जांजगीर-चांपा अउ कोरबा म आज होय दू अलग-अलग हादसा म नौ मनखे मन के मउत होगे।
पहिली घटना जांजगीर-चांपा जिला म होइस, जिहां कुंआ के सफाई के दौरान पांच मनखे के मौत होगे। मृतक मन म एके परिवार के तीन सदस्य सामिल हरय। मिले जानकारी अनुसार जिला के बिर्रा क्षेत्र के किकिरदा गांव म बारिस अउ तेज हवा चले के सेति लकड़ी के छप्पर कुंआ के अंदर गिर गे रिहीस, जेला निकाले बर गांव के एक आदमी कुंआ के अंदर गीस, जउन बहुत देर तक नइ लहुटिस। एखर बाद एक-एक करके चार लोगन मन अउ कुंआ म उतरीन अउ नइ लहुटे सकिन। आसंका बताय जात हे कि कई दिन तक बंद रेहे के सेति कुंआ म जहरीला गैस निकले लगिस, जेखर चपेट म आय ले ए पांचो मनखे के मउत होगे। पुलिस ए मामला के जांच करत हे।
उहें, कोरबा जिला के ग्राम जुराली के डिपरा पारा म कुंआ म गिरे ग्रामीण ल बचाय के परयास म एके परिवार के चार मनखे मनके मौत होगे। बताय जात हे कि कुंआ म एक ग्रामीण के गिरे के बाद ओला बचाय बर ओखर बेटी घलो कुंआ म कूद गीस। एखर बाद परिवार के ही, दू झन दूसर मनखे मन घलो कुंआ म नीचे उतरीन फेर एक के बाद एक जम्मों झन के मौत होगे।
मुख्यमंत्री विष्णुदेव साय ह ए दूनों घटना उपर शोक जताय हे। मुख्यमंत्री ह जांजगीर-चांपा म मृतक के परिजन मन ल पांच-पांच लाख रूपिया अउ कोरबा म होय हादसा म मारेगे मृतक के परिजन मन ल चार-चार लाख रूपिया के आर्थिक सहायता देके घोसना करे हे। ओमन किहीन कि राज्य सरकार पीड़ित परिजन के हर संभव मदद बर तियार हे।
‘संपूर्णता अभियान‘
नीति आयोग डहार ले देसभर के आकांक्षी जिला अउ ब्लॉक मन म ए दिन ‘संपूर्णता अभियान‘ चलाय जात हे। इही कड़ी म केंद्रीय आवास अउ सहरी कार्य राज्यमंत्री तोखण साहू ह आज गौरेला विकासखंड के ग्राम पंचायत सारबहरा म संपूर्णता अभियान के सुभारंभ करीन। ए मउका म ओमन किहीन कि ए अभियान के उद्देस्य आकांक्षी ब्लॉक के जम्मों हितग्राही मन ल योजना के लाभ दिलाना हे।
उहें, कोरिया जिला के बैकुंठपुर म विधायक भैयालाल राजवाड़े ह संपूर्णता अभियान के सुभारंभ करीन। मानस भवन म राखे गे कारीकरम म संपूर्णता अभियान के रूपरेखा के बारे म विस्तार ले जानकारी दे गीस।
ओति, नारायणपुर जिला के ओरछा म संपूर्णता अभियान के आयोजन करके लोगन मन ल जन-कल्याणकारी योजना के जानकारी स्थानीय भाषा गोण्डी म दे गीस। ए दौरान ग्रामीण मन ल निसुल्क बीज, पौधा अउ ओखर स्वास्थ्य परीक्षण करके दवई घलो बांटे गीस।
ऐति महासमुंद के पिथौरा विकासखंड के ग्राम पंचायत गोड़बहाल म काली बिसेस सिविर के आयोजन करे गीस। एखर सुभारंभ जिला पंचायत सीईओ अउ नोडल अधिकारी एस. आलोक ह करीन। सिविर म आने-आने विभाग डहार ले स्टॉल लगाके लोगन मन म केंद्र सरकार के योजना मन के प्रचार-प्रसार करे गीस।
खबर के मुताबिक आकांक्षी जिला कारीकरम अउ आकांक्षी ब्लॉक कारीकरम के तहत एक सौ बारह आकांक्षी जिला अउ पांच सौ आकांक्षी ब्लॉक म छै पहिचाने गे संकेतक मन म ले हरेक म ए संपूर्णता लेना चाहथे। एमा छत्तीसगढ़ के घलो दस आकांक्षी जिला के संगेच संबंधित ब्लॉक सामिल हे। संपूर्णता अभियान देसभर म चार जुलाई ले तीस सितंबर तक चलाय जात हे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत नई राष्ट्रीय शिक्षा नीति उपर उच्च शिक्षा विभाग के सचिव प्रसन्ना आर. ले लेगे भेंटवार्ता प्रसारित करे जाही। ए कारीकरम आकाशवाणी केन्द्र रायपुर डहार ले काली छै जुलाई के बिहनिया साढ़े दस बजे ले प्रसारित करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
मुख्यमंत्री-‘एक पेड़ मां के नाम‘
मुख्यमंत्री विष्णुदेव साय ह आज ‘एक पेड़ मां के नाम‘ अभियान के तहत जशपुर जिला के बगिया म अपन मां के सम्मान म पौधा रोपण करीन। ओमन शासकीय हाई स्कूल बगिया परिसर म रूद्राक्ष के पौधा लगाइन। ओमन किहीन कि ए अभियान के अंतर्गत लगे पौधा जननी अउ जन्म भूमि के रिस्ता ल एक नवा पहिचान दिही। मुख्यमंत्री राज्य स्तरीय शाला प्रवेश उत्सव म सामिल होय बर इंहा पहुंचे रिहीन। ए मउका म ओखर धर्मपत्नी कौशल्या देवी साय ह घलो रूद्राक्ष के पौधा लगाइन। उहें, प्रदेस के वित्तमंत्री अउ जशपुर जिला के प्रभारी मंत्री ओ.पी.चौधरी ह आंवला के पौधा लगाइन।
मुख्यमंत्री ह किहीन कि प्रधानमंत्री नरेंद्र मोदी डहार ले सुरू करे गे ए मुहिम ले हम सब झन ल पर्यावरण संरक्षण म अपन योगदान जरूर देना चाही। ए दौरान ओमन जम्मों झन से ‘एक पेड़ मां के नाम‘ अभियान के तहत पेड़ लगाय के आग्रह करीन। संघरा जम्मों झन ले पौधा मनके संरक्षण बर संकल्प ले बर किहीन। ए मउका म रायगढ़ लोकसभा क्षेत्र के सांसद राधेश्याम राठिया, विधायक जशपुर रायमुनी भगत, गोमती साय अउ गुरू खुशवंत साहेब समेत दूसर जन प्रतिनिधि मौजूद रिहीन।
मुख्यमंत्री-शाला प्रवेश उत्सव
मुख्यमंत्री विष्णुदेव साय आज जशपुर जिला के ग्राम बगिया म राखेगे राज्य स्तरीय शाला प्रवेस उत्सव कारीकरम म सामिल होइन। ए दौरान ओमन प्रवेस उत्सव म आयोजित प्रदर्सनी के अवलोकन करीन। ए मउका म मुख्यमंत्री ह किहीन कि राज्य सरकार विकसित छत्तीसगढ़ दू हजार सैंतालिस के वीजन उपर काम करत हे। ओमन किहीन कि लइका मनके पढ़ाई-लिखाई उपर छत्तीसगढ़ म जतका मेहनत अउ जतन करे जात हे, ओखर ले निश्चित ही स्वर्णिम भविष्य बर ठोस नींच राखे जात हे।
राजस्व पखवाड़ा
राजस्व प्रकरण मनके निराकरण बर प्रदेस म काली छै जुलाई ले राजस्व पखवाड़ा आयोजित करे जाही। बीस जुलाई तक चलइया ए पखवाड़ा के तहत सिविर मनके जानकारी ग्रामीण मन ल देबर हरेक ग्राम पंचायत म कोटवार मनके माध्यम ले मुनादी कराय के निरदेस दे गेहे। ए सिविर म मिलइया आवेदन जइसे- फौती, नामांतरण अउ बंटवारा, अभिलेख त्रुटिसुधार के प्रकरण मनके मउकच म निराकरण करे जाही। अइसने आय, जाति, निवास प्रमाण पत्र संबंधी जम्मो आवेदन के घलो सिविर स्थल म ही लोकसेवा केंद्र के माध्यम ले ऑनलाइन प्रविष्टि अउ समय-सीमा म निराकरण करे के निरदेस दे गेहे। एखर अलावा बी-वन, खसरा अउके किसान किताब के मिले आवेदन मनके निराकरण करे जाही। सिविर म प्राप्त होने वाला आवेदन अउ ओखर उपर करे गे कार्रवाई के जानकारी हर दिन निर्धारित प्रपत्र म कार्यालय ल उपलब्ध कराय के निरदेस दे गेहे।
राज्य युवा सभा
छत्तीसगढ़ म युवा मन ल राष्ट्र निर्माण के गतिविधि म सामिल करे बर नेहरू युवा केंद्र रईपुर डहार ले विधानसभा परिसर म एक दिन के राज्य युवा सभा के आयोजन करे गीस। कारीकरम के उद्घाटन विधानसभा अध्यक्ष डॉक्टर रमन सिंह ह करीन। ए मउका म वन मंत्री केदार कश्यप, छत्तीसगढ़ विधानसभा के सचिव दिनेश शर्मा, नेहरू युवा केंद्र के राज्य निदेसक श्रीकांत पाण्डेय, यूनीसेफ उड़िसा अउ छत्तीसगढ़ के प्रमुख विलियम-हेडलान, श्वेता पटनायक अउ अभिषेक सिंह मौजूद रिहीन। कारीकरम म एक सौ छियालिस विकासखंड के लगभग एक सौ अस्सी छात्र-छात्रा मन भाग लीन।
उप मुख्यमंत्री-राशि मंजूर
उप मुख्यमंत्री अरूण साव ह काली नई दिल्ली म केंद्रीय आवासन अउ सहरी कार्य मंत्री मनोहर लाल खट्टर ले भेंट करीन। ए दौरान ओमन छत्तीसगढ़ के आने-आने नगरीय निकाय के योजना मन उपर चर्चा करीन। ओमन सहर के एक महात्वाकांक्षी योजना मन बर जरूरी रासि स्वीकृत करे के आग्रह करीन।
उप मुख्यमंत्री ह केंद्रीय आवासन अउ सहरी कार्य मंत्री ले प्रधानमंत्री आवास योजना सहरी के तहत उन्नीस हजार ले जादा नवा आवास स्वीकृत करे के अनुरोध करीन। ओमन श्री खट्टर ल बताइन कि छत्तीसगढ़ डहार ले स्वच्छ भारत मिसन के तहत ठोस अपशिष्ट प्रबंधन बर एक्सन प्लान स्वीकृति बर भारत सरकार ले भेजे गेहे। रईपुर, दुरूग अउ भिलाई निकाय मनके क्लस्टर अउ बिलासपुर, रतनपुर, बोदरी अउ मुंगेली म सुखा कचरा के निपटान बर दस मेगावाट के वेस्ट टू-इलेक्ट्रीसिटी प्लान लगाय के परियोजना के प्रस्ताव घलो भेजे गेहे।