आज रईपुर म केंद्रीय गृह मंत्रालय अउ राज्य शासन के वरिष्ठ अधिकारी मनके मौजूदगी म यूनिफाईड कमाण्ड बइठका आयोजित करे गीस। बइठका म मुख्यमंत्री विष्णुदेव साय ह किहीन कि छत्तीसगढ़ म माओवादी गतिविधि कमी आवत हे। ओमन किहीन कि राज्य म केंद्रीय सुरक्षा बल अउ छत्तीसगढ़ पुलिस डहार ले बने तालमेल के साथ माओवादी मनके खिलाफ चलाय जावत संयुक्त अभियान के सेति, ए काम संभव हो सकत हे। माओवादी मनके खिलाफ चलत अभियान के संगेच शासन के ए योजना नियद नेल्लानार म विकास काम म घलो तेजी आवत हे।
बइठका म माओवाद प्रभावित क्षेत्र म तैनात केंद्रीय अउ राज्य के सुरक्षाबल के जवान मनके समस्या उपर घलो चर्चा करे रिहीस। छत्तीसगढ़ के सीमा ले लगे राज्य-महाराष्ट्र, तेलांगाना, आंध्रप्रदेस अउ ओडिशा के संग समन्वय, सीमावर्ती क्षेत्र म संयुक्त कार्रवाई अउ संपर्क मार्ग म सुरक्षाबल डहार ले निगरानी के निरदेस दे गीस। एखर अलावा सीमावर्ती ले लगे राज्य मन संग जानकारी साझा करे जाय उपर जोर दे गीस। मुख्यमंत्री ह माओवाद प्रभावित क्षेत्र म सड़क, पुल-पुलिया अउ दूसर सरकारी निर्माण काम ल देगे बेरा म पूरा करे के निरदेस दे गीस।
बइठका म उप मुख्यमंत्री अउ गृहमंत्री विजय शर्मा, मुख्य सचिव अमिताभ जैन, पुलिस महानिदेसक अशोक जुनेजा संग केंद्रीय गृह मंत्रालय अउ राज्य शासन बड़े अधिकारी मन मौजूद रिहीन।
मुख्यमंत्री रामभक्त सम्मानित
मुख्यमंत्री विष्णुदेव साय ह अयोध्या म श्रध्दालु मनके सेवा करके लहुटे छत्तीसगढ़ के सब्बो रामसेवक मनके अपन निवास म स्वागत करीन। मुख्यमंत्री ह ओमन ल सॉल, श्रीफल अउ भगवान राम के मूर्ति भेंट करके सम्मानित करीन अउ उंखर संग भोजन करीन।
निलंबन
लोक स्वास्थ्य यांत्रिकी विभाग ह जल-जीवन मिसन के काम म लापरवाही बरते के आरोप म बलरामपुर ब्लाक के प्रभारी, कार्यपालन अभियंता आदित्य प्रताप ल हटा दे हवय। विभागीय समीक्षा बइठका के बाद लोक स्वास्थ्य यांत्रिकी विभाग के प्रमुख अभियंता ह ए संबंध म आदेस जारी करीन हे। आदित्य प्रताप ल अवइया आदेस तक बिलासपुर परिक्षेत्र के मुख्य अभियंता कार्यालय म कार्य करे के निरदेस देगे हवय। उंखर जघा म लोक स्वास्थ्य यांत्रिकी मंडल अंबिकापुर के सहायक अभियंता सुशील कुमार सिन्हा ल बलरामपुर खंड के कार्यपालन अभियंता के प्रभार सौंपे गे हवय।
उहें, कोरिया जिला चिकित्सालय म पदस्थ अस्थि रोग विशेषज्ञ अउ प्रभारी सिविल सर्जन सह मुख्य अस्पताल अधीक्षक डॉक्टर राजेन्द्र बंसारिया ल निलंबित कर दे गेहे। आरोप हे कि डॉक्टर बंसारिया ह एक झन मरीज के ऑपरेसन करे के एवज म रासि के मांग करे रिहीन। श्री बंसारिया ल सरगुजा संभाग के अंबिकापुर मुख्यालय कार्यालय म अटैच करे गेहे।
मन की बात
प्रधानमंत्री नरेंद्र मोदी ईतवार तीस जून के बिहनिया ग्यारह बजे ले आकाशवाणी ले ‘‘मन की बात‘‘ कारीकरम म देस-विदेस म लोगन संग अपन बिचार साझा करही। रेडियो कारीकरम के ए ह एक सौ ग्यारहवां कड़ी होही। श्री मोदी के तीसरइया घांव प्रधानमंत्री पद संभाले के बाद ए ह मन की बात के पहला कारीकरम होही। जेला आकाशवाणी के जम्मों नेटवर्क, ए आई न्यूज वेबसाइट अउ न्यूज ऑन ए आई आर मोबाइल ऐप म प्रसारित करे जाही।
नगरीय प्रशासन विभाग-राशि
नगरीय प्रशासन अउ विकास विभाग ह प्रदेस के एक सौ छैंसठ नगरीय निकाय मन ल चुंगी क्षतिपूर्ति मद म अट्ठाईस करोड़ सोलह लाख पचीस हजार रूपिया दे हवय। विभाग डहार ले राज्य के चौदह ठन नगर-निगम ल दस करोड़ बारह लाख पचास हजार रूपिया, चौवालिस ठन नगर-पालिका ल आठ करोड़ सत्तर लाख रूपिया अउ एक सौ आठ नगर पंचायत ल नौ करोड़ तैंतीस लाख पचहत्तर हजार रूपिया जारी करे गेहे। खबर के मुताबिक नगरीय निकाय के पाछू वित्तीय बछर बर चुंगी क्षतिपूर्ति मद म महापौर अउ अध्यक्ष निधि के बांकी पचास प्रतिसत रासि ल जारी करे गेहे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत एक जुलाई ले प्रभावी होवइया तीन ठन नवा आपराधिक कानून उपर सहायक अभियोजन अधिकारी शुभम तोमर ले लेगे भेंटवार्ता प्रसारित करे जाही। ए कारीकरम के दूसरइया कड़ी आकाशवाणी केन्द्र रायपुर डहार ले काली उनतीस जून के बिहनिया साढ़े दस बजे ले प्रसारित करे जाही। एला छत्तीसगढ़ के जम्मों आकाशवाणी केन्द्र मन एके संगरा रिले करही।
उत्कर्ष-भविष्य का निर्माण कार्यक्रम
रायगढ़ के नगर-निगम ऑडिटोरियम म ‘‘उत्कर्ष-भविष्य का निर्माण‘‘ कारीकरम अउ प्रतिभा सम्मान समारोह के आयोजन करे गीस। कारीकरम म वित्तमंत्री ओ.पी.चौधरी ह किहीन कि लइका मन म कौसल के विकास होही त, ओमन ल कामयाबी जरूर मिलही। श्री चौधरी ह करियर कॉउंसिलिंग के बेरा लइका मन ल सलाह घलो दीन।
कृषि विज्ञान केंद्र-कार्यशाला
रईपुर के कृषि महाविद्यालय म आज ले छत्तीसगढ़-मध्यप्रदेस के कृषि विज्ञान केंद्र के इकतीसवां क्षेत्रीय कार्यसाला के सुरूआत होइस। जेखर सुभारंभ कृषिमंत्री रामविचार नेताम ह करीन। कारीकरम म ओमन किहीन कि देस म कृषि अउ उद्यानिकी के विकास म वैज्ञानिक मनके बड़े योगदान हवय। ओमन किहीन कि कृषि वैज्ञानिक मन ल नवा तकनीक अउ दलहन-तिलहन के अलावा मिलेट्स फसल के खोज करके ओखर उत्पादन म बढ़ोत्तरी करे के दिसा म काम करना चाही। ए मउका म श्री नेता ह कृषि विज्ञान केंद्र डहार ले लगाय गे प्रदर्सनीय के अवलोकन करीन अउ पत्रिका के विमोचन करीन।
एसीबी पटवारी-गिरफ्तार
खैरागढ़ जिला के प्रकाशपुर के पटवारी विवेक परघनिहा ल एंटी करप्सन ब्यूरो -एसीबी के टीम ह रिस्वत लेवत रंगे हाथों पकड़े हे। ए कार्रवाई ल एक झन किसान के सिकायत म करे गीस। आरोपी पटवारी ल खैरागढ़ के व्यवहार न्यायालय म पेस करे गीस।
उहें, जांजगीर-चांपा जिला के पामगढ़ क्षेत्र के पनगांव म पटवारी विजय लहरे ल तीन हजार पांच सौ रूपिया रिस्वत लेवत बिलासपुर एसीबी के टीम ह गिरफ्तार करे हे। मिले जानकारी के अनुसार एक झन किसान ले पटवारी ह नक्सा बनवाय के नांव म रिस्वत मांगत रिहीस।
पीबी शब्द पोर्टल
प्रसार भारती डहार ले मीडिया बर ‘‘शब्द सेवा पोर्टल‘‘ लांच करे गेहे। ए पोर्टल म ऑडियो, वीडियो, टेक्स्ट, फोटोग्राफ रूप म दैनिक समाचार प्रिंट टेलीवीजन अउ डिजीटल मीडिया ले सेयर करे जावत हे।
खबर के मुताबिक प्रभार भारती के रिपोर्टर, संवाददाता अउ स्ट्रींगर मन डहार ले चलइया ए सेवा भारत के आने-आने जघा म समाचार देवत हे। ए पोर्टल सब्बो भारतीय भाखा म अउ पचास ठन समाचार श्रेणी म निसुल्क उपलब्ध हे। सेवा ले जुड़े नियम अउ सर्त या कोनो भी प्रकार के दूसर जानकारी बर ई-मेल -पीबी शब्द एट द रेट प्रसार भारती डॉट जीओवी डॉट इन म संपर्क करे जा सकत हे।
फास्ट चार्जिंग स्टेशन
राजधानी रईपुर के पांच ठन जघा म इलेक्ट्रिक वाहन बर फास्ट चार्जिंग स्टेसन लगाय जाही। ए संबंध म आज नगर-निगम रईपुर अउ इंडियन ऑयल कॉर्पोरेसन लिमिटेड के बीच एमओयू म हस्ताक्षर करे गीस। एमा राजधानी रईपुर के पांच ठन प्रमुख जघा-सुभाष स्टेडियम परिसर, पुराना स्मार्ट सिटी ऑफिस परिसर, गांधी उद्यान, अनुपम गार्डन अउ जवाहर बाजार पार्किंग म आईओसीएल डहार ले फास्ट चार्जिंग स्टेसन बनाय जाही। जेखर ले गाड़ी मन ल चार्ज करे जा सकही।
नये आपराधिक कानून
देसभर म एक जुलाई ले तीन नवा आपराधिक कानून लागू होही। इही कड़ी म रईपुर जिला अउ सत्र न्यायालय म आज नवा कानून बर एक दिवसीय कार्यसाला के आयोजन करे गीस।
उहें, बस्तर जिला के तोकापाल जनपद पंचायत के गांव करंजी म भी आज केंद्रीय संचार ब्यूरो, क्षेत्रीय कार्यालय जगदलपुर डहार ले तीन नवा आपराधिक कानून म एक कारीकरम के आयोजन करे गीस।
अउ अब मौसम के हाल…
मौसम विभाग के अनुसार एक ठन निम्न दाब के क्षेत्र उत्तर-पश्चिम बंगाल के खाड़ी अउ ओखर ले लगे पश्चिम मध्य बंगाल के खाड़ी के उपर मौजूद हे। संगेसंग एक ठन द्रोणिका उत्तर पूर्व राजस्थान ले निम्नदाब के केंद्र तक फैले हे। एखर असर ले काली प्रदेस के कुछेक जघा म बरसा हो सकत हे। उहें, अधिकांश जघा म हल्का ले मध्यम बरसा होय के अउ गरज-चमक के संग छींटा पड़े के संभावना हे। एखर अलावा एक-दू जघा म आकाशीय बिजली गिरे के अउ अंधड़ चले के संभावना हे। मौसम विभाग ह काली मध्य छत्तीसगढ़ म भारी बरसा होय के चेतावनी घलो देहे।