राजस्व प्रकरण मन के निराकरण बर प्रदेस म छै ले बीस जुलाई तक राजस्व पखवाड़ा आयोजित करे जाही। राजस्व मंत्री टंकराम वर्मा ह ए पखवाड़ा के दौरान आयोजित राखेगे सिविर मन के जानकारी गांव वाले मन ल देबर हरेक ग्राम पंचायत म कोटवार मन के माध्यम ले मुनादी कराय के निरदेस देहे। ए सिविर मन म मिले आवेदन मन के जइसे -फौती, नामांतरण अउ बंटवारा, अभिलेख त्रुटि सुधार के प्रकरण मन के मउका म ही निराकरण करे जाही। अइसने आय, जाति निवास प्रमाण-पत्र संबंधी जम्मों आवेदन मन ल घलो सिविर स्थल म ही लोक सेवा केंद्र के माध्यम ले आनलाईन प्रविष्टि अउ समय-सीमा म निराकरण करे के निरदेस दे गेहे। एखर संगेसंग बी-वन, खसरा अउ किसान किताब के मिले आवेदन मन के निराकरण करे जाही। सिविर म मिले आवेदन अउ उंखर मन उपर करेगे कार्यवाई के जानकारी हरेक दिन निर्धारित प्रपत्र म कार्यालय ल उपलब्ध कराय के निरदेस घलो दे गेहे।
अरूण साव-प्रेसवार्ता
उप मुख्यमंत्री अउ लोक निर्माण विभाग मंत्री अरूण साव ह आज रईपुर म राखेगे एक पत्रकारवार्ता म बतइन हे कि केंद्रीय सड़क परिवहन अउ राजमार्ग मंत्रालय डहार ले बछर दू हजार चौबीस-पच्चीस बर छत्तीसगढ़ म राष्ट्रीय राजमार्ग मन के उन्नयन अउ चौड़ीकरण बर अट्ठारा काम मन बर तीन हजार तीन सौ इक्कीस करोड़ रूपिया के प्रावधान करे गेहे। ए पाछू पांच बछर के तुलना म करीबन चार गुना जादा हे।
उपमुख्यमंत्री श्री साव ह बतइन हे कि डबल इंजन के सरकार होय के फायदा अब छत्तीसगढ़ के जनता मन ल मिलना सुरू होगे हे। ओमन बतइन कि केंद्र सरकार ह छत्तीसगढ़ म एक हजार एक सौ छै किलोमीटर सड़क मन के सर्वेक्षण अउ डीपीआर बर पैंतीस करोड़ रूपिया के प्रावधान करे हे।
अरूण साव-समीक्षा
उपमुख्यमंत्री अरूण साव ह काली वीडियो कॉन्फ्रेसिंग के माध्यम ल प्रदेस के जम्मों नगरीय निकाय मनके काम के समीक्षा करीन। ओमन नगर निगम आयुक्त , नगर पालिका मन अउ नगर पंचायत के मुख्य नगर पालिका अधिकारी मन ल सहर के सुनियोजित अउ संतुलित विकास बर काम करे बर किहीन। श्री साव ह अधिकारी मन ल स्वच्छता उपर बिसेस धियान देके निरदेस दीन। ओमन किहीन कि स्वच्छता सर्वे म हर निकाय के रैंकिंग म सुधार आना चाही। बइठका म श्री साव ह नगरीय निकाय मन के काम के समीक्षा बर हर महिना बइठका राखे के निरदेस दीन। ओमन किहीन कि नगरीय निकाय मन म डोर-टू-डोर कचरा संग्रहण, उंखर रिसाइक्लिंग अउ गीला कचरे ले कंपोस्ट बनाय के काम म सुधार लाय जाही। श्री साव ह लापरवाही अउ देरी करइया अधिकारी मनके विरूध्द कड़ा कार्रवाई करे बर किहीन।
केदार कश्यप-आदर्श बैंक
सहकारिता मंत्री केदार कश्यप ह किहीन हे कि प्रदेस के जम्मों सहकारी बैंक मन ल आदर्स बैंक के रूप म विकसित करे जाय। श्री कश्यप के अध्यक्षता म काली रईपुर म विभागीय समीक्षा बइठका आयोजित करे गीस। ओमन किहीन कि धान बेचे के बाद किसान मन ल खुद के पइसा निकाले बर परेसानी के सामना करना पड़त हे, जेखर ले शासन के छवि खराब होवत हे। ओमन अधिकारी मन ले किहीन हे कि बैंक म पइसा निकाले बर अवइया किसान मन ल प्राइवेट बैंक जइसन सुविधा देवाय जाय। श्री कश्यप ह किसान मन ल तुरते रासि देवाय बर माइक्रो एटीएम के सुविधा ल मजबूत करे के निरदेस दीन।
सहकारिता मंत्री ह खाद-बीज वितरण के समीक्षा करत किहीन हे कि किसान मन के मांग के अनुरूप ओमन ल खाद-बीज के वितरण करे जाय। सहकारी समिति म पर्याप्त खाद-बीज के भंडारण रहना चाही।
श्री रामलला दर्शन योजना
श्री रामलला दर्सन योजना के तहत आज रईपुर संभाग के पांच जिला के साढ़े आठ सौ यात्री रईपुर रेलवे स्टेसन ले अयोध्याधाम बर रवाना होइन। स्वास्थ्य मंत्री श्याम बिहारी जायसवाल, विधायक पुरन्दर मिश्रा अउ अनुज शर्मा ह ए ट्रेन ल हरियर झंडा दिखाके रवाना करीन। ए मउका म स्वास्थ्य मंत्री श्याम बिहारी जायसवाल ह तीर्थयात्री मन ल सुभकामना दीन। ए यात्री काशी विश्वनाथ के दर्सन करे के बाद अयोध्या म रामलला के दर्सन करही।
नीति आयोग-संपूर्णता अभियान
नीति आयोग डहार ले सामाजिक अउ आर्थिक संकेतक मन म सुधार बर देसभर के एक सौ बारह आकांक्षी जिला अउ पांच सौ आकांक्षी ब्लाक मन म काली चार जुलाई ले तीस सितंबर तक संपूर्णता अभियान चलाय जाही। एमा छत्तीसगढ़ के घलो दस आकांक्षी जिला मनके संगेच संबंधित ब्लाक हे। इही कड़ी म नारायणपुर जिला के हाट बाजार मन म काली ले संपूर्णता अभियान चलाय जाही। एखर तहत सिविर लगाके ओरछा अउ नारायणपुर क्षेत्र के लोगन मन ल सरकार के योजना मनके जानकारी दे जाही। कलेक्टर बिपिन मांझी ह जिला के पहुंचविहीन क्षेत्र मनके हाटबाजार मन म सिविर लगाके लोगन मन ल कृषि, स्वास्थ्य, उद्यानिकी, शिक्षा, एन.आर.एल.एम. विभाग मन डहार ले चलत योजना मन ले लाभान्वित करे के निरदेस देहे।
उहें, संपूर्णता अभियान सिविर के आयोजन छै जुलाई के कोहकामेटा म, आठ जुलाई के आकाबेड़ा म अउ दस जुलाई के ग्राम पंचायत ओरछा म करे जाही।
एक पेड़ मां के नाम
राजस्व मंत्री टंकराम वर्मा ह बलौदाबाजार के जिला कार्यालय परिसर म नीम के पेड़ लगाके ‘‘एक पेड़ अपनी मां के नाम‘‘ अभियान के सुरूआत करीन। बलौदाबाजार वनमंडल म राखेगे ए कारीकरम म नगर पालिका परिषद अध्यक्ष चित्तावर जायसवाल, कलेक्टर दीपक सोनी अउ डीएफओ मयंक अग्रवाल ह घलो ए अभियान के चलत पौधारोपण करीन।
ए मउका म राजस्व मंत्री ह स्कूली लइका मन ल पर्यावरण संरक्षण ले जोड़े बर एक पेड़ अपनी मां के नाम उपर लगाय के अपील करीन। संगेसंग जिला के सब्बो स्कूल, अस्पताल अउ आंगनबाड़ी मन म घलो अभियान चलाके पौधारोपण करे के निरदेस संबंधित अधिकारी मन ल दीन। एमा पालक मन अउ शिक्षक मन ल सामिल करे के ले बड़े रूप म वृक्षारोपण हो सकही।
पुलिस परिवार-बस सुविधा
आज मुख्यमंत्री निवास म मुख्यमंत्री विष्णुदेव साय अउ गृह मंत्री विजय शर्मा ह पुलिस परिवार के लइका मन बर राखेगे कारीकरम म स्कूल बस ल हरियर झंडा दिखाके रवाना करीन। बस के सुविधा अमलीडीह स्थित पुलिस कॉलोनी म रहवइया लइका मन ल देगे हे। समिति के सदस्य मन अउ लइका मन ह मुख्यमंत्री अउ गृह मंत्री के आभार जतइन।
ए मउका म मुख्यमंत्री ह किहीन हे कि, ये एक अच्छा पहल आय। एखर ले लइका मन के परेसानी दूरिहा होही अउ अब लइका मन सुरक्षित स्कूल आ-जा सकही।
माओवादी मुठभेड़
नारायणपुर जिला के कोहकामेटा थाना क्षेत्र म काली होय मुठभेड़ म दू झिन माओवादी मारे गेहे। एला मिलाके मारेगे माओवादी मन के संख्या पांच होगे हे। जिला के पुलिस अधीक्षक प्रभात कुमार ह बतइन हे कि जम्म्मों माओवादी मन के सव बरामद कर ले गेहे। ओमन ए मुठभेड़ म कई झिन माओवादी मनके घायल होय के दावा करे हे। घटना स्थल ले एक थ्री नॉट थ्री रायफल, तीन सौ पंद्रह बोर के तीन रायफल, लांचर समेत भारी मात्रा म हथियार अउ आने-आने माओवादी जिनिस बरामद करे गेहे। ए अंतर्जिला अभियान म डीआरजी, एसटीएफ, बीएसएफ अउ आईटीबीपी के जवान सामिल रिहीस।
शिशु मौत-जांच समिति
रईपुर जिला के उरला स्थित प्राथमिक स्वास्थ्य केंद्र म दू नवजात शिशु मन के मउत के मामला म तीन सदस्यीय डॉक्टर मनके जांच दल ह अपन रिपोर्ट मुख्य चिकित्सा अउ स्वास्थ्य अधिकारी डॉक्टर मिथिलेश चौधरी ल सौंप देहे। डॉक्टर चौधरी ह आकाशवाणी समाचार ल बतइन हे कि एक नवजात शिशु के मउत तीस जून के अउ दूसर नवजात शिशु के मउत एक जुलाई के होय रिहीस। पहिली जांच रिपोर्ट म डॉक्टर अउ नर्स के लापरवाही आगू आय हे। ए जांच रिपोर्ट ल शासन ल भेज दे गेहे।
अउ अब मौसम के हाल…
मौसम विभाग के मुताबिक एक द्रोणिका उत्तर-पूर्व मध्यप्रदेस ले छत्तीसगढ़ तक विस्तारित हे। एखर असर ले प्रदेस म काली कतकोन जघा म हल्का ले मध्यम बरसा होय या गरज-चमक के संग सिटीर-साटर पानी गिरे के संभावना हे। उहें, सरगुजा संभाग के कुछेक जघा म भारी बरसा होय, गाज गिरे अउ हवा गरेर चले के चेतावनी देहे।
अउ अब थोरकुन समाचार सार म –
– मुख्यमंत्री विष्णुदेव साय के दूसरइया जनदर्सन कारीकरम काली बिहनिया ग्यारह बजे ले एक बजे तक मुख्यमंत्री निवास म आयोजित करे जाही। जनदर्सन कारीकरम म मुख्यमंत्री प्रदेस भर ले पहुंचे नागरिक मनले सीधा संवाद करही अउ ओखर मनके समस्या सुनही।
– केंद्रीय स्वास्थ्य मंत्रालय ह नारायणपुर जिला के चार स्वास्थ्य केंद्र मन ल राष्ट्रीय गुणवत्ता आश्वासन मानक प्रमाण पत्र प्रदान करीन।
अउ
– जांजगीर जिला म माजदा वाहन ह एक युवक ल कुचल दीस। जेखर ले युवक के मउका म ही मउत होगिस।