नारायणपुर जिला के कोहकामेटा इलाका म आज सुरक्षा बल मन के संग होय मुठभेड़ म तीन झिन माओवादी मारे गेहे। जिला के पुलिस अधीक्षक प्रभात कुमार ह बतइन कि माओवादी मनके मौजूदगी के सूचना मिले म डीआरजी, एसटीएफ, बीएसएफ अउ आईटीबीपी के संयुक्त टीम रवाना करे गे रिहीस। ए दौरान महाराष्ट्र के सीमा ले लगे कोहकामेटा के जंगल म पहिली ले घात लगा के बइठे माओवादी मन ह सुरक्षा बल उपर फायरिंग सुरू कर दीस। जवाबी कार्रवाई म सुरक्षा बल मन ह तीन माओवादी मन ल मार गिराइस।
माओवादी गिरफ्तार/आत्मसमर्पण
सुकमा जिला के आने-आने ईलाका ले सुरक्षा बल मन ह नौ माओवादी मन ल गिरफ्तार करे हे। जिला के पुलिस अधीक्षक किरण चव्हाण ह बतइन कि एमा ले चार माओवादी पाछू तेईस जून के टेकलगुड़ा म होय बिस्फोट के घटना म सामिल रिहीस। ओमन ह बतइन कि जिला पुलिस बल, डीआरजी, सीआरपीएफ अउ कोबरा बटालियन के संयुक्त कार्रवाई म ए माओवादी मन ल गिरफ्तार करे गीस।
उहें, इही जिला म एक माईलोगन के संग दू ईनामी माओवादी मन ह आत्मसमर्पण करे हे। एखर मन उपर पांच-पांच लाख रूपिया के ईनाम घोसित रिहीस। ए माओवादी मन ह पुलिस अधीक्षक किरण चव्हाण, सीआरपीएफ के डीआईजी सूरजपाल वर्मा अउ अतिरिक्त पुलिस अधीक्षक निखिल राखेचा के आगू आत्मसमर्पण करीन। ए दूनों माओवादी सुकमा जिला के कोंटा एरिया कमेटी म कई बछर ले सक्रिय रिहीस। आत्मसमर्पण करइया माओवादी मन ल राज्य सरकार के पुर्नवास नीति के लाभ दे जाही।
केंद्रीय कृषि मंत्री-बैठक
केंद्रीय कृषि मंत्री शिवराज सिंह चौहान ह काली नई दिल्ली म छत्तीसगढ़ के कृषि मंत्री रामविचार नेताम के संग उच्च स्तरीय प्रतिनिधि मंडल के संग बइठका करीन। ए दौरान प्रदेस म दलहन, तिलहन अउ बागवानी फसल ल बढ़ावा दे के संग कृषि अउ किसान कल्याण ले जुड़े कतकोन बिसय म चर्चा होइस। केंद्रीय मंत्री ह किहीन कि छत्तीसगढ़ के किसान मन ल केंद्रीस स्तर म कोनो समस्या नइ आय दे जाही। एखर बर केंद्र अउ राज्य सरकार मिलके काम करत रइही। केंद्रीय मंत्री ह दलहन अउ तिलहन फसल ल प्रोत्साहित करे के केंद्र सरकार के नीति के उल्लेख घलो करीन। श्री चौहान ह किहीन कि छत्तीसगढ़ म मक्का अउ सोयाबीन के खेती ल बढ़ावा दे जाही।
बइठका म कृषि मंत्री रामविचार नेताम के प्रस्ताव म बागवानी अउ मक्का के क्षेत्र विस्तार म सहमति दे गीस। उहें, प्रदेस म खाद-बीज के उपलब्धता, भंडारण अउ वितरण के संबंध म घलो केंद्रीय मंत्री ल अवगत कराय गीस।
मुख्यमंत्री-पौधारोपण अपील
मुख्यमंत्री विष्णुदेव साय ह स्कूली लइका मन ल पर्यावरण संरक्षण ले जुड़े बर ‘एक पेड़ अपनी मां के नाम‘ म लगाय के अपील करे हे। श्री साय ह काली रईपुर म स्कूल शिक्षा विभाग के समीक्षा बइठका म किहीन कि ए अभियान ले लइका मनके पर्यावरण ले जुड़ाव बाढ़ही। एमा पालक अउ शिक्षक मन ल सामिल करे ले बड़का पैमाना म पौधारोपण हो सकही।
ए संबंध म स्कूल शिक्षा विभाग के सचिव सिध्दार्थ कोमल सिंह परदेशी ह सबो कलेक्टर ल निरदेस जारी कर देहे। ओमन ह किहीन कि मुख्यमंत्री के मंसा के अनुरूप हरियाली के दायरा बढ़ाय बर व्यापक स्तर म काम करना हे। लइका मन देस के भविष्य हे, एमन ल जोड़के पर्यावरण संरक्षण बर घलो अच्छा काम करे जा सकत हे। पौधारोपण शाला प्रवेश उत्सव के दौरान करे जाही। एखर बर जिला के शालावार कैलेंडर तियार करे जाही। स्कूल म पौधारोपण के दौरान जन-प्रतिनिधि मन ल घलो बुलाय जाही। श्री परदेशी ह पौधारोपण के समय शिक्षक अउ छात्र-छात्रा मन ले पौधा ल सुरक्षित राखे के संबंध म सपथ ग्रहण कराय बर घलो किहीन हे।
अरूण साव-शाला प्रवेश उत्सव
उप मुख्यमंत्री अरूण साव काली मुंगेली जिला के गांव गोड़खाम्ही म विकासखंड स्तरीय शाला प्रवेश उत्सव म सामिल होइन। ए दौरान ओमन ह नवा भर्ती लइका मन ल स्कूल ड्रेस अउ पाठ्य-पुस्तक दीन। कारीकरम म श्री साव ह कक्षा दसवीं अउ बाहरवीं के बोर्ड परीक्षा म अच्छा प्रदर्सन करइया, राष्ट्रीय बॉक्सिंग प्रतियोगिता अउ स्काउट गाईड एडवेंचर मनाली म भाग लेवइया छात्र-छात्रा मन ल पुरस्कार दीन। ए मउका म ओमन ह विद्यालय परिसर म आम के पौधा लगात पर्यावरण ल हराभरा राखे बर पौधा रोपण करे के संदेस दीन।
सिंगल विंडो पोर्टल
मुख्यमंत्री विष्णुदेव साय ह आज रईपुर स्थित अपन निवास कार्यालय म वाणिज्य अउ उद्योग विभाग डहार ले अपडेटेड सिंगल विंडो पोर्टल दूसरइया संस्करण के सुरूआत करीन। ए मउका म मुख्यमंत्री ह किहीन कि ए पोर्टल के माध्यम ले प्रदेस म नवा उद्योग मन के स्थापना म उद्योगपति मन ल न सिरिफ आसानी होही, बल्कि रोजगार के अवसर घलो बाढ़ही। संगेसंग छत्तीसगढ़ के युवा मन ल रोजगार घलो मिलही। ओमन ह छत्तीसगढ़ म निवेस करे अउ उद्योग लगइया उद्यमी मन ल राज्य सरकार डहार ले हरसंभव सहयोग के आस्वासन दीन। श्री साय ह किहीन कि ए पोर्टल म विभागीय अधिकारी ल घलो जिम्मेदारी दे गेहे अउ ओखर उपर आवेदन मन ल समय म निराकरण के जवाबदेही घलो होही। मुख्यमंत्री ह उद्योग विभाग के अधिकारी मन ल समय-समय म एखर समीक्षा करे के निरदेस घलो दीन।
वाणिज्य अउ उद्योग विभाग के सचिव अंकित आनंद ह बतइन कि ए पोर्टल म सोलह ले जादा विभाग के सौ ले जादा सुविधा उपलब्ध रइही। आवेदक मन ल एक घांव ही लॉगिन करना होही अउ दोबारा आवेदन करे के जरूरत नइ होही।
एनटीए-सुझाव
केंद्र सरकार ह राष्ट्रीय परीक्षा एजेंसी एनटीए म मजबूत तंत्र विकसित करे बर विद्यार्थी अउ अभिभावक ले सुझाव अउ प्रतिक्रिया मांगे हे। सूचना अउ प्रसारण मंत्रालय सोसल मीडिया पोस्ट म कहे हे कि डॉक्टर के.राधाकृष्णन के अध्यक्षता म गठित उच्च स्तरीय समिति ह विद्यार्थी अउ अभिभावक मन ले परीक्षा प्रतिक्रिया अउ डेटा सुरक्षा प्रोटोकाल म सुधार अउ राष्ट्रीय परीक्षा एजेंसी के संरचना अउ कार्यप्रणाली बर सुझाव अउ विचार मांगे हे। ए सुझाव सात जुलाई तक भेजे जा सकत हे।
स्वास्थ्य मंत्री-कॉन्क्लेव
चिकित्सक दिवस के बेरा म स्वास्थ्य मंत्री श्याम बिहारी जायसवाल काली रईपुर म होवइया एक कारीकरम म सामिल होइन। ए बेरा म ओमन डॉक्टर मन संग स्वास्थ्य के क्षेत्र म नवा विचार अउ नवाचार उपर चर्चा करीन। स्वास्थ्य मंत्री ह सबो डॉक्टर अउ स्वास्थ्य कर्मी मन ल चिकित्सक दिवस के सुभकामना दीन। ए मउका म मानव सेवा म लगातार समर्पित होके काम करइया डॉक्टर बंधू के सम्मान घलो करे गीस।
भाजपा विरोध प्रदर्शन
सदन म राहुल गांधी के कथित आपत्ति जनक बयान उपर भारतीय जनता युवा मोर्चा के कार्यकर्ता मन ह जगदलपुर के गोलबाजार चौक म प्रदर्सन करीन। एमा भाजपा के प्रदेस अध्यक्ष किरण सिंह देव घलो सामिल होइन। राज्य के आने-आने जिला मन म घलो अइसने कतकोन प्रदर्सन होइस।
लक्ष्मी राजवाड़े-समीक्षा
प्रदेस के माईलोगन अउ बाल विकास मंत्री लक्ष्मी राजवाड़े ह आज मंत्रालय म विभागीय काम के समीक्षा करीन। ओमन ह अधिकारी मन ल प्रदेस के सब्बो आंगनबाड़ी के निरीक्षण करे के निरदेस दीन। ओमन ह हितग्राही मन ल दे जात पोषण आहार अउ आने सुविधा के नियमित जांच करके उंखर गुणवत्ता सुनिश्चित करे बर घलो किहीन। श्रीमती राजवाड़े ह अधिकारी मन ले किहीन कि महतारी वंदन योजना, प्रधानमंत्री मातृ वंदना, रेडी-टू-ईट, नोनी सुरक्षा योजना, शुचिता योजना अउ बाल संदर्भ योजना के लाभ सब्बो हितग्राही मन ल मिले। ओमन ह गर्भवती, लइका अउ उंखर मां, लइका अउ किशोरी लइका मन के नियमित अंतराल म स्वास्थ्य परीक्षण, टीकाकरण अउ वजन ले बर किहीन। बइठका म अधिकारी मन ह विभागीय कारीकरम अउ योजना के जानकारी दीन।
अउ अब मौसम के हाल…
मौसम विभाग ह अवइया चौबीस घंटा के दौरान सरगुजा अउ बिलासपुर संभाग के कुछेक जिला मन म भारी बरसा होय, आकाशीय बिजली गिरे अउ अंधड़ चले के चेतावनी देहे। मौसम विभाग के अनुसार एक द्रोणिका उत्तर पूर्व मध्यप्रदेस ले असम तक फैले हे। उहें, उपरी हवा के एक चक्रीय चक्रवाती घेरा बिहार के उपर बने हे। एखर असर ले प्रदेस म काली कतकोन जघा म हल्का ले मध्यम बरसा होय या गरज-चमक के संग छींटा पड़े के संभावना हे।