म तेजी लाने बर देसभर के आकांक्षी जिला अउ विकासखंड म संपूर्णता अभियान सुरू करे गेहे। इही कड़ी म नारायणपुर जिला के कोहकामेटा गांव म पंचायत स्तर म संपूर्णता अभियान सुरू करे गीस। अभियान के तहत नारायणपुर के दस अउ ओरछा के चार विकासखंड म सिविर लगाय जाही, जेमा स्वास्थ्य जांच, पोषण के जानकारी, खेती-किसानी तकनीक के प्रदर्सन, महिला अउ बाल विकास बर योजना अउ आजीविका सुधार के जानकारी सामिल हे।
उहें, कोरबा अउ पोड़ी-उपरोड़ा म घलो काली संपूर्णता अभियान के सुरूवात करे गीस। ए मउका म रामपुर विधायक फूलसिंह राठिया ह किहीन कि आकांक्षी ब्लॉक म संपूर्णता अभियान के सबो मानक मन ल सहभागिता ले पूरा करे जाही। ओमन किहीन कि सरकार के जनकल्याणकारी योजना मनके लाभ सबो लोगन ल मिलना चाही। दूनों आकांक्षी ब्लॉक म आयोजित कार्यक्रम म स्वास्थ्य सिविर अउ पोषण वाटिका के प्रदर्सनी लगाय गेहे। एखरे संगे हितग्राही मन ल चेक, माटी परीक्षण कारड जइसन विभाग के योजना मनके लाभ दे गीस।
सर्वोच्च न्यायालय-नीट यूजी
सर्वोच्च न्यायालय म नीट-यूजी ले जुड़े कतकोन याचिका उपर काली सुनवाई होही। एमा नवा सिरा ले परीक्षा कराय के मांग के याचिका घलो सामिल हे। मुख्य न्यायाधीश डी.वाई. चंद्रचूड़, न्यायमूर्ति जे.बी. पारदीवाला अउ न्यायमूर्ति मनोज मिश्रा के पीठ के आगू छब्बीस याचिका सुनवाई बर आय हे।
अभ्यर्थी मन अपन याचिका म नीट परीक्षा म कथित अनियमितता के एक ठन अलग अउ स्वतंत्र जांच के मांग करीन हे। बाढ़त नीट परीक्षा विवाद के बीच केन्द्र डहार ले सर्वोच्च न्यायालय म हलफनामा दाखिल करे गेहे, जेमा केन्द्र ह किहीस कि परीक्षा म गड़बड़ी के कोनों घलो सबूत के अभाव म नीट परीक्षा ल दुबारा आयोजित करे के कोनों जरूरत नइ हे। केन्द्र ह ए घलो तर्क देहे कि नवा परीक्षा ले लाखों उम्मीदवार मनके जीवन म प्रतिकूल प्रभाव पड़ही।
एफएसएसएआई-खाद्य पदार्थ
भारतीय खाद्य सुरक्षा अउ मानक प्राधिकरण ह पाकिटबंद खाद्य पदार्थ उपर स्पस्ट जानकारी लिखे के मंजूरी दे देहे, जेमा सक्कर, नमक अउ आने जिनीस सामिल हे। ए निरनय खाद्य प्राधिकरण के बइठका म ले गीस।
स्वास्थ्य मंत्रालय ह किहीन कि ए फइसला के उद्देश्य उपभोक्ता मन ल पोषटई जिनीस के सही जानकारी देना हे, ताकि लोगन अपन सही खानपान बर ध्यान देवय। मंत्रालय ह यहू किहीस कि अधिसूचना के मसौदा ल सार्वजनिक करे जाही, जेखर ले सुझाव अउ आपत्ति मिल सकय। खाद्य पदार्थ म सामिल जिनीस के जानकारी सार्वजनिक करे ले गैर-संचारी रोग उपर रोक लगाय म मदद अउ लोक स्वास्थ्य ल बढ़ावा मिलही।
बिजली दर-कांग्रेस विरोध
छत्तीसगढ़ राज्य विद्युत विनियामक आयोग डहार ले बिजली दर म करे गे बढ़ोतरी उपर प्रदेस कांग्रेस ह विरोध जतइस। प्रदेस कांग्रेस अध्यक्ष दीपक बैज ह किहीन कि बिजली दर म आठ फीसदी के बढ़ोतरी राज्य सरकार ल वापस लेना चाही। आम मनखे बिजली के दाम बाढ़े ले हलाकान हे। पाछु छह महीना म बिजली सरप्लस वाला छत्तीसगढ़ राज्य बिजली कटौती के केन्द्र बन गेहे। प्रदेस के कतकोन जिला म रातभर बिजली कटौती होवत हे, जेखर ले आम लोगन के संगेसंग किसान घलो हलाकान हे, जउन बिजली कटौती के सेती अपन खेत म बेरा ले पानी नइ दे पावत हें।
माओवादी-गिरफ्तार
सुकमा जिला के जगदरगुंडा थाना इलाका ले सुरक्षाबल ह पांच झन माओवादी मन ल गिरफ्तार करे हे। इंखर तीर ले हथियार, बारूद, टिफिन बम, अउ दवई समेत अब्बड़ अकन माओवादी जिनीस बरामद करे गेहे।
बस्तर रेंज के पुलिस महानिरीक्षक सुंदरराज पी. ह बतईन कि जगरगुंडा थाना इलाका म सिंगावरम मोड़ के तीर जिला पुलिस बल, डीआरजी अउ बस्तर फाइटर के संयुक्त टीम ह कार्रवाई करत पांचों झिन माओवादी मन ल गिरफ्तार करीस, जेखर बाद गिरफ्तार माओवादी मन ल कोर्ट म पेस करे गीस।
इस्पात कंपनी-मजदूर मौत
दुरूग जिला के हथखोज औद्योगिक क्षेत्र के कंपनी म एक हादसा होगे, जेमा एक झिन मजदूर के मउत होगीस। सूचना मिलतेच पुरानी भिलाई पुलिस मउका म पहुंचीस अउ जांच म जुट गेहे। ए घटना के बाद मृतक के परिजन मन कंपनी प्रबंधन ले पचास लाख रूपिया के मुआवजा के मांग करीन। कंपनी के संचालक ह मृतक के दूनों लइका के पढ़ई अउ स्वास्थ्य के खरचा उठाय के भरोसा परिजन ल दीस हे। उहें, उंखर गोसइन ल नौकरी अउ लइका मनके नाव म तीन-तीन लाख रूपिया के एफ.डी. करे घलो गोठ किहीस। फेर, कंपनी के प्रस्ताव उपर परिजन अउ प्रबंधन के बीच सहमति नइ बनीस।
दुर्घटना
जांजगीर-चांपा जिला के सारागांव म घलो होय सड़क हादसा म स्कूटी सवार एक युवक के मउत होगीस। मृतक युवक यूक्रेन म एमबीबीएस के पढ़ई करत रिहीस।
ऐति, कोरबा जिला के हरदीबाजार थाना क्षेत्र म कार के टक्कर ले साइकिल सवार एक झन ग्रामीण के मउत होगे।
वन महोत्सव-पौधारोपण
कोंडागांव जिला के कोपाबेड़ा म वन महोत्सव के आयोजन करे गीस, जेमा विधायक लता उसेंडी सामिल होइन। ए मउका म नीम, चिरई जाम, आमा, सरई, अमली अउ जाम के पौधा रोपे गीस। कार्यक्रम म विधायक लता उसेंडी ह किहीन कि ‘‘एक पेड़ मां के नाम‘‘ ले चलइया अभियान के तहत हम सब एक पौधा जरूर लगावन अउ ओखर देखभाल करन।
उहें, गौरेला-पेंड्रा-मरवाही जिला म घलो भारत स्काउट-गाईड जिला संघ अउ वनमंडल डहार ले पौधारोपण करे गीस।
रथयात्रा
आज देस के आने-आने जघा भगवान जगन्नाथ के रथयात्रा निकाले जावत हे। छत्तीसगढ़ म घलो रथयात्रा के परब उछाह के संग मनाय जावत हे। आज बिहनिया ले ही मंदिर मन म श्रद्धालु मनके भीड़ उमड़िस अउ दिनभर पूजापाठ के दउर चलीस। ए मउका म कतकोन जघा भगवान जगन्नाथ, बलभद्र अउ देवी सुभद्रा ल रथ म सवार करके यात्रा निकाले गीस।
ए मउका म राज्यपाल विश्वभूषण हरिचंदन अउ मुख्यमंत्री विष्णुदेव साय आज रायपुर के गायत्री नगर जगन्नाथ मंदिर म आयोजित रथयात्रा महोत्सव म सामिल होइन। ओमन भगवान जगन्नाथ के पूजापाठ करके देस अउ प्रदेसवासी मनके सुख-समृद्धि के कामना करीन। ए मउका म ओमन भगवान के पहिली सेवक के रूप म छेरा-पहरा के रसम घलो निभाइन। ए मउका म कृषि मंत्री रामविचार नेताम, सांसद बृजमोहन अग्रवाल अउ विधायक पुरंदर मिश्रा मौजूद रिहीन।
अउ अब मौसम के हाल..
काली प्रदेस के कतकोन जघा म हल्का ले मध्यम बरसा अउ गरज-चमक के संग छींटा पड़े के संभावना हे। उहें, एक-दू जघा म अंधड़ अउ गाज गिरे के चेतावनी दे गेहे। संगे दक्षिण छत्तीसगढ़ म भारी बरसा हो सकथे।