आज आकाशवाणी म मन की बात करीकरम म प्रधानमंत्री नरेंद्र मोदी ह देस के लोगन ले गोठबात करीन। प्रधानमंत्री ह लोकसभा चुनाव म संविधान अउ देस के लोकतांत्रिक प्रणाली म अपन विश्वास दोहराय बर देसवासी मनके आभार व्यक्त करीन। ओमन किहीन कि बछर दू हजार चौबीस के आम चुनाव दुनिया ेके सबले बड़े चुनाव रिहीस।
प्रधानमंत्री ह तीस जून के झारखंड म मनाय जाने वाला ‘हूल दिवस‘ के बारे म बताइन। श्री मोदी ह विश्व पर्यावरण दिवस म ए बछर सुरू करे गे विसेस अभियान- ‘एक पेड़ मां के नाम‘ के बारे म बतईन। ओमन ह लोगन ले अपन मां के संग या अपन मां के सुरता म एक ठन पेड़ लगाय के अपील करीन। प्रधानमंत्री ह किहीन कि पाछू दसक म भारत म वनक्षेत्र के विस्तार होइस अउ अमृत महोत्सव के दौरान देसभर म साठ हजार ले जादा अमृत सरोवर घलो बनाय गीस।
प्रधानमंत्री मोदी ह किहीन कि कुवैत सरकार ह अपन राष्ट्रीय रेडियो म हिंदी म एक ठन विसेस कारीकरम सुरू करे हे, एखर बर ओमन ह कुवैत सरकार अउ उंहा के लोगन ल धन्यवाद दीन। प्रधानमंत्री ह आकाशवाणी परिवार ल घलो बधई दीन कि आकाशवाणी के संस्कृत बुलेटिन ह आज अपन प्रसारण के पचास बछर पूरा करत हे।
प्रधानमंत्री ह आगू महिना पेरिस म सुरू होवईया ओलंपिक खेल बर भारतीय दल ल सुभकामना दीन हे। श्री मोदी ह किहीन कि ए हफ्ता के बाद रथयात्रा सुरू होने वाला हे। ओमन कामना करीन कि महाप्रभु जगन्नाथ के कृपा सबो देसवासी मन उपर बने राहय। ओमन ह अमरनाथ यात्रा अउ पंढरपुर वारी के बारे म घलो बताइन अउ ए यात्रा म सामिल होवइया सबो श्रध्दालु मन ल अपन सुभकामना दीन।
मन की बात-छत्तीसगढ़
प्रधानमंत्री के मन की बात कारीकरम ल देस संघरा छत्तीसगढ़ म घलो सुने गीस। मुख्यमंत्री विष्णुदेव साय ह आज रईपुर के शांति नगर के स्वदेसी भवन पहुंच के मन की बात कारीकरम ल सुनीन। मुख्यमंत्री ह किहीन कि प्रधानमंत्री ह मन की बात कारीकरम के माध्यम ले नवा जानकारी साझा करथे। श्री साय ह मन की बात कारीकरम के आज के प्रसारण के बारे म बतावत किहीन कि प्रधानमंत्री ह एक पेड़ मां के नाम अभियान म लोगन ले पेड़ लगाय के अपील करीन हे। श्री साय ह प्रदेस के जनता ले आग्रह करीन कि ओमन सबो झन अपन घर, बाड़ी, खेत अउ तीर-तखार म एक ठन पेड़ जरूर लगाय।
नये आपराधिक कानून
देस भर म तीन ठन नवा आपराधिक कानून- भारतीय न्याय संहिता, भारतीय नागरिक सुरक्षा अउ भारत साक्ष्य अधिनियम काली ले लागू हो जाही। केंद्र सरकार ह राज्य अउ केंद्रशासित प्रदेस के संग नियमित बइठका करीन हे अउ ए कानून मन ल लागू करे बर प्रौद्योगिकीय, क्षमता निर्माण अउ जागरूकता लाय बर ओमन ह तियार हे। ए संबंध म पुलिस अउ जांच अधिकारी मन ल प्रसिक्षण दे गे हवय। दूरदर्सन अउ आकाशवाणी के समाचार बुलेटिन, कारीकरम, चर्चा अउ सोसल मीडिया प्लेटफार्म के माध्यम ले ए बिसय उपर चर्चा अउ विष्लेसन करे गेहे। जन-जागरूकता अभियान, संवाद कारीकरम, सूचनात्मक वेबसाइट अउ मंत्री स्तर के वेबिनार घलो कराय गीस। एखर अलावा सैक्षणिक संस्थान मन म पाठ्यक्रम मॉड्यूल ल जरूरी रूप ले सामिल करे गीस।
कैग-स्वास्थ्य विभाग रिपोर्ट
प्रधान महालेखाकार- कैग के ऑडिट रिपोर्ट के प्राथमिक जांच म छत्तीसगढ़ म पूर्व के कांग्रेस सरकार के बेरा स्वास्थ्य विभाग म स्वास्थ्य उपकरण खरीदी म छै सौ साठ करोड़ रूपिया के घोटाला के मामला आगू आय हे। एखर सेति प्रधान महालेखाकार यशवंत कुमार ह स्वास्थ्य विभाग के अपर प्रमुख सचिव मनोज कुमार पिंगुआ ल पत्र लिखिन हे। महालेखाकार डहार ले स्वास्थ्य विभाग ल लिखेगे पत्र के बाद स्वास्थ्य मंत्री श्याम बिहारी जायसवाल ह जांच के निरदेस दीन हे। ओमन किहीन कि सरकार ह चार ले पांच आईएएस अधिकारी मनके जांच दल बनाय हे। जल्दीच रिपोर्ट के आधार म कार्रवाई करे जाही।
नारद जयंती समारोह
राजधानी रईपुर के संस्कृति भवन ऑडिटोरियम म काली नारद जयंती के मउका म देवर्षि नारद पत्रकारिता सम्मान समारोह के आयोजन करे गीस। ए मउका म पत्रकारिता के क्षेत्र म काम करईया आने-आने संस्था के पत्रकार मनके सम्मान करे गीस। डॉक्टर अवधेश मिश्रा ल देवर्षि नारद सम्मान, वरिष्ठ छायाकार भूपेश केशरवाणी ल स्वर्गीय रमेश नैयर सम्मान अउ वरिष्ठ पत्रकार भोलाराम सिन्हा ल स्वर्गीय बबनप्रसाद मिश्र सम्मान ले पुरस्कृत करे गीस।
नगरीय निकाय-प्री ऑडिट
उप मुख्यमंत्री अरूण साव ह नगरीय निकाय म वित्तीय अनुसासन म कसावट लाय बर आय-व्यय के प्री-ऑडिट के निरदेस दीन हे। ओमन पाछू सरकार डहार ले ऑडिट प्रक्रिया बंद कराय के सेति पाछू चार बछर के पोस्ट-ऑडिट कराय बर किहीन हे। श्री साव ह प्रदेस के सब्बो एक सौ चौरासी नगरीय निकाय के संगेच नगरीय प्रशासन अउ विकास विभाग के यांत्रिकी प्रकोष्ठ अउ राज्य सहरी विकास अभिकरण के घलो ऑडिट कराय के निरदेस दीन हे। उप मुख्यमंत्री ह नगरीय निकाय म प्री-अंकेक्षण-सह -आंतरिक अंकेक्षण के प्रक्रिया ल फेर सुरू करे बर किहीन हे।
दुर्घटना
बिलासपुर जिला के तोरवा थाना क्षेत्र के लाल खदान ओवरब्रिज तीर आज मंझनिया एक ठन यात्री बस पलटगे ए हादसा म एक झन नोनी के मउत होगे अउ पचीस ले तीस यात्री मन घायल होगे हे, जउन मन ल ईलाज बर अस्पताल म भर्ती कराय गेहे। बताय जात हवय कि बस म करीबन तीस ले चालिस यात्री बइठे रिहीन अउ बस ह बिलासपुर ले शिवरीनारायण जावत रिहीस। ए दौरान लाल खदान ओवरब्रिज तीर फटफटी सवार ल बचाय के परयास म बस ह खंभा ले टकरा के पलट गीस।
मुख्यमंत्री-शिविर
मुख्यमंत्री विष्णुदेव साय ह आज रईपुर के जैन दादा बाड़ी म नारायण सेवा संस्थान डहार ले राखेगे निसुल्क नारायण लिम्ब अउ कैलिपर्स फिटमेंट सिविर म सामिल होइन। एमा प्रदेस के आने-आने जिला ले आय साढ़े सात सौ ले जादा दिव्यांगजन, जउन मन ह दुर्घटना म अपन हाथ-गोड़ गंवाय हे, या चले फिरे म असमर्थ हे, अइसन जरूरतमंद लोगन ल अपर-लोवर लिंब कैलिपर्स लगाय गीस। कारीकरम म मुख्यमंत्री ह किहीन कि राजस्थान ले चलके छत्तीसगढ़ के दिव्यांग मनके मदद बर आगू आय ए संस्था के मैं अभिनंदन करथंव। ओमन ह राज्य सरकार डहार ले दिव्यांग मनके मदद बर हरसंभव मदद के भरोसा संस्थान ल देवाइन।
उपमुख्यमंत्री-श्रध्दालु स्वागत
उपमुख्यमंत्री विजय शर्मा ह आज कवर्धा म अयोध्या अउ काशी विश्वनाथ के यात्रा ले लहुटे श्रध्दालु मनके सुवागत करीन। ए मउका म श्री शर्मा ह किहीन कि हमर बर ए गर्व के बात हे कि हमन प्रदेस के श्रध्दालु मन ल श्री रामलला के दर्सन बर शासकीय मदद देवत हवन। मुख्यमंत्री विष्णुदेव साय के अगुवई म श्री रामलला दर्सन योजना चलत हे अउ हमन ल प्रधानमंत्री नरेंद्र मोदी के गारंटी ल पूरा करे म घलो सफलता मिलत हे।
खबर के मुताबिक छब्बीस जून के कबीरधाम जिला के जनपद पंचायत अउ नगरीय निकाय क्षेत्र के इकहत्तर श्रध्दालू मन अयोध्या अउ काशी विश्वनाथ यात्रा बर रवाना होय रिहीन।
टी-ट्वेंटी विश्व कप
भारत दूसर घांव आईसीसी टी-ट्वेंटी क्रिकेट विश्व कप के खिताब जीत ले हवय। बारबाडोस म काली रतिहा खेले गे फाइनल मुकाबला म भारत ह दक्षिण अफ्रीका ल सात रन ले हरा दीस। पहिली बल्लेबाजी करत भारत ह विराट कोहली के छिहत्तर अउ अक्षय पटेल के सैंतालिस रन कबदौलत निर्धारित बीस ओवर म सात विकेट म एक सौ छिहत्तर रन बनाइन। ए सौ सतहत्तर रन के लक्ष्य के पीछा करत दक्षिण अफ्रीका ह हेनरिक क्लासेन के बावन रन के मदद ले आठ विकेट म एक सौ उनहत्तर रन बनाइस। भारत बर हार्दिक पंड्या ह तीन अउ अर्शदीप सिंह अउ जसप्रीत बुमराह ह दो-दो विकेट हासिल करीन।
विराट कोहली ल उंखर सानदार पारी बर ‘‘प्लेयर ऑफ द मैच‘ के पुरस्कार दे गीस अउ तेज गेंदबाज जसप्रीत बुमराह ल आठ मैच म पंद्रह विकेट लेबर प्लेयर ऑफ द टूर्नामेंट ले सम्मानित करे गीस।
राष्ट्रपति द्रौपदी मुर्मू, उप राष्ट्रपति जगदीप धनखड़, प्रधानमंत्री नरेंद्र मोदी अउ छत्तीसगढ़ के मुख्यमंत्री विष्णुदेव साय ह टी-ट्वेंटी विश्व कप जीते बर भारतीय टीम ल बधई दीन हे।
प्रधानमंत्री ह किहीन कि देस ल भारतीय टीम उपर गर्व हे। ओमन किहीन कि ए मैच ऐतिहासिक रिहीस।