राष्ट्रपति द्रौपदी मुर्मू ह किहीन हे कि सरकार पेपर लीक के निष्पक्ष जांच अउ दोसी मन बर कड़ा सजा सुनिश्चित करे बर प्रतिबद्ध हे। ओमन किहीन कि सरकार परीक्षा- संबंधित निकाय, उंखर कामकाज अउ परीक्षा प्रक्रिया के जम्मों पहलु बर सुधार के दिसा म काम करत हे। राष्ट्रपति ह किहीन कि चाहे प्रतियोगी परीक्षा हो या सरकारी भर्ती के प्रक्रिया जम्मों म पूरा पारदर्सिता अउ ईमानदारी के जरूरत हे।
ओति, केन्द्रीय अन्वेषण ब्यूरो-सीबीआई ह नीट-यूजी परीक्षा म कथित गड़बड़ी के संबंध म दू झिन मनखे ल गिरफ्तार करे हे। अधिकारिक सूत्र ह बतईन कि ए दूनों आरोपी मन ल बिहार के पटना ले हिरासत म ले गीस। नीट-यूजी प्रश्न पत्र लीक मामला के आधिकारिक तौर म सीबीआई जांच करत हे।
जनदर्शन कार्यक्रम
मुख्यमंत्री विष्णुदेव साय के पहिली साप्ताहिक ‘‘जनदर्शन‘‘ कार्यक्रम आज राजधानी रायपुर स्थित मुख्यमंत्री निवास कार्यालय म राखे गीस। ए दउरान प्रदेसभर ले आय मनखे मन मुख्यमंत्री ले भेंट करके अपन समस्या अउ अपेक्षा ले ओमन ल अवगत करईन। मुख्यमंत्री ह लोगन मन ल आश्वस्त करीन कि जनदर्शन म मिले आवेदन मनके जल्दीच निपटारा करे जाही।
जनदर्शन कार्यक्रम म मुख्यमंत्री ले भेंट बर बड़ संख्या म माईलोगिन घलो आय रिहीन। ओमन मुख्यमंत्री ल प्रदेस म महतारी वंदन योजना सुरू करे बर बधाई दीन अउ किहीन कि ए योजना ले मिलइया पइसा ले ओमन ल अपन जरूरत के काम ल पूरा करे म मदद मिले हे। ए दउरान मुख्यमंत्री ले दिव्यांगजन मन ह भेंट करके अपन परेसानी ल बतावत सहायक उपकरण के मांग करीन। एमा मुख्यमंत्री ह दिव्यांगजन मन ल मउकाच म व्हीलचेयर, मोटराइज्ड ट्रायसायकिल, कृत्रिम पैर, बैटरी चलित साइकिल समेत आने-आने सहायक उपकरण दीन।
जनदर्शन कार्यक्रम म आने-आने संगठन मनके प्रतिनिधिमंडल मन ह घलो मुख्यमंत्री ले भेंट करके ओमन ल ज्ञापन सौंपीन।
खबर के मुताबिक मुख्यमंत्री श्री साय जनदर्शन कारीकरम के माध्यम ले हरेक बिरस्पत के बिहनिया ग्यारह बजे ले मंझनिया एक बजे तक आम लोगन ले भेंट करही। जनदर्शन कार्यक्रम म मुख्यमंत्री के आगू दे गे आवेदन मन ल पंजीबद्ध करे के संगेसंग एला जनदर्शन पोर्टल म अपलोड करे जाही। ए पोर्टल म दरज आवेदन के मॉनिटरिंग सीधा मुख्यमंत्री करही। आम जनता ले मिले आवेदन के निराकरण संबंधित विभाग डहार ले समय-सीमा म करके एखर जानकारी आवेदक मन ल दे जाही।
मुख्य न्यायाधीश-आवास लोकार्पण
छत्तीसगढ़ उच्च न्यायालय के मुख्य न्यायाधीश रमेश सिन्हा ह कांकेर जिला के सिंगारभाट अउ पखांजूर म न्यायिक कर्मचारी मन बर नवा बने आवास गृह के वीडियो कॉन्फ्रेंसिंग के माध्यम ले लोकार्पण करीन। ए मउका म मुख्य न्यायाधीश ह किहीन कि राज्य के न्यायालय के बुनियादी ढांचा प्रदान करे के पहल करे गेहे। इही कड़ी म ए लोकार्पण होवत हे। ओमन किहीन कि जिला मजिस्ट्रेट ए सुनिश्चित करे कि नवा बने न्यायिक आवासीय मकान म जम्मों जरूरी सुविधा राहय।
निर्वाचन आयोग-तैयारी
छत्तीसगढ़ राज्य निर्वाचन आयुक्त अजय सिंह ह अवइया नगरीय निकाय अउ त्रिस्तरीय पंचायत चुनाव के तैयारी ल लेके आज अधिकारी मनके बइठका लीन। बइठका म ओमन वार्ड परिसीमन के प्रक्रिया के संबंध म चर्चा करत अधिकारी मन ल समय-सीमा के भीतर परिसीमन के काम ल पूरा करे के निर्देश दीन। श्री सिंह ह बइठका के दउरान मतदाता सूची के संगेसंग मतदान केन्द्र अउ मतदानकर्मी मनके जरूरत ल लेके जरूरी तैयारी सुनिश्चित करे उपर जोर दीन।
पीडब्ल्यूडी-दिशा/निर्देश
राज्य सरकार ह लोक निर्माण के काम म तेजी लाय अउ समय-सीमा म काम पूरा करे बर निविदा ल लेके नवा दिसा-निरदेस जारी करे हे। ए बारे म लोक निर्माण विभाग डहार ले प्रमुख अभियंता अउ जम्मों कार्यपालन अभियंता मन ल परिपत्र जारी करे गेहे। जारी परिपत्र म केहे गेहे कि निविदा आमंत्रण के पहिली कार्यपालन अभियंता ल ए प्रमाणित करना होही कि रद्दा निर्माण बर सड़क के प्रस्तावित कुल लंबाई के नब्बे प्रतिसत लंबाई बिना अड़चन के हे। विभाग ह भवन निर्माण बर सौ प्रतिसत व्यवधानरहित भूमि उपलब्ध होय के बादे निविदा आमंत्रण के कार्यवाही करे के निरदेस दीन हे। परिपत्र म केहे गेहे कि सेतु काम के पहुंच मार्ग बर नब्बे प्रतिसत लंबाई बाधारहित होय म ही निविदा आमंत्रण के कार्यवाही करे जाय।
श्रमिक राशि स्वीकृत
श्रम विभाग के कल्याणकारी योजना के तहत राज्य के चवालीस हजार ले जादा श्रमिक परिवार मनके खाता म उनतीस करोड़ रूपिया ले जादा के रासि जारी करे जाही। एखर बर विभाग डहार ले रासि मंजूर कर दे गेहे।
श्रम मंत्री लखनलाल देवांगन ह अधिकारी मन ल निर्देसित करे रिहीन कि विभाग के अलग-अलग छह योजना के लाभ पात्र हितग्राही मन ल मिलय। इही कड़ी म महतारी जतन योजना के तहत प्रदेस के पंजीकृत छह हजार ले जादा महिला श्रमिक मनके खाता म बीस-बीस हजार रूपिया के रासि दे जाही। अइसने, प्रदेस के श्रमिक परिवार के लइका मनके ड्रेस, पुस्तक अउ कॉपी खरीदे बर रासि मंजूर करे गेहे। नौनिहाल छात्रवृत्ति योजना के तहत ए साल प्राथमिक ले लेके उच्च सिक्षा बर सोलह हजार श्रमिक मनके लइका मन ल छात्रवृत्ति मिलही।
गरियाबंद-डायलिसिस यूनिट
स्वास्थ्य मंत्री श्याम बिहारी जायसवाल ह काली गरियाबंद के कोविड अस्पताल म बनाय गे जिला के किडनी पीड़ित मरीज बर दस बिस्तर के डायलिसिस यूनिट के सुभारंभ करीन। एखरे संग श्री जायसवाल ह सुपेबेड़ा के मरीज मन बर एक एंबुलेंस ल हरा झंडा दिखाके रवाना करीन। ए दउरान ओमन अस्पताल म बनाय गे प्रयोगसाला रूम समेत आने-आने वार्ड मनके निरीक्षण करीन। ए मउका म ओमन किहीन कि जल्दीच सुपेबेड़ा म दू ठिन नवा डायलिसिस केन्द्र के स्थापना करे जाही। श्री जायसवाल ह बतईन कि तेल नदी ले पानी के सप्लाई करके ओला फिल्टर प्लांट के माध्यम ले सुद्ध करके गांव म हरेक घर तक पानी पहुंचाय के काम करे जाही।
कृषि-कार्यशाला
रायपुर के इंदिरा गांधी कृषि विश्वविद्यालय म काली अट्ठाईस जून ले तीन दिन के छत्तीसगढ़ अउ मध्यप्रदेश के कृषि विज्ञान केन्द्र के इकतीसवां क्षेत्रीय कार्यशाला के आयोजन करे जाही। कार्यक्रम के सुभारंभ कृषि मंत्री रामविचार नेताम ह करही। उहें, कार्यक्रम के अध्यक्षता विश्वविद्यालय के कुलपति डॉक्टर गिरीश चंदेल करही। ए कार्यशाला इंदिरा गांधी कृषि विश्वविद्यालय रायपुर अउ भारतीय कृषि अनुसंधान परिषद-कृषि प्रौद्योगिकी अनुप्रयोग अनुसंधान संस्थान जबलपुर के सामलात तत्वावधान म राखे जाही।
शिक्षक-कार्रवाई
बिलासपुर जिला म जिला सिक्षा अधिकारी टी.आर. साहू ह स्कूल ले लंबा समय ले अनुपस्थित पांच झिन सिक्षक मन ल बर्खास्त कर देहे। उहें, ग्यारह सिक्षक मनके खिलाफ सेवा समाप्त के अनुशंसा करे गेहे। एखर अलावा नौ सिक्षक मनके खिलाफ विभागीय जांच के आदेस दे गेहे।
जवान-खुदकुशी प्रयास
बीजापुर जिला म स्थित सीएएफ कैम्प रामपुरम म एक जवान ह सर्विस रायफल ले खुद ल गोली मारे लेहे। ए हादसा म जवान घायल होगे हे। ओला भोपालपट्टनम के सामुदायिक स्वास्थ्य केन्द्र लाय गीस, जिहां प्राथमिक इलाज के बाद सुघ्घर इलाज बर जिला अस्पताल रिफर करे गेहे। फिलहाल जवान के हालत खतरा ले बाहिर बताय गेहे। घायल जवान मनोज दिनकर जांजगीर-चांपा जिला के गांव भोगांव के रहवइया हरय।
अउ अब थोरकुन समाचार सार म –
– बीजापुर जिला म पुलिस ह भैरमगढ़ थाना क्षेत्र ले सात माओवादी मन ल गिरफ्तार करे हे। एमा ले दू झिन माओवादी उपर एक-एक लाख रूपिया के इनाम घोसित रिहीस।
– कोयला घोटाला म गिरफ्तार निलंबित उप सचिव सौम्या चौरसिया के जमानत याचिका ल प्रथम एडीजे न्यायालय ह खारिज कर देहे।
– राज्यपाल विश्वभूषण हरिचंदन ले आज राजभवन म एरिया पैरा आर्म रेसलिंग चैंपियनशिप म स्वर्ण पदक विजेता श्रीमंत झा ह भेंट करीन।
– उहें, राज्यपाल ले छत्तीसगढ़ भारतीय शिक्षण मंडल के अध्यक्ष डॉक्टर राजेन्द्र लकपाले के अगुवई म एक प्रतिनिधिमंडल ह घलो सौजन्य भेंट करीन।
– राजधानी रायपुर स्थित खादी ग्रामोद्योग कार्यालय म आज मंझनिया बाद अचानक आगी लग गे। खबर मिलतेच जिला प्रसासन अउ दमकल के टीम मउका म पहुंचीन अउ आगी म काबू पईस। ए घटना म कोनों भी जनहानि के होय के सूचना नइ हे।
अउ
– राजनांदगांव जिला म डायरिया ले बचाव बर अवइया एक जुलाई ले विशेष पखवाड़ा सुरू होही। ए दउरान लोगन मन ल मौसमी बीमारी ले बचाव बर जागरूक करे जाही।