संसद के बजट सत्र ए महिना के बाईस तारीख ले सुरू होही। संसदीय कार्यमंत्री किरेण रिजिजू ह ए ठिन सोसल मीडिया पोस्ट म बतइन कि बजट सत्र बारह अगस्त तक चलही। ओमन किहीन कि केंद्रीय बजट दू हजार चौबीस-पचीस ल लोकसभा म तेईस जुलाई के पेस करे जाही। श्री रिजिजू ह किहीन कि राष्ट्रपति द्रौपदी मुर्मू ह बजट सत्र बर दोनो सदन के सत्र बलाय के केंद्र सरकार के सिफारिस वाले प्रस्ताव के अनुमोदन कर देहे।
राजस्व पखवाड़ा
लंबित राजस्व मामला ल निपटाय बर आज ले राज्य के जम्मो जिला म ‘‘राजस्व पखवाड़ा‘‘ सुरू होगे हे। राजधानी रईपुर म पत्रकार मन ले गोठबात करत राजस्व अउ आपदा प्रबंधन मंत्री टंकराम वर्मा ह किहीन कि राजस्व पखवाड़ा के समापन बीस जुलाई के होही। ‘‘राजस्व पखवाड़ा‘‘ के दौरान सीमांकन, नामांतरण, बंटवारा, त्रुटि सुधार अउ आने राजस्व प्रकरण मन ले संबंधित माढ़े मामला के निपटारा करे जाही। राजस्व मंत्री वर्मा ह किहीन कि राजस्व पखवाड़ा के दौरान प्रोग्रामर मनके ड्यूटी लगाय गेहे। प्रधानमंत्री गति शक्ति योजना के चलत राजस्व गांव मन के पटवारी-नक्सा जियोरेफ्रेंसिंग के माध्यम ले तियार करे जात हे। ओमन किहीन कि चिप्स ल एखर बर नोडल एजेंसी नियुक्त करे गेहे।
ओमन किहीन कि राजस्व मामला के पंजीयन अउ पेसी के तारीख अपडेट नइ करइया अधिकारी मन उपर कड़ा कार्रवाई करे जाही।
संपूर्णता अभियान
नीति आयोग डहार ले अपेक्षाकृत पिछड़ा अउ दूरिहा जघा मन के तेजी ले विकास तय राखे बर देसभर म आकांक्षी जिला अउ विकासखंड म ए बेरा संपूर्णता अभियान सुरू करे गेहे। इही कड़ी म बस्तर जिला के आकांक्षी विकासखंड तोकापाल म काली जिला स्तरीय संपूर्णता अभियान राखे गे रिहीस। ए कारीकरम म बोलत माई पहूना विधायक विनायक गोयल ह किहीन कि सरकार के जनकल्याणकारी योजना मनके फायदा सबो नागरिक मन ल लेना चाही, माईलोगिन मन बर चलत योजना मन ले आर्थिक मजबूती अउ स्वास्थ्य सुविधा ले एक ठिन सुघ्घर स्वास्थ्य पाय जा सकत हे। ए मउका म कारीकरम जघा म स्वास्थ्य सिविर लगाय गीस, जिहां कई ठिन बीमारी के जांच करके दवई अउ चश्मा घलो बांटे गीस।
उहें, कुपोषण ले जुड़े हल्बी भाषा म नुक्कड़ नाटक देखाय गीस। ए दौरान क्षेत्र के हितग्राही मन ल हेल्थ कार्ड, आयुष्मान कार्ड, स्व-सहायता समूह ल प्रोत्साहन रासि, किसान मन ल बीजा अउ सिंचई उपकरण घलो बांटे गीस।
ओति, बलरामपुर जिला म कृषि मंत्री रामविचार नेताम ह शंकरगढ़ विकासखंड म आज संपूर्णता अभियान के सुभारंभ करीन। ए मउका म ओमन किहीन कि जब हमर गांव आगू बाढ़ही त, हमर ब्लॉक अउ जिला घलो विकसित होही। ए अभियान के माध्यम ले सबो विभाग के योजना मन ल लोगन तक पठोय के परयास करे जाही। उहें, कारीकरम म सरगुजा सांसद चिंतामणि महाराज घलो मौजूदी रिहीन।
इही बीच, कोंडागांव विधायक लता उसेंडी ह माकड़ी म विकासखंड स्तरीय संपूर्णता अभियान के सुभारंभर करीन। ए मउका म ओमन संपूर्णता प्रचार अभियान ल हरा झंडी दिखाके रवाना करीन। कारीकरम म ओमन किसान मन ल मृदा स्वास्थ्य कार्ड घलो बांटिन। ए दौरान पढ़इया लइका मन रंगारंग सांस्कृतिक कारीकरम प्रस्तुत करीन। ए मउका म स्वास्थ्य अउ पोषण क्षेत्र म सुघ्घर काम करइया अउ राष्ट्रीय ग्रामीण आजीविका मिसन के उत्कृष्ट सदस्य मन ल सम्मानित घलो करे गीस।
दीक्षांत समारोह
बिलासपुर के पंडित सुन्दरलाल शर्मा मुक्त विश्वविद्यालय के छटवां छीक्षांत समारोह म राज्यपाल विश्वभूषण हरिचंदन अउ मुख्यमंत्री विष्णुदेव साय सामिल होइन। ए दीक्षांत समारोह म कई ठिन सत्र के परीक्षा मन म पढ़इया मन ल डिग्री अउ गोल्ड मेडल दे गीस। ए मउका म रामप्रताप सिंह अउ सुरभा देसपांडेय ल विद्या वाचस्पति के मानक उपाधि दे गीस। ए मउका म राज्यपाल ह किहीन कि ए विश्व विद्यालय ह पंडित सुन्दरलाल शर्मा के सपना ल गढ़े म बड़का भूमिका निभावत हे।
उहें, मुख्यमंत्री विष्णुदेव साय ह विश्व विद्यालय डहार ले सुरू करे गे छत्तीसगढ़ी पाठ्यक्रम ल संहराइन। संगे ओमन लोगन मन ले ‘एक पेड़ मां के नाम‘ ए अभियान ले जुड़े के अपील करीन। केंद्रीय राज्यमंत्री तोखन सहू अउ उप मुख्यमंत्री अरूण साव ह घलो दीक्षांत समारोह ल संबोधित करीन।
बीजेपी-प्रभारी
भारतीय जनता पार्टी के राष्ट्रीय अध्यक्ष जे.पी. नड्डा ह छत्तीसगढ़ समेत चौबीस ठिन राज्य मनके प्रभारी अउ सह प्रभारी मनके नवा लिस्ट निकाल देहे, जेखर मुताबिक बिहार के कैबिनेट मंत्री नितिन नबीन ल एक घांव फेर छत्तीसगढ़ के प्रभारी बनाय गेहे। ओमन छत्तीसगढ़ प्रदेस भाजपा के चुनाव प्रभारी घलो रिहीन। इही तरह भाजपा के राष्ट्रीय उपाध्यक्ष अउ विधायक लता उसेंडी ल ओडिसा प्रदेस भाजपा के सहप्रभारी बनाय गेहे।
एसीबी-गिरफ्तार
एंटी करप्शन ब्यूरो-एसीबी के टीम ह रईपुर के महिला थाना प्रभारी अउ धमतरी तहसील कार्यालय म पदस्थ नायब तहसीलदार ल लूचपत याने रिस्वत लेके आरोप म गिरफ्तार करे हे। अधिकारी मन ह बतइन कि महिला थाना प्रभारी उपर आरोप हे कि ओह एफआईआर दर्ज करे के नांव म एक झिन माईलोगिन ले पैंतीस हजार रूपिया के लूचपत बर म करे रिहीस, अउ जब महिला थाना म आरोपी थाना प्रभारी ल लूचपत के रूप म बीस हजार रूपिया देत रिहीस। तभे एसीबी के टीम ह ओला पकड़िस।
उहें, धमतरी कार्यालय तहसील कार्यालय म पदस्थ नायब तहसीलदार उपर आरोप हे कि ओहर भुईया के मलिकाना हक देवाय के नाम उपर एक झिन मनखे ले एक लाख रूपिया के मांग करे रिहीस। एसीबी के दल ह नायब तहसीलदार ल लूचपत के रकम लेवत मउका ले गिरफ्तार करे हे। ए दूनों मामला म आरोपी मन के खिलाफ भ्रष्टाचार निवारण अधिनियम के तहत कार्रवाई करे गेहे।
श्यामा प्रसाद मुखर्जी-जयंती
भारतीय जनसंघ के संस्थापक डॉक्टर श्यामा प्रसाद मुखर्जी के आज जयंती हरय। प्रधानमंत्री नरेंद्र मोदी अउ गृहमंत्री अमित शाह, डॉक्टर श्यामा प्रसाद मुखर्जी के जयंती मउका म उनला श्रध्दांजलि दीन हे। ए ठिन सोसल मीडिया पोस्ट म प्रधानमंत्री ह किहीन कि डॉक्टर श्यामा प्रसाद मुखर्जी ह मजबूत राष्ट्रवादी बिचार ले भारत के गौरव बढ़ाय हे।
उहें, छत्तीसगढ़ के मुख्यमंत्री विष्णुदेव साय ह घलो राष्ट्र के अखंडता अउ समाज के उन्नति बर आजीवन काम करइया महान चिंतक डॉक्टर श्यामा प्रसाद के जयंती बेरा उनला सुरता करत माथ नवाइन।
ऐति, भाजपा जिला कार्यालय एकात्म परिसर म एक ठिन कारीकरम राखके डॉक्टर मुखर्जी ल श्रध्दांजलि दे गीस। ए मउका म सांसद बृजमोहन अग्रवाल, विधायक पुरंदर मिश्रा समेत आने बड़का नेता घलो मौजूद रिहीन।
उहें, विधानसभा परिसर के सेंट्रल हाल म सचिव दिनेश शर्मा ह डॉक्टर श्यामा प्रसाद मुखर्जी के फोटू उपर श्रध्दा सुमन चढ़ाइन।
नीट-परीक्षा
एनटीए डहार ले नीट यूजी परीक्षा म भाग लेवइया पढ़ईया लइका मन के एडमिसन बर आज ले सुरू होवइया काउसिलिंग ल स्थगित कर दे गेहे। एखर पहिली सुप्रीम कोर्ट ह दायर याचिका उपर काउंसिलिंग म रोक लगाय ले मना कर दे रिहीस, फेर एमसीसी ह एला लेके कोनो भी शेड्यूल जारी नइ करे रिहीस। एखर संगे याचिकाकर्ता मन डहार ले प्रक्रिया ल दू दिन बर रोके के आग्रह करे गे रिहीस। काबर कि शीर्ष अदालत ह आठ जुलाई के नीट-यूजी ले जुड़े मामला के सुनवाई करही। एनटीए काउंसिलिंग के नवा तारीख आठ जुलाई के बाद घोसित हो सकत हे।
इही बीच, स्नातकोत्तर पीजी चिकित्सा पाठ्यक्रम म दाखिला बर राष्ट्रीय पात्रता प्रवेस परीक्षा-नीट ग्यारह अगस्त के दू पारी म ले जाही। एखर बर राष्ट्रीय आयुर्विज्ञान परीक्षा बोर्ड ह संसोधित टाइम टेबल जारी करे हे।