देसभर म आज ले नवा आपराधिक कानून -भारतीय न्याय संहिता, भारतीय नागरिक सुरक्षा संहिता अउ भारतीय साक्ष्य अधिनियम लागू होगे हे। ए नवा आपराधिक कानून जांच, सुनवई अउ अदालती प्रक्रिया म प्रौद्योगिकीय के परयोग उपर बल देथे। एला देखत राष्ट्रीय अपराध रिकार्ड ब्यूरो ह अपन अपराध अउ अपराध ट्रेकिंग नेटवर्क के संगेसंग प्रणाली म तेईस ठिन संसोधन करे हे। विधि अउ न्याय मंत्री अर्जुन राम मेघवाल ह किहीन हे कि नवा कानून आय ले न्याय देवाय म मदद मिलही। पहिली के कानून म सजा देवाय उपर जादा धियान दे जात रिहीस।
ऐति, छत्तीसगढ़ के मुख्यमंत्री विष्णुदेव साय ह आज देसभर म लागू नवा कानून उपर आधारित एक ठिन पुस्तक के विमोचन करीन। ए पुस्तक म तीन ठिन नवा आपराधिक कानून ल लेके जरूरी जानकारी दे गेहे। ए मउका म मुख्यमंत्री ह किहीन कि नवा कानून ह बने ढंग ले चलय एखर बर राज्य सरकार ह सरलग परयास करत रिहीस। नवा कानून ह जुन्ना अंग्रेजी कानून के जघा ल लिही, जेमा दंड के जघा म न्याय देवाय के प्राथमिकता दे जाही।
ऐति, राज्य म नवा कानून के तहत प्रदेस के पहिली एफआईआर कबीरधाम जिला के रेंगाखार थाना म दरज करे गेहे। त उहें, राजधानी रईपुर के तीर अभनपुर थाना म भारतीय न्याय संहिता के तहत पहिली मर्ग दरज करे गेहे।
जानबा के मुताबिक भारतीय न्याय संहिता, भारतीय नागरिक सुरक्षा संहिता अउ भारतीय साक्ष्य अधिनियम कानून ल पाछू साल के सीतकालिन सत्र के दौरान संसद म पारित करे गे रिहीस।
ऐति, प्रदेस के उप मुख्यमंत्री विजय शर्मा ह तीन ठिन बने नवा कानून के प्रचार-प्रसार बर जागरूकता रथ ल हरा झंडी दिखाके रवाना करीन। ए मउका म ओमन किहीन कि कानून के उद्देस्य क्षेत्र के सुरक्षा, विकास अउ सामाजिक न्याय ल ठीक-ठाक करना हे।
नये आपराधिक कानून-02
ओति, गौरेला-पेण्ड्रा-मरवाही जिला म तीन ठिन नवा कानून के लागू होय के मउका म जिला अउ पुलिस प्रशासन डहार ले जिला मुख्यालय म कारीकरम राखे गीस। त उहे, कोरिया जिला म घलो जन-जागरूकता के कारीकरम होइस। जिला मुख्यालय बैकुंठपुर म राखेगे कारीकरम म विधायक भईयालाल राजवाड़े ह बताइन कि ए नवा कानून ल एकदम सरल बनाय गेहे। कारीकरम म माईलोगिन अउ लइका मन ले जुड़े कानूनी नियम के बारे म जानबा दे गीस।
महतारी वंदन योजना
मुख्यमंत्री विष्णुदेव साय ह आज महतारी वंदन योजना के पांचवां किस्त जारी कर दीन। योजना म श्री साय ह सत्तर लाख माईलोगिन मनके खाता म करीबन छै सौ चौव्वन करोड़ रूपिया जमा करीन। जानबा के मुताबिक राज्य सरकार ह महतारी वंदन योजना के तहत विवाहित माईलोगिन मन ल हर महिना एक हजार रूपिया देके फइसला लेहे।
एनटीए-परिणाम
राष्ट्रीय परीक्षा एजेंसी- एनटीए ह दूसर घांव होय परीक्षा के बाद आज पंद्रह सौ ले जादा परीक्षार्थी मनके सुधारे गे परिणाम ल घोसित कर दे हे। नवा रिजल्ट आय के बाद एनटीए ह जम्मो परीक्षार्थी मनके रैंक ल सुधारे हे। एनटीए ह एक ठिन विज्ञप्ति म केहे कि जम्मों परीक्षार्थी मनके सुधारेगे स्कोरकार्ड वेबसाइट म अपलोड हे। जानबा के मुताबिक सर्वोच्च न्यायालय डहार ले एक हजार पांच सौ तिरसठ परीक्षार्थी मनके दुबारा परीक्षा लेके निरदेस देके बाद तेईस जून के दूसर घांव परीक्षा होय रिहीस।
बैज-पत्रकारवार्ता
प्रदेस कांग्रेस अध्यक्ष दीपक बैज ह आरोप लगाय हे कि राज्य म कानून बेवस्था ए बेरा ठीक-ठाक नइ हे। ओमन किहींन कि बस्तर के एक झिन आदिवासी युवक के पीट-पीट के हत्या करना एखर प्रमाण हे। आज रईपुर म होय एक ठिन पत्रकारवार्ता म ओमन किहीन कि लोहंडीगुड़ा के रहईया मंगल मुरया ह एक ठिन प्राइवेट कॉलेज के छात्र रिहीस, जेखर पाछू दिन दू झिन मनखे ह लिफ्ट मांगे के नाव म एखर हत्या कर दीन। ओमन किहीन कि राजधानी म आदिवासी मन सुरक्षित नइ हे।
परिवहन विभाग-सुविधा
राज्य म परिवहन विभाग डहार ले आज ले आम लोगन मन बर बिसेस सुविधा सुरू करे गेहे, जेमा ड्राइविंग लाइसेंस अउ पंजीयन प्रमाण पत्र देगे पता म नइ पहुंचे के स्थिति म अर्जी करइया मनके जिला के क्षेत्रीय, अतिरिक्त क्षेत्रीय अउ जिला परिवहन के ऑफिस म दे जाही।
जानबा के मुताबिक परिवहन विभाग डहार ले डाक के माध्यम ले भेजे गे ड्राइविंग लाइसेंस अउ पंजीयन प्रमाण पत्र पता बने ढंग ले नइ होय के सेति वापिस परिवहन विभाग म लहुट जात रिहीस। अइसन अर्जी करइया मन ल अपन प्रमाण पत्र लेबर नवा रईपुर आय बर पड़त रिहीस, फेर अब ए सुविधा मिले ले ओमन ल उंखर जिला म ही प्रमाण पत्र मिल जही।
उच्च न्यायालय-परीक्षा
छत्तीसगढ़ उच्च न्यायालय बर सहायक ग्रेड-तीन पद बर पहिली स्तर के लिखित परीक्षा अट्ठाईस जुलाई के होवइया हे। छत्तीसगढ़ व्यवसायिक परीक्षा मंडल डहार ले ए परीक्षा बर सरगुजा, बिलासपुर, जगदलपुर, दुरूग अउ रईपुर ल केंद्र बनाय गेहे। जानबा के मुताबिक उच्च न्यायालय के वेबसाइट उपर अर्जी करइया मन सहायक ग्रेड-तीन बर ऑनलाइन अर्जी जमा करे रिहीन। जम्मों अभ्यर्थी मन ल लिखित परीक्षा म सामिल होय बर प्रवेस पत्र बर छत्तीसगढ़ व्यवसायिक परीक्षा मंडल के वेबसाइट म जाके पंजीयन कराना होही अउ संगेसंग परीक्षा बर जिला के चयन घलो करना होही। एखर बर दू जुलाई ले सोलह जुलाई तक के तारिख राखे गेहे।
खाद्य विभाग सर्वर-बाधित
राज्य म खाद्य विभाग के सर्वर ह तीन दिन तक नइ चलय। फेर खाद्य वितरण पोर्टल उपर एखर कोनो प्रभाव नइ पड़य। आज ले तीन जुलाई तक विभागीय ऑनलाइन के काम राज्य डेटा सेंटर म स्थित विभागीय सर्वर के माध्यम ले करे जात हे।
ईओडब्ल्यू-चालान
कथित सराब घोटाला मामला म ईओडब्ल्यू के टीम ह आज रईपुर के बिसेस अदालत म दस हजार ले जादा पन्ना के चालान पेस करे हे, जेमा पूर्व आईएएस अनिल टुटेजा, ए.पी. त्रिपाठी, अरविंद सिंह, त्रिलोक सिंह ढिल्लन अउ कारोबारी अनवर ढेबर ल आरोपी बनाय गेहे।
राजस्व पखवाड़ा
बलौदाबाजार जिला म लंबित राजस्व प्रकरण के निपटारा बर आज ले अट्ठयासी ठिन ग्राम पंचायत मन म बिसेस सिविर के आयोजन करे जात हे। राजस्व पखवाड़ा के कारीकरम पंद्रह जुलाई तक चलही। एमा नामांतरण, सीमांकन, बटांकन, फौती खाता, रिकॉर्ड दुरूस्तीकरण, नजूल भूमि के नवीनीकरण के संगेसंग राजस्व विभाग ले जुड़े जम्मों मामला सामिल हे।
अउ अब मौसम के हाल…
मौसम विभाग ह अवइया चौबीस घंटा के दौरान प्रदेस के एक-दू जघा म गरज-चमक के संग जोरदरहा बरसा होय अउ गाज गिरे के चेतावनी देहे। जोरदरहा बरसा बिलासपुर अउ सरगुजा संभाग के जिला म हो सकथे।
मौसम विभाग के मुताबिक एक ठिन द्रोणिका उत्तर-पूर्व अरब सागर ले दक्षिण तटीय गुजरात ले मध्यप्रदेस तक स्थित हे, जेखर सेति प्रदेस के कतकोन जघा हल्का ले मध्यम बरसा होय के संभावना हे।
अउ अब थोरकुन समाचार सार म –
– तेल विपणन कंपनी मन ह वाणिज्यिक एलपीजी गैस सिलेंडर के भाव म तीस रूपिया के कमी करे हे।
– वित्तमंत्री ओ.पी.चौधरी ह राज्य के सत्रह ठिन महाविद्यालय मन बर करीबन अस्सी करोड़ रूपिया के रासि मंजूर करे हे।
– केंद्रीय महिला अउ बालविकास मंत्री अन्नपूर्णा देवी ले आज नई दिल्ली म छत्तीसगढ़ के महिला अउ बाल विकास मंत्री लक्ष्मी राजवाड़े ह मिलिन।
– बलौदाबाजार कलेक्टर दीपक सोनी ह पुलिस प्रशासन ले मिले जांच रिपोर्ट के आधार उपर भाटापारा के रहइया सतीश डागोर ल एक साल बर जिला बदर कर देहे।
– नारायणपुर जिला के गांव नेलांगूर म पाछू रतिहा माओवादी मन ह एक झिन मनखे के हत्या कर दीन।
– जशपुर पुलिस ह नकली नोट के संग एक झिन आरोपी ल गिरफ्तार करे हे, उंखर तीर ले पचहत्तर हजार रूपिया ले जादा के नकली नोट जब्त करे हे।
अउ
– कोंडागांव जिला के केशकाल पुलिस ह दू झिन अंतर्राज्यीय गांजा तस्कर ल गिरफ्तार करके उंखर तीर ले बाईस किलोग्राम ले जादा के गांजा बरामद करे हे।