नीति आयोग ह देसभर के आकांक्षी जिला अउ ब्लॉक म छह प्रमुख संकेतक के संपूर्णता लेबर आज ले तीस सितंबर तक तीन महिना के संपूर्णता अभियान सुरू करे हे। एमा छत्तीसगढ़ के नारायणपुर जिला के नारायणपुर अउ ओरछा म संपूर्णता अभियान के सुभारंभ करे गीस। कारीकरम के माई पहुना सर्वआदिवासी समाज के संरक्षक रूपसाय सलाम रिहीन। उहें कारीकरम के अगुवई कलेक्टर विपीन मांझी ह करीन। ए मउका म श्री सलाम ह किहींन कि देस ल विकास के रद्दा म आगू बढ़ाय बर सबले पहिली समाज ल सुधारे के जरूरत हे, तभे देस विकास करही। ओमन ए अभियान ल सफल बनाय बर सबो ले अपील करीन। उहें, कलेक्टर ह संपूर्णता कारीकरम म मौजूद सबो झन ल सपथ देवाइन।
कारीकरम म गरभवती माईलोगन मन ल गोदभराई रसम म पोषण आहार कीट बांटे गीस। ए दौरान स्वास्थ्य, शिक्षा, महिला अउ बाल विकास विभाग कोति ले स्टाल लगाके योजना के प्रचार-प्रसार करे गीस। उहें, स्वास्थ्य सिविर घलो लगाय गीस। कारीकरम म आने-आने स्कूल के लइका मन ह सांस्कृतिक कारीकरम प्रस्तुत करके अउ लोगन ल बीमारी ले बांचे के संदेस दीन।
खबर के मुताबिक आकांक्षी जिला कार्यालय अउ आकांक्षी ब्लॉक कारीकरम म एक सौ बारह आकांक्षी जिला अउ पांच सौ आकांक्षी ब्लॉक म छै पहिचाने गे संकेतक मन म हरेक म ए संपूर्णता लेना चाहथे। एमा छत्तीसगढ़ के घलो दस आकांक्षी जिला संग ब्लॉक सामिल हवय।
एक पेड़ मां के नाम
मुख्यमंत्री विष्णुदेव साय ह राज्य म पर्यावरण संरक्षण ल बढ़ावा देबर आज ‘‘एक पेड़ मां के नाम‘‘ अभियान के सुभारंभ करीन। ए मउका म मुख्यमंत्री ह अपन निवास कार्यालय परिसर म दहीमन के पौधा लगाइन। संगेसंग प्रदेसवासी मनले अपन मां के नाव म एक पेड़ लगाय के आह्वान करीन। दहीमन के पौधा सरगुजा क्षेत्र म बहुतायत म मिलथे। ए पौधा औषधिगुण ले भरे हे अउ कई ठन बीमारी के इलाज म काम आथे।
उहें, प्रदेस म ग्यारह जुलाई के राज्य स्तरीय वनमहोत्सव मनाय जाही। वन मंत्री केदार कश्यप ह काली वीडियो कॉन्फ्रेंसिंग ले समीक्षा बइठका लेके सबो मुख्य वन संरक्षक अउ वन मंडल अधिकारी मन ल निरदेस जारी करीन। ए अभियान म सत्तर लाख पौधा लगाय जाही। कारीकरम ल सफल बनाय बर पौधा ल जन प्रतिनिधि मन कोति ले गोद ले जाही। ए अभियान म लोगन अपन श्रध्दाभक्ति के मुताबिक देवी-देवता के नांव म पौधा रोपण कर सकही। वन क्षेत्र के संगेसंग रद्दा के किनारे घलो पौधा रोपण होही।
जनदर्शन कार्यक्रम
मुख्यमंत्री विष्णुदेव साय के रईपुर स्थित निवास कार्यालय म आज जन दर्शन कारीकरम राखेगे दूसर हफ्ता के जनदर्सन कारीकरम म मुख्यमंत्री ह नोनी-बाबू मेघावी शिक्षा सहायता योजना म तेरह झिन लइका मन ल दू-दू लाख रूपिया के चेक दीन। खबर के मुताबिक पंजीयन होय निर्माणी श्रमिक परिवार के ए लइका मन ह दसवीं अउ बारहवीं बोर्ड परीक्षा म टॉप टेन म जघा बनाय हे। ए कारीकरम म मुख्यमंत्री ह दिव्यांगजन मन ल ट्राई सायकल समेत आने सहायक उपकरण दीन।
कारीकरम के सुरूआत म मुख्यमंत्री ह स्वामी विवेकानंद के पुण्यतिथि म उंखर चित्र म फूलमाला चढ़ाके श्रध्दांजलि दीन। ए बेरा म मुख्यमंत्री ह किहीन कि स्वामी विवेकानंद के विचार कई सदी तक लोगन बर प्रेरणा दीही। जनदर्शन स्थल के तीर म लोगन बर स्वास्थ्य परीक्षण सिविर लगाय गीस।
नितिन गडकरी-ज्ञापन
सक्ति जिला के जेठा गांव म बने टोल प्लाजा ले निकले म जिलावासी मन ल छूट दे अउ राष्ट्रीय राजमार्ग के समतलीकरण कराय के मांग ल लेके जांजगीर-चांपा के सांसद कमलेश जांगड़े ह नई दिल्ली म केंद्रीय सड़क परिवहन अउ राजमार्ग मंत्री नितिन गडकरी ल ज्ञापन सौंपे हे।
खबर के मुताबिक ए राष्ट्रीय राजमार्ग म रईपुर ले ओड़िसा तक कतकोन छोटे-बड़े सहर हावय अउ भारी वाहन के अवई-जवई ए रद्दा म होथे। एखर संगेसंग अकलतरा-रायगढ़ रद्दा के समतलीकरण नई होय के सेति, सक्ति क्षेत्र म आय दिन रद्दा दुर्घटना होथे।
केंद्रीय वित्त आयोग-प्रतिनिधिमंडल
सोलहवां केंद्रीय वित्त आयोग के प्रतिनिधिमंडल ग्यारह ले तेरह जुलाई तक छत्तीसगढ़ के दौरा म रइही। तीन दिवसीय ए दौरा कारीकरम के अगुवई अरविंद पनगढ़िया करही। ए प्रतिनिधिमंडल म आयोग के बारह सदस्य सामिल हे। ए मउका वित्त मंत्री ओ.पी.चौधरी आयोग के आगू राज्य के आर्थिक वित्तीय अधोसंरचना विकास ले जुड़े बिसय म प्रस्तुतीकरण दीही। ए दौरान अवइया बछर म राज्य के वित्तीय जरूरत के संबंध म घलो गोठबात करे जाही। एखर संगेसंग आने-आने विभाग कोति ले प्रस्तावित परियोजना बर विशिष्ट अनुदान संबंधी मांग पत्र घलो आयोग के आगू पेस करे जाही।
रायपुर/बलौदाबाजार-फोरलेन
रईपुर-बलौदाबाजार राष्ट्रीय राजमार्ग के जल्दीच फोरलेन म बढ़वार होही। केंद्र सरकार के परिवहन मंत्रालय कोति ले रईपुर बलौदाबाजार रद्दा बर करीबन एक हजार पांच सौ करोड़ रूपिया के मंजूरी दे गेहे। पहिली चरण म आठ सौ चवालीस करोड़ रूपिया के लागत ले ए रद्दा विधानसभा ले करीबन तिरपन किलोमीटर तक अउ दूसर चरण म साढ़े छै सौ करोड़ रूपिया के लागत ले करीबन बत्तीस किलोमीटर तक फोरलेन रद्दा बनाय जाही।
राजस्व मंत्री टंकराम वर्मा ह रईपुर-बलौदाबाजार राष्ट्रीय राजमार्ग म फोरलेन रद्दा बनाय के मंजूरी मिले म मुख्यमंत्री विष्णुदेव साय अउ केंद्रीय परिवहन मंत्री नितिन गडकरी के आभार जतात क्षेत्र के लोगन ल बधई अउ सुभकामना दीन हे।
आईईडी बरामद
कोंडागांव अउ कांकेर पुलिस ह पांच-पांच किलो के दू आईईडी बरामद करे हे। खबर के मुताबिक कोंडागांव अउ कांकेर पुलिस के संयुक्त दल इरागांव थाना क्षेत्र के कोटकोडो-तमोरा ले गस्त म निकले रिहीन। ए दौरान पुलिस ल निसाना बनाय बर माओवादी मन ह दू आईईडी लगाय रिहीन जउन ल पुलिस ह बरामद कर लेहे अउ एखर बाद बम निरोधक दस्ता ह एला निष्क्रिय कर दीन।
नवजात शिशु मौत-कार्रवाई
रईपुर जिला के उरला प्राथमिक स्वास्थ्य केंद्र म पाछू दिन दू नवजात लइका के मौत के मामला म दू झिन डॉक्टर के खिलाफ कार्रवाई करे गीस। स्वास्थ्य विभाग ह आदेस जारी करत कोताही बरतइया प्रभारी चिकित्सा अधिकारी डॉक्टर सुनील साहू ल निलंबित कर देहे।
उहें, संविदा चिकित्सा अधिकारी डॉक्टर पूनम सरकार ल बर्खास्त करे गेहे। इही बीच, स्वास्थ्य मंत्री श्याम बिहारी जायसवाल ह किहीन कि स्वास्थ्य बेवस्था म कोनो भी कीसम के कोताही ल बर्दास्त नइ करे जाही अउ अइसन मामला म दोसी मन उपर सख्त कार्रवाई करे जाही।
फुटबॉल प्रतियोगिता
चौबीसवां राज्य स्तरीय सालेय क्रीडा प्रतियोगिता म सुब्रतो मुखर्जी कप फुटबॉल प्रतियोगिता आज ले जगदलपुर म सुरू होगे हे। चित्रकोट विधायक विनायक गोयल ह ए प्रतियोगिता के सुभारंभ करीन। ए मउका म ओमन किहीन कि राज्य सरकार खेलकूद ल बढ़ावा देबर परयास करत हे। ओमन खिलाड़ी मन ल खेलभावना संग बने खेले अउ राज्य, राष्टी्रय स्तर म बने उपलब्धी पाय खातिर सुभकामना दीन। ए प्रतियोगिता म दुरूग, रईपुर, बिलासपुर, सरगुजा अउ बस्तर संभाग के ढाई सौ ले जादा खिलाड़ी खेल अधिकारी अउ प्रसिक्षक सामिल होवत हे। एमा बालक वरग म पंद्रह अउ सत्रह बछर तक अउ बालिका वरग म सत्रह बछर के खिलाड़ी भाग लेवत हे।
अउ अब मौसम के हाल..
अवइया चौबीस घंटा के दौरान प्रदेस म कतकोन जघा म छूटपुट बरसा अउ गरज-चमक संग छींटा बौछार होय के संभावना हे। मौसम विभाग के मुताबिक एक द्रोणिका राजस्थान ले बांग्लादेस तक बने हे। उहें, उपरी हवा के चक्रीय-चक्रवाती घेरा उत्तरी झारखंड के उपर बने हे, जेखर परभाव ले प्रदेस म एक-दू जघा म भारी बरसा होय गाज गिरे अउ हवा गरेर के चेतावनी दे गेहे। भारी बरसा जशपुर जिला अउ ओखर ले लगे क्षेत्र म हो सकत हे।
अउ अब थोरकुन समाचार सार म –
– मुख्यमंत्री विष्णुदेव साय काली जशपुर जिला के गांव बगिया म राखेगे राज्य स्तरीय शाला प्रवेस उत्सव कारीकरम म मुख्य माईपहूना के रूप म सामिल होही। कारीकरम के अगुवई वित्त मंत्री अउ जशपुर जिला के प्रभारी मंत्री ओ.पी.चौधरी करही।
– जांजगीर-चांपा जिला के शनिचराडीह गांव म बिजली खंभा तीर खेलत दू झिन लइका के करंट के चपेट म आय ले मउत होगे।
अउ
– जांजगीर-चांपा जिला के कनई गांव म मशरूम खाय के बाद एके परिवार के बारह झन के तबियत बिगड़गे सबो झन ल जिला अस्पताल म भर्ती कराय गेहे।